Vishnudharmottara Purana · Chapter 2.36.40

2.36
// puṣkara uvāca //
vailomyaṃ dharmarājo'pi nācaratyatha yoṣitām //
pativratānāṃ dharmajña pūjyāstasyāpi tāssadā

atra te varṇayiṣyāmi kathāṃ pāpapraṇāśinīm //
yathā vimokṣito bhartā mṛtyupāśāvṛtaḥ striyā

madreṣu śākale rājā babhūvā'śvapatiḥ purā //
aputrastapyamāno'sau putrārthe sarvakāmadam

sāvitryāḥ kārayāmāsa lakṣahomaṃ dvijottamaiḥ //
siddhārthakairhūyamānā sāvitrī pratyahaṃ dvija

śatasaṃkhyaiścaturthyāṃ tu māsāddaśadine gate //
kāle tu darśayāmāsa svāṃ tanuṃ manujeśvare

sāvitryuvāca //
rājanbhakto'si me nityaṃ prāpsyase tanayāṃ śubhām //
maddattāṃ yatprasādācca putrānprāpsyasi śobhanān

puṣkara uvāca // etāvaduktvā sā rājñaḥ praṇatasyaiva bhārgava //
jagāmādarśanaṃ devī khe yathā rāma cañcalā

mālavyā nāma tasyāsti rājñaḥ patnī pativratā //
suṣāva tanayāṃ kāle sāvitrīmeva rūpataḥ

sāvitryā hutayā dattā tadrūpasadṛśā tataḥ //
sāvitryeva bhavedeṣā jagāda nṛpatirdvijān // //
kālena yauvanaṃ prāptāṃ dadau satyavate pitā //
nāradastu tataḥ prāha rājānaṃ dīptatejasam

kṣīṇāyureṣa varṣeṇa bhaviṣyati nṛpātmajaḥ //
pradīyate sakṛtkanyā cintayitvā narādhipaḥ

tathāpi pradadau kanyāṃ dyumatsenātmaje śubhāma //
sāvitryapi ca bhartāramāsādya nṛpanandanam

nāradasya tu vākyena dūyamānena cetasā //
śuśrūṣāṃ paramāṃ cakre bhartṛśvaśurayorvane

rājyabhraṣṭassabhāryastu naṣṭacakṣurnarādhipaḥ //
tutoṣa tāṃ samāsādya rājaputrīṃ tadā snuṣām

caturthe'hani martavyaṃ yadā satyavatā dvija //
śvaśureṇābhyanujñātā tadā rājñā tu sā snuṣā

cakre trirātraṃ dharmajña prāpte tasmiṃstadā dine //
cārupuṣpaphalāhāraṃ satyavānprayayau vanam

śvaśureṇābhyanujñātā yācanābhaṅgabhīruṇā //
sāvitryapi jagāmāśu saha bhartrā mahadvanam

cetasā dūyamānena gūhamānā ca tadbhayam //
vane papraccha bhartāraṃ drumāṃśca samṛgāṃstathā

āśvāsayāmāsa sa rājaputrīṃ klāntāṃ vane padmapalāśanetrām //
sandarśanenātha mṛgadvijānāṃ tathā drumāṇāṃ vipine nṛvīraḥ

//
iti śrīviṣṇudharmottare dvitīyakhaṇḍe mārkaṇḍeyavajrasaṃvāde rāmaṃ prati puṣkaropākhyāne sāvitryupākhyāne vanapraveśo nāma ṣaṭtriṃśattamo'dhyāyaḥ

2.37
// satyavānuvāca // //
vane'sminṣaṭpadākīrṇaṃ sahakāraṃ manoharam //
śrotraghrāṇamukhaṃ paśya vasante rativardhanam

vane sapuṣpaṃ dṛṣṭvaiṣā raktā ślokaṃ manoharam //
hasatīva manaḥ serṣyaṃ tvāmivāyatalocane

dakṣiṇe dakṣiṇenaitāṃ paśya ramyāṃ vanasthalīm //
puṣpitaiḥ kiṃśukairyuktāṃ jvalitāmiva saprabhaiḥ

sugandhikusumāmodī vanarājivinirgataḥ/ /
karoti vāyurdākṣiṇyādāvayoḥ klamanāśanam

apyutpalaviśālākṣi karṇikāraiḥ supuṣpitaiḥ //
kāñcanairiva bhātyeṣā vanarājī manoharā

