Vishnudharmottara Purana · Chapter 3.126.130

3.126
// vajra uvāca // //
nāmnāṃ saṃpūjanaṃ viṣṇostvayā kāryaṃ prakīrtitam//
prādurbhāveṣu kāmyaṃ ca pūjanaṃ ca tvayeritam

kāla nāmāni ca tathā sthānanāmāni cāpyatha //
kāmyāni caiva nāmāni tvayā proktāni bhārgava

tasyaiva devadevasya viṣṇoramitatejasaḥ //
sarvadevamayasyeha sarvarūpadharasya ca

ārādhanavidhānāni kathayasva mamānagha //
tvaṃ hi sarvakathārāmo yathā devaḥ pitāmahaḥ

bhūya eva samācakṣva upavāsaphalaṃ vibho //
devatāpūjanārthāya vidhinā pūjanasya ca

mārkaṇḍeya uvāca //
aṣṭapatraṃ tu kamalaṃ vinyasedvarṇakaiḥ śubhaiḥ //
brahmāṇaṃ karṇikāyāṃ tu tasya saṃpūjayedvibhum

ṛgvedaṃ pūrvapatre tu yajurvedaṃ tu dakṣiṇe //
paścime sāmavedaṃ tu uttare'tharvaṇaṃ tathā

āgneye ca tathāṅgāni dharmaśāstrāṇi nairṛte //
purāṇānyeva vāyavye caiśānyāṃ nyāyavistaram

evaṃ vinyasya dharmajña sopavāsastu pūjayet //
caitraśuklādathārabhya sopavāso jitendriyaḥ

sadā pratipadaṃ prāpya śuklapakṣasya yādava //
saṃvatsaraṃ mahābhāga śuklagandhānulepanaḥ

bhūriṇā paramānnena dhūpadīpairatandritaḥ //
saṃvatsarānte gāṃ dadyāddhute cīrṇe narottama

idaṃ vrataṃ yastu karoti rājansa vedavitsyādbhuvi dharmanityaḥ //
kṛtvā tadā dvādaśavatsarāṇi vidheśca loka puruṣaḥ prayāti

iti śrīviṣṇudharmottare tṛtīyakāṇḍe mārkaṇḍeyavajrasaṃvāde brāhmīpratipallābho nāma ṣaḍviṃśatyuttaraśatatamo'dhyāyaḥ

3.127
// mārkaṇḍeya uvāca // //
ārādhanaṃ tridevasya tasya vakṣyāmi yādava //
viṣṇoramitavīryasya dvitīyamarimardana

brāhmī tu rājasī mūrtistasya vargapravartinī //
sāttvikī vaiṣṇavī jñeyā saṃsāraparipālinī

tāmasī ca tathā raudrī jñeyā saṃhārakāriṇī //
caitraśuklapratipadi brahmāṇaṃ pūjayennaraḥ

gandhamālyanamaskāradhūpadīpānnasampadā //
kṣīraṃ brāhmaistato mantrairjuhuyājjātavedasi

lohabhāṇḍaṃ dvije dadyātkṣīrapūrṇaṃ sakāñcanam //
dadhnā ca bhojanaṃ kāryaṃ madhyaṃ prāpte divākare

ekavastrāṃcite deśe tathā svapyātkuśāstṛte //
tataścaturthe divase kūpanādeyasārasaiḥ //
tribhirekagataistoyaiḥ samyaksnānaṃ samācaret

pūjayetpūrtavatsamyakpuratritayameva tat //
lohatrayaṃ dvije dadyātsamālyaṃ nṛpa dakṣiṇām

tṛtīyehni tataḥ pūjā kāryā rudrasya pārthiva //
gandhamālyanamaskāradhūpa dīpaistathaiva ca //
mānastoketi maṃtreṇa ghṛtahomo vidhīyate

saghṛtaṃ lohapātraṃ ca sahiraṇyaṃ sadakṣiṇam //
tṛtīye dinabhāge tu vātāhāraṃ samācaret

tathā trimadhuraṃ dadyādbhojanaṃ tacca bhakṣayet //
vratametannaraḥ kṛtvā māsimāsi dinatrayam //
saṃvatsareṇa dharmajña gatimiṣṭāmavāpnuyāt

mānuṣyamāsādya bhavatyarogo jitendriyaḥ satyaparo vinītaḥ//
saubhāgyarūpadraviṇopapannaḥ sākṣācchivo lokadhurandharaḥ syāt

iti śrīviṣṇudharmottare tṛtīyakhaṇḍe mārkaṇḍeyavajrasaṃvāde trimūrtivrataṃ nāma saptaviṃśatyuttaraśatatamo'dhyāyaḥ

