Vishnudharmottara Purana · Chapter 3.121.125

3.121
vajra uvāca //
kasmindeśe mahābhāga prādurbhāvaṃ kamarcayeta //
etanme saṃśayaṃ chindhi tvaṃ hi sarvaṃ vijānase

mārkaṇḍeya uvāca //
brahmāṇaṃ puṣkare devaṃ prayāge yogaśāyinama / /
kālaṃjare mahādevaṃ śakratīrthe śatakratuma

sindhukūle varāhaṃ ca śāligrāme trivikramam / /
kāśmīreṣu tathā matsyaṃ sāgare vaḍavānalam / / ३ / /
ayodhyāyāṃ tathā rāmaṃ naimiṣe dharmameva ca //
karṇāṭe cāśvaśirasaṃ madradeśe nṛkesarim

śatrughnaṃ mathurāyāṃ ca daṇḍakeṣu ca lakṣmaṇam //
bharataṃ kekayeṣveva yamunāyāṃ tathā balim

prāgjyotiṣe'niruddhaṃ ca pradyumnaṃ dakṣiṇāpathe //
tathā bhārgavarāmaṃ ca malaye yadunandanam

pāñcālaviṣaye rājanpṛthuṃ vainyaṃ ca pūjayeta //
tamasātīramāsādya vālmīkiṃ pūjayennaraḥ

vārāṇasyāṃ pare pāre vyāsaṃ yadukulodvaha //
gaṅgākūle mahārāja vāsudevaṃ ca pūjayet

gajendramokṣaṇaṃ devamaṅgeṣu yadunandana //
dvāravatyāṃ tathā kṛṣṇaṃ naranārāyaṇāvubhau

badaryāśramamāsādya pūjayettu vicakṣaṇaḥ //
kurukṣetrepi dharmajña rāmaṃ bhṛgukulodvahama

atha vā yādavaśreṣṭha rathasthau kṛṣṇaphālgunau //
haṃsaprapatane haṃsaṃ matsyaṃ matsyeṣu yādava

gayāśīrṣe varāhaṃ tu mūlasthāne divākaram //
prabhāse ca tathā somaṃ himavatyalakādhipama

airāvatyāṃ bhogamayaṃ sarayvāṃ rāmameva ca //
bhogibhogāsanāsīnaṃ sarayūtaṭasaṃsthitama

sarvamūrtidharaṃ devaṃ sarvatrāpyatha vārcayeta //
sarvatra sarva śaktirhi sarvātmā sa nigadyata

sarvatra devaḥ sa tu sarvaśaktiḥ sarveśvaraḥ sarvaśarīrasaṃsthaḥ //
pūjyaḥ sadā sarvaphalapradātā loke sakāmānvidadhāti rājan

iti śrīvipṇudharmauttare tṛ० khaṇḍe mārkaṇḍeyavajrasaṃvāde śrīviṣṇudeśādhideśaprādurbhāvapūjāvarṇano nāmaikaviṃśatyuttaśatatamo'dhyāyaḥ / १२१ //
3.122
vajra uvāca //
kena kāryeṇa devasya kiṃkiṃ nāma prakīrtayet //
etanme saṃśayaṃ chindhi bhṛguvaṃśavivardhana

mārkaṇḍeya uvāca //
vāsudevācyutānantasatyājapuruṣottama //
paramātmeśvarādyaiśca tato mokṣaṃ prayacchati

dharmaviddharmakṛddharmī viśvātmā viśvakṛcchuciḥ //
śucimadviṣṇurabjākhyo puṣkarākhyo hyadhokṣajaḥ

śuciḥśravā śipiviṣṭo yajñeśo yajñabhāvanaḥ //
nāmnāmityevamādīnāṃ samuccāraṇato naraḥ

dharmaṃ mahāntamāpnoti pāpabandhakṣayaṃ tathā //
śrīdaḥ śrīśaḥ śrīnivāsaḥ śrīdharaḥ śrīniketanaḥ

śriyaḥ patiḥ śrīparamaḥ śrīmāñchrīvatsalācchanaḥ //
nṛsiṃho duṣṭadamano jayo viṣṇustrivikramaḥ

stutaḥ prayacchate cātha aṇimādibhiracyutaḥ //
kāmyaḥ kāmapradaḥ kāntaḥ kāmayātmā tathā hariḥ

