Vishnudharmottara Purana · Chapter 3.106.110

3.106
mārkaṇḍeya uvāca //
āvāhanānyato vacmi yānyahaṃ yadunandana //
teṣāmante paṭhecchlokaṃ pratyekasya mahābhuja

yājakaṃ yajamānaṃ ca śreyasābhyetya yojaya //
idamarghyamidaṃ pādyaṃ dhūpoyaṃ pratigṛhyatām

āvāhayāmyahaṃ devaṃ vāsudevaṃ jagatpatim //
amṛtādhmātameghābhaṃ vidyudṛśavasāsasam

caturvaktraṃ mahābāhuṃ caturvedadharaṃ prabhum //
caturāśramagoptāraṃ cāturvarṇyadharaṃ tathā

caturyugaṃ catuṣketuṃ caturmūrtidharaṃ param //
caturaṃghritanuṃ nāthaṃ caturvidhavibhāvanama

jarāyujasya kartavyaṃ tathā cāṇḍodbhavasya ca //
sarvagaṃ varadaṃ nityaṃ sūkṣmaṃ sthūlamajaṃ vibhum

ātmasthaṃ ca bahisthaṃ ca dūrasthaṃ cāntikaṃ ca tam //
guṇādhāraṃ guṇairhīnaṃ guṇātītaṃ guṇottaram

saguṇaṃ nirguṇātmānaṃ cājeyaṃ jagataḥ parama //
ehi me puṇḍarīkākṣa śaraṇāgata vatsala

kṣaraparyantavaktrāntarnirastāsuramaṇḍala //
gadāveganirastogradaityanāthagaṇeśvara

utphullacārukamalavirājitakarāmbuja //
śaṅkhanādodbhavaśvāsamūḍhīkṛtamahāsura

mahīkarāmbujanyastacaraṇadvayarājita //
kaustubhodbhūtagojālahatāsuravilocana

vanamālāṅkitoraska kirīṭodbhāsitānana //
yajña yajñopayajñāṅgayajñayone jagadguro

sarvakāmapradācintya sarvaśaktibalānvita //
āvāhayāmyahaṃ devaṃ saṅkarṣaṇamayonijam

śaśāṅkaśatasaṅkāśaṃ sajalāmbudavāsasam //
krodhāgniśamitāśeṣakalpāṃtabhuvanatrayam

vāṅmanaḥkāyasambhūtamalatritayanāśanam //
ehi saṃkarṣaṇācintya deva bhaktajanapriya

lāṅgūlākṛṣṭadaityendra dīnekṣaṇanirīkṣaṇa //
musalāgravinirbhinna tamomūrtivināśana

hārdamūrte niśīthasya tamasaśca vināśaka //
devamāvāhayiṣyāmi pradyumnamaparājitam

dūrvāṅkuradalaśyāmaṃ śaśāṅkāṃśusamāmba ram //
kāmaṃ kāmapradaṃ śāntaṃ kamanīyaṃ suśobhitam

sarvamānabhṛtāṃ devaṃ manoviṣayagocaram //
pradyumnābhyehi deveśa pradyotitacarācara

tejomūrte durādharṣaṃ sūryakoṭisamaprabha //
ajñātamadhyaparyanta devārigaṇanāśana

cāpakṛṣṭivinirmuktaśarāhatajagattraya //
āvāhayāmyahaṃ devaṃ cāniruddhaṃ jagadgurum

padmapatrāgrasaṅkāśaṃ raktāmbaravibhūṣaṇam //
aruddhamārgaṃ sarvatra dīptānalasamaprabham

kāryaṃ paramamīśānaṃ jagatkāraṇakāraṇam //
aniruddha tvamabhyehi vyāptāśeṣacarācara

ākāśatulyasadvajravidāritasurāhita //
carmasañchāditāśeṣabhuvanāditya vikrama

(sarveṣāṃ prāṇināṃ karmma saṃsāraparipālaka

)
āvāhayiṣye varadaṃ cānanta dīptatejasam //
phaṇāvaligatāśīrṣamahīmaṇḍaladhāriṇam

lāṃgalāliṅgatakaraṃ musalāsaktavigraham //
mahocchritena tālena tathā cihnena rājitam

ehyananta mahābhāga śeṣāhe dharaṇīdhara //
śaśāṅka śatasaṅkāśa tathāmbarasuśobhita

ādhāraḥ sarvabhūtānāṃ tvameko bhūtabhāvanaḥ //
tvayedaṃ dhāryate viśvaṃ trailokyaṃ ca jagatpate

lakṣmīmāvāhayiṣyāmi viṣṇorvakṣasi saṃsthitām //
padmānanāṃ padmakarāṃ śaśāṃkasadṛśāmbarām

hitasthāṃ sarvalokasya varadāṃ kāmarūpiṇīm //
sarvagāṃ sarvajananīṃ devīṃ tribhuvaneśvarīm

