વિષ્ણુધર્મોત્તરપુરાણમ્ · અધ્યાય 3.101.105

3.101
માર્કણ્ડેય ઉવાચ ॥
અથાર્ચાશૌચાનન્તરં પવિત્રકસ્યાર્ચાયાઃ કુર્યાત્ ॥
તત્ર કમલકર્ણિકાયાં ધ્રુવા દ્યૌરિતિ મન્ત્રેણ દક્ષિણશિરસ્કં પ્રાક્છિરસં વા શય્યાયાં સ્થાપયેત્॥
અતઃ પઞ્ચવર્ણૈઃ પઞ્ચભિરાસ્તરણૈરાસ્તરયેત્।
શુદ્ધાવત્યશ્ચોદીરયેત્।
તતો યુવા સુવાસા ઇતિ પ્રચ્છાદનપટં દદ્યાત્ ॥
ગણ્ડોપધાનં ચ ।
તતો ગર્ભમયં સપ્તશીર્ષમનન્તં નાગં કુર્યાત્ ।
તં ચ શયને સ્થાપયેત્ ॥
તતો જીવસ્યાવાહનં કુર્યાત શિવસંકલ્પં ચોદીરયેત્ ।
તતસ્ત્વનન્તસ્યાવાહનં પ્રયોજયેત્ ।
તતોર્ઘ્યપાદ્યમાચમનીયમનુલેપનમાલ્યદીપધૂપમધુપર્કપ્રાપણકમાત્રાભિઃ પ્રત્યેકં સાવિત્રેણાનન્તરમર્ચયેત્ ॥
તતઃ સર્પસામ ।
નમોસ્તુ સર્પેભ્ય ઇતિ યોગેયોગેતિ મન્ત્રં ચોદીરયેત્ ॥
અનન્તમાહાત્મ્યં ચ વા વદેત્ ॥
તતો ધ્રુવા દ્યૌરિતિ મન્ત્રેણાનન્તોપરિ શ્રીભગવદર્ચા પવિત્રકે સ્થાપયેત્ ॥
તતો જીવસ્યાવાહનં કુર્યાત્ ।
શિવસઙ્કલ્પં જપેત્ ।
તતો ભગવન્તમાવાહયેત્ ।
તતઃ સર્વે ભૂન્યસ્તજાનવઃ પ્રણામં કુર્યુઃ આગતશ્ચ ભગવાનિતિ બ્રૂયુઃ ।
તતઃ શઙ્ખપટહભેરીજયશબ્દૈઃ પૂજયેયુઃ ।
તતોઽર્ઘ્યપાદ્યાચમનીય સ્નાનીયાનુલેપનમાલ્યધૂપદીપમધુપર્કપ્રાપણકમાત્રાદાનૈઃ શ્રીભગવન્તં પ્રત્યેકં સવિત્રેણાર્ચયેત્ ।
તતઃ સ્વસ્તિ ન ઇન્દ્ર ઇતિ જપેત્ ।
તતો યુવાસુવાસા ઇતિ શ્રીભગવન્તં મહતા વાસોયુગેનાચ્છાદયેત્ યુઞ્જતે મન ઇતિ પુષ્પૈરવકિરેત્ ।
બોધશ્ચમા પ્રતિબોધશ્ચેતિ સિદ્ધાર્થૈરવકિરેત્ ।
પ્રાદુરભાવાનિતિ વાચયેત્ ।
એવમધિવાસનં કાર્યમ્ ॥
અધિવાસિતે ચ ભગવતિ અર્ચાસ્થણ્ડિલે વેદિં પ્રતિષ્ઠાપ્ય આસનાનિ પાદપીઠાનિ ચ અર્ચાશૌચવિધાનેન વેદિમાસનાનિ ચ શોધયેત્ ।
તતઃ શઙ્કરગીતોક્તવિધિના ઇજ્યાં સાત્ત્વતઃ કુર્યાત્ ।
ઇજ્યાસમકાલમેવ હોમસ્થણ્ડિલે હોતા હોમં વેદીશૌચમાસનાનાં સકૃદેવ વિધત્તે ॥
ઇજ્યાહોમો તુ કર્તવ્યો પ્રત્યહં ત્વધિવાસિતે ।
પૂજનં ગીતનૃત્યૈશ્ચ પ્રતિષ્ઠા યાવદાગતા ।
અધિવાસનમેતત્તે મયા સમ્યગુદાહૃતમ્

ઇતિ શ્રીવિષ્ણુ૦ ધ૦ તૃ૦ ખ૦ મા૦ વ૦ સં૦ અધિવાસનવર્ણનો નામૈકાધિકશતતમોઽધ્યાયઃ .

3.102
॥ માર્કણ્ડેય ઉવાચ ॥
આવાહયામ્યહં જીવં બીજં સર્વગતં પ્રભુમ્ ॥
પઞ્ચભાવસ્થિતં દેહે પઞ્ચધા ચ સ્થિતં પુનઃ

વાયવ્યેન તુ ભાવેન પઞ્ચધાવસ્થિતં પુનઃ ॥
આગ્નેયેન તુ ભાવેન પઞ્ચધાવસ્થિતં તથા

વારુણેન ચ ભાવેન પઞ્ચધાવસ્થિતં પ્રભુમ્ ॥
ભૂતાત્મકત્વેન તથા પઞ્ચધાવસ્થિતં પુનઃ

પરમાત્માનમત્યુગ્રમનુગ્રં જગદીશ્વરમ્ ॥
સર્વગં સર્વધાતારં સર્વેશમપરાજિતમ્

અત્યર્થસૂક્ષ્મં વરદં ક્ષેત્રજ્ઞં પ્રભુમીશ્વરમ્ ॥
।ભૂતભવ્યભવિષ્યસ્ય પ્રભું લોકનમસ્કૃતમ્

ગુણાધારં જગદ્યોનિં મહદ્ભ્યોપિ મહત્તરમ્ ॥
જીવદેવ ત્વમભ્યેહિ પ્રવિશાર્ચામિમાં સ્વયમ્

કુરુષ્વ દેવદેવેશ સજીવં ચ તથાનઘ ॥
ઇદમર્ઘ્યમિદં પાદ્યં ધૂપોઽયં પ્રતિગૃહ્યતામ્

ઇતિ શ્રીવિ૦ ધ૦ તૃ૦ ખ૦ મા૦ વ૦ સં૦ જીવાવાહનં નામ દ્વયુત્તરશતતમોઽધ્યાયઃ

3.103
વજ્ર ઉવાચ ॥
આવાહનાનિ મે બ્રૂહિ દેવતાનાં ભૃગૂત્તમ ॥
ભવન્ત્યાવાહિતા મન્ત્રૈર્યસ્માત્સન્નિહિતાઃ સુરાઃ

માર્કણ્ડેય ઉવાચ ॥
આવાહનાનિ તે વચ્મિ દેવાનાં યદુનન્દન ॥
અથોક્તવર્જં કેષાંચિત્કેષાંચિત્પુનરેવ તે

સર્વસ્યાવાહનસ્યાન્તે શ્લોકાર્ધં પરિકીર્તિતમ્ ॥
ઇદમર્ઘ્યં ચ પાદ્યં ચ ધૂપોઽયં પ્રતિગૃહ્યતામ્

