Vishnudharmottara Purana · Chapter 3.141.145

3.141
mārkaṇḍeya uvāca //
idamanyatpravakṣyāmi caturmūrtivrataṃ tava //
vidyākāmena kartavyaṃ nareṇa suvipaścitā

bahiḥ snānaṃ naraḥ kṛtvā kṛtaṛgvedapūjanaḥ //
ṛgvedaṃ śṛṇuyānnityaṃ māsamātramatandritaḥ

caitrādārabhya dharmajñaḥ nityaṃ naktāśano dvijaḥ //
yasmācchrutaṃ dvijāttasya jyeṣṭhasya caramehani

vāsoyugaṃ hiraṇyaṃ ca tathā dhenuṃ payasvinīma //
ghṛtapūrṇaṃ kāṃsyapātraṃ sahiraṇyaṃ ca dakṣiṇā

āṣāḍhādiṣu māseṣu yajurvedavrataṃ bhaveta //
āśvinādiṣu māseṣu sāmavedavrataṃ bhavet

tathā sarvavrataṃ nāma pauṣādiṣu vidhīyate //
sarveṣu sarvaṃ kartavyamṛgvedavratakīrtitam

vedātmano vāsudevasya pūjāṃ kṛtvā naro drādaśavatsarāṇi //
viṣṇolokaṃ yāti loke viśiṣṭaṃ yastaṃ prāptaḥ sarvaduḥkhaṃ jahāti

iti śrīviṣṇudharmottare tṛ० kha० mārkaṇḍeyavajrasaṃvāde pañcamacaturmūrtikalpe vedavrato nāmaikacatvāriṃśaduttaraśatatamo'dhyāyaḥ

3.142
mārkaṇḍeya uvāca //
idamanyatpravakṣyāmi caturmūrtivrataṃ tava //* caturvyūha
sarvātmanāṃ tu kartavyā yathā pūjā jagadguroḥ//
caitraśuklacaturthyāṃ tu sopavāso jitendriyaḥ

caturthyāṃ vāsudevasya kṛtvā saṃpūjanaṃ śubhama //
kāñcanaṃ dakṣiṇāṃ dadyāddvijāya brahmacāriṇe

tathā saṅkarṣaṇaṃ devaṃ pūjayitvā jagadgurum //
vaiśākhe tu gṛhasthāya dadyācchayyāṃ susaṃskṛtām

saṃpūjya devaṃ pradyumnaṃ jyeṣṭhe māsi yathāvidhi //
vanasthāya tathā dadyātphalamūlaṃ sagorasam

aniruddhaṃ tathāṣāḍhe pūjayitvā jagadgurum //
dadyādalābupātraṃ ca yogasthāya dvijātaye

ityevaṃ pāraṇaṃ proktaṃ svargaloke mahīyate //
dvitīye pāraṇe prāpte śakraloke mahīyate

sālokyamāyātyatha keśavasya prāpte tṛtīye tvatha pāraṇe ca //
ityāśramākhyaṃ vratamuttamaṃ te mayeti kalmaṣanāśakāri

iti śrīviṣṇudharmottare tṛtīyakhaṇḍe mārkaṇḍeyavajrasaṃvāde caturmūrtikalpe āśramavratavarṇano nāma dvicatvāriṃśaduttaraśatatamo'dhyāyaḥ

3.143
mārkaṇḍeya uvāca //
idamanyatpravakṣyāmi caturmūrtivrataṃ tava //
caturātmā hariḥ proktaścatvārastu hutāśanāḥ