āgaccha varade lakṣmi durdhare bhūtabhāvane //
haripriye viśālākṣi sarvalokanamaskṛte

yatra tvaṃ tatra sakalaṃ trailokyaṃ varavarṇini //
yunakṣi bhogaiḥ sakalaṃ smṛtiprāptaṃ janaṃ śubham

tārkṣyamāvāhayiṣyāmi manomārutaraṃhasam //
pakṣavātasamuddhūtasamastabhuvanatrayam

garuḍairhi samabhyehi dīptānalacayopama //
mahāviṣatamograstanirviṣīkaraṇācyuta

tālamāvāhayiṣyāmi ketuṃ saṃkarṣaṇasya tu //
ehi me bhagavam̐stāla samastabhuvaneśvara

jhaṣamāvāhayiṣyāmi kāmaketuṃ varapradam //
ehi me makarāgryeha samastabhuvaneśvara

ṛṣyamāvāhayiṣyāmi ṛṣirājaṃ mahābalam //
ehi ṛṣya mahābhāga karmamūrte durāsada

devamāvāhayiṣyāmi nṛsiṃhaṃ jñānarūpiṇam //
daṃṣṭrākarālavadanamalātamasitekṣaṇam

sahasrayamasakrodhaṃ sahasrendraparākramam //
sahasradhanadanaṃ sphītaṃ manasopyatiśīghragam //

vidyujjihvaṃ vyāditāsyaṃ bhrukuṭīkuṭilānanam //
vahnijvālāvalīpuñjadurnirīkṣyamukhaśriyam

āgaccheha nṛsiṃhādya mahābalaparākrama //
vajratīkṣṇanakhākrāntamahādaityendrajīvita

ajñānadhvāntamātaṅgabhaṅgavispaṣṭakesara //
mahāmantrakapāṭogradāruṇācintyavikrama

devamāvāhayiṣyāmi kāpilīṃ tanumāśritam //
tejonidhānamajitaṃ sāgarātmajavāḍavam

ehi me kapilādyeha paramātmansanātana //
dhyānavīkṣitasadbhāva sāṃkhyamārgapravartaka

devamāvāhayiṣyāmi nṛvarāhaṃ mahābalam //
bhinnāñjanacayaśyāma līloddhṛtavasundhara

āgaccha nṛvarāheha hiraṇyākṣavināśana //
śeṣābhabhogavinyastamahācaraṇapaṅkaja

śaṅkhanādodbhava trāhi niyantā suranāyakam //
devamāvāhayiṣyāmi varāhaṃ varadarpitam

bālendulekhādaṃṣṭrāgravibhāsitajagattraya //
vismayotphullanayana bhūmivīkṣitavigraha

bālendutulyadaṃṣṭrāgra līloddhṛtavasundhara //
ehi me bhagavandeva varāhāmitavikrama

nirastāśeṣadaityeṃdra dīnabhaktajanoddhara //
dharmamāvāhayiṣyāmi sarvabhūtasukhāvaham

durvijñeyaṃ bahudvāraṃ khalamūrtidurāsadam //
ehi dharma mamābhyehi bhuvanatrayapālaka

samastapāpaśamana sarvabādhāvināśana //
rudramāvāhayiṣyāmi tejomūrtiṃ durāsadam

aiśvaryamatigambhīraṃ sarvasaṃhārakārakam //
ehi me bhagavannrudra jaṭāmaṇḍala durdṛśa

nirdagdhāśeṣabhuvana tṛtīyekṣaṇatejasā //
devamāvāhayiṣyāmi brāhmaṇaṃ dīptatejasam

caturmukhaṃ caturbāhuṃ guṇādhīnaṃ guṇottaram //
devadeva tvamabhyehi pitāmaha sureśvara

samastabhuvanādhyakṣa jagatkāraṇakāraṇa //
bhūmimāvāhayiṣyāmi dhāriṇīṃ sarvadehinām

sarvabhūtapratiṣṭhāṃ ca kṣitiṃ kṣoṇīṃ sarasvatīm //
ehi me varade devi vasudhe bhūtabhāvini

sarvāśraye mahābhāge devavadbhayahāriṇi

śaṅkhamāvāhayiṣyāmi nabhomūrtimathāvyayam

śabdayoniṃ nirālambaṃ samastabhuvanāśrayam //
ehyehi śaṅkhapravara pāñcajanya mahāsvana