આવાહયામ્યહં દેવૌ નાસત્યૌ સૂર્યનન્દનૌ ॥
આગચ્છેતાં મહાભાગૌ વરદૌ ચાશ્વિનૌ શુભૌ

વસૂનાવાહયિષ્યામિ દેવાનષ્ટૌ વરપ્રદાન્ ॥
આયાન્તુ વરદા દેવા વસવઃ પાપનાશનાઃ

વિશ્વાનાવાહયિષ્યામિ દેવાનદ્ભુતતેજસઃ ॥
આયાન્તુ વરદાઃ સર્વે વિશ્વેદેવા મહાબલાઃ

આવાહયામ્યઙ્ગિરસો દેવાનદ્ભુતતેજસઃ ॥
આયાન્ત્વઙ્ગિરસો દેવા મહાબલ પરાક્રમાઃ

રુદ્રાનાવાહયિષ્યામિ ત્રિનેત્રાન્વૃષવાહનાન્ ॥
આયાન્તુ વરદા રુદ્રાસ્ત્રૈલોક્યવરદાઃ શુભાઃ

આવાહયિષ્યામ્યાદિત્યાન્ વરદાન્દીપ્તતેજસઃ ॥
આયાન્તુ વરદાઃ સૂર્યાઃ સર્વે તે તેજસોલ્બણાઃ

ભૃગૂનાવાહયિષ્યામિ દેવાન્દીપ્તતપોધનાન્ ॥
આયાન્તુ ભૃગવો દેવા વરદા દીપ્તતેજસઃ

સુરાનાવાહયિષ્યામિ મરુતસ્તેજસાધિકાઃ ॥
આયાન્તુ મરુતો દેવા વરદા ભુવનેશ્વરાઃ

સુરાનાવાહયિષ્યામિ સર્વાનેવ દિવૌકસઃ ॥
આગચ્છન્તુ સુરાઃ સર્વે મન્ત્રપૂજાભિલાષિણઃ

દૈત્યાનાવાહયિષ્યામિ મહાબલપરાક્રમાન્ ॥
આયાન્તુ દૈત્યા ધર્મિષ્ઠા દેવદેવાનુગા મમ

આવાહયિષ્યે ગન્ધર્વાન્રૂપદ્રવિણસંયુતાન્ ॥
આયાન્તુ સર્વગન્ધર્વા વરદાઃ કામરૂપિણઃ

યક્ષાનાવાહયિષ્યામિ ધનાધ્યક્ષસમન્વિતાન્ ॥
આયાન્તુ વરદા યક્ષાસ્ત્રૈલોક્યવિદિતા મમ

આવાહયિષ્યામિ તથા રાક્ષસાન્વિવિધાયુધાન્॥
આયાન્તુ રાક્ષસા વીરા દેવદેવાનુયાયિનઃ

આવાહયિષ્યામિ તથા વિદ્યાધરગણાનહમ્ ॥
વિદ્યાધરાઃ સમાયાન્તુ વિવિધાઃ ગગનઙ્ગમાઃ

આવાહયિષ્યામિ તથા કિન્નરાન્દેવગાયનાન્॥
આયાન્તુ કિન્નરાઃ સર્વે સુસ્વરાસ્તુ સુલોચનાઃ

નાગાનાવાહયિષ્યામિ ભુજગાન્સર્પગોચરાન॥
આયાન્તુ વરદા નાગાસ્ત્રૈલોક્યવિદિતા મમ

અહમાવાહયિષ્યામિ તથૈવાપ્સરસઃ શુભાઃ ॥
સમાયાન્તુ મહાભાગા દેવયોષા મમોજ્જ્વલાઃ ॥ ।

અહમાવાહયિષ્યામિ સર્વાસ્ત્રિદશપત્નયઃ ॥
આયાન્તુ વરદાઃ સર્વાસ્તપ્તચામીકરપ્રભાઃ

આવાહયિષ્યામિ તથા વરદા દેવમાતરઃ ॥
આયાન્તુ વરદાઃ સર્વા સુવેશાઃ સુખદાઃ શિવાઃ

પિતૄનાવાહયિષ્યામિ સૂક્ષ્મરૂપધરાનહમ્ ॥
આયાન્તુ પિતરઃ સર્વે ગણસ્થાસ્તુ પૃથક્પૃથક્

આવાહયિષ્યામિ તથા સુપર્ણાન્બલવત્તરાન્ ॥
સુપર્ણાસ્તુ સમાયાન્તુ વિષ્ણુતેજોપબૃંહિતાઃ

આવાહયામિ વરદાન્સર્વાનેવ પ્રજાપતીન્ ॥
પ્રજાધ્યક્ષાઃ સમાયાન્તુ ત્રૈલોક્યપરિપાલકાઃ

આવાહયામિ દેવેન્દ્રાન્દેવાન્ભુવનનાયકાન્ ॥
આયાન્તુ દેવનાથા મે વરદાઃ કામરૂપિણઃ

મનૂનાવાહયિષ્યામિ પ્રભુત્વે જગતઃ સ્થિતાન્ ॥
આયાન્તુ મનવઃ સર્વે તપસા નષ્ટકિલ્બિષાઃ

આવાહયિષ્યામ્યોષધ્યઃ સર્વપ્રાણિધરાઃ શુભાઃ ॥
ઓષધ્યશ્ચ સમાયાન્તુ સર્વાઃ કામપ્રદાઃ શુભાઃ

ઋષીનાવાહયિષ્યામિ તપસા દ્યોતિતપ્રભાન્ ॥
આયાન્તુ ઋષયઃ સિદ્ધાઃ સર્વે મે દીપ્તતેજસઃ ॥
શૈલાનાવહાયિષ્યામિ સર્વૌષધિસમન્વિતાન્

આયાન્તુ ભૂધરાઃ શૈલાઃ સર્વે મે સ્થાવરેશ્વરાઃ ॥
દ્રુમાનાવાહયિષ્યામિ નાનારૂપધરાનહમ

દ્રુમાઃ સર્વે સમાયાન્તુ મનોમારુતરંહસઃ ॥
આવાહયિષ્યામિ તથા પાતાલાન્સર્વગોચરાન્

આયાન્તુ સર્વે પાતાલા દૈત્યસ્થાના હ્યવિન્દિતાઃ ॥
દ્વીપાનાવાહયિષ્યામિ સર્વાનદ્ભુતધારિણઃ

આયાન્તુ દ્વીપા લોકાનાં સ્થાનભૂતા જગત્પ્રિયાઃ ॥
લોકાનાવાહયિષ્યામિ સ્થાનભૂતાન્મનોહરાન્

આયાન્તુ લોકાઃ સકલાઃ સર્વે મે ભૂતભાવનાઃ ॥
આવાહયિષ્યામિ તથા સમુદ્રાઞ્જગતઃ પ્રિયાન્

સમુદ્રા મે સમાયાન્તુ રસાધારા જગત્પ્રિયાઃ ॥
વર્ષાનાવાહયિષ્યામિ સર્વભૂતાશ્રયાનિહ

આગચ્છન્તુ તથા ચેહ વર્ષાઃ સર્વમનોહરાઃ ॥
આવાહયિષ્યામિ તથા ચતુરઃ સાગરાનહમ્

સાગરાઃ શીઘ્રમાયાન્તુ સર્વે તોયધરા મમ ॥
નદીસ્ત્વાવાહયિષ્યામિ વરદા લોકમાતરઃ

આયાન્તુ વરદા નદ્યઃ સર્વપાપહરાઃ શુભાઃ ॥
આવાહયિષ્યામિ તથા સર્વાનભ્રગણાનહમ્

આયાન્ત્વભ્રા મહાભાગાઃ સર્વે ચાશુચરા મમ ॥
આવાહયિષ્યામિ તથા પિશાચાન્સર્વગાનહમ્॥
પિશાચાસ્તુ સમાયાન્તુ સર્વે મે કામરૂપિણઃ

