વિષ્ણુધર્મોત્તરપુરાણમ્ · અધ્યાય 1.96

વજ્ર ઉવાચ ॥
સર્વેષાં તુ સમાચક્ષ્વ ગન્ધમાલ્યં તથૈવ ચ ॥
ધૂપં બ્રહ્મન્સનૈવેદ્યં પાનં ચૈવ પૃથક્પૃથક્

હોમદ્રવ્યં તથા મન્ત્રં દક્ષિણાશ્ચ ભૃગૂત્તમ ॥
એકસ્ત્વં સર્વવિદ્બ્રહ્મન્બ્રહ્મા વા જગતાં પતિઃ

માર્કણ્ડેય ઉવાચ ॥
ધ્રુવસ્થાનનિવિષ્ટાનાં દેવાનાં ચ મહીપતે ॥
સર્વાસાં ચન્દનં દેયં નિત્યમેવ પૃથક્પૃથક્

સૂર્યાય કુઙ્કુમં દેયં કર્પૂરં શશિને તથા ॥
ભૌમાય ચન્દનં રક્તં ચાગુરું શશિજાય ચ

જીવાય ચન્દનં દેયં કુઙ્કુમેન વિમિશ્રિતમ્ ॥
શુક્રાય ચન્દનં શ્વેતં સૌરાય ચ મૃગોદ્ભવમ્

કુઙ્કુમેન યુતં દદ્યાદ્દાનવાય મૃગોદ્ભવમ્ ॥
અગુરું કુઙ્કુમં ચોભૌ સુદેયૌ ધૂમકેતવે

કુઙ્કુમં કૃત્તિકાનાં તુ રોહિણીનાં મૃગોદ્ભવમ્ ॥
ઇલ્વલાનાં ચ કર્પૂરં રૌદ્રે નાગમદં તથા

આદિત્યસ્ય પ્રદાતવ્યાવુભૌ કુઙ્કુમચન્દનૌ ॥
ઉશીરચન્દનૌ દેયાવાશ્લેષાપૈત્ર્યયોસ્તથા

પ્રિયઙ્ગુચન્દનૌ દેયૌ તથા ભાગ્યસ્ય પાર્થિવ ॥
અર્યમ્ણશ્ચ પ્રદાતવ્યૌ ચન્દનૌ શ્વેતરક્તકૌ

સાવિત્રસ્ય પ્રદાતવ્યં કુઙ્કુમં પૃથિવીપતે ॥
ત્વાષ્ટ્રસ્ય ચન્દનં દેયં કુઙ્કુમં સમૃગોદ્ભવમ્

જાતીફલયુતં દેયં વાયવ્યસ્ય ચ ચન્દનમ્ ॥
વિશાખાયાઃ પ્રદાતવ્યં કુઙ્કુમં ચન્દનં તથા

તુરુષ્કસહિતં દેયં તથા મૈત્રાય ચન્દનમ્ ॥
જ્યેષ્ઠાયાશ્ચ પ્રદાતવ્યં ચન્દનં કુઙ્કુમં તથા

મૂલાય શિંશપાસારં તથા દેયં મૃગોદ્ભવમ્ ॥
આપ્યાય કુષ્ઠસંયુક્તં દાતવ્યં ચન્દનં ભવેત્

વૈશ્વદેવાય મૃગજં ચન્દનાગુરુણી તથા ॥
બ્રાહ્માય ચન્દનં દેયં વૈષ્ણવાયાગુરું તથા

જાતીલવઙ્ગૌ દાતવ્યૌ સુપિષ્ટૌ વાસવાય તૌ ॥
વારુણાય ચ કર્પૂરમાજાહિર્બુધ્ન્યયોસ્તથા

પૌષ્ણાય ચન્દનં રક્તમાશ્વિનાય તથા સિતમ્ ॥
યામ્યાયાગુરુસંયુક્તં તથા દેયં મૃગોદ્ભવમ્

સમાનદેવનક્ષત્રં કથિતં ચ તથા દિશમ્ ॥
ઉત્તરાયાસ્તથા દેયે ચન્દનાગુરુણી શુભે

સાગરાણાં પ્રદાતવ્યં સર્વેષામેવ ચન્દનમ્ ॥
અલાભે તુ તથા દેયં સર્વેષામેવ ચન્દનમ્

મઙ્ગલ્યં તત્પવિત્રં ચ દેવાનાં દયિતં ચ તત્ ॥
ધાર્યં ચ દેયં તદ્રાજઁસ્તત્ર લક્ષ્મીઃ પ્રતિષ્ઠિતા

યદ્યદ્ગ્રહસ્યાભિહિતં મયૈતદૃક્ષસ્ય વા ભૂમિપતિપ્રધાન ॥
તદ્દેવતાયાશ્ચ તદેવ દેયં દિશસ્તથા નાત્ર વિચારણાસ્તિ

ઇતિ શ્રીવિષ્ણુધર્મોત્તરે પ્રથમખણ્ડે માર્કણ્ડેયવજ્રસંવાદે અનુલેપકથનો નામ ષણ્ણવતિતમોઽધ્યાયઃ