śabdamātrahatāśeṣamahādānavamaṇḍala //
padmamāvāhayiṣyāmi samastabhuvanāśrayam

apāṃ mūrtimayaṃ saumyaṃ puṇḍarīkamiti smṛtam //
ehi padma mahābhāga bhūtabhavyabhavaprabho

lakṣmīnilaya vistīrṇa brahmayone jaganmaya //
cakramāvāhayiṣyāmi kṣaratparyantamaṇḍalam

vajranābhaṃ viśālākṣaṃ vāyumūrjitamavyayam //
kālacakraṃ jagaccakraṃ dharmacakraṃ sudarśanam

nityaṃ satatagaṃ devaṃ tṛptaṃ dānavaśoṇitaiḥ //
ehi cakrāmitaśita jagatpālanatatpara

devendrahṛdayatrāsatamonāśanatatpara //
gadāmāvāhayiṣyāmi tejomūrtiṃ durāsadām

gāyatrīṃ devajananīṃ kālarātrīṃ bhayaṅkarīm //
ehi kaumodaki gade samastāsuranāśini

yāsāṃ tvaṃ gahvarā proktā vaiṣṇavī tu sudurdharā //
ahamāvāhayiṣyāmi sāvantaṃ nāma lāṅgalam

āgaccha lāṅgalāsyeha vyāhṛtiṃ bhuvanatrayam //
ahamāvāhayiṣyāmi saudhanvaṃ musalaṃ prabhum //

āgaccha musalādyeha devārigaṇasūdana //
cāpamāvāhayiṣyāmi śārṅgaṃ ripuniṣūdanam

āgaccha cāpa varada devāsuragaṇapriya //
śaramāvāhayiṣyāmi mohanaṃ ripumohanam

ehi viddhāribalaja gacchāristribhuvaneśvara //
carma cāvāhayiṣyāmi khyātamāvaraṇeti yat

/
carmābhyehi viśāla tvaṃ sarvasyāvaraṇaṃ smṛtam //
khaḍgamāvāhayiṣyāmi nandakaṃ nāma nāmataḥ

ehi khaḍga mamāśeṣadaityanāthakulāntaka ///
ahamāvāhayiṣyāmi vanamālāṃ sukhāvahām

vanamāle tvamabhyehi buddhāśeṣajagattraye //
maṇimāvāhayiṣyāmi kaustubhaṃ keśavāṅgagam

/
kaustubha tvamihābhyehi marīcivikacodbhava //
devamāvāhayiṣyāmi hariṃ hayaśirodharam

śaśāṅkaśatasaṅkāśa vedoddharaṇaniścita ///
hayagrīva tvamabhyehi śaṅkhacakragadādhara

vedāharaṇaduḥkhārtasamāśvāsitapadmaja //
ahamāvāhayiṣyāmi ṛgvedaṃ padabhūṣitam

/
ṛgveda tvamihābhyehi brahmamūrte varaprada //
ahamāvāhayiṣyāmi yajurvedamatipriyam

yajurveda tvamabhyehi deveśagaṇanāyaka /// /
ahamāvāhayiṣyāmi devamātharvaṇaṃ śubham

āgacchātharvavedeha sarvakarmaphalaprada //
devamāvāhayiṣyāmi bhogibhogāsanasthitam

bhogibhogāsanāsīna samāgaccha jagadguro //
devamāvāhayiṣyāmi bhogibhogaśayaṃ prabhum

lakṣmīsahāyaṃ varadaṃ lokasākṣiṇamavyayam //
ehyehi puṇḍarīkākṣa bhogibhogāśayācyuta

trailokyanātha govinda madhukaiṭabhasūdana //
devamāvāhayiṣyāmi viṣṇudevaṃ trivikramam

//
samastabhuvanātīta pādākrāntajagattraya //
trivikrama tvamabhyehi daityadīnākṣivīkṣita

vikacotphullanayana tridaśaiḥ śatamīkṣita //
ahamāvāhayiṣyāmi viśvarūpadharaṃ vibhum