આવાહયિષ્યામિ તથા સ્કન્દસ્ય પાર્શ્વગાનહમ્

નાનારૂપાઃ સમાયાન્તુ સ્કન્દસ્ય પાર્શ્વગા મમ ॥
આવાહયિષ્યામિ તથા દેવાનાં પાર્ષદાનહમ્

નાનારૂપાઃ સમાયાન્તુ દેવાનાં પાર્ષદા મમ ॥
આવાહયિષ્યામિ તથા હરસ્ય પાર્ષદાનહમ્ ॥
નાનારૂપાઃ સમાયાન્તુ હરસ્ય પાર્ષદા મમ

આવાહયિષ્યામિ તથા માતરો લોકમાતરઃ

આયાન્તુ માતરો દેવ્યો વરદાઃ સર્વગાઃ શુભાઃ ॥
ગ્રહાનાવાહયિષ્યામિ સર્વલોકેશ્વરાનહમ્

ગ્રહાઃ સર્વે સમાયાન્તુ દીપ્તા ભુવનનાયકાઃ ॥
આવાહયિષ્યામિ તથા નક્ષત્રાન્વરદાનહમ્

આયાન્તુ સર્વે નક્ષત્રાઃ સર્વે ભુવનનાયકાઃ ॥
દિશસ્ત્વાવાહયિષ્યામિ પ્રાગાદ્યાઃ સુમનોહરાઃ

આગચ્છન્તુ દિશઃ સર્વાઃ સર્વભૂતસુખાવહાઃ॥
વીથ્યસ્ત્વાવાહયિષ્યામિ દિવ્યા નવગ્રહાશ્રયાઃ

આયાન્તુ વીથ્યઃ સકલા ગ્રહનક્ષત્રમણ્ડિતાઃ ॥
અહમાવાહયિષ્યામિ મુહૂર્તાન્સૂક્ષ્મરૂપિણઃ

મુહૂર્તાઃ શીઘ્રમાયાન્તુ કાલસ્યાવયવાઃ શુભાઃ ॥
ઋતૂનાવાહયિષ્યામિ ષડહં ભુવનેશ્વરાન્

આયાન્તુ ઋતવઃ સર્વે જગચ્ચક્રપ્રવર્તકાઃ ॥
આવાહયિષ્યામિ તથા પઞ્ચસંવત્સરાનહમ્

આયાન્તુ વત્સરાઃ સર્વે કાલચક્રપ્રવર્તકાઃ ॥
યુગાનાવાહયિષ્યામિ ચતુરો દીપ્તતેજસઃ

આગચ્છન્તુ યુગાઃ સર્વે ચતુર્મૂર્તિવ્યવસ્થિતાઃ ॥
અહમાવાહયિષ્યામિ મનૂંશ્ચૈવ ચતુર્દશ

મન્વન્તરાઃ સમાયાન્તુ ત્રિદશાવધિસંસ્થિતાઃ ॥
કાલમાવાહયિષ્યામિ દેવં સાવયવં શુભમ્

આગચ્છ ભગવન્કાલ દેવદેવ જનાર્દન ॥
દેવાનાવાહયિષ્યામિ યજ્ઞમૂર્તિધરાનહમ્

દેવાઃ સર્વે સમાયાન્તુ વરદા બહુરૂપિણઃ ॥
ગ્રહમાવાહયિષ્યામિ વિદ્યાસ્થાનાન્યશેષતઃ

સર્વાણીહ સમાયાન્તુ લોકાનાં હિતકામ્યયા॥
શાસ્ત્રાનાવાહયિષ્યામિ શાન્તાન્દર્શનવત્થિતાન્

શસ્ત્રાણિ શીઘ્રમાયાન્તુ ચમૂનાં મણ્ડનં પરમ્॥
અસ્ત્રાણ્યાવાહયિષ્યામિ ત્રૈલોક્યસ્ય હિતાનિ વૈ

સર્વે ચેહ સમાયાન્તુ ધર્મસેતુપ્રવર્તકાઃ ॥
અહમાવાહયિષ્યામિ વેદશાસ્ત્રાણ્યનેકશઃ

વેદશાસ્ત્રાઃ સમાયાન્તુ જગદ્રક્ષણતત્પરાઃ ॥
અહમાવાહયિષ્યામિ સર્વાંસ્ત્રિદશવાહનાન્

ઇહ સર્વે સમાયાન્તુ સર્વે ત્રિદશવાહનાઃ ॥
નાગાનાવાહયિષ્યામિ દેવપુત્રાન્મહાબલાન

દેવોપવાહ્યા નાગેન્દ્રાઃ શીઘ્રમાયાન્તુ સત્વરાઃ ॥
નિધીનાવાહયિષ્યામિ શઙ્ખપદ્મપુરોગમાન્ ॥
આયાન્તુ નિધયઃ સર્વે સર્વલોકૈકભાવના

આહ્વાનકાર્યં યદિ સઙ્ગમધ્યાદેકસ્ય કાર્યં યદુવંશનાથ ॥
કાર્યાદથેહા તુ તદેકવત્સ્યાદાહ્વાનમન્ત્રસ્ય યથાનુરૂપાઃ

ઇતિ શ્રીવિષ્ણુધમોત્તરે તૃતીયખણ્ડે માર્કણ્ડેયવજ્રસંવાદે પ્રતિષ્ઠાકલ્પે દેવસંવાહ્વાનં નામ ત્ર્યુત્તરશતતમોઽધ્યાયઃ

3.104
માર્કણ્ડેય ઉવાચ ॥
આવાહયામ્યહં દેવં બ્રહ્માણં પરમેષ્ઠિનમ્ ॥
જગતોઽસ્ય સમુત્પત્તિસ્થિતિસંહારકારણમ્

ચતુર્વેદં ચતુર્વક્ત્રં ચાતુર્વર્ણ્યપ્રભું પ્રભુમ્ ॥
ચતુરાશ્રમગોપ્તારં વરદં ભૂતભાવનમ્

પદ્મયોનિં જગદ્યોનિં યજ્ઞયોનિં જગત્પતિમ્ ॥
આત્મયોનિમનાધૃષ્યં યજ્ઞવાહં જગત્પતિમ્

યજ્ઞેશં યજ્ઞમૂર્તિં ચ ત્રૈલોક્યસ્યૈકકારણમ્ ॥
સર્વગં નારદં સૌમ્યં પરમં પરમેશ્વરમ્

ભૂતભવ્યભવન્નાથં યોગજ્ઞેયં સનાતનમ્ ॥
આગચ્છ ભગવન્બ્રહ્મન્યજમાનસ્ય વૃદ્ધયે

ઇદમર્ઘ્યમિદં પાદ્યં ધૂપં ચેદં પ્રગૃહ્યતામ્ ॥
આવાહયામ્યહં દેવં દેવદેવં હુતાશનમ્

જગતોઽસ્ય સમુત્પત્તિસ્થિતિ સંહારકારકમ્ ॥
દેવમૂર્તિં તદાધારં સર્વદેવમુખં પ્રભુમ્

પિઙ્ગેક્ષણં પિઙ્ગજટં ધૂમકેતું વિભાવસુમ્ ॥
શુકયાનગમં દેવં સર્વાભરણભૂષિતમ્

સર્વગં વરદં ભાનું જઠરસ્થં ચ દેહિનામ્ ॥
તેજોમૂર્તિં દુરાધર્ષં સપ્તજિહ્વં મહાબલમ્

સપ્તાર્ચિષં સપ્તમુનિં સમિત્સપ્તકમચ્યુતમ્ ॥
વિષ્ણોરંશમનિર્દેશ્યં ભાનવં જાતવેદસમ્

પાવનં પુષ્ટિદં સૌમ્યં ભક્તાનાં ભૂતિવર્ધનમ્ ॥
યાજકં યજમાનં ચ પુષ્ટ્યા વિભજ સર્વશઃ

ઇદમર્ઘ્યમિદં પાદ્યં ધૂપં ચેદં પ્રગૃહ્યતામ્ ॥
આવાહનાન્યતો વક્ષ્યે સર્વેષાં પાર્થિવોત્તમ

