Vishnudharmottara Purana · Chapter 2.136.140

2.136
garga uvāca//
anagnirdīpyate yatra rāṣṭre bhṛśasamanvitaḥ //
na dīpyate cendhanaṃ vā sarāṣṭraḥ pīḍyate nṛpaḥ

prajalādambunāśaṃ ca tathārdraṃ vāti kiñcana //
prasādastoraṇaṃ dvāraṃ nṛpaveśma surālayam

etāni yatra dahyante tatra rājabhayaṃ bhavet //
vidyutā vā pradahyante tathāpi nṛpaterbhayam

anaiśyāni tamāṃsi syurdiśa pāṃsurajāṃsi ca //
dhūmaścānagnijo yatra tatra vidyānmahadbhayam // ४
rātrāvanabhre gagane bhayaṃ syādṛkṣavarjite //
divā satāre gagane tathaiva bhayamādiśet

grahanakṣatravaikṛtye tārāvikṛtadarśane //
puravāhanayāneṣu catuṣpānmṛgapakṣiṣu

āyudheṣu ca dīpteṣu dhūmāyatsu tathaiva ca //
niryatsu kośāśca tathā saṃgrāmastumulo bhavet

vināgniṃ visphuliṅgāśca dṛśyante yatra karhicit //
svabhāvāccāpi pūryante dhanūṃṣi vikṛtāni ca

vikārāścāyudhānāṃ syustatra saṃgrāmamādiśet //
trirātro'poṣitastatra purodhāḥ susamāhitaḥ

samidbhiḥ kṣīravṛkṣāṇāṃ sarṣapaiśca ghṛtena ca //
agniliṅgaiśca juhuyādvahniṃ śvetāmbaraḥ śuciḥ

dadyātsuvarṇaṃ ca tathā dvijebhyo gāścaiva vastrāṇi tathā bhuvaṃ ca //
evaṃ kṛte pāpamupaiti nāśaṃ yadvahnivaikṛtyabhavaṃ dvijendra

iti śrīviṣṇudharmottare dvitīyakhaṇḍe mārkaṇḍeyavajrasaṃvāde rāmaṃ prati puṣkaropākhyāne autpātikāgnivarṇano nāma ṣaṭatriṃśaduttaraśatatamo'dhyāyaḥ

2.137
garga uvāca //
pureṣu yeṣu dṛśyante pādapā daivacoditāḥ //
rudanto vā hasanto vā sravanto vā bahūnrasān

purogavā vinā vāsaṃ śākhāṃ muñcantyasaṃśramāt //
phalapuṣpaṃ tathā bālā darśayanti trihāyanā

sarvāvasthāṃ darśayanti phalapuṣpamathābhavam //
kṣīraṃ snehaṃ surāṃ raktaṃ madhu toyaṃ sravanti ca

śuṣyantyarogāḥ sahasā śuṣkā rohanti vā punaḥ //
uttiṣṭhantīha patitāḥ patanti ca tathotthitāḥ

tatra vakṣyāmi te brahmanvipāke phalameva ca //
rodane vyādhimākhyāti hasane deśaviplavam

śākhāprapatane kuryātsaṃgrāme yo'dhapātanam //
bālānāṃ maraṇe kuryādbālānāṃ phalapuṣpatā

svarāṣṭrabhedaṃ kurute phalapuṣpasanātanama //
kṣayaṃ sarvatrage kṣīre snehe durbhikṣalakṣaṇam

vāhanāpacayaṃ madhye rakte saṃgrāmamādiśet //
madhusrāve bhavedvyādhirjalasrāveṇa varṣati

arogaśoṣaṇājjñeyaṃ brahmandurbhikṣalakṣaṇam //
śuṣkeṣu saṃprarohatsu vīryamannaṃ ca hīyate

utthāne patitānāṃ ca bhayaṃ bhedakaraṃ bhavet //
sthānātsthānātturaṃgāṇāṃ deśabhaṅgaṃ tathādiśet

jalpatsvapi ca vṛkṣeṣu rudatsvapi dhanakṣayam //
etatpūjitavṛkṣeṣu sarvaṃ rājño vipacyate

puṣpe phale vā vikṛte rājño mṛtyuṃ tadādiśet //
anyeṣu caivaṃ yukteṣu vṛkṣātpāteṣvatandritaḥ

ācchādayitvā taṃ vṛkṣaṃ gandhamālyairvibhūṣayet //
vṛkṣopari tathā chatraṃ kuryāttāpapraśāntaye

śivamabhyarcayeddevaṃ paśuṃ cāsmai nivedayet //
mūlebhya iti ṣaṇmāṣānhutvā rudrīṃ japettathā

madhvājyayuktena tu pāyasena saṃpūjya viprāṃśca bhuvaṃ ca dadyāt //
gītena nṛtyena tathārcayeta devaṃ bhavaṃ pāpavināśahetoḥ

iti śrīviṣṇudharmottare dvitīyakhaṇḍe mā०saṃ०rāmaṃ prati puṣkaropākhyāne autpātike vṛkṣavaikṛtyavarṇano nāma saptatriṃśaduttaraśatatamo'dhyāyaḥ

