Vishnudharmottara Purana · Chapter 3.101.105

3.101
mārkaṇḍeya uvāca //
athārcāśaucānantaraṃ pavitrakasyārcāyāḥ kuryāt //
tatra kamalakarṇikāyāṃ dhruvā dyauriti mantreṇa dakṣiṇaśiraskaṃ prākchirasaṃ vā śayyāyāṃ sthāpayet//
ataḥ pañcavarṇaiḥ pañcabhirāstaraṇairāstarayet/
śuddhāvatyaścodīrayet/
tato yuvā suvāsā iti pracchādanapaṭaṃ dadyāt //
gaṇḍopadhānaṃ ca /
tato garbhamayaṃ saptaśīrṣamanantaṃ nāgaṃ kuryāt /
taṃ ca śayane sthāpayet //
tato jīvasyāvāhanaṃ kuryāta śivasaṃkalpaṃ codīrayet /
tatastvanantasyāvāhanaṃ prayojayet /
tatorghyapādyamācamanīyamanulepanamālyadīpadhūpamadhuparkaprāpaṇakamātrābhiḥ pratyekaṃ sāvitreṇānantaramarcayet //
tataḥ sarpasāma /
namostu sarpebhya iti yogeyogeti mantraṃ codīrayet //
anantamāhātmyaṃ ca vā vadet //
tato dhruvā dyauriti mantreṇānantopari śrībhagavadarcā pavitrake sthāpayet //
tato jīvasyāvāhanaṃ kuryāt /
śivasaṅkalpaṃ japet /
tato bhagavantamāvāhayet /
tataḥ sarve bhūnyastajānavaḥ praṇāmaṃ kuryuḥ āgataśca bhagavāniti brūyuḥ /
tataḥ śaṅkhapaṭahabherījayaśabdaiḥ pūjayeyuḥ /
tato'rghyapādyācamanīya snānīyānulepanamālyadhūpadīpamadhuparkaprāpaṇakamātrādānaiḥ śrībhagavantaṃ pratyekaṃ savitreṇārcayet /
tataḥ svasti na indra iti japet /
tato yuvāsuvāsā iti śrībhagavantaṃ mahatā vāsoyugenācchādayet yuñjate mana iti puṣpairavakiret /
bodhaścamā pratibodhaśceti siddhārthairavakiret /
prādurabhāvāniti vācayet /
evamadhivāsanaṃ kāryam //
adhivāsite ca bhagavati arcāsthaṇḍile vediṃ pratiṣṭhāpya āsanāni pādapīṭhāni ca arcāśaucavidhānena vedimāsanāni ca śodhayet /
tataḥ śaṅkaragītoktavidhinā ijyāṃ sāttvataḥ kuryāt /
ijyāsamakālameva homasthaṇḍile hotā homaṃ vedīśaucamāsanānāṃ sakṛdeva vidhatte //
ijyāhomo tu kartavyo pratyahaṃ tvadhivāsite /
pūjanaṃ gītanṛtyaiśca pratiṣṭhā yāvadāgatā /
adhivāsanametatte mayā samyagudāhṛtam

iti śrīviṣṇu० dha० tṛ० kha० mā० va० saṃ० adhivāsanavarṇano nāmaikādhikaśatatamo'dhyāyaḥ .

3.102
// mārkaṇḍeya uvāca //
āvāhayāmyahaṃ jīvaṃ bījaṃ sarvagataṃ prabhum //
pañcabhāvasthitaṃ dehe pañcadhā ca sthitaṃ punaḥ

vāyavyena tu bhāvena pañcadhāvasthitaṃ punaḥ //
āgneyena tu bhāvena pañcadhāvasthitaṃ tathā

vāruṇena ca bhāvena pañcadhāvasthitaṃ prabhum //
bhūtātmakatvena tathā pañcadhāvasthitaṃ punaḥ

paramātmānamatyugramanugraṃ jagadīśvaram //
sarvagaṃ sarvadhātāraṃ sarveśamaparājitam

atyarthasūkṣmaṃ varadaṃ kṣetrajñaṃ prabhumīśvaram //
/bhūtabhavyabhaviṣyasya prabhuṃ lokanamaskṛtam

guṇādhāraṃ jagadyoniṃ mahadbhyopi mahattaram //
jīvadeva tvamabhyehi praviśārcāmimāṃ svayam

kuruṣva devadeveśa sajīvaṃ ca tathānagha //
idamarghyamidaṃ pādyaṃ dhūpo'yaṃ pratigṛhyatām

iti śrīvi० dha० tṛ० kha० mā० va० saṃ० jīvāvāhanaṃ nāma dvayuttaraśatatamo'dhyāyaḥ

3.103
vajra uvāca //
āvāhanāni me brūhi devatānāṃ bhṛgūttama //
bhavantyāvāhitā mantrairyasmātsannihitāḥ surāḥ

mārkaṇḍeya uvāca //
āvāhanāni te vacmi devānāṃ yadunandana //
athoktavarjaṃ keṣāṃcitkeṣāṃcitpunareva te

sarvasyāvāhanasyānte ślokārdhaṃ parikīrtitam //
idamarghyaṃ ca pādyaṃ ca dhūpo'yaṃ pratigṛhyatām

āvāhayāmyahaṃ devau nāsatyau sūryanandanau //
āgacchetāṃ mahābhāgau varadau cāśvinau śubhau

vasūnāvāhayiṣyāmi devānaṣṭau varapradān //
āyāntu varadā devā vasavaḥ pāpanāśanāḥ

viśvānāvāhayiṣyāmi devānadbhutatejasaḥ //
āyāntu varadāḥ sarve viśvedevā mahābalāḥ

