વિષ્ણુધર્મોત્તરપુરાણમ્ · અધ્યાય 1.97

માર્કણ્ડેય ઉવાચ ॥
સવર્ણાનિ ગ્રહર્ક્ષાણાં દિશાં ચ જગતીપતે ॥
નિત્યં દેયાનિ વાસાંસિ પતાકાશ્ચ વિજાનતા

ભૂષણાનિ ચ દેયાનિ કાઞ્ચનાનિ શુભાનિ ચ ॥
રત્નચિત્રાણિ રમ્યાણિ યથાશક્ત્યા નરાધિપ

ધ્રુવસ્થાનનિવિષ્ટાનાં દેવતાનાં મહીપતે ॥
જાતીપુષ્પાણિ દેયાનિ સર્વેષામવિશેષતઃ

રક્તપદ્માનિ સૂર્યસ્ય શ્વેતપદ્માનિ ચેન્દવે ॥
બન્ધૂકાનિ ચ ભૌમાય બુધાયેન્દીવરાણિ ચ

જીવાય યૂથિકા પીતા સિતાય ચ તથા સિતા ॥
બાણપુષ્પાણિ સૌરાય રાહવે પાટલાનિ ચ

તથા દમનકં દેયં કેતવે વસુધાધિપ ॥
કૃત્તિકાસુ ચ દેયાનિ રાજન્રક્તોત્પલાનિ ચ

ચમ્પકાનિ ચ રોહિણ્યા ઇલ્વિલાયાઃ સિતોત્પલમ્ ॥
ધત્તૂરકાણ્યથાર્દ્રાયા આદિત્યસ્ય ચ મલ્લિકા

ચમ્પકાન્યેવ પુષ્યસ્ય જાતી સ્યાત્સાર્પપિત્ર્યયોઃ ॥
ભાગ્યસ્ય કાન્તા દાતવ્યા અર્યમ્ણશ્ચ સુવર્ચલા

સાવિત્રત્વાષ્ટ્રયોર્નિત્યં બન્ધૂકકુસુમાનિ ચ ॥
વાયવ્યસ્ય ચ દેયાનિ સિન્ધુવારાણિ પાર્થિવ

ઐન્દ્રાગ્ન્યસ્ય ચ દેયાનિ કુરણ્ડકુસુમાનિ ચ ॥
રક્તાશોકસ્ય પુષ્પાણિ તથા મૈત્રસ્ય પાર્થિવ

ચમ્પકાનિ ચ શાક્રસ્ય તથા દેયાનિ ભૂપતે ॥
મૂલસ્ય ચ તથા દેયં રાજન્કૃષ્ણકુહેટકમ્

કહ્લારાણિ તથાપ્યસ્ય વૈશ્વદેવસ્ય કુબ્જકમ્॥
બ્રાહ્મસ્ય જાતીપુષ્પાણિ વૈષ્ણવસ્ય ચ ચમ્પકમ્

પાટલા વાસવસ્યાપિ વારુણસ્યોત્પલાનિ તુ ॥
અર્કપુષ્પાણ્યથાપ્યસ્ય તથા દેયાનિ પાર્થિવ

આહિર્બુધ્ન્યસ્ય દેયાનિ ધત્તૂરકુસુમાનિ ચ ॥
કરવીરકપુષ્પાણિ તથા પૌષ્ણસ્ય પાર્થિવ

ચૂતપુષ્પાણિ દેયાનિ આશ્વિનસ્ય નરાધિપ ॥
નીલોત્પલાનિ યામ્યસ્ય તથા દેયાનિ ભૂપતે

સમાનવેશનક્ષત્રકથિતાનિ તથા દિશામ્ ॥
ઉત્તરાયાશ્ચ દેયાનિ નાગપુષ્પાણિ પાર્થિવ

સાગરાણાં ચ દેયાનિ કમલાનિ મહીપતે ॥
ઉક્તાલાભે પ્રદેયાનિ સવર્ણાનિ નરાધિપ ॥
સ્વકાલજાનિ પુષ્પાણિ સર્વેષામવિશેષતઃ

યદ્યદ્રહસ્યાભિહિતં મયાત્ર ઋક્ષસ્ય વા ભૂમિપતિપ્રધાન ॥
તદ્દેવતાયાશ્ચ તથૈવ દેયં દિશસ્તથા નાત્ર વિચારણાસ્તિ

ઇતિ શ્રીવિષ્ણુધર્મોત્તરે પ્રથમખણ્ડે માર્કણ્ડેયવજ્રસંવાદે ગ્રહર્ક્ષવિશેષપુષ્પદેયાદેયાધ્યાયો નામ સપ્તનવતિતમોઽધ્યાયઃ