atimuktalatājālaruddhamārgavanasthalīḥ //
paśyoccaiścārusarvāṅgi kusumotkara bhūṣaṇā

madhumattālijhāṅkāravyājena varavarṇini //
cāpayaṣṭiṃ karotīva kāmaḥ pānthajighāṃsayā

phullacaṃpakasadvaktrā puṃskokilavinādinī //
vibhāti cārutilakā tvamivaiṣā vanasthalī

kokilaścūtaśikhare mañjarīreṇupiñjaraḥ //
gaditairvyaktatāmeti kulīnaśceṣṭitairiva

puṣpareṇvanuliptāṅgaḥ priyāmanusaranvane //
kusumātkusumaṃ yāti kūjankāmī śilīmukhaḥ

mañjarīṃ sahakārasya kāntācañcvagrakhaṇḍitām //
svādayatyatipuṣpe'pi puṃskokilayuvā drume

kākaḥ prasūtāṃ vṛkṣāgre sāmiṣāgreṇa cañcunā //
kākīṃ sampāyayatyeṣa pakṣācchādita putrakām

bhūbhāgaṃ nimnamāsādya dayitāsahito yuvā //
nāhāramapi cādatte kāmī kāmaṃ kapiñjalaḥ

kalaviṅkastu virutaiḥ sapriyo viṭape sthitaḥ //
muhurmuhurviśālākṣi utkaṇṭhayati kāminaḥ

kṣudraśākhāṃ samārūḍhaḥ śuko'yaṃ kāntayā saha //
bhāreṇa namayañśākhāṃ karoti saphalāmiva

vanebhapiśitāsvādatṛpto nidrāmupāgataḥ //
śete siṃhayuvā kāntācaraṇāvaraṇānanaḥ

vyāghrayormidhunaṃ paśya śailakandara saṃsthitam //
yayornetraprabhālokairguhā bhinneva lakṣyate

aya dvīpī priyāṃ leḍhi jihvāgreṇa punaḥpunaḥ //
prītimāyāti mahatīṃ lihyamānaśca kāntyā

utsaṅgakṛtamūrdhānaṃ nidrāpahṛtacetasam //
jantūddharaṇataḥ kāntaṃ sukhayatyeva vānarī

bhūmau nipatitā kāntaṃ mārjārī darśitodarā //
nakhairdantaistudatyeṣā na ca pīḍayate tathā

śaśakaḥ śaśikā cobhe saṃsupte pīḍite ime //
sam̐llīnagātracaraṇe karṇairvyaktimupāgate

snātaṃ sarasi padmāḍhye vāraṇaṃ madamantharam //
sambhāvayati tanvaṅgi mṛṇālaśakalairvaśā

kāntapotrasamutkhātaiḥ kāntā mārgānusāriṇī //
karoti kavalaṃ mustairvarāhī potakānane

dṛḍhāṅgasandhirmahiṣaḥ kardamārdratanurvane //
anuvrajati dhāvantīṃ priyāṃ baddhacatuṣkakaḥ

paśya cārvaṅgi sāraṅgaḥ tvatkaṭākṣanibhaṃ vane //
sabhāryāṃ māṃ tu paśyantaṃ kautūhalasamanvitam

paśya paścimapādena rohī kaṇḍūyate mukham //
snehārdrabhāvaḥ kaṣati bhartā śṛṅgāgrakoṭinā

dāḍime camarīṃ paśya sitavālāmagacchatīm //
anvāste camaraḥ kāmī vīkṣate māṃ ca garvitaḥ //

ātape gavayaḥ paśya niviṣṭo bhāryayā saha //
romanthamāsye kurvāṇaḥ kākaṃ kakudi dhārayan

paśyājaṃ bhāryayā sārdhaṃ nyastāgracaraṇadvayam //
vipule badarīskandhe tacchadagrāsakāmyayā

haṃsaṃ sabhāryaṃ sarasi vicarantaṃ sunirmale //
suśuklasyendubimbasya paśyainaṃ sadṛśa śriyam

sabhāryaścakravāko'yaṃ kamalākaramadhyagaḥ //
karoti padminīṃ kāntāṃ sapuṣpāmiva sundari

mayā phaloccayaḥ subhru tvayā puṣpoccayaḥ kṛtaḥ //
indhanaṃ na kṛtaṃ kiñcittatkariṣyāmi sāṃpratam

tvamasya sarasastīre drumacchāyāmupāśritā //
kṣaṇamātraṃ pratīkṣasva viśramasva ca bhāmini

