Vishnudharmottara Purana · Chapter 1.97

mārkaṇḍeya uvāca //
savarṇāni graharkṣāṇāṃ diśāṃ ca jagatīpate //
nityaṃ deyāni vāsāṃsi patākāśca vijānatā

bhūṣaṇāni ca deyāni kāñcanāni śubhāni ca //
ratnacitrāṇi ramyāṇi yathāśaktyā narādhipa

dhruvasthānaniviṣṭānāṃ devatānāṃ mahīpate //
jātīpuṣpāṇi deyāni sarveṣāmaviśeṣataḥ

raktapadmāni sūryasya śvetapadmāni cendave //
bandhūkāni ca bhaumāya budhāyendīvarāṇi ca

jīvāya yūthikā pītā sitāya ca tathā sitā //
bāṇapuṣpāṇi saurāya rāhave pāṭalāni ca

tathā damanakaṃ deyaṃ ketave vasudhādhipa //
kṛttikāsu ca deyāni rājanraktotpalāni ca

campakāni ca rohiṇyā ilvilāyāḥ sitotpalam //
dhattūrakāṇyathārdrāyā ādityasya ca mallikā

campakānyeva puṣyasya jātī syātsārpapitryayoḥ //
bhāgyasya kāntā dātavyā aryamṇaśca suvarcalā

sāvitratvāṣṭrayornityaṃ bandhūkakusumāni ca //
vāyavyasya ca deyāni sindhuvārāṇi pārthiva

aindrāgnyasya ca deyāni kuraṇḍakusumāni ca //
raktāśokasya puṣpāṇi tathā maitrasya pārthiva

campakāni ca śākrasya tathā deyāni bhūpate //
mūlasya ca tathā deyaṃ rājankṛṣṇakuheṭakam

kahlārāṇi tathāpyasya vaiśvadevasya kubjakam//
brāhmasya jātīpuṣpāṇi vaiṣṇavasya ca campakam

pāṭalā vāsavasyāpi vāruṇasyotpalāni tu //
arkapuṣpāṇyathāpyasya tathā deyāni pārthiva

āhirbudhnyasya deyāni dhattūrakusumāni ca //
karavīrakapuṣpāṇi tathā pauṣṇasya pārthiva

cūtapuṣpāṇi deyāni āśvinasya narādhipa //
nīlotpalāni yāmyasya tathā deyāni bhūpate

samānaveśanakṣatrakathitāni tathā diśām //
uttarāyāśca deyāni nāgapuṣpāṇi pārthiva

sāgarāṇāṃ ca deyāni kamalāni mahīpate //
uktālābhe pradeyāni savarṇāni narādhipa //
svakālajāni puṣpāṇi sarveṣāmaviśeṣataḥ

yadyadrahasyābhihitaṃ mayātra ṛkṣasya vā bhūmipatipradhāna //
taddevatāyāśca tathaiva deyaṃ diśastathā nātra vicāraṇāsti

iti śrīviṣṇudharmottare prathamakhaṇḍe mārkaṇḍeyavajrasaṃvāde graharkṣaviśeṣapuṣpadeyādeyādhyāyo nāma saptanavatitamo'dhyāyaḥ