śvasantamaniśaṃ vaktrairbhūtagrāmamaśeṣataḥ //
sṛjaṃti ca mahārāja sarvabhūtānyanekaśaḥ

dhārayantaṃ śarīreṇa sarvaṃ jagadidaṃ tathā //
viśvarūpa tvamabhyehi sarvāyudhavibhūṣita

sarvabhūtena tātena nānāvarṇadharāpaha //
dehasthāśeṣabhuvana jagatkāraṇakāraṇa

durnirīkṣyātigambhīra māyādarśitavigraha //
devamāvāhayiṣyāmi matsyaṃ salilagocaram

matsyadeva tvamabhyehi lokajīvadharācyuta //
haṃsamāvāhayiṣyāmi devaṃ jñānapradaṃ vibhum

haṃsa śīghraṃ tvamabhyehi sarvajñānavināśana//
kūrmamāvāhayiṣyāmi dhṛtamandaraparvatam

ehyehi bhagavankūrma śyāmotpattikarācyuta //
devamāvāhayiṣyāmi strīrūpaṃ dharmamīśvaram

strīrūpadhārinnabhyehi surasomapradāyaka //
naramāvāhayiṣyāmi devaṃ tapasi niṣṭhitam

narābhyehi mahābhāga dharmamūrte jagatpate //
devamāvāhayiṣyāmi tathā nārāyaṇaṃ prabhum // ९५ /
nārāyaṇa samabhyehi sarvapāpaharāvyaya //
harimāvāhayiṣyāmi deveśaṃ kanakaprabham

hare deva tvamabhyehi paradarpavināśaka //
kṛṣṇamāvāhayiṣyāmi sajalāmbudasannibham

kṛṣṇābhyehi mahābhāga devadeva jagatpriya //
devamāvāhayiṣyāmi dattātreyaṃ taponvitam // ९८
dattātreya tvamabhyehi vedoddharaṇatatpara //
ahamāvāhayiṣyāmi vālmīkiṃ tapasāṃ nidhim

vālmīke tvamihābhyehi vedoddharaṇatatpara //
rāmamāvāhayiṣyāmi hatakṣattriyamaṇḍalam

bhāgarvābhyehi me nātha jaṭāmaṇḍaladurdṛśa //
āvāhanaṃ kariṣyāmi paraśuṃ dīptatejasam

āgaccha paraśo śīghraṃ lakṣīkṛtavasundhara //
pṛthumāvāhayiṣyāmi cakravartinamūrjitam

pṛtho śīghraṃ tvamabhyehi pṛthvīnātha mahābala //
rāmamāvāhayiṣyāmi kṛtarākṣasanigraham

rāma śīghraṃ tvamabhyehi dharmaseto durāsada //
ahamāvāhayiṣyāmi pradyumnaṃ bharataṃ vibhum

bharata tvamihābhyehi kṛtagandharvanigraha //
ahamāvāhayiṣyāmi lakṣmaṇaṃ ripunāśanam

lakṣmaṇa tvamihābhyehi meghanādāstrabhāskara //
ahamāvāhayiṣyāmi śatrughnaṃ dīptatejasam

śatrughna śīghramabhyehi lavaṇāsuramardana //
vyāsamāvāhayiṣyāmi vedavyāsaṃ jagadgurum

vedavyāsa tvamabhyehi sarvadharmapradarśaka //
ahamāvāhayiṣyāmi dharmaputraṃ yudhiṣṭhiram

yudhiṣṭhira tvamabhyehi sarvadharmabhṛtāṃvara //
ahamāvāhayiṣyāmi bhīmaṃ mārutaputrakam

bhīmasena tvamabhyehi śatrunāśa tamohara //
ahamāvāhayiṣyāmi pārthaṃ ripuniṣūdanam

arjunābhyehi me śīghraṃ laghvīkṛtavasundhara //
ahamāvāhayiṣyāmi nakulaṃ rūpaśobhitam

nakula tvamihābhyehi śaṅkhacarmmadharācyuta //
ahamāvāhayiṣyāmi sahadevaṃ raṇapriyam

sahadeva tvamabhyehi rūpadraviṇasaṃyuta //
kṛṣṇāmāvāhayiṣyāmi svargalakṣmīṃ manoharām

yājñaseni tvamabhyehi lakṣīkṛtavasundhare //
sītāmāvāhayiṣyāmi rāmapatnīṃ yaśasvinīm

sīte devi tvamabhyehi mahītalasamukṣite //
ahamāvāhayipyāmi devakīṃ kṛṣṇamātaram

devaki tvaṃ samabhyehi devamātarjagatpriye //
ahamāvāhayiṣyāmi yaśodāṃ jagataḥ priyām

yaśode tvamihābhyehi saṃvardhitajanārdane //
devīmāvāhayiṣyāmi ekānāśīti viśrutām

ekānāśe tvamabhyehi kṛṣṇarakṣārthamudyate //
devīmāvāhayiṣyāmi rukmiṇīṃ kṛṣṇavallabhām

rukmiṇi tvamihābhyehi jagatāmekasundari //
devīmāvāhayiṣyāmi satyabhāmāṃ manoharām