// sāvitryuvāca // //
evametatkariṣyāmi mama dṛṣṭipathāttvayā //
dūre kānta na gantavyaṃ bibhemi gahane vane

// puṣkara uvāca // //
tasya pātayataḥ kāṣṭhaṃ jajñe śirasi vedanā //
sa vedanārttaḥ saṅgamya bhāryāṃ vacanamabravīt

// satyavānuvāca // //
āyāsena mamānena jātā śirasi vedanā //
tamaśca praviśāmīva na ca jānāmi kiñcana

tvadutsaṅge śiraḥ kṛtvā nidropahatalocanaḥ //
puṣkara uvāca //
tadutsaṅge śiraḥ kṛtvā suṣvāpa gatacetanaḥ

pativratā mahābhāgā tatassā rājakanyakā //
dadarśa dharmarājaṃ tu svayaṃ taṃ deśamāgatam / ३८//
nīlotpaladalaśyāmaṃ pītāmbaradharaṃ prabhum //
vidyullatānibaddhāṅgaṃ satoyamiva toyadam

kirīṭenārkavarṇena kuṇḍalābhyāṃ virājitam //
hārabhārārpitoraskaṃ tathāṅgadavibhūṣitam

tathānugamyamānaṃ ca kālena saha mṛtyunā //
sa tu saṃprāpya taṃ deśaṃ dehātsatyavatastadā

aṅguṣṭhamātraṃ puruṣaṃ pāśabaddhaṃ vaśaṅgatam //
ākṛṣya dakṣiṇāmāśāṃ prayayau satvaraṃ tadā

sāvitryapi varārohā tyaktvā taṃ gatajīvitam //
anuvavrāja gacchantaṃ dharmarājamatandritā

tāmuvāca yamo gaccha yathāgatamanindite //
aurdhvadaihikakāryeṣu yuktā bhartuḥ samācara

nānugantumasau śakyastvayā lokāntaraṃ gataḥ //
pativratāsi tena tvaṃ muhūrtamanupaśyasi //

guruśuśrūṣaṇādbhadre tathā satyavato mahat //
puṇyaṃ samarjitaṃ yena nayāmyenamahaṃ svayam

etāvadeva kartavyaṃ puruṣasya vijānataḥ //
mātuḥ pituśca śuśrūṣā gurośca varavarṇini

gurutritayametacca sadā satyavatā vane

pūjitaṃ pūjitassvargastadānena ciraṃ śubhe //
tapasā brahmacaryeṇa tvagniśuśrūṣayā tathā

puruṣāḥ svargamāyānti guruśuśrūṣaṇena ca //
ācāryaśca pitā caiva mātā bhrātā ca pūrvajaḥ

nārtenāpyavamantavyā brāhmaṇena viśeṣataḥ //
ācāryo brahmaṇo mūrtiḥ pitā mūrtiḥ prajāpateḥ

mātā pṛthivyā mūrtiśca bhrātā vai mūrtirātmanaḥ //
yanmātāpitarau kleśaṃ sahete sambhave nṛṇām

na tasya niṣkṛtiḥ śakyā kartuṃ varṣaśatairapi //
tayornityaṃ priyaṃ kuryādācāryasya ca sarvadā

teṣveva triṣu tuṣṭeṣu tapaḥ satyaṃ samāpyate //
teṣāṃ trayāṇāṃ śuśrūṣā paramaṃ tapa ucyate

na tairanabhyanujñāto dharmamanyaṃ samācareta //
ta eva hi trayo lokāsta eva traya āśramāḥ

ta eva ca trayo vedāsta evoktāstrayo'gnayaḥ //
pitā vai gārhapatyo'gnirmātāgnirdakṣiṇaḥ smṛtaḥ

gururāhavanīyastu agnitretā garīyasī //
triṣvapramādyanneteṣu trīṃllokāñjayate gṛhī

sa hi divyena vapuṣā devavaddivi modate //
imaṃ lokaṃ mātṛbhaktaḥ pitṛbhaktastu madhyamam

guruśuśrūṣayā tvevaṃ brahmalokaṃ samaśnute //
sarve tasyādṛtā dharmā yasyaite traya ādṛtāḥ

anādṛtāstu yasyaite sarvāstasyāphalāḥ kriyāḥ //
yāvattrayaste jīveyustāvannānyatsamācaret

