Vishnudharmottara Purana · Chapter 3.131.135

3.131
// mārkaṇḍeya uvāca //
imāṃ tathānyāṃ vakṣyāmi dvitīyāṃ sarvakāmadām //
yāmupoṣya naraḥ kāmānsarvānāpnotyabhīpsitān

caitradvitīyāṃ saṃprāpya śuklapakṣasya mānavaḥ //
dināvasāne kurvīta samyak snānaṃ nadījale

.
bālendumaṇḍalaṃ kṛtvā pūjayecchvetavarṇakaiḥ //
śvetaiḥ puṣpaiḥ phalaiścaiva paramānnena bhūriṇā

/
īkṣunekṣuvikārairvā guḍena lavaṇena vā //
dināvasāne deveśaṃ pūjayitvā niśākaram

ghṛtena havanaṃ kṛtvā naktaṃ bhuñjīta vāgyataḥ //
tatastailena haritaṃ bhakṣayetsakṛdeva ca

etadvrataṃ naraḥ kṛtvā samyak saṃvatsaraṃ śuciḥ //
saubhāgyaṃ mahadāpnoti svargalokaṃ ca gacchati

etatpavitraṃ ripu nāśakāri saubhāgyadaṃ rogaharaṃ ca rājan//
proktaṃ vrataṃ yādavavaṃśamukhya kāryaṃ prayatnena tathā striyāpi

iti śrīviṣṇudharmottare tṛtīyakhaṇḍe mārkaṇḍeyavajrasaṃvāde bālendudvitīyāvratavarṇano nāmaikatriṃśaduttaraśatatamo'dhyāyaḥ

3.132
mārkaṇḍeya uvāca //
aśūnyaśayanāṃ rājandvitīyāṃ śṛṇvato mama //
yāmupoṣya na vaidhavyaṃ prayāti strī kathañcana

patnīviyogaṃ ca naro nāsādayati karhicit //
kṛṣṇapakṣadvitīyāyāṃ grāhyā sā śravaṇe tithiḥ

svāstīrṇe śayane viṣṇuṃ lakṣmīṃ devīṃ tathaiva ca //
saṃpūjayetphalaiḥ puṣpairgandhairarghaiśca bhārgava

naivedyaṃ ca tato dadyāddīpaṃ dhūpaṃ ca śaktitaḥ //
tataḥ saṃpūjya deveśaṃ japenmantramimaṃ śuciḥ

śrīvatsadhāriñśrīkānta śrīvāsa śrīpate'cyuta //
gārhasthaṃ mā praṇāśaṃ me yātu dharmārtha kāmadam

agnayo mā praṇaśyantu mā praṇaśyantu devatāḥ //
pitaro mā praṇaśyantu matto dāṃpatyabhedataḥ

lakṣmyā viyujyate deva na kadācidyathā bhavān //
tathā kalatrasaṃbandho deva mā me vinaśyatu

lakṣmyā na śūnyaṃ varada yathā te śayanaṃ sadā //
śayyā mamāpyaśūnyāstu tathaiva madhusūdana

evaṃ prasādya deveśaṃ naktaṃ bhuñjīta vāgyataḥ //
brāhmaṇāya dvitīyehni pradadyāccaiva dakṣiṇām

śayane ca dvijendrāya gate māsa catuṣṭaye//
tasya janmatrayaṃ rājangṛhabhaṅgo na jāyate

aśūnyaśayanaścāsau dharmakarmārthasādhakaḥ //
bhavatyavyāhataiśvaryaḥ puruṣo nātra saṃśayaḥ

vaidhavyahīnā subhagā virogā pativratā dharmaparā ca sādhvī //
rūpeṇa yuktā na bhayānvitā ca nārī bhavetsarvaguṇopapannā

iti śrīviṣṇudhamottare tṛtīyakhaṇḍe mārkaṇḍeyavajrasaṃvāde aśūnyaśayanadvitīyāvratakathano nāma dvātriṃśaduttaraśatatamo'dhyāyaḥ

3.133
mārkaṇḍeya uvāca //
śuklapakṣa tṛtīyāyāṃ sopavāso jitendriyaḥ //
maṇḍalatritayaṃ kuryādvarṇakena pṛthakpṛthak

maṇḍalaṃ dakṣiṇe bhāge śvetaṃ kuryānnaro bhaveta //
raktaṃ madhye'pyadhaḥ kuryādudakchvetaṃ dhruvasya tu

viṣṇoḥ padatrayaṃ teṣu pūjyaṃ syānmaṇḍaleṣu ca //
bhūmau ca prathamaṃ pādaṃ dvitīyaṃ sūryamaṇḍale

tṛtīyaṃ tu dhruve deve pūjayetprayataḥ śuciḥ //
yathā maṇḍalavarṇāṅko gandhamālyādibhirdvija

tadviṣṇoḥ paramityeva homamantro vidhīyate //
trivikramāyeti tathā strīśūdrasya dvijottama

akṣatāni tilānyājyaṃ homayetsaṃyutaṃ trayam //
tāmraraupyasuvarṇāni śaktyā dadyāttu dakṣiṇām

bhojanaṃ ca trimadhuraṃ bhojayedbrāhmaṇottamam //
prāṇayātrāṃ ca kurvīta trigavyena ca taddinam

evaṃ varṣatrayaṃ kṛtvā vratānte vai trihāyanam //
brāhmaṇāya tu gāṃ dattvā sarvānkāmānavāpnuyāt

bhūmau tathāntarikṣe ca divi caiva narottama //
gatistasyā pratihatā bhavatyariniṣūdana

trīṇi varṣasahasrāṇi sarvagasyāvicāriṇaḥ //
mānasaṃ vācikaṃ caiva kāyikaṃ ca vimuñcati