āhitāgnirdvijo yasya vidyate'gnicatuṣṭayam //
sopavāsaścaturthyāṃ tu śuklapakṣasya phālgune

abhyarcya caturātmānaṃ vāsudevamatandritaḥ //
tasmai dadyāddvijendrāya tilaprasthāni ṣoḍaśa

suvarṇasya suvarṇaṃ ca vastraṃ ghṛtatulāmapi //
evaṃ saṃvatsaraṃ kṛtvā vratametadatandritaḥ

sarvakāmasamṛddhasya yajñasya phalamaśnute //
vimānenārkavarṇena svargalokaṃ ca gacchati

mānuṣo dīptatejāḥ syāddīptāgniḥ pramadāpriyaḥ //
ripūñjayati saṃgrāme dhanavāṃśca tathā bhavet

ye tvagnayo vai caturaḥ pradiṣṭāḥ sa vāsudevaḥ kathitaścaturdhā //
yaḥ pūjayedbrāhmaṇamāhitā'gniṃ devaḥ sa tenāpyatha pūjitaḥ syāt //

iti śrīviṣṇudharmottare tṛ० kha० mārkaṇḍeyavajrasaṃvāde saptamacaturmūrtikalpe agnivratavarṇano nāma tricatvāriṃśaduttaraśatatamo'dhyāyaḥ

3.144
mārkaṇḍeya uvāca //
idamanyatpravakṣyāmi caturmūrtivrataṃ tava //
caitraśuklasamārambhe prathame'hni pūjayeta

kṛtaṃ śuklena sarveṇa gandhamālyādinā dvijaḥ //
dvitīye'hani raktena tathā tretāṃ tu pūjayet

tṛtīye'hani pītena dvāparaṃ pūjayedbudhaḥ //
caturthe'hani kṛṣṇena tiṣyaṃ saṃpūjayedyugam

siddhārthakaiḥ kuṃkumena tathaiva ca haridrayā //
tathaivāmalakasnānamācareddivasakramāt

siddhārthakākṣatatilairghṛtena juhuyāttathā //
muktāphalaṃ tathā vajraṃ padmarāgaṃ ca yādava //

indranīlaṃ tathā dadyādvipreṣu divasakramāt //
kṣīreṇa prāṇayātrāṃ tu kuryātpratyahameva tu

kṛtvā vrataṃ vatsarametadekaṃ caturyugaṃ modati nākapṛṣṭhe //
saṃpūjya devaṃ yugamūrtisaṃjñaṃ caturyugaṃ śāsti mahīṃ samagrām

iti śrīviṣṇudharmottare tṛ० kha० mākaṇḍeyavajrasaṃvāde aṣṭamacaturmūrti kalpe caturyugavratavarṇano nāma catuścatvāriṃduttaraśatatamo'dhyāyaḥ

3.145
mārkaṇḍeya uvāca //
idamanyatpravakṣyāmi caturmūrtivrataṃ tava //
nityaṃ caturṣu māseṣu śrāvaṇādyeṣu yādava

catuḥsāgaracihnāni pūrṇakumbhāni pūjayeta //
caturātmā harirjñeyaḥ sāgarātmā vicakṣaṇaiḥ //
snānaṃ samācarennityaṃ nadītoyeṣu yādava

homaṃ ca pratyahaṃ kuryād gavyena payasā tathā //
tāni kumbhāni viprebhyaḥ pratyahaṃ vinivedayet

sopahārāṇi dharmajña bhaktyā śaktyā tathaiva ca //
naktaṃ ca prāśanaṃ kuryyātsatataṃ tailavarjitam

kārtikasyāvasāne'hni bhojayitvā dvijottamān //
dhenuṃ dattvā ca viprāya nākapṛṣṭhe mahīyate //
sarvakāmasamṛddhasya yajñasya phalamaśnute

mānuṣyamāsādya mahīpatiḥ syādbhuktvā mahīṃ sāgaramekhalāntām //
tatrāpi dharmasya patirniviṣṭo bhavatyarogaśca balena yuktaḥ

iti śrīviṣṇudharmottare tṛtīyakhaṇḍe mārkaṇḍeyavajrasaṃvāde viṣṇucaturmūrtikalpe sāgaravratavarṇano nāma pañcacatvāriṃśaduttaraśatatamo'dhyāyaḥ