tanuṃ nivedayettebhyo mano vacanakarmabhiḥ //
triṣveteṣvitikṛtyaṃ hi puruṣasya samāpyate

eṣa dharmaḥ paraḥ sākṣādupadharmo'nya ucyate //
gurupūjāratirbhartā tvaṃ ca sādhvī pativratā

vinivartasva dharmajñe glānirbhavati te'dhunā //
sāvitryuvāca //
patirhi daivataṃ strīṇāṃ patireva parāyaṇam

anugamyaḥ striyā sādhvyā patiḥ prāṇadhaneśvaraḥ //
mitaṃ dadāti hi pitā mitaṃ bhrātā mitaṃ sutaḥ

amitasya hi dātāraṃ bhartāraṃ kā na pūjayeta //
nīyate yatra bhartā me svayaṃ vā yatra gacchati

mayāpi tatra gantavyaṃ yathāśakti surottama //
patimādāya gacchantamanugantumahaṃ yadā

tvāṃ deva na hi śakṣyāmi tadā tyakṣyāmi jīvitam //
manasvinī tathā kā ca vaidhavyākṣaradūṣitā

muhūrtamapi jīveta maṇḍanārhāpyamaṇḍitā //
yama uvāca //
pativrate mahābhāge parituṣṭo'smi te śubhe

vinā satyavataḥ prāṇānvaraṃ varaya mā ciram //
sāvitryuvāca //
vinaṣṭacakṣuṣo rājyaṃ cakṣuṣā saha kāmaye //
cyutarājyasya dharmajña śvaśurasya mahātmanaḥ

// yama uvāca //
kṛtena kāmena nivarta bhadre bhaviṣyatīdaṃ sakalaṃ tvayoktam //
mamoparodhastava ca klamaḥ syāttathādhvanā tena tava bravīmi

iti śrīviṣṇudharmottare dvitīyakhaṇḍe mā० saṃ० sāvitryupākhyāne saptatriṃśattamo'dhyāyaḥ

2.38
sāvittryuvāca//
kutaḥ klamaḥ kuto duḥkhaṃ sadbhiḥ saha samāgame //
satāṃ tasmānna me glānistvatsamīpe surottama

sādhūnāṃ vāpyasādhūnāṃ santa eva parā gatiḥ //
naivāsatāṃ naiva satāmasanto naiva cātmanaḥ

viṣāgnisarpaśastrebhyo na tathā jāyate bhayam //
akāraṇajagadvairikhalebhyo jāyate yathā

santaḥ prāṇānapi tyaktvā parārthaṃ kurvate yathā //
tathā'santo'pi manujāḥ parapīḍāsu tatparāḥ

tyajatyasūnayaṃ lokastṛṇavadyasya kāraṇāt//
paropadhānasaktāste paralokaṃ tathā satā

nikāyeṣunikāyeṣu purā brahmā jagadguruḥ //
asatāmupaghātāya rājānaḥ kṛtavānsvayam

cāraiḥ parīkṣayedrājā dhūrtānsammārjayetsadā //
nigrahaṃ cāsatāṃ kuryātsa tu lokajiduttamaḥ

dhānyasaṃrakṣaṇārthāya nirmārṣṭā kakṣamuddharan //
yathā vardhayate dhānyaṃ varddhanīyāstathā prajāḥ

nigraheṇā satāṃ rājñā satāṃ ca paripālanaiḥ //
etāvadeva kartavyaṃ rājñā svargamabhīpsatā

rājakṛtyaṃ hi lokeṣu nāstyanyajjagatīpate //
asatāṃ nigrahādeva satāṃ ca paripālanāt

rājānuśāsitā teṣāmasatāṃ śāsitā bhavān //
tena tvamadhiko deva devebhyaḥ pratibhāsi me

jagattu dhāryate sadbhiḥ satāmagryastathā bhavān //
tena tvāmabhiyāntyā me klamo deva na vidyate

yama uvāca //
tuṣṭosmi te viśālākṣi vacanairdharmasaṃhitaiḥ //
vinā satyavataḥ prāṇānvaraṃ varaya mā ciram

sāvitryuvāca //
sahodarāṇāṃ bhrātṝṇāṃ kāmayāmi śataṃ vibho //
anapatyaḥ pitā prītiṃ putralābhātprayātu me

yama uvāca //
kṛtena kāmena nivarta bhadre bhaviṣyatīdaṃ sakalaṃ tavoktam //
mamoparodhastava ca klamaḥ syāttathādhunā tena tava bravīmi

iti śrīviṣṇudharmottare dvitīyakhaṇḍe mā० sa० sāvitryupākhyāne dvitīyavaralābho nāmāṣṭatriṃśattamodhyāyaḥ

