Vishnudharmottara Purana · Chapter 1.99

// mārkaṇḍeya uvāca //
dhruvasthānaniviṣṭānāṃ devatānāṃ narādhipa //
dadhyodanaṃ pāyasaṃ ca pratyekaṃ vinivedayet

guḍaudanaṃ guḍāpūpāḥ phalāni guḍapāyasam //
nivedanaṃ tu sūryāya dhānyalāje madhūtkaṭe

sarpirdadhyodanaṃ caiva phalāni vividhāni ca //
modakāni ca mukhyāni pāyasaṃ śaśinastathā

guḍaudanaṃ guḍāpūpā yāvakaṃ guḍapāyasam //
kṛsaraṃ ca tathā deyaṃ bhūmiputrāya pārthiva

kṣīraudanaṃ sasarpiṣkaṃ kṣīravṛkṣaphalāni ca //
kṣīriṇyaśca tathoṣadhyo somaputrāya dāpayet

śimbidhānyavikārāṇi bilvānyāmalakāni ca //
ghṛtaudanaṃ ca jīvāya dātavyaṃ bhūtimicchatā

dadhyodanaṃ pāyasaṃ ca madhunā sarpiṣā yutam// /
utkārikaṃ modakāṃśca bhārgavāya nivedayet /

māṣaudanaṃ sasarpiṣkaṃ kṛsaraṃ dadhi yāvakam//
nivedayettu saurāya kulatthaṃ caṇakaiḥ saha

plakṣaṃ dadhitthaṃ ca tathā palalaṃ caiva rāhave//
māṣaudanaṃ tathā deyaṃ yavāpūpāṃstathaiva ca

tallopikāstathā matsyāḥ ketave kṛsaraṃ tathā //
vasāsarpīṃṣi ca tathā deyāni manujeśvara

madhulāje kṛttikānāṃ kulmāṣaṃ dadhisarpiṣī //
rohiṇīnāṃ ca bījāni dadhipiṣṭavṛṣāṇi ca

dadhyodakaṃ celvalānāṃ mṛgamāṃsaṃ tathaiva ca //
rudhiraṃ kṛsaraṃ cobhau raudrasya vinivedayet

punarvasoḥ pradātavyaṃ palalaṃ savilāyanam //
pāyasaṃ ca sasarpiṣkaṃ tiṣyāya vinivedayet

piṣṭasarpāṇi sārpasya kṣaudraṃ dadhiyutaṃ tathā //
tilaudanaṃ sapalalaṃ paitryasya vinivedayet

ṣaṣṭikānnaṃ ca bhāgyasya madhusarpīṃṣi cāpyatha //
āryamṇāya tilāpūpānṣaṣṭikānnaṃ tathaiva ca //

priyaṃgutaṇḍulaiḥ siddhaṃ sāvitrāya ca pāyasam //
tvāṣṭrasya caiva pīyūṣaṃ dvijā citrāṇḍajāstathā

vāyavyasya ca phalguni mūlakāni śubhāni ca //
kulatthāni viśākhāsu yavāpūpāstathaiva ca

kulatthabhaktaṃ mitrāya dadhikṣaudrānvitaṃ tathā //
ghṛtaudanaṃ ca śākrāya phalāni vividhāni ca

mūlāni ca vicitrāṇi tathā mūlaphalāni ca //
āpyasya saktavo deyā madhumiśrodakaiḥ saha

saktavo vaiśvadevāya madhulāje tathaiva ca //
brāhmāya pāyasaṃ deyaṃ saguḍaṃ bhūtimicchatā

dadhyodanaṃ pāyasaṃ ca vaiṣṇavāya nivedayet //
ghṛtodakaṃ ca śākāni vāsavāya nivedayet

paiṣṭaṃ biḍālaṃ śākāṃśca vāruṇāya tathā dadhi //
ādāya māṃsamājaṃ tu vyāghraṃ piṣṭakṛtaṃ dadhi

āhirbudhnyāya māṃsāni tathaiva ca rasaudanam //
pauṣṇāya saktavo māṣā māṣayuktāśca saktavaḥ

aśvaṃ piṣṭakṛtaṃ māṣānyāvakaṃ ca tathā dadhi //
āśvinasyātha yāmyasya taṇḍulāni tilāni ca

rājanpaiṣṭāśca paśavo māṃsaṃ pakvāmakaṃ tathā//
pāyasaṃ saghṛtaṃ kṣaudraṃ pūrvasyāṃ vinivedayet

āgneyyāṃ diśi rājendra kṛsaraṃ kṣīramiśritam//
dakṣiṇasyāṃ ca dātavyaṃ kṛsaraṃ tailamiśritam/ā२६/
nairṛtyāṃ ca pradātavyaṃ kṛsaraṃ matsyasaṃyutam/
kulmāṣāṃścaiva matsyāṃśca paścimasyāṃ nivedayet

vāyavyāyāśca matsyāni tathā kṣīrodanāni ca //
aiśānyāyāḥ pradātavyau ghṛtakṣīrodanāvubhau

modakollopikāmiśrāḥ sāgarāṇāṃ balirbhavet

yadyadgrahasyābhihitaṃ mayātra ṛkṣasya vā bhūmipatipradhāna //
taddevatāyāśca tadeva deyaṃ diśastathā nātra vicāraṇāsti

iti śrīviṣṇudharmottare prathamakhaṇḍe mārkaṇḍeyavajrasaṃvāde graharkṣanaivedyadeyādeyavidhirnāma navanavatitamo'dhyāyaḥ