વિષ્ણુધર્મોત્તરપુરાણમ્ · અધ્યાય 1.98

માર્કણ્ડેય ઉવાચ ॥
ધ્રુવસ્થાનનિવિષ્ટાનાં દેવતાનાં મહીપતે ॥
ગુગ્ગુલું ઘૃતસંયુક્તં ધૂપં દદ્યાદ્વિચક્ષણઃ

ધૂપં ત્વગુરુરર્કાય નમેરું ચ તથેન્દવે ॥
ભૌમાય ગુગ્ગુલું દદ્યાત્સર્જં દયાદ્બુધાય ચ

શિલાજતુ તુ જીવાય દાતવ્યં પાર્થિવોત્તમ ॥
શ્રીવાસકં તુ શુક્રાય નખં સૌરાય પાર્થિવ ॥
મદશ્ચ રાહવે દેયં કેતવે ચ વસા તથા

કૃત્તિકાનાં ઘૃતં દેયં રોહિણીનાં ચ ચન્દનમ્ ॥
ઇલ્વલાનાં ચ કર્પૂરમાર્દ્રાયાં ચ નખં તથા

પુનર્વસોશ્ચાપ્યગુરું પુષ્યસ્ય ચ તથાક્ષતમ્ ॥
શ્રીવાસકં ચ સાર્પસ્ય પૈત્રસ્ય ચ તથા ઘૃતમ્

પ્રિયઙ્ગું મધુના યુક્તં ભાગ્યસ્ય સઘૃતં ભવેત્ ॥
ઘૃતેન મધુના યુક્તમાર્યમ્ણસ્ય શતાવરીમ્

કુન્દુરું ચૈવ હસ્તાય ત્વાષ્ટ્રાય ચ પલં ભવેત્ ॥
વાયવ્યાય ચ કર્પૂરમૈન્દ્રાગ્ન્યાય મિસિર્ભવેત્

મૈત્રાય કુઙ્કુમં દેયં શાક્રાય મૃગજં ભવેત્ ॥
શાટીમૂલં ચ મૂલાય આપ્યાય નલદં તથા

ગુગ્ગુલું વૈશ્વદેવાય બ્રાહ્માય ઘૃતચન્દને ॥
વૈષ્ણવાયાગુરું દદ્યાદ્વાસવાય તથા પલમ્

વારુણાય તથોશીરમાજાય ચ પલં ભવેત્ ॥
અહિર્બુધ્ન્યાય દાતવ્યં દેવદારું નરાધિપ

કઙ્કોલકાનિ પૌષ્ણાય આશ્વિનાય ચ ચન્દનમ્ ॥
યમ્યાય ગુગ્ગુલુર્દેયઃ સતતં ભૂતિમિચ્છતા

કર્પૂરં કુઙ્કુમં ચૈવ ચન્દનં મૃગજં તથા ॥
તુરુષ્કમગુરું કાન્તાં ગુગ્ગુલું ચ ક્રમાદ્દિશામ્

પ્રાચ્યાદીનાં મહીનાથ સાગરાણાં ચ ચન્દનમ્ ॥
સર્વાભાવે ચ દાતવ્યાઃ સર્વેષામેવ ગુગ્ગુલુમ્

વનસ્પતિરસો દિવ્યો ગન્ધાઢ્યો ગન્ધ ઉત્તમઃ ॥
આઘ્રાણઃ સર્વદેવાનાં ગુગ્ગુલુપ્રવરઃ શુભઃ

દીપશ્ચાજ્યેન દાતવ્યઃ સર્વેષામવિશેષતઃ ॥
તૈલેન વા મહીનાથ વસાઢ્યેન વિવર્જયેત્

યદ્યદ્ગ્રહસ્યાભિહિતં મયાત્ર ઋક્ષસ્ય વા ભૂમિપતિપ્રધાન॥
તદ્દેવતાયાશ્ચ તથૈવ દેયં દિશાં તથા નાત્ર વિચારમસ્તિ

ઇતિ શ્રીવિષ્ણુધર્મોત્તરે પ્રથમખણ્ડે માર્કણ્ડેયવજ્રસંવાદે ગ્રહર્ક્ષધૂપદીપો નામાષ્ટનવતિતમોઽધ્યાયઃ