3.128
mārkaṇḍeya uvāca //
ekameva jagatsarvaṃ prakṛtiḥ puruṣaḥ smṛtaḥ //
caitraśuklasamāraṃbhe sopavāso jitendriyaḥ

puruṣaṃ pūjayedviṣṇuṃ sthale vā yadi vā jale //
gandhamālyanamaskāradhūpadīpānnasaṃpadā

pauruṣaṃ tu tathā sūktaṃ japedantarjale naraḥ //
tathā cainaṃ ca pratyaṣṭaṃ budho dadyājjalāñjalim

tathā puṣpāṇi dharmajñaḥ phalāni ca mahābhuja //
dhūpaṃ dadyātsanaivedyaṃ japecchaktyā tathā ca tam

juhuyācca tathā''jyena dvije dadyācca kāñcanam //
āhāraṃ payasā kuryānniśākāle ca bhārgava//

etatsaṃvatsaraṃ kṛtvā nityavratamatandritaḥ //
pakṣayorubhayorvīra sarvapāpaiḥ pramucyate

prasādamāsādya sa vāsudevātsarveśvarātsarvagaṇādacintyāt //
lokeśvarānmokṣapadaṃ prayāti ye yānti siddhā munayaḥ pratītāḥ

iti śrīviṣṇudharmottare tṛ० khaṇḍe mārkaṇḍeyavajrasaṃvāde pauruṣīpratipadvarṇano nāmāṣṭāviṃśatyuttaraśatatamo'dhyāyaḥ

3.129
mārkaṇḍeya uvāca //
puruṣaḥ prakṛtiścobhau jagatsarvaṃ prakīrtitam //
agnīṣomātmakaṃ sarvaṃ tathā tasya prakīrtitam

vāsudevaśca lakṣmīśca tāveva parikīrtitau //
caitraśuklasamāyāṃ ca sopavāso jitendriyaḥ

pauruṣeṇa sa sūktena vahniṃ saṃpūjayennaraḥ //
gandhamālyanamaskāradhūpadīpānnasapradā

lakṣmīṃ ca varadāṃ devīṃ pūjayedudakena tu //
śrīsūktena ca dharmajña yathāvanmanujeśvara

kāñcanaṃ rājataṃ cobhau dadyādvipreṣu dakṣiṇām //
prāṇayātrāṃ budhaḥ kuryātkṣīreṇa saghṛtena ca

saṃvatsaramidaṃ kṛtvā vrataṃ samyagupoṣitaḥ //
mucyate pātakaiḥ sarvairmokṣopāyāṃśca vindati

kāmānavāpnotyatha vā vicitrām̐llokāṃśca mukhyānvasudhāṃ samagrām //
virūpato rūpamathāpi cāgryaṃ yaśastathāgryaṃ tanayāṃśca mukhyān

iti śrīviṣṇudharmottare tṛ० khaṇḍe mārkaṇḍeyavajrasaṃvāde prakṛti puruṣanirūpaṇo nāmaikonatriṃśaduttaraśatatamo'dhyāyaḥ

3.130
mārkaṇḍeya uvāca //
nāsatyau devabhiṣajāvaśvinau parikīrtitau //
tāveva kathitau loke sūryatārādhipau nṛpa

aśvayānarato yasmādaśvinau parikīrtitau //
caitraśukladvitīyāyāṃ sopavāso jitendriyaḥ

nāsatyau devabhiṣajau pūjayetprayataḥ śuciḥ //
gandhamālyanamaskāradhūpadīpānnasampadā

kṛtvā ca rūpanirmāṇaṃ nāsatyau pūjayennaraḥ ///
dīpamālāṃ tato dadyāttayorniśi viśeṣataḥ

kanakaṃ rajataṃ cobhe dadyādvipreṣu dakṣiṇām //
saṃmīlya netrayugalaṃ viṣṇuṃ ca saṃsmarennaraḥ

pradīptatejā bhavati cakṣuṣmāṃścaiva jāyate //
prāṇayātrāṃ tu kurvīta dadhnā ghṛtayutena ca

netravrataṃ dvādaśavatsarāṇi kṛtvā bhavedbhūmipatiḥ pratītaḥ //
sarūparūporigaṇapramāthī dharmābhirāmo nṛpavaryamukhyaḥ

iti śrīviṣṇudharmottare tṛ० kha० mārkaṇḍeyavajrasaṃvāde nāsatyapūjācakṣurvrataṃ nāma triṃśaduttaraśatatamo'dhyāyaḥ