સર્વસ્યાવાહનસ્યાન્તે શ્લોકોઽયં પરિકીર્તિતઃ ॥
પ્રવિશ્યાર્ચામિમાં સમ્યઙ્ મયા ભક્ત્યા વિનિર્મિતામ્

ઇદમર્ઘ્યમિદં પાદ્યં ધૂપં ચેદં પ્રગૃહ્યતામ્ ॥
ધ્રુવમાવાહયિષ્યામિ સર્વદેવ ગણેશ્વરમ્

નિબદ્ધં ભ્રામ્યતે યેન ભચક્રં વાતરજ્જુભિઃ ॥
એહિ મે ધ્રુવ દેવેશ કેશવાચિન્ત્યવિક્રમ

સર્વગ્રહગણાધ્યક્ષ સર્વલોકનમસ્કૃત ॥
આવાહયિષ્યામ્યાકાશં વિમાનશતમણ્ડિતમ્

તૃતીયં દેવદેવસ્ય પદં વિષ્ણોર્મહાત્મનઃ ॥
એહિ મે ભગવન્સૌમ્ય નિરાલમ્બ નભસ્તલ

અપ્રમેયાતિગમ્ભીર વિમાનશતમણ્ડિત ॥
ઊર્ધ્વમાવાહયિષ્યામિ ચાનન્તાં મહતીં દિશમ્

અપ્રમેયાં નિરાલમ્બાં ચન્દ્રસૂર્યાંશુવર્જિતામ્ ॥
આગચ્છેહ મહાભાગે સતતં સિદ્ધસેવિતે

અનન્તે વિપુલે દેવિ નિર્મલે હિતકારિણિ ॥
આવાહયામ્યધસ્તાત્તુ દિશં શેષેણ પાલિતામ્

નાગદૈત્યોરગગણૈઃ સતતં ચ નિષેવિતામ્ ॥
ગમ્ભીરે વિપુલે ભીમે બહુસ્થાનાતિમણ્ડિતે

એહિ મે રત્નબહુલે બહુરૂપે મહાબલે॥
આવાહયિષ્યે વરદં સહસ્રાંશું દિવાકરમ્ ॥
તેજોમૂર્તિં દુરાધર્ષં ભક્તાનામભયપ્રદમ્॥
એહિ દેવ જગન્નાથ ઋક્સામયજુષાં પતે

ત્રૈલોક્યમણ્ડલે દીપ સર્વવ્યાધિવિનાશન ॥
આવાહયામ્યહં દેવમાદિત્યમુદકેશયમ્

સ્નિગ્ધવૈદૂર્યસઙ્કાશં વરુણં સુમહાદ્યુતિમ્ ॥
એહિ દેવ જલાધ્યક્ષ યાદોગણમહેશ્વર

નાગદૈત્યોરગગણૈઃ સતતં સેવિતાચ્યુત ॥
આવાહયામ્યહં ચન્દ્રં શીતાંશુમમૃતપ્રભમ્

ઓષધીશં દ્વિજાધ્યક્ષં નયનાનન્દકારકમ ॥
એહિ મે ભગવઞ્ચન્દ્ર શશાઙ્ક મૃગલાઞ્છન

ભક્તાનુકમ્પિન્સતતં સર્વનક્ષત્રપૂજિત ॥
ભૌમમાવાહયિષ્યામિ તેજોમૂર્તિં દુરાસદમ્

ભદ્રમૂર્તિમનિર્દેશ્યં વક્ત્રં રુધિરસપ્રભમ્ ॥
એહિ મે ભગવન્ભૌમ અઙ્ગારકસમપ્રભ

ત્વયિ સર્વં સમાયત્તં ભૂતલેઽસ્મિઞ્શુભાશુભમ્ ॥
સ્કન્દમાવાહયિષ્યામિ ષણ્મુખં વરદં શિશુમ્

દેવારિસેનામથનં પાર્વત્યાનન્દવર્ધનમ ॥
એહિ દેવ કુમારાદ્ય મહિષાસુરતસ્કર

કાર્તિકેય જગન્નાથ મયૂરવરવાહન ॥
બુધમાવાહયિષ્યામિ બોધનં જગદીશ્વરમ્

ચાન્દ્રિં ગ્રહગણાધ્યક્ષં તેજોમૂર્તિં દુરાસદમ્ ॥
એહિ શીતાંશુજાચિન્ત્ય જગજ્જિષ્ણો જનાર્દન

મહાબલ મહાભાગ મહાબાહો મહાદ્યુતે ॥
વિષ્ણુમાવાહયિષ્યામિ શઙ્ખચક્રગદાધરમ્

અતસીકુસુમશ્યામં પીતવાસસમચ્યુતમ્ ॥
એહિ મે દેવદેવેશ પ્રજાનિર્માણકારક

નારાયણ સુદુષ્પાર મહેષ્વાસ ધનુર્ધર ॥
શક્રમાવાહયિષ્યામિ દેવં સુરગણેશ્વરમ્

વજ્રપાણિં મહાબાહું ગોબ્રાહ્મણહિતે રતમ્ ॥
એહિ દેવ સહસ્રાક્ષ દેવારિબલસૂદન

ઐરાવતગ ધર્મજ્ઞ શચીહૃદયનન્દન ॥
જીવમાવાહયિષ્યામિ દેવેશ્વરપુરોહિતમ્

બૃહસ્પતિં બૃહદ્વાક્યં વેદવેદાંગપારગમ્ ॥
એહિ જીવ મહાભાગ જીવભૂત મહીતલે

સમ્યગ્વૃદ્ધિસ્તવાયત્તા સતતં ભૂમિવર્ધન ॥
દેવીમાવાહયિષ્યામિ પાર્વતીં વરદામુમામ્

હરસ્ય દયિતાં ભાર્યાં ચાર્વઙ્ગીં ભૂતિવર્ધિનીમ્ ॥
એહિ દેવિ જગન્માતર્મેનાહૃદયનન્દિનિ

પવિત્રે વરદે સૌમ્યે નિત્યં ભક્તજનપ્રિયે॥
શુક્રમાવાહયિષ્યામિ ભાર્ગવં જગદીશ્વરમ્

નિત્યં સર્વધનાધ્યક્ષં તપસા દ્યોતિતપ્રભમ ॥
એહિ શુક્ર મહાભાગ ષોડશાર્ચે વરપ્રદ

પ્રભુસ્ત્વં વરદો નિત્યં વર્ષાવર્ષસ્ય નિગ્રહે॥
આવાહયામ્યહં દેવં પ્રજાધ્યક્ષમકલ્મષમ્

