Vishnudharmottara Purana · Chapter 3.156.160

3.156
mārkaṇḍeya uvāca //
athātaḥ saṃpravakṣyāmi ṣaṇmūrterarcanaṃ tava //
vasante pūjayennityaṃ dvau māsau madhumādhavau

phalaiḥ puṣpaiḥ kaṣāyaistu grīṣmegrīṣme ca pūjayet //
madhureṇa mahārāja prāvṛṭkāle hite ca tam

amlena pūjayennityaṃ śaradaṃ lavaṇena ca//
baṭukena ca hemante tiktena śiśire tathā

naktāśanastathā tiṣṭhedṛtūktaṃ varjayedrasam //
brāhmaṇānbhojayeccātra ṛtūktaṃ rasabhojanam//

saṃvatsaramidaṃ kṛtvā vrataṃ paramapāvanam //
aśvamedhamavāpnoti rājasūyaṃ ca vindati

sarvānkāmānavāpnoti nātra kāryā vicāraṇā //
phalamakṣayyamāpnoti vratasyāsya narottama

caitrādathārabhya site ca ṣaṣṭhīṃ saṃpūjayedyo ṛtuṣaṭkamevam //
kṛtopavāsastu yathoktametatphalaṃ labhetpūrṇamitīdamuktam

iti śrīviṣṇudharmottare tṛtīyakhaṇḍe mārkaṇḍeyavajrasaṃvāde ṣaṇmūrtivratavarṇano nāma ṣaṭpañcāśaduttaraśatatamo'dhyāyaḥ

3.157
mārkaṇḍeya uvāca //
ataḥ paraṃ pravakṣyāmi saptamūrtivrataṃ tava //
caitramāsādathārabhya pratipatprabhṛti kramāt

/
subhāsvarā varhiṣado hyagniṣvāttāstathaiva ca //
kravyādānupahūtām̐śca ājyapāṃśca sukālinaḥ

pūjayetpratyahaṃ rājangandhamālyānulepanaiḥ //
naivedyaṃ kṛsaraṃ kuryāttilānagnau ca homayet

kṛsaraṃ bhojayedviprāṃstilāndadyācca dakṣiṇām //
naktāśanastathā tiṣṭheddhaviṣyāśī narādhipa

saṃvatsaramidaṃ kṛtvā vrataṃ puruṣasattama //
vratāvasāne dadyācca rajatasya palaṃ dvije

vratenānena cīrṇena sūryalokagatirbhavet //
tridaśaiḥ pūjyamānastu kāmacārī vihaṅgamaḥ

varṣaṃ samagraṃ puruṣastu kṛtvā saṃsāramokṣaṃ labhate narendra//
kṛtvā tathā dvādaśavatsarāṇi mānuṣyamāsādya mahīpatiḥ syāt

iti śrīviṣṇudharmottare tṛtīyakhaṇḍe mā० saṃvāde subhāsurādipitṛvratavarṇano nāma saptapañcāśaduttaraśatatamo'dhyāyaḥ

3.158
mārkaṇḍeya uvāca //
caitramāsādathārabhya kṛṣṇapakṣadine dine //
pātālapūjanaṃ kuryātpratipatprabhṛti kramāt

rukmabhaumaṃ tathā bhaumaṃ pātālaṃ nīlamṛttikam //
raktabhaumaṃ pītabhaumaṃ śvetakṛṣṇamṛdāvapi

suvarṇairgandhamālyaiśca naivedyena ca bhūriṇā //
ghṛtadīpapradānena vahnisantarpaṇena ca

evaṃ naktāśanaṃ kṛtvā vrataṃ saṃvatsaraṃ tadā //
vratāvasāne dadyācca dīpakaṃ dvijaveśmasu

sa tu vastrāṇi rājendra yathāvarṇāni cāpyatha //
vratametannaraḥ kṛtvā nṛṇāmadhipatirbhavet

patiṃ labhante nara devakanyāḥ śatasahasraśaḥ //
ramayanti mahārāja yathaiveḍaviḍastathā

kālena cāsādya manuṣyalokaṃ rājā bhavecchatrugaṇapramāthī//
balena rūpeṇa dhanena yukto mahāmatiḥ sarvajagatpradhānaḥ

iti śrīviṣṇudha० tṛ० khaṇḍe mā० saṃ० pātālānāṃ vratavarṇano nāmāṣṭapañcāśadadhikaśatatamo'dhyāyaḥ

3.159
mārkaṇḍeya uvāca //
athātaḥ saṃpravakṣyāmi saptadvīpavrataṃ śubham //
caitraśuklādathārabhya pratyahaṃ dinasaptakam

jambuśākakuśakrauñcaśālmalidvīpasaṃjñitam //
gomedaṃ puṣkaraṃ caiva pratyahaṃ pūjayetkramāt

nityameva tathā snānaṃ bahireva samācaret //
ghṛtena homaṃ kurvīta saptasasyaṃ ca dāpayet

ekamannaṃ tathā naktaṃ sakṛdeva samācaret //
adhaḥśāyī bhavennityaṃ taddeve divasatrayam

pūrṇe saṃvatsare dadyādrajatasya vinirmitam //
palānāntu śatenaiva saṃsthānaṃ dvīpavatkṛtam

vratametannaraḥ kṛtvā pūrṇaṃ saṃvatsaraṃ śuciḥ //
svargalokamavāpnoti yāvadābhūtasaṃplavam

mānuṣyamāsādya samastadvīpānbhunakti bhūmiṃ vijitāripakṣaḥ //
saṃpūjyamānastridaśaiḥ sadaiva maharṣibhirbrāhmaṇapuṅgavaiśca

iti śrīviṣṇudharmottare tṛ० kha० mārkaṇḍeyavajrasaṃvāde jambūdvīpādisaptadvīpavratavarṇano nāmaikonaṣaṣṭyuttaraśatatamo'dhyāyaḥ

3.160
mārkaṇḍeya uvāca //
athātaḥ saṃpravakṣyāmi samudravratameva te //
caitraśuklādathārabhya pratyahaṃ divasatrayam

lavaṇakṣīraājyaughadadhimaṇḍasurodakam //
tathaivekṣusurodaṃ ca svādūdaṃ caiva pūjayet

ācaretpratyahaṃ snānaṃ nityameva gṛhādbahiḥ //
ghṛtena homaṃ kurvīta saptasasyaṃ ca dāpayet

haviṣyāśī bhavennaktaṃ kuryātsaṃvatsaraṃ vratam //
saṃvatsarānte dadyācca tathā dhenuṃ payasvinīm

vratenānena cīrṇena saptasāgaramekhalām //
bhunakti vasudhāṃ rājā saptajanmāntarāṇi ca

ārogyakāmaḥ kurvīta vratametattathottamam //
dharmakāmo yaśaḥkāmaḥ śrīkāmaśca tathāparaḥ

maṅgalyametatparamaṃ pavitraṃ śrīvardhanaṃ dharmavivṛddhikāri //
kartavyametatprayatairmanuṣyairye rājyakāmāstu viśeṣatastaiḥ

iti śrīviṣṇudharmottare tṛ० kha० mārkaṇḍeyavajrasaṃvāde lavaṇasamudrādi saptasamudravratavarṇano nāma ṣaṣṭyuttaraśatatamo'dhyāyaḥ