Vishnudharmottara Purana · Chapter 3.146.150

3.146
mārkaṇḍeya uvāca //
idamanyatpravakṣyāmi caturmūrtivrataṃ tava //
vāsudevasya garuḍastālaḥ saṅkarṣaṇasya ca

pradyumnasya tathā cihnaṃ makaro vyāditānanaḥ//
devo'niruddho dharmajña ṛṣyaketuḥ prakīrtataḥ

pītaṃ nīlaṃ tathā śvetaṃ raktaṃ ca yadunandana//
teṣāṃ tu kathitaṃ vāsaḥ patākā tādṛgiṣyate

yasya devasya yaccihnaṃ sa cātmā nāma kīrtitaḥ //
patākā yādṛśī yasya vasanaṃ tasya tādṛśam

caitre tu pratyahaṃ māsi garuḍaṃ pūjayennaraḥ //
pītena gaṃdhanaivedyamālyavastrādinā dvijaḥ

vaiśākhe ca tathā māsi tālaṃ saṃpūjayetsadā //
nīlena gaṃdhanaivedyamālyavastrādinā dvijaḥ

ṛṣyaṃ saṃpūjayeddevaṃ māsyāṣāḍhe yathāvidhi //
raktena gandhanaivedyamālyavastrādinā dvijaḥ

/
bahiḥ snānaṃ tathā kuryādvahnisaṃpūjanaṃ tataḥ //
nityaṃ ca kuryāddharmajña tathā brāhmaṇatarpaṇam

prāṇayātrā tathā kuryāduktaṃ tailavivarjitam //
adhaḥśāyī tathā ca syād brahmacārī tathā bhavet

vratamettathā kuryānnityaṃ māsacatuṣṭayam //
brāhmaṇānpūjayecchaktyā cāṣāḍhacaramehani

vastrāṇyarthāni dharmajña dadyādvipreṣu dakṣiṇām //
kṛtvaikaṃ pāraṇaṃ rājansvargaloke mahīyate

dvitīyaṃ pāraṇaṃ kṛtvā śakraloke mahīyate //
tṛtīyaṃ pāraṇaṃ kṛtvā brahmaloke mahīyate

kṛtvā pāraṇaṣaṭkaṃ tu rudraloke mahīyate //
viṣṇulokamavāpnoti kṛtvā dvādaśapāraṇam

dhvajavrataṃ dvādaśavatsarāṇi kṛtvā naro bhārgavavaṃśamukhya //
sāyujyamāyāti janārdanasya devasya viṣṇoḥ parameśvarasya

iti śrīviṣṇudharmottare tṛtīyakhaṇḍe mārkaṇḍeyavajrasaṃvāde caturmūrtikalpe dhvajavratavarṇano nāma ṣaṭcatvāriṃśaduttaraśatatamo'dhyāyaḥ / १४६ //
3.147
mārkaṇḍeya uvāca //
idamanyatpravakṣyāmi caturmūrtivrataṃ tava //
īśānaṃ ca tathā vahniṃ virūpākṣaṃ samīraṇam

vijñeyaṃ yaduśārdūla devamūrticatuṣṭayam //
teṣāṃ tu rūpanirmāṇaṃ kṛtvā tānarcayedbudhaḥ

gandhamālyanamaskāradhūpadīpānnasaṃpadā //
caitraśukle mahābhāgaṃ pratipatprabhṛti kramāt

bhaumanādeyatāḍākasārasaiḥ snānamācaret //
dadhnā tilairyavairhomo ghṛtena ca tathā bhavet

karpūrakuṅkumaṃ caiva tathaivāgurucaṃdane //
brāhmaṇeṣu pradātavyaṃ tathā rājandina kramāta

dinatrayaṃ tathāśnīyātsāyaṃprātarayācitam //
dinamekaṃ tathāśnīyādbrahmacārī narottama

evaṃ saṃvatsaraṃ kṛtvā vrataṃ puruṣasattama //
sarvakāmasamṛddhasya yajñasya phalamaśnute

mānuṣyamāsādya bhavatyarogo vasundhareśo vijitāripakṣaḥ //
janmāntare syāddvijavaryamukhyo vedaprasakto bahuyajñayājī

iti śrīṣṇudharmottare tṛ० kha० mārkaṇḍeyavajrasaṃvāde caturmūrtikalpe devamūrtivratavarṇanonāma saptacatvāriṃśaduttaraśatatamo'dhyāyaḥ