āvāhayāmyaṅgiraso devānadbhutatejasaḥ //
āyāntvaṅgiraso devā mahābala parākramāḥ

rudrānāvāhayiṣyāmi trinetrānvṛṣavāhanān //
āyāntu varadā rudrāstrailokyavaradāḥ śubhāḥ

āvāhayiṣyāmyādityān varadāndīptatejasaḥ //
āyāntu varadāḥ sūryāḥ sarve te tejasolbaṇāḥ

bhṛgūnāvāhayiṣyāmi devāndīptatapodhanān //
āyāntu bhṛgavo devā varadā dīptatejasaḥ

surānāvāhayiṣyāmi marutastejasādhikāḥ //
āyāntu maruto devā varadā bhuvaneśvarāḥ

surānāvāhayiṣyāmi sarvāneva divaukasaḥ //
āgacchantu surāḥ sarve mantrapūjābhilāṣiṇaḥ

daityānāvāhayiṣyāmi mahābalaparākramān //
āyāntu daityā dharmiṣṭhā devadevānugā mama

āvāhayiṣye gandharvānrūpadraviṇasaṃyutān //
āyāntu sarvagandharvā varadāḥ kāmarūpiṇaḥ

yakṣānāvāhayiṣyāmi dhanādhyakṣasamanvitān //
āyāntu varadā yakṣāstrailokyaviditā mama

āvāhayiṣyāmi tathā rākṣasānvividhāyudhān//
āyāntu rākṣasā vīrā devadevānuyāyinaḥ

āvāhayiṣyāmi tathā vidyādharagaṇānaham //
vidyādharāḥ samāyāntu vividhāḥ gaganaṅgamāḥ

āvāhayiṣyāmi tathā kinnarāndevagāyanān//
āyāntu kinnarāḥ sarve susvarāstu sulocanāḥ

nāgānāvāhayiṣyāmi bhujagānsarpagocarāna//
āyāntu varadā nāgāstrailokyaviditā mama

ahamāvāhayiṣyāmi tathaivāpsarasaḥ śubhāḥ //
samāyāntu mahābhāgā devayoṣā mamojjvalāḥ // /

ahamāvāhayiṣyāmi sarvāstridaśapatnayaḥ //
āyāntu varadāḥ sarvāstaptacāmīkaraprabhāḥ

āvāhayiṣyāmi tathā varadā devamātaraḥ //
āyāntu varadāḥ sarvā suveśāḥ sukhadāḥ śivāḥ

pitṝnāvāhayiṣyāmi sūkṣmarūpadharānaham //
āyāntu pitaraḥ sarve gaṇasthāstu pṛthakpṛthak

āvāhayiṣyāmi tathā suparṇānbalavattarān //
suparṇāstu samāyāntu viṣṇutejopabṛṃhitāḥ

āvāhayāmi varadānsarvāneva prajāpatīn //
prajādhyakṣāḥ samāyāntu trailokyaparipālakāḥ

āvāhayāmi devendrāndevānbhuvananāyakān //
āyāntu devanāthā me varadāḥ kāmarūpiṇaḥ

manūnāvāhayiṣyāmi prabhutve jagataḥ sthitān //
āyāntu manavaḥ sarve tapasā naṣṭakilbiṣāḥ

āvāhayiṣyāmyoṣadhyaḥ sarvaprāṇidharāḥ śubhāḥ //
oṣadhyaśca samāyāntu sarvāḥ kāmapradāḥ śubhāḥ

ṛṣīnāvāhayiṣyāmi tapasā dyotitaprabhān //
āyāntu ṛṣayaḥ siddhāḥ sarve me dīptatejasaḥ //
śailānāvahāyiṣyāmi sarvauṣadhisamanvitān

āyāntu bhūdharāḥ śailāḥ sarve me sthāvareśvarāḥ //
drumānāvāhayiṣyāmi nānārūpadharānahama

drumāḥ sarve samāyāntu manomārutaraṃhasaḥ //
āvāhayiṣyāmi tathā pātālānsarvagocarān

āyāntu sarve pātālā daityasthānā hyavinditāḥ //
dvīpānāvāhayiṣyāmi sarvānadbhutadhāriṇaḥ

āyāntu dvīpā lokānāṃ sthānabhūtā jagatpriyāḥ //
lokānāvāhayiṣyāmi sthānabhūtānmanoharān

āyāntu lokāḥ sakalāḥ sarve me bhūtabhāvanāḥ //
āvāhayiṣyāmi tathā samudrāñjagataḥ priyān

samudrā me samāyāntu rasādhārā jagatpriyāḥ //
varṣānāvāhayiṣyāmi sarvabhūtāśrayāniha

āgacchantu tathā ceha varṣāḥ sarvamanoharāḥ //
āvāhayiṣyāmi tathā caturaḥ sāgarānaham

sāgarāḥ śīghramāyāntu sarve toyadharā mama //
nadīstvāvāhayiṣyāmi varadā lokamātaraḥ

āyāntu varadā nadyaḥ sarvapāpaharāḥ śubhāḥ //
āvāhayiṣyāmi tathā sarvānabhragaṇānaham

āyāntvabhrā mahābhāgāḥ sarve cāśucarā mama //
āvāhayiṣyāmi tathā piśācānsarvagānaham//
piśācāstu samāyāntu sarve me kāmarūpiṇaḥ