ભક્તાનુકંપિનં દેવં પ્રજાનિર્માણકારકમ્ ॥
એહિ દેવ પ્રજાધ્યક્ષ પ્રજાનિર્માણકારક

ત્વયિ દેવ સમાયત્તં પ્રજાનામભવોદ્ભવમ્ ॥
સૌરિમાવાહયિષ્યામિ શનૈશ્ચારિણમચ્યુતમ્

તપસ્વિનમનાધૃષ્યં ભક્તાનામભયપ્રદમ્ ॥
એહિ તીક્ષ્ણાંશુજાચિન્ત્ય ભાવાભાવપ્રદર્શક

ત્વયિ સર્વં મમાયત્તં રાજ્ઞાં ભૂમૌ શુભાશુભમ્ ॥
આવાહયામ્યહં દેવં ગજવક્ત્રં ગણેશ્વરમ્

વિઘ્નેશં વિઘ્નહર્તારં પાર્વતી હૃદયપ્રિયમ્ ॥
એહિ દેવ ગણાધ્યક્ષ લમ્બોદર મહાભુજ

કાર્યસિદ્ધિઃ સમાયત્તા ત્વયિ સર્વેશ દેહિનામ્॥
રાહુમાવાહયિષ્યામિ દૈત્યેંદ્રં ગ્રહતાં ગતમ્

કેશવાપ્તવરં વીરં તપસા દગ્ધકિલ્બિષમ્ ॥
એહ્યેહિ દૈત્યપ્રવર વરદાચિન્ત્યવિક્રમ

તમોમૂર્તે દુરાધર્ષં વિપરીતામ્બરામ્બર ॥
આવાહયામ્યહં દેવં વિશ્વકર્માણમચ્યુતમ્

સર્વાસાં દેવતાનાં તુ સદા શિલ્પપ્રવર્તકમ્ ॥
એહિ દેવવરાચિન્ત્ય સર્વશિલ્પપ્રવર્તક

એહિ દેવવરાચિન્ત્ય સદા શિલ્પપ્રવર્તક ॥
ત્વયિ સર્વેશ સર્વેષાં કર્મણામાશ્રિતા ગતિઃ

કેતુમાવાહયિષ્યામિ કેતું સર્વદિવૌકસામ્ ॥
બ્રાહ્મણ્યં સર્વધર્મજ્ઞં ભક્તાનામભયપ્રદમ્

ધૂમકેતો ઇહાભ્યેહિ હુતાશનસમપ્રભ॥
શિખાકરાલવિકચ પૂજકાર્તિવિનાશન

આવાહયિષ્યામિ શુભાં કૃત્તિકાં દેવપૂજિતામ્ ॥
એહિ સાધારણે દેવિ જ્યેષ્ઠે દક્ષસુતે શુભે

આવાહયામિ વરદાં રોહિણીં ચન્દ્રવલ્લભામ્ ॥
એહિ રોહિણિ ધર્મજ્ઞે ધ્રુવકર્મસુ શોભને

આવાહયામિ વરદામિલ્વિલાં શશિવલ્લભામ્ ॥
એહિ મે ઇલ્વિલે દેવિ મૃદુકર્મસુ શોભને

રુદ્રમાવાહયિષ્યામિ ત્રિનેત્રં શૂલપાણિનમ્ ॥
એહિ શઙ્કર સર્વાત્મન્મહાગણગણેશ્વર

આર્દ્રામાવાહયિષ્યામિ નક્ષત્રં બાહુસંજ્ઞિતમ્ ॥
એહ્યાર્દ્રે ચારુસર્વાઙ્ગિ દારુણે રુદ્રસમ્મિતે

આવાહયિષ્યામિ દિતિં તપસા દગ્ધકિલ્બિષામ્ ॥
આદિત્યારણિ ધર્મજ્ઞે એહિ દેવિ મહાવ્રતે

ઋક્ષમાવાહયિષ્યામિ ધર્મજ્ઞં તુ પુનર્વસુમ્ ॥
પુનર્વસૌ ઇહાગચ્છ ચરકર્મપ્રસાધક

તિષ્યમાવાહયિષ્યામિ નક્ષત્રં ક્ષિપ્રસંજ્ઞિતમ ॥
એહિ પુષ્ય મહાભાગ પોષં વર્ધય સર્વતઃ

સર્પાનાવાહયિષ્યામિ ત્રૈલોક્યાનન્તગોચરાન્ ॥
આયાન્તુ સર્વતઃ સર્પાઃ સૌમ્યરૂપા ભવન્તુ તે

આવાહયામિ ચાશ્લેષાં ભક્તાનાં શ્રીવિવર્ધિનીમ્ ॥
આશ્લેષે ત્વમિહાભ્યેહિ દારુણે વિજયપ્રદે

પિતૄનાવાહયિષ્યામિ મર્ત્યમૂર્તિધરાનહમ્ ॥
આયાન્તુ પિતરઃ શીઘ્રં સુધાકવ્યભુજોઽવ્યયાઃ

મઘામાવાહયિષ્યામિ ઉગ્રનક્ષત્રમઞ્જસા ॥
એહિ મે સુભગે દેવિ સર્વાઘવિનિષૂદનિ

ભગમાવાહયિષ્યામિ ભક્તસૌભાગ્યવર્ધનમ્॥
એહિ દેવવરાચિન્ત્ય ભક્તસંકટનાશક

ઋક્ષમાવાહયિષ્યામિ પૂર્વફલ્ગુનસંજ્ઞકમ્ ॥
એહિ ભાગિ મહાભાગ ઉગ્રકર્મપ્રસાધક

આવાહયિષ્યામ્યર્યમ્ણમાદિત્યં તેજસાં નિધિમ્ ॥
અર્યમંસ્ત્વં સમભ્યેહિ ભક્તસઙ્કટનાશન

ઋક્ષમાવાહયિષ્યામિ ઉત્તરાફલ્ગુનીં શુભામ્ ॥
એહિ ત્વં સુભગે દેવિ ધ્રુવે સર્વાઙ્ગસુન્દરિ

હસ્તમાવાહયિષ્યામિ સાવિત્રં ક્ષિપ્રમઞ્જસા ॥
એહિ સાવિત્ર ધર્મજ્ઞ ભક્તાનાં પાપનાશક

આવાહયામ્યહં દેવં ત્વષ્ટારમસિતદ્યુતિમ્ ॥
એહિ મે ભગવંસ્ત્વષ્ટઃ પ્રજાપાલનતત્પર

ચિત્રામાવાહયિષ્યામિ ચિત્રમૂર્તિં મનોહરામ્ ॥
એહિ મે વરદે દેવિ મૃદુકર્મપ્રસાધિકે

વાયુમાવાહયિષ્યામિ સર્વગં દીપ્તતેજસમ્ ॥
દેવ વાયો ત્વમભ્યેહિ સર્વભૂતજગત્પ્રિય

સ્વાતિમાવાહયિષ્યામિ નિત્યમુત્તરસર્વગામ્ ॥
દેવિ સ્વાતિ ત્વમભ્યેહિ ચરકર્મસુ શોભને

આવાહયિષ્યામીન્દ્રાગ્ની સહિતૌ દીપ્તતેજસૌ ॥
ઇંદ્રાત્રેહિ જગન્નાથ એહ્યગ્ને વિજયપ્રદ

ઋક્ષમાવાહયિષ્યામિ વિશાખામગ્રતેજસમ્ ॥
વિશાખે ત્વમિહાભ્યેહિ દેવિ સાધારણે શુભે

મિત્રમાવાહયિષ્યામિ દેવં દીપ્તાંશુતેજસમ્ ॥
એહિ મિત્ર મહાભાગ ભક્તાનામભયં કુરુ

ઋક્ષમાવાહયિષ્યામિ ત્વનુરાધાં વરપ્રદામ્ ॥
અનુરાધે ત્વમભ્યેહિ મૃદુકર્મસુ શોભને

શક્રોસ્યાવાહનં પ્રોક્તં જ્યેષ્ઠાયાઃ શૃણુ પાર્થિવ ॥
જ્યેષ્ઠામાવાહયિષ્યામિ નક્ષત્રં શક્રદૈવતમ્