3.148
mārkaṇḍeya uvāca //
idamanyatpravakṣyāmi caturmūrtivrataṃ tava //
śaṅkhacakragadāpadmaścaturātmā prakīrtitaḥ

vāsudevaḥ smṛtaḥ śaṅkhaścakraṃ saṃkarṣaṇastathā //
pradyumnaśca gadā padmamaniruddho jagadguruḥ

śrāvaṇādiṣu māseṣu bahiḥ snānastu bhaktabhuk //
teṣāṃ saṃpūjanaṃ kuryātpratimāsamataḥ kramāt

gandhamālya namaskāradhūpadīpānnasaṃpadā //
tatastu kārtikasyānte samāpte tu tathā vrate

brāhmaṇānbhojayedbhaktyā dadyācchaktyā ca dakṣiṇām //
kāṃsyapātraṃ ca saghṛtaṃ sasuvarṇaṃ tathaiva ca

kṛtvā vrataṃ māsacatuṣṭayaṃ tu prāpnoti lokaṃ tridaśeśvarasya//
mānuṣyamāsādya tatheha paścādvasundhareśo bhavatīha vīraḥ

iti śrīviṣṇudharmottare tṛtīyakhaṇḍe mārkaṇḍeyavajrasaṃvāde caturmūrtivratakalpe āyudhavratavarṇano nāmāṣṭācatvāriṃśaduttaraśatatamo'dhyāyaḥ

3.149
mārkaṇḍeya uvāca //
idamanyatpravakṣyāsi caturmūrtivrataṃ tava //
trirātropoṣitaḥ samyagvasante viṣuvaddine

pūjāṃ kṛtvā yathāśakti vāsudevasya śatruhan //
tato māsatrayaṃ nityaṃ vāsudevaṃ tu pūjayeta

tacca māsatrayaṃ tiṣṭhetphalāhāro vicakṣaṇaḥ //
tataḥ śāradamāsādya dharmajñaṃ viṣuvaddinam //

trirātropoṣitaḥ snātvā pradyumnaṃ pūjayetpriyam //
homaṃ kṛtvā tatośnīyāddattvā dānaṃ ca śaktitaḥ

prāṇayātrāṃ tu kurvīta yāvakena mahāmate//
vratāvasānamāsādya vāsantaṃ viṣuvaddinam //
brāhmaṇaṃ bhojayecchaktyā dadyādvipreṣu dakṣiṇām

kāñcanaṃ rajataṃ vastraṃ gāṃ ca yādavanandana //
etatsaṃvatsaraṃ kṛtvā vrataṃ nāma haripriyam

svargalokamavāpnoti bahukālamasaṃśayam //
tato'śvilokānprāpnoti vasulokaṃ tato dvijaḥ

viśveṣāṃ caiva devānāṃ tathaivāṅgirasāṃ dvijaḥ //
rudrāṇāmatha sādhyānāṃ bhṛgūṇāṃ savitustathā

marutāmapi dharmajña śiśirāṃśostathaiva ca //
prāpnoti devalokaṃ ca kāmacārī vihaṅgamaḥ

prāpnoti lokaṃ sa hutāśanasya śakrasya devasya tathā harasya //
lokaṃ samāsādya pitāmahasya tataḥ sa viṣṇoḥ puruṣaḥ prayāti

iti śrīviṣṇudharmottare tṛtīyakhaṇḍe mārkaṇḍeyavajrasaṃvāde caturmūrtivratakalpe phalāhāraharipriyavratavarṇano nāmaikonapañcāśaduttaraśatatamo'dhyāyaḥ

3.150
mārkaṇḍeya uvāca //
idamanyatpravakṣyāmi caturmūrtivrataṃ tava //
tasminneva vrate rājanmayā pūrvodite śubhe

viṣṇoḥ sthāne tvanantasya pūjā kāryā vijānatā //
tasya saṃpūjanaṃ kṛtvā mahīgaganavedhasām

dvitīyādiṣu kurvīta yathāvadvijitendriyaḥ //
anantaṃ pūjayedvidvānprathamehni yathāvidhi

vratametannaraḥ kṛtvā pūrṇaṃ saṃvatsaraṃ tataḥ//
viṣṇulokamavāpnoti yāvadindrāścaturdaśa

mānuṣyamāsādya bhavatyarogo jitendriyaḥ satyaparo vinītaḥ //
dhanena rūpeṇa sukhena yukto janābhirāmaḥ pramadāpriyaśca

iti śrīviṣṇudharmottare tṛtīyakhaṇḍe mārkaṇḍeyavajrasaṃvāde caturmūrtikalpe'nantatavarṇano nāma pañcāśaduttaraśatatamo'dhyāyaḥ