āvāhayiṣyāmi tathā skandasya pārśvagānaham

nānārūpāḥ samāyāntu skandasya pārśvagā mama //
āvāhayiṣyāmi tathā devānāṃ pārṣadānaham

nānārūpāḥ samāyāntu devānāṃ pārṣadā mama //
āvāhayiṣyāmi tathā harasya pārṣadānaham //
nānārūpāḥ samāyāntu harasya pārṣadā mama

āvāhayiṣyāmi tathā mātaro lokamātaraḥ

āyāntu mātaro devyo varadāḥ sarvagāḥ śubhāḥ //
grahānāvāhayiṣyāmi sarvalokeśvarānaham

grahāḥ sarve samāyāntu dīptā bhuvananāyakāḥ //
āvāhayiṣyāmi tathā nakṣatrānvaradānaham

āyāntu sarve nakṣatrāḥ sarve bhuvananāyakāḥ //
diśastvāvāhayiṣyāmi prāgādyāḥ sumanoharāḥ

āgacchantu diśaḥ sarvāḥ sarvabhūtasukhāvahāḥ//
vīthyastvāvāhayiṣyāmi divyā navagrahāśrayāḥ

āyāntu vīthyaḥ sakalā grahanakṣatramaṇḍitāḥ //
ahamāvāhayiṣyāmi muhūrtānsūkṣmarūpiṇaḥ

muhūrtāḥ śīghramāyāntu kālasyāvayavāḥ śubhāḥ //
ṛtūnāvāhayiṣyāmi ṣaḍahaṃ bhuvaneśvarān

āyāntu ṛtavaḥ sarve jagaccakrapravartakāḥ //
āvāhayiṣyāmi tathā pañcasaṃvatsarānaham

āyāntu vatsarāḥ sarve kālacakrapravartakāḥ //
yugānāvāhayiṣyāmi caturo dīptatejasaḥ

āgacchantu yugāḥ sarve caturmūrtivyavasthitāḥ //
ahamāvāhayiṣyāmi manūṃścaiva caturdaśa

manvantarāḥ samāyāntu tridaśāvadhisaṃsthitāḥ //
kālamāvāhayiṣyāmi devaṃ sāvayavaṃ śubham

āgaccha bhagavankāla devadeva janārdana //
devānāvāhayiṣyāmi yajñamūrtidharānaham

devāḥ sarve samāyāntu varadā bahurūpiṇaḥ //
grahamāvāhayiṣyāmi vidyāsthānānyaśeṣataḥ

sarvāṇīha samāyāntu lokānāṃ hitakāmyayā//
śāstrānāvāhayiṣyāmi śāntāndarśanavatthitān

śastrāṇi śīghramāyāntu camūnāṃ maṇḍanaṃ param//
astrāṇyāvāhayiṣyāmi trailokyasya hitāni vai

sarve ceha samāyāntu dharmasetupravartakāḥ //
ahamāvāhayiṣyāmi vedaśāstrāṇyanekaśaḥ

vedaśāstrāḥ samāyāntu jagadrakṣaṇatatparāḥ //
ahamāvāhayiṣyāmi sarvāṃstridaśavāhanān

iha sarve samāyāntu sarve tridaśavāhanāḥ //
nāgānāvāhayiṣyāmi devaputrānmahābalāna

devopavāhyā nāgendrāḥ śīghramāyāntu satvarāḥ //
nidhīnāvāhayiṣyāmi śaṅkhapadmapurogamān //
āyāntu nidhayaḥ sarve sarvalokaikabhāvanā

āhvānakāryaṃ yadi saṅgamadhyādekasya kāryaṃ yaduvaṃśanātha //
kāryādathehā tu tadekavatsyādāhvānamantrasya yathānurūpāḥ

iti śrīviṣṇudhamottare tṛtīyakhaṇḍe mārkaṇḍeyavajrasaṃvāde pratiṣṭhākalpe devasaṃvāhvānaṃ nāma tryuttaraśatatamo'dhyāyaḥ

3.104
mārkaṇḍeya uvāca //
āvāhayāmyahaṃ devaṃ brahmāṇaṃ parameṣṭhinam //
jagato'sya samutpattisthitisaṃhārakāraṇam

caturvedaṃ caturvaktraṃ cāturvarṇyaprabhuṃ prabhum //
caturāśramagoptāraṃ varadaṃ bhūtabhāvanam

padmayoniṃ jagadyoniṃ yajñayoniṃ jagatpatim //
ātmayonimanādhṛṣyaṃ yajñavāhaṃ jagatpatim

yajñeśaṃ yajñamūrtiṃ ca trailokyasyaikakāraṇam //
sarvagaṃ nāradaṃ saumyaṃ paramaṃ parameśvaram

bhūtabhavyabhavannāthaṃ yogajñeyaṃ sanātanam //
āgaccha bhagavanbrahmanyajamānasya vṛddhaye

idamarghyamidaṃ pādyaṃ dhūpaṃ cedaṃ pragṛhyatām //
āvāhayāmyahaṃ devaṃ devadevaṃ hutāśanam

jagato'sya samutpattisthiti saṃhārakārakam //
devamūrtiṃ tadādhāraṃ sarvadevamukhaṃ prabhum

piṅgekṣaṇaṃ piṅgajaṭaṃ dhūmaketuṃ vibhāvasum //
śukayānagamaṃ devaṃ sarvābharaṇabhūṣitam

sarvagaṃ varadaṃ bhānuṃ jaṭharasthaṃ ca dehinām //
tejomūrtiṃ durādharṣaṃ saptajihvaṃ mahābalam