જ્યેષ્ઠે દેવિ ત્વમભ્યેહિ દારુણે ચારુલોચને ॥
દેવમાવાહયિષ્યામિ નિરૃતિં વીરવન્દિતમ્

એહિ દેવ વિરૂપાક્ષ મહાબલ સદાશ્રય ॥
મૂલમાવાહયિષ્યામિ નક્ષત્રં દારુણં મહત્

એહિ મૂલ મહાભાગ ભક્તાનામભયપ્રદ ॥
આપસ્ત્વાવાહયિષ્યામિ સર્વગા વરદાઃ શુભાઃ

આપસ્ત્વાવાહયિષ્યામિ પૂર્વાષાઢેતિ સંજ્ઞિતમ્ ॥
એહિ ત્વમુગ્રે વરદે પૂર્વાષાઢેતિસંજ્ઞિતે

ઋક્ષમાવાહયિષ્યામિ યત્તદભિજિદુચ્યતે ॥
એહિ ધિષ્ણ્યવરિષ્ઠાય ક્ષિપ્રકર્મપ્રસાધક

ઋક્ષમાવાહયિષ્યામિ શ્રવણં સર્વકામદમ્ ॥
પ્રસન્નસ્ત્વં સમભ્યેહિ ચરકર્મપ્રસાધક

ધનિષ્ઠે ત્વમિહાભ્યેહિ ચરકર્મપ્રસાધિકે

ઋક્ષમાવાહયિષ્યામિ નામ્ના શતભિષાં શુભામ્ ॥
આગચ્છ ત્વં શતભિષે ચરકર્મસુ શોભને

અજૈકપાદં વરદં રુદ્રમાવાહયામ્યહમ્ ॥
આગચ્છ રુદ્ર વરદ ત્રિશૂલપરમાયુધ

ઋક્ષમાવાહયિષ્યામિ પૂર્વભદ્રપદામહમ્ ॥
એહિ ભદ્રપદે પૂર્વે ઉગ્રકર્મપ્રસાધનિ

આહિર્બુધ્ન્યં મહાભાગં રુદ્રમાવાહયામ્યહમ્ ॥
આહિર્બુધ્ન્ય સમભ્યેહિ જટાજૂટોપશોભિત

ધ્રુવમાવાહયિષ્યામિ દેશે ભદ્રપદોત્તરામ્ ॥
એહિ ત્વં સુમહાભાગે મમ ભદ્રપદોત્તરે

આવાહયામ્યહં દેવં પૂષણં પાપનાશકમ્ ॥
પૂષન્સમ્યગિહાભ્યેહિ સર્વકલ્મષનાશક

ઋક્ષમાવાહયિષ્યામિ રેવતીં ભીરુદર્શનામ્ ॥
એહિ રેવતિ ધર્મજ્ઞે મૃદુકર્મપ્રસાધકે

ઋક્ષમાવાહયિષ્યામિ ક્ષિપ્રમશ્વિનિ સંજ્ઞકમ્ ॥
એહ્યશ્વિનિ મહાભાગે વરદે કામદાયિનિ

યમમાવાહયિષ્યામિ ધર્મરાજમથાચ્યુતમ્ ॥
એહિ ધર્મભૃતાં શ્રેષ્ઠ વૈવસ્વત મહાભુજ

ઋક્ષમાવાહયિષ્યામિ ઉગ્રં ભરણિસંજ્ઞકમ્ ॥
એહિ ત્વં દેવિ ભરણિ સુભગે ચારુદર્શને

પ્રાચીમાવાહયિષ્યામિ સૂર્યોદયવિભૂષણામ ॥
એહિ ત્વં વરદે પૂર્વે શુભકર્મપ્રસાધનિ

દિશમાવાહયિષ્યામિ વરદાં પૂર્વદક્ષિણામ્ ॥
વહ્નિપ્રિયે સમભ્યેહિ વરદે પૂર્વદક્ષિણે

અહમાવાહયિષ્યામિ દક્ષિણાં દક્ષિણાં દિશમ્ ॥
દક્ષિણે ત્વં સમભ્યેહિ સર્વકર્મશુભપ્રદે

દિશમાવાહયિષ્યામિ શુભાં દક્ષિણપશ્ચિમામ્ ॥
એહિ ત્વં નૈરૃતે દેવિ સતતં ભૂતિવર્ધિનિ

દિશમાવાહયિષ્યામિ વારુણીં વરદાં સદા ॥
આગચ્છ પશ્ચિમે દેવિ વરદે વરુણપ્રિયે

આવાહયિષ્યામિ દિશં વાયવીં પશ્ચિમોત્તરામ્ ॥
વરદે ત્વં સમભ્યેહિ વાયવ્યે પશ્ચિમોત્તરે

આવાહયામિ ધનદં દેવં વૈશ્રવણં પ્રભુમ્ ॥
રાજરાજ સમભ્યેહિ સર્વયજ્ઞેશ્વરાધિપ

દિશમાવાહયિષ્યામિ સૌમ્યાં ધનદપાલિતામ્ ॥
ઉત્તરે ત્વં સમભ્યેહિ સર્વધર્મફલપ્રદે

દિશમાવાહયિષ્યામિ શુભાં પ્રાગુત્તરામહમ્ ॥
એહિ ત્વં સુભગે દેવિ સતતં શિવપાલિતે

સર્વાનાવાહયિષ્યામિ પૂર્ણકુમ્ભેષુ સાગરાન્ ॥
રત્નાધ્યક્ષાઃ સમાયાન્તુ ચત્વાર ઇહ સાગરાઃ

ઐશાન્યાં દિશિ યઃ કુમ્ભઃ પૂર્વસ્તસ્યાં તુ સાગરઃ ॥
આયાતુ શીઘ્રમેવેહ તરઙ્ગોર્મિસમાકુલ

શીઘ્રમભ્યેહિ નિલય યાદસાં પૂર્વસાગર ॥
તરઙ્ગશતસંક્રાંત બાલભાસ્કરમણ્ડલ

આગ્નેયે ચ સમાયાત દક્ષિણે દક્ષિણઃ શિવઃ ॥
બહુરત્નપ્રભાપુઞ્જવિમિશ્ર સલિલાશય

યાદસાં નિલયાભ્યેહિ ક્ષિપ્રં દક્ષિણસાગર ॥
તરઙ્ગધૌત પાદાગ્ર ત્રિકૂટશિખરાચ્યુત

પશ્ચિમાયાઃ સમાયાતુ કુમ્ભે દક્ષિણપશ્ચિમે ॥
રત્નપુઞ્જમહાજ્વાલાવિરાજિતમહોદક

તરઙ્ગમણ્ડિતાભ્યેહિ ક્ષિપ્રં પશ્ચિમસાગર ॥
અસ્તાર્કબિમ્બસંક્રાન્તગતમણ્ડલદુર્દૃશ

ઉત્તરશ્ચ તથાભ્યેતુ કુમ્ભે વૈ પશ્ચિમોત્તરે ॥
હિમાદ્રિશિખરચ્છાયાક્ષીરોદસદૃશઃ પ્રભુઃ

