Vishnudharmottara Purana · Chapter 1.100

mārkaṇḍeya uvāca //
dhruvasthānaniviṣṭānāṃ devatānāṃ pṛthakpṛthak //
pānāya dāpayetkṣīraṃ prītaye vāntarātmanaḥ//
gandhodakaṃ tathārkāya payaḥ somāya kīrtitam

bhūmiputrāya kharjūraṃ mārdvīkaṃ śaśijāya ca//
jīvāya ca tathā takraṃ śukrāyekṣurasaṃ tathā

māṃsapānaṃ tu saurāya rāhormīnarasaṃ tathā //
chāgaṃ payaḥ pradātavyaṃ ketave manujeśvara

gandhodakaṃ ca kṛttikānāṃ rohiṇīnāṃ suvīrakam //
ilvalānāṃ payaḥ proktaṃ raudreḥ khārjūramāsavam // ४
ādityāya tathā gauḍaṃ kṣīraṃ tiṣyāya dāpayet//
kṣīrameva ca sārpāya tathā pitryāya yādava

gandhodakaṃ ca bhāgyāya tathāryamṇāya kīrtitam//
sāvitrāya tathāyastu tvāṣṭrāya ca tathā payaḥ

vāyavyāya ca mārdvīkamaindrāgnyāya ca kāñjikam //
mitrāya takraṃ deyaṃ ca śākrāya dadhi dāpayet

nārikelāmbu mūlāya tathāpyāya madhūdakam //
khārjūraṃ vaiśvadevāya brāhmāya salilaṃ hitam

āmraiḥ pānaṃ vaiṣṇavāya jambubhirvāsavāya ca //
vāruṇāya madhūkaiśca rasamājasya pārthiva

āhirbudhnyasya ca tathā rasameva bhavennṛpa //
pauṣṇāya ca bhavecchāgaṃ cāśvināya ca māhiṣam //
yāmyāya ca tathā deyaṃ svacchaṃ māṃsarasaṃ tathā

samānadevanakṣatraṃ kathitaṃ ca tathā diśām //
uttarāyai pradātavyaṃ tathā kṣīraṃ narādhipa

sāgarāṇāṃ ca sarveṣāṃ satataṃ bhūtimicchatā

yadyadgrahasyābhihitaṃ mayātra ṛkṣasya vā bhūmipatipradhāna //
taddevatāyāśca tathaiva deyaṃ diśastathā nātra vicāraṇāsti

iti śrīviṣṇudharmottare prathamakhaṇḍe mārkaṇḍeyavajrasaṃvāde pratigraharkṣadeyādeyapāno nāma śatatamo'dhyāyaḥ