saptārciṣaṃ saptamuniṃ samitsaptakamacyutam //
viṣṇoraṃśamanirdeśyaṃ bhānavaṃ jātavedasam

pāvanaṃ puṣṭidaṃ saumyaṃ bhaktānāṃ bhūtivardhanam //
yājakaṃ yajamānaṃ ca puṣṭyā vibhaja sarvaśaḥ

idamarghyamidaṃ pādyaṃ dhūpaṃ cedaṃ pragṛhyatām //
āvāhanānyato vakṣye sarveṣāṃ pārthivottama

sarvasyāvāhanasyānte śloko'yaṃ parikīrtitaḥ //
praviśyārcāmimāṃ samyaṅ mayā bhaktyā vinirmitām

idamarghyamidaṃ pādyaṃ dhūpaṃ cedaṃ pragṛhyatām //
dhruvamāvāhayiṣyāmi sarvadeva gaṇeśvaram

nibaddhaṃ bhrāmyate yena bhacakraṃ vātarajjubhiḥ //
ehi me dhruva deveśa keśavācintyavikrama

sarvagrahagaṇādhyakṣa sarvalokanamaskṛta //
āvāhayiṣyāmyākāśaṃ vimānaśatamaṇḍitam

tṛtīyaṃ devadevasya padaṃ viṣṇormahātmanaḥ //
ehi me bhagavansaumya nirālamba nabhastala

aprameyātigambhīra vimānaśatamaṇḍita //
ūrdhvamāvāhayiṣyāmi cānantāṃ mahatīṃ diśam

aprameyāṃ nirālambāṃ candrasūryāṃśuvarjitām //
āgaccheha mahābhāge satataṃ siddhasevite

anante vipule devi nirmale hitakāriṇi //
āvāhayāmyadhastāttu diśaṃ śeṣeṇa pālitām

nāgadaityoragagaṇaiḥ satataṃ ca niṣevitām //
gambhīre vipule bhīme bahusthānātimaṇḍite

ehi me ratnabahule bahurūpe mahābale//
āvāhayiṣye varadaṃ sahasrāṃśuṃ divākaram //
tejomūrtiṃ durādharṣaṃ bhaktānāmabhayapradam//
ehi deva jagannātha ṛksāmayajuṣāṃ pate

trailokyamaṇḍale dīpa sarvavyādhivināśana //
āvāhayāmyahaṃ devamādityamudakeśayam

snigdhavaidūryasaṅkāśaṃ varuṇaṃ sumahādyutim //
ehi deva jalādhyakṣa yādogaṇamaheśvara

nāgadaityoragagaṇaiḥ satataṃ sevitācyuta //
āvāhayāmyahaṃ candraṃ śītāṃśumamṛtaprabham

oṣadhīśaṃ dvijādhyakṣaṃ nayanānandakārakama //
ehi me bhagavañcandra śaśāṅka mṛgalāñchana

bhaktānukampinsatataṃ sarvanakṣatrapūjita //
bhaumamāvāhayiṣyāmi tejomūrtiṃ durāsadam

bhadramūrtimanirdeśyaṃ vaktraṃ rudhirasaprabham //
ehi me bhagavanbhauma aṅgārakasamaprabha

tvayi sarvaṃ samāyattaṃ bhūtale'smiñśubhāśubham //
skandamāvāhayiṣyāmi ṣaṇmukhaṃ varadaṃ śiśum

devārisenāmathanaṃ pārvatyānandavardhanama //
ehi deva kumārādya mahiṣāsurataskara

kārtikeya jagannātha mayūravaravāhana //
budhamāvāhayiṣyāmi bodhanaṃ jagadīśvaram

cāndriṃ grahagaṇādhyakṣaṃ tejomūrtiṃ durāsadam //
ehi śītāṃśujācintya jagajjiṣṇo janārdana

mahābala mahābhāga mahābāho mahādyute //
viṣṇumāvāhayiṣyāmi śaṅkhacakragadādharam

atasīkusumaśyāmaṃ pītavāsasamacyutam //
ehi me devadeveśa prajānirmāṇakāraka

nārāyaṇa suduṣpāra maheṣvāsa dhanurdhara //
śakramāvāhayiṣyāmi devaṃ suragaṇeśvaram

vajrapāṇiṃ mahābāhuṃ gobrāhmaṇahite ratam //
ehi deva sahasrākṣa devāribalasūdana

airāvataga dharmajña śacīhṛdayanandana //
jīvamāvāhayiṣyāmi deveśvarapurohitam

bṛhaspatiṃ bṛhadvākyaṃ vedavedāṃgapāragam //
ehi jīva mahābhāga jīvabhūta mahītale

samyagvṛddhistavāyattā satataṃ bhūmivardhana //
devīmāvāhayiṣyāmi pārvatīṃ varadāmumām

harasya dayitāṃ bhāryāṃ cārvaṅgīṃ bhūtivardhinīm //
ehi devi jaganmātarmenāhṛdayanandini

pavitre varade saumye nityaṃ bhaktajanapriye//
śukramāvāhayiṣyāmi bhārgavaṃ jagadīśvaram

nityaṃ sarvadhanādhyakṣaṃ tapasā dyotitaprabhama //
ehi śukra mahābhāga ṣoḍaśārce varaprada

prabhustvaṃ varado nityaṃ varṣāvarṣasya nigrahe//
āvāhayāmyahaṃ devaṃ prajādhyakṣamakalmaṣam