ānando mādhavaścaiva kāmasaṃvṛddhaye japet //
rāmaḥ paraśurāmaśca nṛsiṃho viṣṇureva ca

vikramaścaivamādīni japyānyarijigīṣubhiḥ //
dāmodarāniruddhau ca jñeyau bandhanamokṣadau

japtavyobhyasatā vidyāṃ mahāpuruṣa ityapi //
vidyārthinā vā japtavyaṃ tathāśvaśiraseti ca

balārthī balabhadreti saukhyārthī sukhadeti ca //
aśvārthī cāśvaśirasaṃ gajārthī nāgamokṣaṇam

gobhirarthī japennāma vāsudeveti kīrtitam //
yajñārthī yajñapuruṣaṃ kīrtayetprayato naraḥ

nārāyaṇeti ca tathā viṣṇaveti yadūdvaha//
yadvābhirocato rāmaṃ sarvārtheṣu hyudīrayet //
sarvāṇyetāni nāmāni parasya brahmaṇo yataḥ

sarvāṇi nāmāni hi tasya rājan bhavanti kāmākhiladāyakāni //
yadeva saṃkīrtayate sa śaktyā tasmādavāpnoti hi kāmasiddhim

iti śrīviṣṇudharmottare tṛ० khaṇḍe mārkaṇḍeyavajrasaṃvāde kāmaprāptivarṇano nāma dvāviṃśatyuttaraśatatamo'dhyāyaḥ

3.123
vajra uvāca //
kāryārambhe tathā kasminko nāma ddvija kīrtayet //
etanme saṃśayaṃ chindhi tvaṃ hi sarvaṃ vijānase

mārkaṇḍeya uvāca //
cakriṇaṃ halinaṃ caiva śārṅgiṇaṃ khaḍginaṃ tathā //
kṣemārthī pravasanrājandikṣu prācyādiṣu smaret

arcitaṃ cādhikaṃ caiva sarvaṃ sarveśvaraṃ prabhum //
saṃsmaretpuruṣaṃ bhaktyā vyavahāreṣu sarvadā

kūrmaṃ varāhaṃ matsyaṃ ca jalaprataraṇe smaret //
bhrājiṣṇumagnijanane japedrāmamatandritaḥ

saṅgrāmābhimukhe gacchansaṃsmaredaparājitam //
keśavaṃ puṇḍarīkākṣaṃ puṣkarārthaṃ tathā japet

netrabādhāsu sarvāsu hṛṣīkeśaṃ tathaiva ca //
acyutaṃ cāmṛtaṃ caiva japedauṣadhakarmaṇi

garuḍadhvajānusmaraṇādāpado mucyate naraḥ //
jvaraduṣṭa śirorogaviṣavīryaṃ praśāmyati

grahanakṣatrapīḍāsu devabādhāṭavīṣu ca //
dasyuvairinirodheṣu vyāghrasiṃhādisaṃkaṭe

andhakāre tathā tīvre narasiṃheti kīrtayet //
vittasthāpanakāle ca dhānyasaṃsthāpane tathā

kurvīta tanmanā bhūtvā anantācyutakīrtanam //
nārāyaṇaṃ śārṅgadharaṃ śrīdharaṃ gajamokṣaṇam

vāmanaṃ khaṅginaṃ caiva duḥsvapneṣu tu saṃsmaret //
agnidāhe samutpanne saṃsmarejjalaśāyinam

balabhadraṃ samṛddhārthe kṛṣyāraṃbhe halāyudham //
uttāraṇaṃ vaṇijyārthī śrīśamabhyudaye nṛpa

maṅgalyaṃ maṅgale viṣṇumamaṅgalyeṣu kīrtayet //
ariṣṭānteṣu śeṣeṣu viśokeṣu tathā japet

uttiṣṭhan kīrtayedviṣṇuṃ prasupto mādhavaṃ naraḥ //
bhojane caiva govindaṃ sarvatra madhusūdanam

nārāyaṇaṃ sarvakāle kṣutapraskhala nādiṣu //
snāne devārcane home praṇipāte pradakṣiṇe

kīrtayedvāsudeveti anukteṣvapi yādava //
kāryārambhe'tha vā rājanyatheṣṭaṃ nāma kīrtayeta //

sarvāṇi nāmāni hi tasya rājansarvārthasiddhāni bhavanti puṃsaḥ //
tasmādyatheṣṭaṃ khalu devanāma sarveṣu kāryeṣu japettu bhaktyā

iti śrīviṣṇudharmottare tṛtīyakhaṇḍe mārkaṇḍeyavajrasaṃvāde tattatkāryaprāptitattannāmakīrtanavarṇano nāma trayoviṃśatyuttaraśatatamo'dhyāyaḥ