મહાપવિત્રસલિલ શીઘ્રમુત્તરસાગર ॥
ઇહાભ્યેહિ મહાભાગ યજમાનાભિવૃદ્ધયે

આવાહિતાનાં કર્તવ્યં ભૂમૌ કૃત્વા તતઃ શિરઃ ॥
પ્રણામમભિવાદં ચ તતો મન્ત્રમુદીરયેત્

ભવતાં હિ પ્રસાદેન ભવતાં પ્રતિપૂજને ॥
પ્રયતિષ્યે યથાશક્ત્યા તન્મેઽનુજ્ઞાતુમર્હથ

યુષ્માકં પૂજનં કર્તું કેન શક્યં યથાવિધિ ॥
યુષ્મત્પૂજાવિહીનેન કેન લભ્યં મહત્ફલમ્

તતઃ કર્તું યથાશક્ત્યા ભવતાં પ્રતિપૂજનમ્ ॥
વરદાઃ પ્રયતિષ્યામિ તન્મેઽનુજ્ઞાતુમર્હથ

સ્વાંસ્વાં દિશમધિષ્ઠાય દિક્પાલા દીપ્તતેજસઃ ॥
ઉત્સાદયન્તુ સકલાન્વિઘ્નાન્યાન્સમુપસ્થિતાન

વિનાયકા વિઘ્નકરાઃ સમોગ્રા યજ્ઞદ્વિષો યે પિશિતાશનાશ્ચ ॥
સિદ્ધાર્થકૈર્વજ્રસમાનકલ્પૈર્મયા નિરસ્તા વિદિશઃ પ્રયાન્તુ

ઇતિ શ્રીવિષ્ણુધર્મોત્તરે તૃતીયખણ્ડે માર્કણ્ડેયવજ્રસંવાદે બ્રહ્માદિદેવાહ્વાન વર્ણનો નામ ચતુરુત્તરશતતમોધ્યાયઃ

3.105
માર્કણ્ડેય ઉવાચ ॥
લોકાનાવાહયિષ્યામિ હંસરૂપાન્મનોહરાન્॥
આયાન્તુ વાહનત્વેન યે સ્થિતાઃ પરમેષ્ઠિનઃ

વૃષમાવાહયિષ્યામિ ચતુષ્પાદં કકુદ્મિનમ્ ॥
વૃષાભ્યેહિ મહાભાગ ધર્મમૂર્તે વરપ્રદ

શૂલમાવાહયિષ્યામિ ગુણાધારં મહાદ્યુતિમ્॥
એહિ શૂલ મહાભાગ દૈત્યનાથગણાન્તક

અહમાવાહયિષ્યામિ દેવં નન્દીશ્વરં પ્રભુમ્ ॥
અભ્યેહિ નન્દિન્ભગવન્ સર્વલોકનમસ્કૃત

આવાહયામિ વરદં વીરભદ્રં મહાબલમ્ ॥
અભ્યેહિ વીરભદ્રાય મહાગણગણેશ્વર

જ્વરમાવાહયિષ્યામિ ત્રિપાદં ત્રિભુજં પ્રભુમ્ ॥
જ્વરાભ્યેહિ મહાભાગ સતતં ચરણોજ્જ્વલ

દેવીમાવાહયિષ્યામિ ભદ્રકાલીં સુખપ્રદામ્ ॥
આગચ્છ વરદે દુર્ગે સર્વલોકનમસ્કૃતે

આવાહયામિ પૌલોમીં વરદાં નિત્યનન્દિનીમ ॥
શક્રપત્નિ ત્વમભ્યેહિ વરદે કામરૂપિણિ

નાગમાવાહયિપ્યામિ તથૈરાવણસંજ્ઞિતમ્ ॥
ઇહાભ્યેહિ મહાભાગ શક્રનાગ જયાવહ

વજ્રમાવાહયિષ્યામિ સર્વભેદકમાશુગમ્ ॥
શીઘ્રં વજ્ર ત્વમભ્યેહિ સર્વદુષ્ટનિબર્હણ

હયાનાવાહયિષ્યામિ છન્દોરૂ પાન્મનોહરાન્ ॥
આગચ્છન્તુ મમાદ્યેહ તુરગા વ્યોમગોચરાઃ

અહમાવાહયિષ્યામિ દણ્ડસંજ્ઞં બલોત્કટમ્ ॥
દણ્ડ શીઘ્રમિહાભ્યેહિ મહાબલપરાક્રમ

અહમાવાહયિષ્યામિ પિઙ્ગલં સુમહાબલમ્ ॥
લોકસાક્ષિસ્ત્વમભ્યેહિ પિઙ્ગલાય મહાબલ

ધ્વજમાવાહયિષ્યામિ ચિત્રં સૂર્યસમપ્રભમ્ ॥
ધર્મ શીઘ્રં ત્વમભ્યેહિ સૂર્યધ્વજગતાચ્યુત

દેવીમાવાહયિષ્યામિ સૂર્યભાં કામરૂપિણીમ્ ॥
દેવિ ત્વં તૂર્ણમાગચ્છ સર્વલોકનમસ્કૃતે ॥।

રાજ્ઞીમાવાહયિષ્યામિ સૂર્યપત્નીં સુરૂપિણીમ્॥
આગચ્છ વરદે રાજ્ઞિ જગદ્ધારિણિ પૂજિતે

અહમાવાહયિષ્યામિ સૂર્યપત્નીં સુવર્ચસામ્॥
ધ્યાયે દેવિ ત્વમાગચ્છ કૃતાકૃતવિચારિણિ

અહમાવાહયિષ્યામિ દશચન્દ્રમસો હયાન્ ॥
સર્વે શીઘ્રમિહાયાન્તુ ચન્દ્રાશ્વાઃ કામરૂપિણઃ॥.॥
અહમાવાહયિષ્યામિ કાન્તિં ત્રિદશવલ્લભામ્ ॥
કાન્તે શીઘ્રં ત્વમભ્યેહિ શશાઙ્કદયિતે શુભે

શોભામાવાહયિષ્યામિ કાઙ્ક્ષિતાં ભુવનેશ્વરીમ્ ॥
શોભે શીઘ્રં ત્વમભ્યેહિ સર્વલોકૈકસુન્દરિ

દિનમાવાહયિષ્યામિ સમસ્તધ્વાન્તનાશકમ્ ॥
દિન શીઘ્રં ત્વમભ્યેહિ દર્શિતાખિલમણ્ડલ ॥ ॥
રાત્રિમાવાહયિષ્યામિ સર્વભૂતસુખાવહામ્ ॥
રાત્રિ દેવિ ત્વમભ્યેહિ સર્વભૂતવરપ્રદે ।૨૨॥
સન્ધ્યામાવાહયિષ્યામિ દેવીં બ્રાહ્મણપૂજિતામ્ ॥
આગચ્છ વરદે સન્ધ્યે સર્વભૂતનમસ્કૃતે