bhaktānukaṃpinaṃ devaṃ prajānirmāṇakārakam //
ehi deva prajādhyakṣa prajānirmāṇakāraka

tvayi deva samāyattaṃ prajānāmabhavodbhavam //
saurimāvāhayiṣyāmi śanaiścāriṇamacyutam

tapasvinamanādhṛṣyaṃ bhaktānāmabhayapradam //
ehi tīkṣṇāṃśujācintya bhāvābhāvapradarśaka

tvayi sarvaṃ mamāyattaṃ rājñāṃ bhūmau śubhāśubham //
āvāhayāmyahaṃ devaṃ gajavaktraṃ gaṇeśvaram

vighneśaṃ vighnahartāraṃ pārvatī hṛdayapriyam //
ehi deva gaṇādhyakṣa lambodara mahābhuja

kāryasiddhiḥ samāyattā tvayi sarveśa dehinām//
rāhumāvāhayiṣyāmi daityeṃdraṃ grahatāṃ gatam

keśavāptavaraṃ vīraṃ tapasā dagdhakilbiṣam //
ehyehi daityapravara varadācintyavikrama

tamomūrte durādharṣaṃ viparītāmbarāmbara //
āvāhayāmyahaṃ devaṃ viśvakarmāṇamacyutam

sarvāsāṃ devatānāṃ tu sadā śilpapravartakam //
ehi devavarācintya sarvaśilpapravartaka

ehi devavarācintya sadā śilpapravartaka //
tvayi sarveśa sarveṣāṃ karmaṇāmāśritā gatiḥ

ketumāvāhayiṣyāmi ketuṃ sarvadivaukasām //
brāhmaṇyaṃ sarvadharmajñaṃ bhaktānāmabhayapradam

dhūmaketo ihābhyehi hutāśanasamaprabha//
śikhākarālavikaca pūjakārtivināśana

āvāhayiṣyāmi śubhāṃ kṛttikāṃ devapūjitām //
ehi sādhāraṇe devi jyeṣṭhe dakṣasute śubhe

āvāhayāmi varadāṃ rohiṇīṃ candravallabhām //
ehi rohiṇi dharmajñe dhruvakarmasu śobhane

āvāhayāmi varadāmilvilāṃ śaśivallabhām //
ehi me ilvile devi mṛdukarmasu śobhane

rudramāvāhayiṣyāmi trinetraṃ śūlapāṇinam //
ehi śaṅkara sarvātmanmahāgaṇagaṇeśvara

ārdrāmāvāhayiṣyāmi nakṣatraṃ bāhusaṃjñitam //
ehyārdre cārusarvāṅgi dāruṇe rudrasammite

āvāhayiṣyāmi ditiṃ tapasā dagdhakilbiṣām //
ādityāraṇi dharmajñe ehi devi mahāvrate

ṛkṣamāvāhayiṣyāmi dharmajñaṃ tu punarvasum //
punarvasau ihāgaccha carakarmaprasādhaka

tiṣyamāvāhayiṣyāmi nakṣatraṃ kṣiprasaṃjñitama //
ehi puṣya mahābhāga poṣaṃ vardhaya sarvataḥ

sarpānāvāhayiṣyāmi trailokyānantagocarān //
āyāntu sarvataḥ sarpāḥ saumyarūpā bhavantu te

āvāhayāmi cāśleṣāṃ bhaktānāṃ śrīvivardhinīm //
āśleṣe tvamihābhyehi dāruṇe vijayaprade

pitṝnāvāhayiṣyāmi martyamūrtidharānaham //
āyāntu pitaraḥ śīghraṃ sudhākavyabhujo'vyayāḥ

maghāmāvāhayiṣyāmi ugranakṣatramañjasā //
ehi me subhage devi sarvāghaviniṣūdani

bhagamāvāhayiṣyāmi bhaktasaubhāgyavardhanam//
ehi devavarācintya bhaktasaṃkaṭanāśaka

ṛkṣamāvāhayiṣyāmi pūrvaphalgunasaṃjñakam //
ehi bhāgi mahābhāga ugrakarmaprasādhaka

āvāhayiṣyāmyaryamṇamādityaṃ tejasāṃ nidhim //
aryamaṃstvaṃ samabhyehi bhaktasaṅkaṭanāśana

ṛkṣamāvāhayiṣyāmi uttarāphalgunīṃ śubhām //
ehi tvaṃ subhage devi dhruve sarvāṅgasundari

hastamāvāhayiṣyāmi sāvitraṃ kṣipramañjasā //
ehi sāvitra dharmajña bhaktānāṃ pāpanāśaka

āvāhayāmyahaṃ devaṃ tvaṣṭāramasitadyutim //
ehi me bhagavaṃstvaṣṭaḥ prajāpālanatatpara

citrāmāvāhayiṣyāmi citramūrtiṃ manoharām //
ehi me varade devi mṛdukarmaprasādhike

vāyumāvāhayiṣyāmi sarvagaṃ dīptatejasam //
deva vāyo tvamabhyehi sarvabhūtajagatpriya

svātimāvāhayiṣyāmi nityamuttarasarvagām //
devi svāti tvamabhyehi carakarmasu śobhane

āvāhayiṣyāmīndrāgnī sahitau dīptatejasau //
iṃdrātrehi jagannātha ehyagne vijayaprada

ṛkṣamāvāhayiṣyāmi viśākhāmagratejasam //
viśākhe tvamihābhyehi devi sādhāraṇe śubhe

mitramāvāhayiṣyāmi devaṃ dīptāṃśutejasam //
ehi mitra mahābhāga bhaktānāmabhayaṃ kuru