3.124
vajra uvāca //
kasminkāle tu devasya kiṃkiṃ nāma prakīrtayet //
etanme saṃśayaṃ chindhi tvaṃ hi sarvaṃ vijānase

mārkaṇḍeya uvāca //
puruṣaṃ vāmadevaṃ ca tathā saṅkarṣaṇaṃ prabhum //
pradyumnamaniruddhaṃ ca kramācchabdeṣu varjayet

viṣṇuṃ madhunihantāraṃ tathā devaṃ trivikramam //
vāmanaṃ śrīdharaṃ caiva hṛṣīkeśaṃ tathaiva ca

dāmodaraṃ padmanābhaṃ keśavaṃ ca yadūttama//
nārāyaṇaṃ mādhavaṃ ca govindaṃ ca tathā kramāt

caitrādiṣu tu māseṣu devadevamanusmaret //
pradyumnamaniruddhaṃ ca pakṣayoḥ śuklakṛṣṇayoḥ

sarvaḥ śarvaḥ śivaḥ sthāṇurbhūtānāṃ nidhiravyayaḥ//
ādityādiṣu vāreṣu kramādevamanusmaret

viśvaṃ viṣṇurvaṣaṭkāro bhūtabhavyabhavaḥ prabhuḥ//
bhūtakṛt bhūtabhṛdbhāvo bhūtātmā bhūtabhāvanaḥ

avyaktaḥ puṃḍarīkākṣo viśvakarmā śuciśravāḥ //
sambhavo bhāvano bhartā prabhavaḥ prabhurīśvaraḥ

aprameyo hṛṣīkeśaḥ padmanābhaḥ paraḥ prabhuḥ //
agrāhyaḥ śāśvato dhātā kṛṣṇaścaitānyanusmaret

devadevasya nāmāni kṛttikādiṣu yādava //
brahmāṇaṃ śrīpatiṃ viṣṇuṃ kapilaṃ śrīdharaṃ prabhum

dāmodaraṃ hṛṣīkeśaṃ govindaṃ madhusūdanam //
bhūdharaṃ gadinaṃ caiva śikhinaṃ padminaṃ tathā

cakriṇaṃ ca mahārāja prathamādiṣu saṃsmaret //
sarvaṃ vā sarvadā rāma devadevasya yādava

nāmāni sarvāṇi janārdanasya kālaśca sarvaḥ puruṣapravīra //
tasmātsadā sarvagatasya nāma grāhyaṃ yatheṣṭaṃ varadasya rājan

iti śrīviṣṇudharmottare tṛtīyakhaṇḍe mārkaṇḍeyavajrasaṃvāde kālanāmākhyāno nāma caturviṃśatyuttaraśatatamo'dhyāyaḥ

3.125
vajra uvāca //
kasminkṣetre tu devasya kiṃkiṃ nāma prakīrtayet //
etanme saṃśayaṃ chindhi bhṛguvaṃśavivardhana

mārkaṇḍeya uvāca //
atrāpyudāharantīmamitihāsaṃ purātanam//
vāsudevasya saṃvādamarjunasya ca yādava

vṛtte bhāratasaṃgrāme rājyaṃ prāpte yudhiṣṭhire/
asminneva sabhoddeśe vijahrāte yathāsukham

vāsudevārjunau vīrau lakṣīkṛtavasundharau //
tataḥ kathānte kasmiṃścitkṛṣṇaṃ papraccha phālgunaḥ

arjuna uvāca //
kṣetreṣu yeṣuyeṣu tvaṃ kīrtanīyo mayācyuta //
cetasā praṇidhānārthaṃ tvaṃ mamākhyātumarhasi

śrībhagavānuvāca //
sarvagaḥ sarvabhūto'haṃ na hi kiñcinmayā vinā //
carācare jagatyasminvidyate kurusattama

tathāpi yeṣu sthāneṣu cintanīyohamarjuna //
stotavyo nāmabhiryaiśca śṛṇu tvaṃ tadvadāmi te

puṣkare puṇḍarīkākṣaṃ gayāyāṃ ca gadādharam //
lohadaṇḍe tathā viṣṇuṃ stuvaṃstarati duṣkṛtam

rāghavaṃ citrakūṭe tu prabhāse daityasūdanam //
vṛndāvane ca govindaṃ māṃ stuvanpuṇyabhāgbhavet

jayaṃ jayantyāṃ stunvaṃśca jayantaṃ hastināpure //
varāhaṃ kandamāle ca kaśmīreṣu ca cakriṇam

janārdanastu kubjāmre mathurāyāṃ ca keśavam //
śrīkubje śrīdharaṃ tadvadgaṅgādvāre surottamam

