Vishnudharmottara Purana · Chapter 1.98

mārkaṇḍeya uvāca //
dhruvasthānaniviṣṭānāṃ devatānāṃ mahīpate //
gugguluṃ ghṛtasaṃyuktaṃ dhūpaṃ dadyādvicakṣaṇaḥ

dhūpaṃ tvagururarkāya nameruṃ ca tathendave //
bhaumāya gugguluṃ dadyātsarjaṃ dayādbudhāya ca

śilājatu tu jīvāya dātavyaṃ pārthivottama //
śrīvāsakaṃ tu śukrāya nakhaṃ saurāya pārthiva //
madaśca rāhave deyaṃ ketave ca vasā tathā

kṛttikānāṃ ghṛtaṃ deyaṃ rohiṇīnāṃ ca candanam //
ilvalānāṃ ca karpūramārdrāyāṃ ca nakhaṃ tathā

punarvasoścāpyaguruṃ puṣyasya ca tathākṣatam //
śrīvāsakaṃ ca sārpasya paitrasya ca tathā ghṛtam

priyaṅguṃ madhunā yuktaṃ bhāgyasya saghṛtaṃ bhavet //
ghṛtena madhunā yuktamāryamṇasya śatāvarīm

kunduruṃ caiva hastāya tvāṣṭrāya ca palaṃ bhavet //
vāyavyāya ca karpūramaindrāgnyāya misirbhavet

maitrāya kuṅkumaṃ deyaṃ śākrāya mṛgajaṃ bhavet //
śāṭīmūlaṃ ca mūlāya āpyāya naladaṃ tathā

gugguluṃ vaiśvadevāya brāhmāya ghṛtacandane //
vaiṣṇavāyāguruṃ dadyādvāsavāya tathā palam

vāruṇāya tathośīramājāya ca palaṃ bhavet //
ahirbudhnyāya dātavyaṃ devadāruṃ narādhipa

kaṅkolakāni pauṣṇāya āśvināya ca candanam //
yamyāya guggulurdeyaḥ satataṃ bhūtimicchatā

karpūraṃ kuṅkumaṃ caiva candanaṃ mṛgajaṃ tathā //
turuṣkamaguruṃ kāntāṃ gugguluṃ ca kramāddiśām

prācyādīnāṃ mahīnātha sāgarāṇāṃ ca candanam //
sarvābhāve ca dātavyāḥ sarveṣāmeva guggulum

vanaspatiraso divyo gandhāḍhyo gandha uttamaḥ //
āghrāṇaḥ sarvadevānāṃ guggulupravaraḥ śubhaḥ

dīpaścājyena dātavyaḥ sarveṣāmaviśeṣataḥ //
tailena vā mahīnātha vasāḍhyena vivarjayet

yadyadgrahasyābhihitaṃ mayātra ṛkṣasya vā bhūmipatipradhāna//
taddevatāyāśca tathaiva deyaṃ diśāṃ tathā nātra vicāramasti

iti śrīviṣṇudharmottare prathamakhaṇḍe mārkaṇḍeyavajrasaṃvāde graharkṣadhūpadīpo nāmāṣṭanavatitamo'dhyāyaḥ