2.138
// garga uvāca //
ativṛṣṭiranāvṛṣṭirdurbhikṣāyobhayaṃ matam //
anṛte bhadine riktā vṛṣṭirjñeyā bhayāvahā

anabhre vikṛtā caiva vijñeyā rājamṛtyave //
śītoṣṇatāviparyāse jantūnāṃ ripujaṃ bhayam

śoṇitaṃ varṣate yatra tatra śastrabhayaṃ bhavet //
aṅgārapāṃsuvarṣeṇa nagaraṃ tadvinaśyati

majjāsthisnehamāṃsānāṃ janamārabhayaṃ bhavet //
phalapuṣpe tathā dhānyaṃ hiraṇyādi bhayāya tu

pāṃsujantūpalānāṃ tu varṣaṇe rogajaṃ bhayam //
chidrāṇāṃ tu pravarṣe ca sasyānāmītivardhanam

virajaske ravau vyabhre yadā chāyā na dṛśyate //
dṛśyate tu pratīpā vā tatra deśabhayaṃ bhavet

nirabhre cātha rātrau vā śvetaṃ yāmyottareṇa tu //
indrāyudhaṃ tadā dṛṣṭvā ulkāpātāṃstathaiva ca

digdāhapariveṣau vā gandharvanagaraṃ tathā //
paracakrabhayaṃ brūyāddeśopadravameva vā

sūryenduparjanyasamīraṇānāṃ yāgastu kāryo vidhivaddvijendra //
dhānyānnagokāñcanadakṣiṇāśca deyā dvijānāṃ bhayanāśahetoḥ

iti śrīviṣṇudharmottare dvitīyakhaṇḍe mā० saṃ० rāmaṃ prati pupkaropākhyāne autpātikeṣu vṛṣṭivaikṛtyavarṇano nāmāṣṭatriṃśaduttaraśatatamo'dhyāyaḥ

2.139
garga uvāca //
nagarādapasarpanti samīpamupayānti vā //
aśoṣyā api śuṣyanti samīpaṃ pravahanti vā

nadyo hradaprasravaṇā visarāśca bhavanti cet //
vivarṇaṃ kaluṣaṃ taptaṃ phenavajraṃ tu saṃkulam

kṣīraṃ snehaṃ surāṃ raktaṃ vahante vā kulodakāḥ //
ṣaṇmāsābhyantaraṃ tatra paracakrabhayaṃ bhavet

jalāśayā nadante vā prajalpanti kvathanti vā //
vimuñcate'tha vā brahmañjalāndhūmarajāṃsi ca

akhāte vā jalotpattiḥ sasattvā vā jalāśayāḥ //
saṃgītaśabdā dṛśyante janamārabhayaṃ vadet

jalāśayānāṃ vaikṛtye saṃyatastu jalāśaye //
sthālīpākena paśunā varuṇaṃ pūjayeddvija

divyamambhaḥ payaḥ sarpirmadhu cātrāvasecanam //
japtavyā vāruṇā mantrāstaiśca homo jale bhavet

madhvājyayuktaṃ paramānnamatra deyaṃ dvijānāṃ dvija bhojanārthe //
gāvaśca deyā dvija vastrayuktāstathodakumbhāḥ sakalāṅgaśāntyai

iti śrīviṣṇudharmottare dvitīyakhaṇḍe mārkaṇḍeyavajrasaṃvāde rāmaṃ prati puṣkaropākhyāne jalavaikṛtyavarṇano nāmaikonacatvāriṃśaduttaraśatatamo'dhyāyaḥ

2.140
// garga uvāca // //
kālaprasavanā nāryaḥ kālātītāḥ prajāstathā //
vikṛtaprasavāścaiva yugmaprasavikāstathā

amānuṣā aruṇḍāśca sañjātavyasanāstathā //
hīnāṅgā adhikāṅgāśca jāyante yadi vā striyaḥ //

paśavaḥ pakṣiṇaścaiva tathā caiva sarīsṛpāḥ //
vināśaṃ tasya deśasya kulasyāpi vinirdiśet

vivāsayettānnṛpatiḥ svarāṣṭrātpriyaṃ ca pūjyāśca tato dvijendrāḥ //
kimicchakairbrāhmaṇatarpaṇaṃ ca kāryaṃ tataḥ śāntimupaiti pāpam

iti śrīviṣṇudhamottare dvitīyakhaṇḍe mārkaṇḍeyavajra saṃvāde rāmaṃ prati puṣkaropākhyāne strīprasavavaikṛtyavarṇano nāma catvāriṃśaduttaraśatatamo'dhyāyaḥ