2.39
sāvitryuvāca //
dharmo hi daivataṃ strīṇāṃ patireva parāyaṇam //
anugamyaḥ striyā sādhvyā patiḥ prāṇadhaneśvaraḥ

dharmārjane suraśreṣṭha kuto glāniḥ kutaḥ klamaḥ//
tvatpādamūlamevedaṃ paramaṃ dharmakāraṇam

dharmārjanaṃ sadā kāryaṃ puruṣeṇa vijānatā //
tallābhaḥ sarvalābhebhyo yato deva viśiṣyate

dharmaścārthaśca kāmaśca trivargaṃ jīvataḥ phalam //
dharmahīnasya kāmārthau vandhyāsutasamāvubhau

dharmādarthastathā kāmo dharmāllokadvayaṃ tathā //
dharma eko'nuyātyenaṃ yatra kutra ca gāminam

śarīreṇa samaṃ nāśaṃ sarvamanyaddhi gacchati //
eko hi jāyate jantureka eva vipadyate

dharmastamanuyātyeko na suhṛnna ca bāndhavāḥ //
rūpasaubhāgyalāvaṇyaṃ sampaddharmeṇa labhyate

brahmendropendraśarvendrayamārkāgnyanilāmbhasām //
vasvaśvidhanadādyānāṃ ye lokāḥ sarvakāmadāḥ

dharmeṇa tānavāpnoti puruṣaḥ puruṣāntaka //
manoharāṇi dvīpāni varṣāṇi sumukhāni ca

prayānti dharmeṇa narāstathaivāmaratāmitāḥ //
nandanādīni mukhyāni devodyānāni yāni ca

tāni puṇyena labhyante nākapṛṣṭhaṃ tathā naraiḥ //
vimānāni vicitrāṇi tathaivāpsarasaḥ śubhāḥ

taijasāni śarīrāṇi sadā puṇyavatāṃ phalama //
rājyaṃ nṛpatipūjā ca kāmasiddhistathepsitā

upaskarāṇi mukhyāni phalaṃ puṇyasya dṛśyate //
rukmavaiḍūryadaṇḍāni candrāṃśusadṛśāni ca

cāmarāṇi surādhyakṣa bhavanti śubhakarmaṇām //
( pūrṇendumaṇḍalābhena raktāṃśukamitena ca

dhāryatāṃ yānti chatreṇa naraḥ puṇyena karmaṇā //)
jayaśaṅkhasvanādeva sūtamāgadhaniḥsvanama

varāsanaṃ sabhṛṅgāraṃ phalaṃ puṇyā karmaṇaḥ //
varānnapānaṃ gītaṃ ca nṛtyamālyānulepanam

ratnavastrāṇi mukhyāni phalaṃ puṇyasya karmaṇaḥ //
rūpaudāryaguṇopetāḥ striyaścātinoharāḥ

vāsaḥ prāsādapṛṣṭheṣu bhavanti śubhakarmaṇām //
suvarṇakiṃkiṇī miśracāmarāḥ pīṭhadhāriṇaḥ

vahanti turagā deva naraṃ puṇyena karmaṇā //
hemakakṣaiḥ samātaṅgaiścalatparvatasannibhaiḥ

khelāṃghripadavinyāsairyānti puṇyena karmaṇā //
sarvakāmaprade deve sarvāpadduritāpahe

vahanti bhaktiṃ puruṣāssadā puṇyena karmaṇā //
tasya dvārāṇi yajanaṃ tapo dānaṃ dayā kṣamā

brahmacaryaṃ ca satyaṃ ca tīrthānusaraṇaṃ śubhe //
svādhyāyasevā sādhūnāṃ sahavāsaḥ surārcanam

gurūṇāṃ caiva śuśrūṣā brāhmaṇānāṃ ca pūjanam //
indriyāṇāṃ jayaścaiva mārdavaṃ hrīramatsaram

tasmāddharmaḥ sadā kāryo nityameva vijānatā //
na hi pratīkṣate mṛtyuḥ kṛtamasya na vā kṛtam