śāligrāme mahāyogyaṃ hariṃ govardhanācale //
piṇḍārake caturbāhuṃ śaṃkhadvāre ca śaṃkhinam

vāmanaṃ tu kurukṣetre yamunāyāṃ trivikramam //
viśveśvaraṃ tathā śoṇe kapilaṃ pūrvasāgare

śvetadvīpapatiṃ cāpi gaṅgāsāgarasaṃgame //
bhūdharaṃ devikātīre prayāge yogaśāyinam

naranāraṇāyākhyau ca tathā badarikāśrame //
samudre dakṣiṇe nāma padmanābheti phālguna

dvārakāyāṃ tathā kṛṣṇaṃ stuvaṃstarati durgatim //
evaṃ rāmaṃ mahendrādrau hṛṣīkeśaṃ tathā budha

aśvatīrthe hayagrīvaṃ viśvarūpaṃ himācale //
nṛsiṃhaṃ kṛtaśauce tu vipāśāyāṃ dvijapriyam

naimiṣe yajñapuruṣaṃ jambumāle tathācyutam //
anantaṃ saindhavāraṇye daṇḍake śārṅgadhāriṇam

utpalāvartake śauriṃ narmadāyāṃ śriyaḥ patim //
dāmodaraṃ raivatake nandāyāṃ jalaśāyinam

sarvayogeśvaraṃ caiva sindhusāgarasaṃgame //
sahyādrau devadeveśaṃ vaikuṇṭhaṃ mādhave vane

sarvapāpaharaṃ viṃdhye coḍreṣu puruṣottamam //
hradaye cāpi kaunteya paramātmā sanātanaḥ

vaṭevaṭe vaiśravaṇaṃ catvarecatvare śivam //
parvateparvate rāmaṃ sarvatra madhusūdanam

naraṃ bhūmau tathā vyomni kaunteya garuḍadhvajam //
vāsudevaṃ ca sarvatra saṃsmarejjyotiṣāṃ patim

arcayanpraṇamanstunvansaṃsmareśca dhanañjaya //
eteṣvetāni nāmāni naraḥ pāpātpramucyate

sthāneṣveteṣu mannāmnāmeteṣāṃ prīṇayennaraḥ //
dvijānāṃ prīṇanaṃ kṛtvā svargaloke mahīyate

nāmānyetāni kaunteya sthānānyetāni cātmavān //
japanvai pañca pañcāśattrisandhyaṃ matparāyaṇāḥ

trīṇi janmāni yatpāpaṃ cāvasthātritaye kṛtam //
tatkṣālayatyasandigdhaṃ jāyate ca satāṃ kule

dvikālaṃ vā japanvaitaddivārātrau ca yatkṛtam //
tasmādvimucyate pāpātsaṃstuvanparamo naraḥ

japtānyetāni kaunteya sakṛcchraddhāsamanvitam //
mocayanti naraṃ pāpādyattatraiva dine kṛtam

dhanyo yaśasyaḥ śatrughno jayaḥ kurukulodvaha //
grahānukūlatāṃ caiva karotyāśu na saṃśayaḥ

upoṣitāśca manasaḥ sthāneṣveteṣu mānavaḥ //
kṛtāyatanavāsaśca prāpnotyabhimataṃ phalam

utkrāntirapyaśeṣeṣu sthāneṣveteṣu śasyate //
anyasthānācchataguṇameteṣvanaśanādikam

//
yastu matparamaḥ kālaṃ karotyeteṣu mānavaḥ//
devānāmapi pūjyo'sau mama loke mahīyate

sthāneṣvathaiteṣu ca ye vasanti saṃpūjayante mama sarvakālam //
tadeha cānte tridivaṃ prayānti nākaṃ ca lokaṃ samavāpnuvanti

iti śrīviṣṇudharmottare tṛtīyakhaṇḍe mārkaṇḍeyavajrasaṃvāde arjunaṃ prati kṛṣṇopadeśe sthānaviśeṣakīrtanamāhātmyavarṇano nāma pañcaviṃśatyuttaraśatatamo'dhyāyaḥ