ṛkṣamāvāhayiṣyāmi tvanurādhāṃ varapradām //
anurādhe tvamabhyehi mṛdukarmasu śobhane

śakrosyāvāhanaṃ proktaṃ jyeṣṭhāyāḥ śṛṇu pārthiva //
jyeṣṭhāmāvāhayiṣyāmi nakṣatraṃ śakradaivatam

jyeṣṭhe devi tvamabhyehi dāruṇe cārulocane //
devamāvāhayiṣyāmi nirṛtiṃ vīravanditam

ehi deva virūpākṣa mahābala sadāśraya //
mūlamāvāhayiṣyāmi nakṣatraṃ dāruṇaṃ mahat

ehi mūla mahābhāga bhaktānāmabhayaprada //
āpastvāvāhayiṣyāmi sarvagā varadāḥ śubhāḥ

āpastvāvāhayiṣyāmi pūrvāṣāḍheti saṃjñitam //
ehi tvamugre varade pūrvāṣāḍhetisaṃjñite

ṛkṣamāvāhayiṣyāmi yattadabhijiducyate //
ehi dhiṣṇyavariṣṭhāya kṣiprakarmaprasādhaka

ṛkṣamāvāhayiṣyāmi śravaṇaṃ sarvakāmadam //
prasannastvaṃ samabhyehi carakarmaprasādhaka

dhaniṣṭhe tvamihābhyehi carakarmaprasādhike

ṛkṣamāvāhayiṣyāmi nāmnā śatabhiṣāṃ śubhām //
āgaccha tvaṃ śatabhiṣe carakarmasu śobhane

ajaikapādaṃ varadaṃ rudramāvāhayāmyaham //
āgaccha rudra varada triśūlaparamāyudha

ṛkṣamāvāhayiṣyāmi pūrvabhadrapadāmaham //
ehi bhadrapade pūrve ugrakarmaprasādhani

āhirbudhnyaṃ mahābhāgaṃ rudramāvāhayāmyaham //
āhirbudhnya samabhyehi jaṭājūṭopaśobhita

dhruvamāvāhayiṣyāmi deśe bhadrapadottarām //
ehi tvaṃ sumahābhāge mama bhadrapadottare

āvāhayāmyahaṃ devaṃ pūṣaṇaṃ pāpanāśakam //
pūṣansamyagihābhyehi sarvakalmaṣanāśaka

ṛkṣamāvāhayiṣyāmi revatīṃ bhīrudarśanām //
ehi revati dharmajñe mṛdukarmaprasādhake

ṛkṣamāvāhayiṣyāmi kṣipramaśvini saṃjñakam //
ehyaśvini mahābhāge varade kāmadāyini

yamamāvāhayiṣyāmi dharmarājamathācyutam //
ehi dharmabhṛtāṃ śreṣṭha vaivasvata mahābhuja

ṛkṣamāvāhayiṣyāmi ugraṃ bharaṇisaṃjñakam //
ehi tvaṃ devi bharaṇi subhage cārudarśane

prācīmāvāhayiṣyāmi sūryodayavibhūṣaṇāma //
ehi tvaṃ varade pūrve śubhakarmaprasādhani

diśamāvāhayiṣyāmi varadāṃ pūrvadakṣiṇām //
vahnipriye samabhyehi varade pūrvadakṣiṇe

ahamāvāhayiṣyāmi dakṣiṇāṃ dakṣiṇāṃ diśam //
dakṣiṇe tvaṃ samabhyehi sarvakarmaśubhaprade

diśamāvāhayiṣyāmi śubhāṃ dakṣiṇapaścimām //
ehi tvaṃ nairṛte devi satataṃ bhūtivardhini

diśamāvāhayiṣyāmi vāruṇīṃ varadāṃ sadā //
āgaccha paścime devi varade varuṇapriye

āvāhayiṣyāmi diśaṃ vāyavīṃ paścimottarām //
varade tvaṃ samabhyehi vāyavye paścimottare

āvāhayāmi dhanadaṃ devaṃ vaiśravaṇaṃ prabhum //
rājarāja samabhyehi sarvayajñeśvarādhipa

diśamāvāhayiṣyāmi saumyāṃ dhanadapālitām //
uttare tvaṃ samabhyehi sarvadharmaphalaprade

diśamāvāhayiṣyāmi śubhāṃ prāguttarāmaham //
ehi tvaṃ subhage devi satataṃ śivapālite

sarvānāvāhayiṣyāmi pūrṇakumbheṣu sāgarān //
ratnādhyakṣāḥ samāyāntu catvāra iha sāgarāḥ

aiśānyāṃ diśi yaḥ kumbhaḥ pūrvastasyāṃ tu sāgaraḥ //
āyātu śīghrameveha taraṅgormisamākula

śīghramabhyehi nilaya yādasāṃ pūrvasāgara //
taraṅgaśatasaṃkrāṃta bālabhāskaramaṇḍala