સ્વાહામાવાહયિષ્યામિ વહ્નેર્ભાગં વિભાવરીમ્ ॥
સ્વાહેભ્યેહિ મહાભાગે વરદે કામરૂપિણિ

વેદાનાવાહયિષ્યામિ શુભરૂપધરાનહમ્ ॥
આયાન્તુ વાહનત્વેન ધૂમ્રકેતુવ્યવસ્થિતાઃ

આવાહયિષ્યે મહિષં મહાબલપરાક્રમમ્ ॥
આગચ્છેહ મહાભાગ સર્વદુષ્ટનિબર્હણ

દણ્ડમાવાહયિષ્યામિ સર્વવાહનપૂજિતમ્ ॥
એહિ દણ્ડ મહાભાગ સર્વસત્ત્વવિનાશન

દેવીમાવાહયિષ્યામિ ધૂમ્રોર્ણાં ચારુલોચનામ્ ॥
આગચ્છ દેવિ ધૂમ્રોર્ણે સર્વલોકનમસ્કૃતે

કાલમાવાહયિષ્યામિ સર્વત્રાહતપૂજિતમ્ ॥
કાલાભ્યેહિ મહાભાગ સર્વસત્ત્વભયઙ્કર

મૃત્યુમાવાહયિષ્યામિ દેવીં સર્વહરામહમ્ ॥
દેવિ મૃત્યો ત્વમભ્યેહિ સર્વગે કામરૂપિણિ

આવાહયામિ વરદં ચિત્રગુપ્તં સુખપ્રદમ્ ॥
ચિત્રગુપ્ત સમભ્યેહિ સર્વત્રસમદર્શન

અહમાવાહયિષ્યામિ વિરૂપાક્ષં મહાબલમ્ ॥
વિરૂપાક્ષ સમભ્યેહિ નિશાચરગણેશ્વર

ઉષ્ટ્રમાવાહયિષ્યામિ મહામોહમિતિ શ્રુતમ્ ॥
ઉષ્ટ્રાભ્યેહિ મહાભાગ મહાગ્રીવ મહાગતે

ગૌરીમાવાહયિષ્યામિ જલાધિપતિસુન્દરીમ્ ॥
એહિ ગૌરિ મહાદેવિ વરદે કામરૂપિણિ

હંસાનાવાહયિષ્યામિ સમુદ્રેણ સુપૂજિતાન્॥
આયાન્તુ વરદા હંસા રસાચારા વિહઙ્ગમાઃ

પાશમાવાહયિષ્યામિ સર્વાકર્ષણતત્પરમ્ ॥
પાશાભ્યેહિ મહાભાગ સર્વસત્ત્વવશઙ્કર

ગઙ્ગામાવાહયિષ્યામિ સર્વકલ્મષનાશિનીમ્ ॥
ગઙ્ગે શીઘ્રં ત્વમભ્યેહિ પીયૂષસદૃશોદકે

અહમાવાહયિષ્યામિ યમુનાં ચ યમાનુજામ્ ॥
આગચ્છ યમુને દેવિ સર્વકલ્મષનાશિનિ

શિવામાવાહયિષ્યામિ વાયોઃ પત્નીં પ્રભાવતીમ્ ॥
શિવેભ્યેહિ મહાભાગે વરદે કામરૂપિણિ

અહમાવાહયિષ્યામિ શિબિકાં પરમાયતામ્ ॥
શિબિકે ત્વમિહાભ્યેહિ સર્વસત્ત્વસુખઙ્કરિ

નરમાવાહયિષ્યામિ નરાધિપતિવાહનમ્ ॥
નર શીઘ્રં ત્વમભ્યેહિ તથા નૃપતિનાયક

શઙ્ખમાવાહયિષ્યામિ નિધિપ્રવરમુત્તમમ્ ॥
શીઘ્રં શઙ્ખ ત્વમભ્યેહિ ધનાધિપતિવલ્લભ

પદ્મમાવાહયિષ્યામિ નિધિપ્રવરમુત્તમમ્ ॥
પદ્મ શીઘ્રં ત્વમભ્યેહિ મહાવિભવકારક

દેવીમાવાહયિષ્યામિ પાર્વતીં હરવલ્લભામ્ ॥
દેવિ શીઘ્રં ત્વમભ્યેહિ મહાવિભવકારિકે

અહમાવાહયિષ્યામિ જયન્તં શક્રનન્દનમ્ ॥
જયન્ત શીઘ્રમભ્યેહિ સર્વાસુરવિમર્દન

આવાહયિષ્યે વરદં પુષ્કરં કામગં શુભમ્ ॥
પુષ્કર ત્વમિહાભ્યેહિ સર્વજ્ઞાનપ્રકાશક

જ્યોત્સ્નામાવાહવિષ્યામિ ત્રૈલોક્યસ્યૈકસુન્દરિ ॥
આગચ્છ વરદે જ્યોત્સ્ને સર્વભૂતસુખઙ્કરિ

અહમાવાહયિષ્યામિ ત્વામેવ નલકૂબરમ્ ॥
સમભ્યેહિ મહાભાગ ધનદસ્યાત્મસમ્ભવ

આવાહયિષ્યામિ તથા રવિપુત્રં યમાગ્રજમ્ ॥
સૂર્યપુત્ર સમભ્યેહિ ભક્તકલ્યાણકારક

ધર્મમાવાહયિષ્યામિ સર્વલોકસુખાવહમ્ ॥
ધર્માભ્યેહિ મહાભાગ જગતાં પરિપાલક

અર્થમાવાહયિષ્યામિ સર્વલોકસુખાવહમ્ ॥
અર્થભ્યેહિ મહાભાગ સર્વબાધાવિનાશક

કામમાવાહયિષ્યામિ ફલં સર્વસ્ય કારણ ॥
કામ શીઘ્રં ત્વમ ભ્યેહિ સર્વપ્રાણિહૃદિ સ્થિત

રાત્રિમાવાહયિષ્યામિ દેવીં સર્વજગત્પ્રિયામ્ ॥
અભ્યેહિ વરદે દેવિ રતિ ત્વમપરાજિતે

નિદ્રામાવાહયિષ્યામિ સર્વલોકસુખપ્રદામ્ ॥
આગચ્છ વરદે નિદ્રે ત્રૈલોક્યપરિમોહિનિ

આવાહયિષ્યે વરદાં મહાદેવીં સરસ્વતીમ્॥
શીઘ્રં દેવિ ત્વમભ્યેહિ સર્વકામવરપ્રદે

અહમાવાહયિષ્યામિ તથા ધન્વતરિં પ્રભુમ્ ॥
ધન્વન્તરે ત્વમભ્યેહિ ક્ષીરોદાર્ણવસમ્ભવ

અહમાવાહયિષ્યામિ ઉચ્ચૈઃશ્રવસમશ્વપમ્ ॥
હયરાજ સમભ્યેહિ ક્ષીરોદાર્ણવસંભવ

યેષામાવાહનં પ્રોક્તં તેષાં મન્ત્રમિદં પઠેત્ ॥
અશ્વિનૌ પ્રણતઃ સ્તૌમિ દર્ભપાણિરતન્દ્રિતઃ

આવાહનાનાં ચ ગણં તથોક્તં મહાશુભં પાપહરં પવિત્રમ્ ॥
આવાહિતાઃ સન્નિહિતાસ્ત્વવશ્યં દેવા ભવન્ત્યુત્તમવંશજાતાઃ

ઇતિ શ્રીવિષ્ણુધર્મોત્તરે તૃતીયે ખણ્ડે માર્કણ્ડેયવજ્રસંવાદે લોકાદ્યાવાહનવર્ણનો નામ પઞ્ચોત્તરશતતમોઽધ્યાયઃ