Vishnudharmottara Purana · Chapter 1.96

vajra uvāca //
sarveṣāṃ tu samācakṣva gandhamālyaṃ tathaiva ca //
dhūpaṃ brahmansanaivedyaṃ pānaṃ caiva pṛthakpṛthak

homadravyaṃ tathā mantraṃ dakṣiṇāśca bhṛgūttama //
ekastvaṃ sarvavidbrahmanbrahmā vā jagatāṃ patiḥ

mārkaṇḍeya uvāca //
dhruvasthānaniviṣṭānāṃ devānāṃ ca mahīpate //
sarvāsāṃ candanaṃ deyaṃ nityameva pṛthakpṛthak

sūryāya kuṅkumaṃ deyaṃ karpūraṃ śaśine tathā //
bhaumāya candanaṃ raktaṃ cāguruṃ śaśijāya ca

jīvāya candanaṃ deyaṃ kuṅkumena vimiśritam //
śukrāya candanaṃ śvetaṃ saurāya ca mṛgodbhavam

kuṅkumena yutaṃ dadyāddānavāya mṛgodbhavam //
aguruṃ kuṅkumaṃ cobhau sudeyau dhūmaketave

kuṅkumaṃ kṛttikānāṃ tu rohiṇīnāṃ mṛgodbhavam //
ilvalānāṃ ca karpūraṃ raudre nāgamadaṃ tathā

ādityasya pradātavyāvubhau kuṅkumacandanau //
uśīracandanau deyāvāśleṣāpaitryayostathā

priyaṅgucandanau deyau tathā bhāgyasya pārthiva //
aryamṇaśca pradātavyau candanau śvetaraktakau

sāvitrasya pradātavyaṃ kuṅkumaṃ pṛthivīpate //
tvāṣṭrasya candanaṃ deyaṃ kuṅkumaṃ samṛgodbhavam

jātīphalayutaṃ deyaṃ vāyavyasya ca candanam //
viśākhāyāḥ pradātavyaṃ kuṅkumaṃ candanaṃ tathā

turuṣkasahitaṃ deyaṃ tathā maitrāya candanam //
jyeṣṭhāyāśca pradātavyaṃ candanaṃ kuṅkumaṃ tathā

mūlāya śiṃśapāsāraṃ tathā deyaṃ mṛgodbhavam //
āpyāya kuṣṭhasaṃyuktaṃ dātavyaṃ candanaṃ bhavet

vaiśvadevāya mṛgajaṃ candanāguruṇī tathā //
brāhmāya candanaṃ deyaṃ vaiṣṇavāyāguruṃ tathā

jātīlavaṅgau dātavyau supiṣṭau vāsavāya tau //
vāruṇāya ca karpūramājāhirbudhnyayostathā

pauṣṇāya candanaṃ raktamāśvināya tathā sitam //
yāmyāyāgurusaṃyuktaṃ tathā deyaṃ mṛgodbhavam

samānadevanakṣatraṃ kathitaṃ ca tathā diśam //
uttarāyāstathā deye candanāguruṇī śubhe

sāgarāṇāṃ pradātavyaṃ sarveṣāmeva candanam //
alābhe tu tathā deyaṃ sarveṣāmeva candanam

maṅgalyaṃ tatpavitraṃ ca devānāṃ dayitaṃ ca tat //
dhāryaṃ ca deyaṃ tadrājam̐statra lakṣmīḥ pratiṣṭhitā

yadyadgrahasyābhihitaṃ mayaitadṛkṣasya vā bhūmipatipradhāna //
taddevatāyāśca tadeva deyaṃ diśastathā nātra vicāraṇāsti

iti śrīviṣṇudharmottare prathamakhaṇḍe mārkaṇḍeyavajrasaṃvāde anulepakathano nāma ṣaṇṇavatitamo'dhyāyaḥ