āgneye ca samāyāta dakṣiṇe dakṣiṇaḥ śivaḥ //
bahuratnaprabhāpuñjavimiśra salilāśaya

yādasāṃ nilayābhyehi kṣipraṃ dakṣiṇasāgara //
taraṅgadhauta pādāgra trikūṭaśikharācyuta

paścimāyāḥ samāyātu kumbhe dakṣiṇapaścime //
ratnapuñjamahājvālāvirājitamahodaka

taraṅgamaṇḍitābhyehi kṣipraṃ paścimasāgara //
astārkabimbasaṃkrāntagatamaṇḍaladurdṛśa

uttaraśca tathābhyetu kumbhe vai paścimottare //
himādriśikharacchāyākṣīrodasadṛśaḥ prabhuḥ

mahāpavitrasalila śīghramuttarasāgara //
ihābhyehi mahābhāga yajamānābhivṛddhaye

āvāhitānāṃ kartavyaṃ bhūmau kṛtvā tataḥ śiraḥ //
praṇāmamabhivādaṃ ca tato mantramudīrayet

bhavatāṃ hi prasādena bhavatāṃ pratipūjane //
prayatiṣye yathāśaktyā tanme'nujñātumarhatha

yuṣmākaṃ pūjanaṃ kartuṃ kena śakyaṃ yathāvidhi //
yuṣmatpūjāvihīnena kena labhyaṃ mahatphalam

tataḥ kartuṃ yathāśaktyā bhavatāṃ pratipūjanam //
varadāḥ prayatiṣyāmi tanme'nujñātumarhatha

svāṃsvāṃ diśamadhiṣṭhāya dikpālā dīptatejasaḥ //
utsādayantu sakalānvighnānyānsamupasthitāna

vināyakā vighnakarāḥ samogrā yajñadviṣo ye piśitāśanāśca //
siddhārthakairvajrasamānakalpairmayā nirastā vidiśaḥ prayāntu

iti śrīviṣṇudharmottare tṛtīyakhaṇḍe mārkaṇḍeyavajrasaṃvāde brahmādidevāhvāna varṇano nāma caturuttaraśatatamodhyāyaḥ

3.105
mārkaṇḍeya uvāca //
lokānāvāhayiṣyāmi haṃsarūpānmanoharān//
āyāntu vāhanatvena ye sthitāḥ parameṣṭhinaḥ

vṛṣamāvāhayiṣyāmi catuṣpādaṃ kakudminam //
vṛṣābhyehi mahābhāga dharmamūrte varaprada

śūlamāvāhayiṣyāmi guṇādhāraṃ mahādyutim//
ehi śūla mahābhāga daityanāthagaṇāntaka

ahamāvāhayiṣyāmi devaṃ nandīśvaraṃ prabhum //
abhyehi nandinbhagavan sarvalokanamaskṛta

āvāhayāmi varadaṃ vīrabhadraṃ mahābalam //
abhyehi vīrabhadrāya mahāgaṇagaṇeśvara

jvaramāvāhayiṣyāmi tripādaṃ tribhujaṃ prabhum //
jvarābhyehi mahābhāga satataṃ caraṇojjvala

devīmāvāhayiṣyāmi bhadrakālīṃ sukhapradām //
āgaccha varade durge sarvalokanamaskṛte

āvāhayāmi paulomīṃ varadāṃ nityanandinīma //
śakrapatni tvamabhyehi varade kāmarūpiṇi

nāgamāvāhayipyāmi tathairāvaṇasaṃjñitam //
ihābhyehi mahābhāga śakranāga jayāvaha

vajramāvāhayiṣyāmi sarvabhedakamāśugam //
śīghraṃ vajra tvamabhyehi sarvaduṣṭanibarhaṇa

hayānāvāhayiṣyāmi chandorū pānmanoharān //
āgacchantu mamādyeha turagā vyomagocarāḥ

ahamāvāhayiṣyāmi daṇḍasaṃjñaṃ balotkaṭam //
daṇḍa śīghramihābhyehi mahābalaparākrama

ahamāvāhayiṣyāmi piṅgalaṃ sumahābalam //
lokasākṣistvamabhyehi piṅgalāya mahābala

dhvajamāvāhayiṣyāmi citraṃ sūryasamaprabham //
dharma śīghraṃ tvamabhyehi sūryadhvajagatācyuta

devīmāvāhayiṣyāmi sūryabhāṃ kāmarūpiṇīm //
devi tvaṃ tūrṇamāgaccha sarvalokanamaskṛte ///

rājñīmāvāhayiṣyāmi sūryapatnīṃ surūpiṇīm//
āgaccha varade rājñi jagaddhāriṇi pūjite

ahamāvāhayiṣyāmi sūryapatnīṃ suvarcasām//
dhyāye devi tvamāgaccha kṛtākṛtavicāriṇi

ahamāvāhayiṣyāmi daśacandramaso hayān //
sarve śīghramihāyāntu candrāśvāḥ kāmarūpiṇaḥ//.//
ahamāvāhayiṣyāmi kāntiṃ tridaśavallabhām //
kānte śīghraṃ tvamabhyehi śaśāṅkadayite śubhe

śobhāmāvāhayiṣyāmi kāṅkṣitāṃ bhuvaneśvarīm //
śobhe śīghraṃ tvamabhyehi sarvalokaikasundari

dinamāvāhayiṣyāmi samastadhvāntanāśakam //
dina śīghraṃ tvamabhyehi darśitākhilamaṇḍala // //
rātrimāvāhayiṣyāmi sarvabhūtasukhāvahām //
rātri devi tvamabhyehi sarvabhūtavaraprade /२२//
sandhyāmāvāhayiṣyāmi devīṃ brāhmaṇapūjitām //
āgaccha varade sandhye sarvabhūtanamaskṛte

svāhāmāvāhayiṣyāmi vahnerbhāgaṃ vibhāvarīm //
svāhebhyehi mahābhāge varade kāmarūpiṇi

vedānāvāhayiṣyāmi śubharūpadharānaham //
āyāntu vāhanatvena dhūmraketuvyavasthitāḥ