satyabhāme tvamabhyehi devi keśavavallabhe //
devīstvāvāhayiṣyāmi kṛṣṇapatnīrahaṃ śubhāḥ

devyaḥ sarvāḥ samāyāntu gāndhārīpramukhāstviha //
rāmamāvāhayiṣyāmi madavibhrāntalocanam

kuṇḍalaikadharaṃ śāntaṃ vanamālāvibhūṣitam //
ehi rāma mahābhāga revatīdayitācyuta

hatapralambasīrāgravyākṛṣṭayamunodaka //
kṛṣṇamāvāhayiṣyāmi toyapūrṇāmbudacchavim

cāṇūrabaladarpaghnaṃ kaṃsāsuravināśanam //
ehi kṛṣṇa mahābhāga lakṣīkṛtavasundhara

nirastadānavaśreṣṭha dhṛtagovardhanācala //
ahamāvāhayiṣyāmi pradyumnaṃ makaracchavim

devāriśambaraprāṇataskaraṃ rativallabham //
pradyumna tvamihābhyehi parasainyavināśana

ahamāvāhayiṣyāmi aniruddhaṃ jagadgurum//
bāṇāsuramahāsainyasamudra vaḍavānala

aniruddha tvamabhyehi mahābalaparākrama //
khaḍgapāṇe mahābhāga ūṣāhṛdayavarddhana

sāmbamāvāhayiṣyāmi gadāpāṇiṃ mahābalam //
ehi sāmba mahābhāga nāśitāśeṣadānava

ahamāvāhayiṣyāmi yuyudhānaṃ balotkaṭam //
yuyudhāna tvamabhyehi dīrghabāho'rimardana

ahamāvāhayiṣyāmi saubhadramaparājitam //
vasubhadraṃ ca dharmajñaṃ nīlāmbaradharāvubhau

vāsudevapratīhārau prāptahastau sulocanau //
taptajāmbūnadākārau mahābalaparākramau

subhadra śīghramāgaccha pūrvadvārasya vāmataḥ //
gaṇaiḥ sānucaraiḥ sārddhaṃ bhava sannihitaḥ sadā

ahamāvāhayiṣyāmi tathāṣāḍhaṃ balānvitam //
yajñatātaṃ ca dharmajñaṃ pītāmbaradharāvubhau

nīlajīmūtasaṅkāśau tathā mudgaradhāriṇau //
saṅkarṣaṇapratīhārau cārurūpau manoharau

āṣāḍha tvamihāgaccha dakṣiṇadvāravāmataḥ //
gaṇaiḥ sānucaraiḥ sārdhaṃ bhava sannihitaḥ sadā

yajñatāta tvamabhyehi dvāradakṣiṇato bhava //
gaṇaiḥ sānucaraiḥ sārdhaṃ bhava sannihitaḥ sadā

( jayamāvāhayiṣyāmi dīptatejasamacyutam //
vijayaṃ ca viśālaṃ ca pāṭalāmbaradhāriṇau

śaśāṃkāṃśupratīkāśau tathobhau khaḍgadhāriṇau //)
pradyumnasya pratīhārau kāmadevau suvarcasau

jaya śīghraṃ tvamabhyehi paścimadvāravāmataḥ //
gaṇaiḥ sānucaraiḥ sārdhaṃ bhava saṃnihitaḥ sadā

vijaya tvamihābhyehi dvāradakṣiṇato bhava //
gaṇaiḥ sānucaraiḥ sārdhaṃ bhava sannihitaḥ sadā

ahamāvāhayiṣyāmi tathā modaṃ jagatpriyam //
pramodaṃ ca mahāvīryaṃ śvetāmbaradharāvubhau

sindūrāruṇasaṅkāśau śaktihastau balotkaṭau //
aniruddhapratīhārau mahābalaparākramau

āmoda śīghramabhyehi dvāradakṣiṇato bhava //
gaṇaiḥ sānucaraiḥ sārdhaṃ bhava sannihitaḥ sadā

sarvānāvāhayiṣyāmi vāsudevagaṇānaham //
vāsudevasamākārānvāsudevaparākramān

pradyumnasya samākārānpradyumnābhaparākramān //
pradyumnasya gaṇāḥ śīghramāyāṃtu bhuvaneśvarāḥ

sarvakāmapradā vīrā sarveśāḥ sarvaśaktayaḥ //
sarvānāvāhayiṣyāmi aniruddhagaṇānaham

aniruddhasamākārānaniruddhaparākramān //
aniruddhagaṇāḥ śīghramāyāntu bhuvaneśvarāḥ

sarvakāmapradā vīrā sarveśāḥ sarvaśaktayaḥ //
prādurbhāvagatasyeva viṣṇoramitatejasaḥ

noktamāvāhanaṃ yatra vāsudevoktamañjasā //
kāryamāvāhanaṃ tatra sarvagasya mahātmanaḥ //
atha vā viṣṇurūpoktametatsāraṃ taveritam