bāla evācareddharmamanityaṃ deva jīvitam //
ko hi jānāti kasyādya mṛtyuḥ kena bhaviṣyati

paśyato'pyasya lokasya maraṇaṃ purataḥ sthitam //
amarasyeva caritamatyāścaryaṃ surottama

yuvatvāpekṣayā bālo vṛddhatvāpekṣayā yuvā //
mṛtyorutsaṅgamārūḍhaḥ sthaviraḥ kimapekṣate

bhuvaḥ śailaṃ samārūḍhaḥ tato vṛkṣāgramāśritaḥ //
tatrāpyavindatastrāṇaṃ mṛtyodbhītasya kā gatiḥ

na bhayaṃ maraṇādeva prāṇināmadhikaṃ kvacita //
tatrāpi nirbhayāḥ santaḥ sadā sukṛtakāriṇaḥ

yama uvāca //
tuṣṭo'smi te viśālākṣi vacanairdharmasaṅgataiḥ //
vinā satyavataḥ prāṇānvaraṃ varaya mā ciram

sāvitryuvāca //
varayāmi tvayā dattaṃ putrāṇāṃ śatamaurasam //
anapatyasya lokeṣu gatiḥ kila na vidyate

yama uvāca //
kṛtena kāmena nivarta bhadre bhaviṣyatīdaṃ sakalaṃ tvayoktam //
mamoparodhaśca tava klamaḥ syāttathādhunā tena tava bravīmi

iti śrīviṣṇudharmottare dvitīyakhaṇḍe mā० saṃ० sāvitryupākhyāne tṛtīyavaralābho nāmaikonacatvāriṃśo'dhyāyaḥ

2.40
sāvitryuvāca //
sarvadharmavidhānajñaḥ sarvadharmapravartakaḥ //
tvameva jagatāṃ nāthaḥ prajāsaṃyamano yamaḥ

karmaṇāmānurūpyeṇa yasmādyamayasi prajāḥ ///
tasmāttvamucyase deva yama ityeva nāmataḥ

dharmeṇemāḥ prajāḥ sarvā yathā rañjayase prabho //
tasmātte dharmarājeti nāma satyaṃ nigadyate

sukṛtaṃ duṣkṛtaṃ cobhe purodhāya yathā janāḥ //
tvatsakāśamathāyānti tasmāttvaṃ mṛtyurucyase

sarveṣāmatha bhūtānāṃ yasmādantakaro bhavān ////
tasmātvamantakaḥ proktaḥ sarvadevairmahādyute

vivasvatastvaṃ tanayaḥ prathamaḥ parikīrtitaḥ //
tasmādvaivasvato nāmnā sarvadeveṣu kathyase

kālaṃ kalādyaṃ kalayansarveṣāṃ tvaṃ hi tiṣṭhasi //
tasmātkāleti te nāma procyate tatsudarśibhiḥ

āyuṣye karmaṇi kṣīṇe gṛhṇāsi prasabhaṃ janam /////
tasmāttvaṃ kathyase loke sarvaprāṇahareti vai

tava prasādāddeveśa dharme tiṣṭhanti jantavaḥ //
tava prasādāddeveśa saṅkaro naiva jāyate

satāṃ sadā gatirdeva tvameva parikīrtitaḥ //
jagato'sya jagannātha maryādāparipālakaḥ

pāhi māṃ tridaśaśreṣṭha duḥkhitāṃ śaraṇāgatām //
pitarau ca tathaivāsya rājaputrasya duḥkhitau

yama uvāca //
stutena bhaktyā dharmajñe mayā tuṣṭena satyavān //
tava bhartā vimukto'yaṃ labdhakāmā vrajābale

rājyaṃ kṛtvā tvayā sārdhaṃ vatsarāśītipañcakam //
nākapṛṣṭhamathāruhya tridaśaissaha raṃsyate

stotreṇānena dharmajñe kalyamutthāya yaśca mām //
kīrtayiṣyati tasyāpi dīrghamāyurbhaviṣyati

puṣkara uvāca // etāvaduktvā bhagavānyamastu vimucya taṃ rājasutaṃ mahātmā //
adarśanaṃ tatra jagāma rāma kālena sārdhaṃ saha mṛtyunā ca

iti śrīviṣṇudharmottare dvitīyakhaṇḍe mā० saṃ० sāvitryupākhyāne cattvāriṃśattamo'dhyāyaḥ