āvāhayiṣye mahiṣaṃ mahābalaparākramam //
āgaccheha mahābhāga sarvaduṣṭanibarhaṇa

daṇḍamāvāhayiṣyāmi sarvavāhanapūjitam //
ehi daṇḍa mahābhāga sarvasattvavināśana

devīmāvāhayiṣyāmi dhūmrorṇāṃ cārulocanām //
āgaccha devi dhūmrorṇe sarvalokanamaskṛte

kālamāvāhayiṣyāmi sarvatrāhatapūjitam //
kālābhyehi mahābhāga sarvasattvabhayaṅkara

mṛtyumāvāhayiṣyāmi devīṃ sarvaharāmaham //
devi mṛtyo tvamabhyehi sarvage kāmarūpiṇi

āvāhayāmi varadaṃ citraguptaṃ sukhapradam //
citragupta samabhyehi sarvatrasamadarśana

ahamāvāhayiṣyāmi virūpākṣaṃ mahābalam //
virūpākṣa samabhyehi niśācaragaṇeśvara

uṣṭramāvāhayiṣyāmi mahāmohamiti śrutam //
uṣṭrābhyehi mahābhāga mahāgrīva mahāgate

gaurīmāvāhayiṣyāmi jalādhipatisundarīm //
ehi gauri mahādevi varade kāmarūpiṇi

haṃsānāvāhayiṣyāmi samudreṇa supūjitān//
āyāntu varadā haṃsā rasācārā vihaṅgamāḥ

pāśamāvāhayiṣyāmi sarvākarṣaṇatatparam //
pāśābhyehi mahābhāga sarvasattvavaśaṅkara

gaṅgāmāvāhayiṣyāmi sarvakalmaṣanāśinīm //
gaṅge śīghraṃ tvamabhyehi pīyūṣasadṛśodake

ahamāvāhayiṣyāmi yamunāṃ ca yamānujām //
āgaccha yamune devi sarvakalmaṣanāśini

śivāmāvāhayiṣyāmi vāyoḥ patnīṃ prabhāvatīm //
śivebhyehi mahābhāge varade kāmarūpiṇi

ahamāvāhayiṣyāmi śibikāṃ paramāyatām //
śibike tvamihābhyehi sarvasattvasukhaṅkari

naramāvāhayiṣyāmi narādhipativāhanam //
nara śīghraṃ tvamabhyehi tathā nṛpatināyaka

śaṅkhamāvāhayiṣyāmi nidhipravaramuttamam //
śīghraṃ śaṅkha tvamabhyehi dhanādhipativallabha

padmamāvāhayiṣyāmi nidhipravaramuttamam //
padma śīghraṃ tvamabhyehi mahāvibhavakāraka

devīmāvāhayiṣyāmi pārvatīṃ haravallabhām //
devi śīghraṃ tvamabhyehi mahāvibhavakārike

ahamāvāhayiṣyāmi jayantaṃ śakranandanam //
jayanta śīghramabhyehi sarvāsuravimardana

āvāhayiṣye varadaṃ puṣkaraṃ kāmagaṃ śubham //
puṣkara tvamihābhyehi sarvajñānaprakāśaka

jyotsnāmāvāhaviṣyāmi trailokyasyaikasundari //
āgaccha varade jyotsne sarvabhūtasukhaṅkari

ahamāvāhayiṣyāmi tvāmeva nalakūbaram //
samabhyehi mahābhāga dhanadasyātmasambhava

āvāhayiṣyāmi tathā raviputraṃ yamāgrajam //
sūryaputra samabhyehi bhaktakalyāṇakāraka

dharmamāvāhayiṣyāmi sarvalokasukhāvaham //
dharmābhyehi mahābhāga jagatāṃ paripālaka

arthamāvāhayiṣyāmi sarvalokasukhāvaham //
arthabhyehi mahābhāga sarvabādhāvināśaka

kāmamāvāhayiṣyāmi phalaṃ sarvasya kāraṇa //
kāma śīghraṃ tvama bhyehi sarvaprāṇihṛdi sthita

rātrimāvāhayiṣyāmi devīṃ sarvajagatpriyām //
abhyehi varade devi rati tvamaparājite

nidrāmāvāhayiṣyāmi sarvalokasukhapradām //
āgaccha varade nidre trailokyaparimohini

āvāhayiṣye varadāṃ mahādevīṃ sarasvatīm//
śīghraṃ devi tvamabhyehi sarvakāmavaraprade

ahamāvāhayiṣyāmi tathā dhanvatariṃ prabhum //
dhanvantare tvamabhyehi kṣīrodārṇavasambhava

ahamāvāhayiṣyāmi uccaiḥśravasamaśvapam //
hayarāja samabhyehi kṣīrodārṇavasaṃbhava

yeṣāmāvāhanaṃ proktaṃ teṣāṃ mantramidaṃ paṭhet //
aśvinau praṇataḥ staumi darbhapāṇiratandritaḥ

āvāhanānāṃ ca gaṇaṃ tathoktaṃ mahāśubhaṃ pāpaharaṃ pavitram //
āvāhitāḥ sannihitāstvavaśyaṃ devā bhavantyuttamavaṃśajātāḥ

iti śrīviṣṇudharmottare tṛtīye khaṇḍe mārkaṇḍeyavajrasaṃvāde lokādyāvāhanavarṇano nāma pañcottaraśatatamo'dhyāyaḥ