āvāhane ye kathitāstu mantrā jñeyāsta eveha vibodhane'pi //
āvāhane tatra vibodhane tu budhaiḥ prayojyaṃ yaduvaṃśanātha

iti śrīviṣṇudharmottare tṛtīyakhaṇḍe mārkaṇḍeyavajrasaṃvāde śeṣasarvadevāvāhanavarṇano nāma ṣaḍuttaraśatatamo'dhyāyaḥ

3.107
mārkaṇḍeya uvāca //
prokto vibodhane vīra maṃtro hi na divaukasām //
vāsudevasya vakṣyāmi tava rājannibodhanam

devaṃ vibodhayiṣyāmi vāsudevamajaṃ vibhum //
anādimadhyaparyantaṃ mahābalaparākramam

anantaṃ sarvagaṃ nāthaṃ mahadbhyopi mahattaram //
sūkṣmātisūkṣmaṃ dūrasthaṃ sannikarṣagataṃ tathā

nārāyaṇaṃ mṛdukaraṃ devaṃ śārṅgadhanurdharam //
atasīkusumaśyāmaṃ pītavāsasamacyutam

vibuddhaḥ puṇḍarīkākṣaḥ śaraṇāgatavatsalaḥ //
saṃsārasarasīmagnabhagnanāgakṛtakṛpa

cakraparyantacchinnāgra duḥsvapnagrāhadurdhara //
saṃsevitamahāyoganidrāsammīlitekṣaṇa

śeṣāhibhogaparyantavistīrṇaśayanācyuta //
tatphaṇāvaliratnāṃśuvitānakakṛtottara

lakṣmīsaṃvāhyamānāṃghrikamaladvayarājita //
nirṇāśitamahādaitya kṛtakṣemajagattraya

śītāṃśuraśmijālābha dugdhāmbhodhiśayācyuta //
bhaktānāṃ narakaśvabhranipātabhayanāśana

teṣāṃ svalokagamanadattahastāvalambana //
saṃsārasāgarottāramahāpota janārdana

nāmagrahaṇamātreṇa ghanāvakṣayakāraka //
svatimātrakṛtāśeṣa manorathamahāphala

trivikramakramākrāntabrahmāṇḍottaramaṇḍapa //
bālendukalpadaṃṣṭrāgra līloddhṛtavasundhara

ete vibodhayanti tvāṃ devāḥ sendrapurogamāḥ //
ṛṣayaśca mahābhāgāḥ trailokyāmaladarśinaḥ

vibodhayati deva tvāṃ brahmā śubhacaturmukhaḥ //
yajurvedo gadābhistu gīrbhidevavarācyuta

tyaja vibudhagaṇārisūdanādya nidrāṃ bhava bhuvanapateghasaṃcayāpaho me //
tvayi bhavati hi yasya nātha bhaktirugrā gatiratiśayanī tu tasya daivatebhyaḥ

iti śrīviṣṇudharmottare tṛ० khaṇḍe mārkaṇḍeyavajrasaṃvāde vāsudevavibodhano nāma saptottaraśatatamo'dhyāyaḥ

3.108
// vavra uvāca // //
bhagavansarvadevānāṃ mūrtayaḥ parikīrtitāḥ //
pañcabhūtayutā yasmāttasmātteṣāṃ bhṛgūttama

āvāhanavidhiḥprokto yattadyuktatamaṃ matam //
āvāhitāḥ samāyānti yatra kāmāvasāyitām

āśritya mahimāṃ prāptiṃ laghimāṃ ca tathā surāḥ //
viṣṇuḥ sarvagato devo mahadbhyopi mahattaraḥ

sūkṣmebhyaścātisūkṣmaśca sarvavyāpī jaganmayaḥ //
nāsti kiñcijjagatyasminyatra nāsti janārdanaḥ

sadasacca mahābhāga tena vyāptaṃ mahātmanā //
āvāhanena kiṃ kāryaṃ tasya sarvagatasya tu

maheṃdriya mahābhāga sarvatra paripacyate //
etanme saṃśayaṃ chindhi tvaṃ hi sarvaviducyase

mārkaṇḍeya uvāca //
sarvadevagaṇā yadvadvajra piṇḍitamūrtayaḥ //
prādurbhāvagatopyevaṃ devo madhuniṣūdanaḥ