sarvapāpaṃ mahābhāga manuṣyo jāyate tayā //
kule dhanāḍhyo bhavati rūpadraviṇasaṃyute // ११ /
virogaḥ sarvasiddhārthastrivargasya ca sādhakaḥ //
kṛtvā dvādaśavarṣāṇi viṣṇuloke mahīyate

tatrāpi nityaṃ varadaṃ vareṇyaṃ lakṣmīsahāyaṃ puruṣaṃ purāṇam //
paśyatyamoghaṃ vibhumapratarkyaṃ sanātanaṃ duḥkhavināśahetuma//

iti śrīviṣṇudharmottare tṛtīyakhaṇḍe mārkaṇḍeyavajrasaṃvāde trivikramavratavarṇano nāma trayastriṃśaduttaraśatatamo'dhyāyaḥ

// mārkaṇḍeya uvāca //
dvitīyaṃ tava vakṣyāmi śṛṇu traivikramaṃ vratam //
bhūmistu prathamaḥ pādo hyantarikṣaṃ tathā param

tṛtīyaśca divaṃ jñeyo devadevasya cakriṇaḥ //
bhuvaḥ patiḥ smṛto vahnirantarikṣaṃ tathā param

divaḥ patistathā sūryastacca viṣṇoḥ padatrayam //
jyeṣṭhaśuklatṛtīyāyāṃ sopavāso jitendriyaḥ

kalye kūpajalasnāto vahniṃ sampūjayennaraḥ //
gandhamālyanamaskāradhūpadīpānnasaṃpadā

nadījale tata. snātvā madhyaṃ prāpte divākare //
vāyoḥ saṃpūjanaṃ kṛtvā saktūndadyāddvijātaye

snātvā ca sarasītoye sāyaṃ sūryaṃ samarcayet //
tataśca naktaṃ cāśnīyāddhaviṣyaṃ vāgyataḥ śuciḥ

evaṃ saṃvatsare rājankṛtvā vratamatandritaḥ //
samāpayitvā vaiśākhe dadyādvipreṣu dakṣiṇām

tāmraṃ rūpyaṃ suvarṇaṃ ca trīṇi lohāni yādava //
vāsoyugaṃ ca soṣṇīṣaṃ trīṇi vāsāṃsi cāpyatha

upānaho yugaṃ chatraṃ trīṇi cemāni bhaktitaḥ //
etatsaṃvatsaraṃ kṛtvā narastraivikramaṃ vratam

sarvakāmasamṛddhasya yajñasya phalamaśnute //
vimānenārkavarṇena kiṅkiṇījālamālinā

devarājagaṇāḍhyena vīṇāmurajanādinā //
annamāyuḥ sutāścaiva prasanne garuḍadhvaje

ākrāntalokatritayasya tasya padatrayaṃ dharmabhṛtāṃ variṣṭha //
saṃpūjya kāmānmanujā labhante gatiṃ yatheṣṭāṃ puruṣapravīra

iti śrīviṣṇudharmottare tṛtīyakhaṇḍe mārkaṇḍeyavajrasaṃvāde dvitīyatraivikramavratakathano nāma catustriṃśaduttaraśatatamo'dhyāyaḥ

3.135
mārkaṇḍeya uvāca //
vyākhyātaṃ te mahābhāga tava traivikamaṃ vratama //
tṛtīyaṃ nṛpaśārdūla tanme nigadataḥ śṛṇu

jyeṣṭha śuklatṛtīyāyāṃ naraḥ samyagupoṣitaḥ //
bhuvassaṃpūjanaṃ kuryāddhūpamālyānulepanaiḥ

dīpairannaiśca vividhairdadyādvipreṣu dakṣiṇām //
bījapūrṇāni pātrāṇi sahiraṇyāni śaktitaḥ

pūjaivamantarikṣasya hyāṣāḍheti vidhīyate //
dakṣiṇā tatra dātavyā vāsoyugmaṃ dvijātaye

divaḥ pūjā ca kartavyā śrāvaṇe prāgvadeva tu //
chatraṃ copānaho yugmaṃ dakṣiṇāṃ tatra dāpayet

evaṃ māsatrayeṇeha pāraṇaṃ prathamaṃ bhavet //
māsatrayeṇa cānyattu māsatrayyaṃ punastataḥ

tato māsatrayeṇānyamenamabdena cānagha //
vijñeyaṃ dharmanityasya pāraṇānāṃ catuṣṭayam

prathamaṃ pāraṇaṃ kṛtvā agniṣṭomaphalaṃ labheta //
atirātraphalaṃ rājandvitīye pāraṇe tathā

tṛtīye pāraṇe vidvānvājapeyaphalaṃ labheta //
caturthe pāraṇe proktaṃ rājasūyasya yatphalam

vimānenārkavarṇena kiṅkiṇījālamālinā //
haṃsayuktena divyena vīṇāmurajanādinā

varāpsarogaṇāḍhyena kāmukenāpi cāruṇā //
yatheṣṭagāmī bhavati bahukālamasaṃśayam

mānuṣye janma cāsādya triśuklatvamavāpnuyāt //
vidyā janma tathā karma nātra kāryā vicāraṇā

trivikramasyāpratimasya tasya carācareśasya padatrayaṃ ca //
yaḥ pūjayettasya bhavanti kāmāḥ sarve samṛddhā na hi saṃśayo'tra

iti śrīviṣṇudharmottare tṛtīyakhaṇḍe mārkaṇḍeyavajrasaṃvāde tṛtīyatraivikramavratavarṇano nāma pañcatriṃśaduttaraśatatamo'dhyāyaḥ