pañcabhūtayutā mūrtiḥ sarvā bhavati maṇḍitā //
ādyantamadhyasaṃyuktā sarvasyaiva yadūttama

prādurbhāvagato viṣṇuryathā devagaṇāstathā //
āhitaḥ sannihito bhavatīti viniścayaḥ

devasya dvividhā mūrtiḥ parā caiva tathāparā //
parāyāḥ pauruṣī mūrtiḥ pañcabhūtavirājitā

tayā samūrtirbhavati sarvagaḥ parameśvaraḥ //
puruṣeṇa vinā loke na kiñcidiha vidyate

anādimadhyanidhanastvaprameyatanustathā //
sarvendriyamanāḥ śaktiḥ sarvataḥ sa tathā nṛpa

prādurbhāvagatasyāpi tasya yā sarvaśaktitā //
icchataḥ sā vinirdiṣṭā na tveṣānicchato nṛpa

puruṣatve hyanantasya yā rājansarvaśaktitā //
nisargasiddhā sā jñeyā sadā sarvatra yādava //

āvāhanamathātrāpi kriyate yajjagatpateḥ //
nityaṃ saṃnihitasyāpi sarvatra parameṣṭhinaḥ

kevalaṃ kāraṇaṃ tatra manasastuṣṭikāraṇam //
āvāhito mayā devaḥ sthāne sannihito'pi ca

āvāhanaṃ svatṛptyarthaṃ puruṣasya yathā sthitam //
tathāpyarcā mahābhāga svatuṣṭyarthaṃ prayojanam

nityatṛptasya kiṃ tasya kāryaṃ bhavati cārcayā

kevalaṃ bhaktituṣṭyarthaṃ sa bhaktebhyaḥ pratīcchati //
yosāvarcayate devo yatra devorcyate budhaiḥ

abhyarcate ca yairbhāvaiḥ sarve tadviddhi tanmayam //
tasyārcākaraṇaṃ viddhi kartṛprītiprayojanam

jñeyaṃ tathaiva cātmānaṃ tasya sarvagatasya tu//
anādikāraṇaṃ tena nityatṛptena yādava

anugrahārthaṃ bhaktānāṃ cātmanaḥ saṃpravartitam //
aśarīraḥ śarīrastho yathā bhavati bhūpate

bhaktalakṣaṇabodhārthaṃ tathaivāvāhyate tvasau //
anākāraṃ mahārāja lakṣyabandhastu duṣkaraḥ

sākārairlakṣabandhastu kartuṃ vai śakyate sukham//
vidhivacca tathākāraḥ prādurbhāvagatasya hi

mayokto rājaśārdūla purastādeva śāstrataḥ //
bhāvo bhavatu yo yasminbhāvanāyāṃ bhavennaraḥ

tatraiva bhāvanānena kāryā cārcā ca yādava //
ādau kṛtvā mahābhāga sākāre lakṣabandhanam

tataḥ samartho bhavati śūnye dhyāne narottama//
evamāvāhanaṃ tasya tathā pūjā ca yādava

prabuddhaiḥ kriyate yatnādātmānugrahakāraṇam //
nityatṛpto na tṛptyarthamupahāraṃ prayacchati

pratīcchati mahārāja bhaktānugrahakārakaḥ //
mokṣa prāptāvubhāvetau tvayā jñeyau mahābhuja

jñānamārgaḥ kriyāmārgaḥ kṛto yaśca nirāśiṣaḥ //
vajrabandhāya bhavati sakāmena kriyā kṛtā//
niṣkāmena kṛtā saiva mokṣāyaiva vidhīyate

āvāhitāḥ sannihitāstadeva bhavatyavaśyaṃ nṛpa mantrayuktāḥ//
svatuṣṭaye deva varasya viṣṇorāvāhana vajra budhaiḥ pradiṣṭam

iti śrīviṣṇudharmottare tṛtīyakhaṇḍe mārkaṇḍeyavajrasaṃvāde āvāhanaprayojanavarṇano nāmāṣṭottaraśatatamo'dhyāyaḥ

3.109
vajra uvāca //
bhagavanhomavidhimācakṣva /
tamuvāca bhagavānmārkaṇḍeyaḥ /
adhivāsito bhagavānagniṃ prajvālya parisamūhyājyena vilīnenotsavena rakṣoghnamaṃtrājyabhāgāntaraṃ prāguktaṃ hutvā vakṣyamāṇairnāmabhiḥ svāhāntaiścaturthīprayuktaiḥ yavatilasiddhārthānekaikena nāmnā aṣṭau vā aṣṭāviṃśati aṣṭottaraśataṃ vājyāhutīrjuhuyāt //
ॐnamo bhagavate vāsudevāya //
ॐnamo bhagavate saṃkarṣaṇāya //
ॐnamo bhagavate pradyumnāya //
ॐnamo bhagavate aniruddhāya //
ॐnamo bhagavate puruṣāya //
ॐnamo bhagavate satyāya //
ॐnamo bhagavate acyutāya //
ॐnamaḥ śriyai //
ॐnamaḥ kālarātryai //
ॐnamaḥ sṛṣṭyai //
ॐnamo garuḍāya //
ॐnamastālāya //
ॐnamo makarāya //
ॐ namo ṛṣyāya //
ॐnamo'nantāya //
ॐnamaḥ kaustubhāya //
ॐnamo vanamālāyai //
ॐnamaḥ pṛthivyai //
ॐnamaḥ śaṅkhāya //
ॐnamaḥ padmāya //
ॐnamo gadāyai //
ॐnamaścakrāya //
ॐnamo halāya //
ॐnamo musalāya //
ॐnamaścāpāya //
ॐnamaścarmaṇe //
ॐnamaḥ khaḍgāya //
ॐnamo subhadrāya //
ॐnamo vasubhadrāya //
ॐnamo āṣāḍhāya //
ॐnamo yajñatātāya //
ॐnamo jayāya //
ॐnamo vijayāya //
ॐnamo āmodāya //
ॐnamaḥ pramodāya //
tato vyāhṛtihomaḥ kāryaḥ /
tato gāyatryā homaṃ kuryāta /
tatastadviṣṇoḥ paramaṃ padamityanayā tato vaiṣṇavagāyatryā //
tato yuñjate mana iti anuvākena //
tataḥ puruṣasūktena //
tato ratho akṣeṣviti ṛkcatuṣṭayena //
tataścamakaṣaṭkena //
tatastvājyena //
saṃvatsarādevādihomapūrvakeṇa karmaṇottarataṃtraṃ samāpayet //
viṣṇoḥ pratiṣṭhā karaṇe homa eṣa prakīrtitaḥ //
anyāsāṃ devatānāṃ ca talliṅgairjuhuyāddhaviḥ //
iti śrīviṣṇudharmottare tṛtīyakhaṇḍe mārkaṇḍeyavajrasaṃvāde homavidhi varṇano nāma navottaraśatatamo'dhyāyaḥ//१० ९//
3.110
mārkaṇḍeya uvāca //
atha pratiṣṭhādidivase prāpte śaṅkhapaṭahatūryaiḥ śrībhagavantaṃ vibodhayet //
vibodhana mantraṃ paṭheta //
tataḥ kalpakoṭimūrtidharordhvabāhuḥ kalaśadharasthapatiścātra bhagavān yaśceha bhagavāniti mantreṇa devāgāraṃ praviśeyuḥ//
tataḥ pañcagavya miśrasarvauṣadhiḥ sarvagandhānsarvaratnāni suvarṇaṃ ca piṇḍikāśvabhre nikhanet //
tatra ca mantrā bhavaṃti//
mahābhāgaḥ

bhāsaḥ //
trisuparṇaḥ //
bhāruṇḍam //
mṛtyulāṃgalam //
svasti na iṃdra dvādaśādhyātmam //
ātmavyūhaṃ ca tataḥ sāṃvatsaroddiṣṭe kāle bhagavantaṃ susamaṃ sadṛṣṭipīṭhikāyām //
dhruvā dyauriti niścalamanenaiva mantreṇa kuryāt //
nāma cāsyodīrayet//
pratiṣṭhāsāma ca paṭhet /
sarvaśca jano lājākusumotkareṇa jayaśabdena kolāhalaṃ kuryāt //
vāditrāṇi vādayet //
ॐ namo bhagavate vāsudevāyetyudīrayet //
brahmasūktaṃ ca paṭhet //
agnerāyurasīti jīvādānaṃ kuryāt //
kalpakaśca kalaśapāṇiḥ paṭhet //
ॐ pratiṣṭhitosi bhagavansupratiṣṭhā bhavatviyam //
sānnidhyaṃ pratipadyasva yajamānābhivṛddhaye //
śannostu dvipade nityaṃ śannaścāstu catuṣpade //
śannostu sarvalokasya śanno rājñastathaiva ca //
yajamānaḥ sabhṛtyo yo saputrapaśubāndhavaḥ //
rakṣyo bhagavatā nityaṃ deśaścāyaṃ namostu te //
iti śrīviṣṇudharmottare tṛtīyakhaṇḍe mārkaṇḍeyavajrasaṃvāde bhagavadvibodhanamantravarṇano nāma daśottaraśatatamo'dhyāyaḥ