Vishnudharmottara Purana · Chapter 1.95

mārkaṇḍeya uvāca //
āvāhanānyato vakṣye sarveṣāṃ pārthivottama //
sarvasyāvāhanasyānte śloko'yaṃ parikīrtyate

maṇḍale sampraviśyāsminmayā bhaktyā niveditam //
idamarghyamidaṃ pādyaṃ dhūpo'yaṃ pratigṛhyatām

dhruvamāvāhayiṣyāmi sarvagrahagaṇeśvaram //
niruddhaṃ bhrāmyate yena bhacakraṃ vātarajjubhiḥ

ehi me dhruva deveśa keśavācintyavikrama //
sarvagrahagaṇādhyakṣa sarvalokanamaskṛta

āvāhayiṣyāmyākāśaṃ vimānaśatamaṇḍitam //
tṛtīyaṃ devadevasya padaṃ viṣṇormahātmanaḥ

ehi me bhagavansaumya nirālamba nabhastala //
aprameyātigambhīra nakṣatragrahamaṇḍita

āvāhayāmyahaṃ devaṃ brahmāṇaṃ jagatāṃ patim //
jagato'sya samutpattisthitisaṃhārakārakam

ehi sarvaprajādhyakṣa padmayone caturmukha //
vedamūrte tadādhāra kālanirmāṇa tatpara

ūrddhvamāvāhayiṣyāmi hyanantāṃ mahatīṃ diśam //
aprameyāṃ nirālambāṃ candrasūryāṃśuvarjitām

āgaccheha mahābhāge satataṃ siddhasevite //
anante vipule devi nirmale hitakāriṇi

pṛthvīmāvāhayiṣyāmi sarvasattvahite ratām //
dharāṃ bhūmiṃ kṣamāṃ kṣoṇīṃ varadāṃ bhūtadhāriṇīm

ehi me vasudhe devi vārāheṇa samuddhṛte //
sarvabījadhare bhadre sarvabhūtāpahāriṇi

śeṣamāvāhayiṣyāmi mahīmaṇḍala dhāraṇam //
phaṇāvalīratnajālamarīcivikasojjvalam

ehi śeṣa mahābhāga ehyanantādikeśava //
āheyī tvaṃ tanustasya viṣṇoramitatejasaḥ

āvāhayāmyadhastāttu diśaṃ śeṣeṇa pālitām //
nāgadaityoragagaṇaissatataṃ ca niṣevitām

ehi me ratnabāhulye nityaṃ śeṣeṇa pālite //
gambhīre vipule bhīme bahusthānābhimaṇḍite

āvāhayiṣye varadaṃ deveśaṃ jātavedasam //
vedamūrttiṃ tadādhāraṃ devadevaṃ hutāśanam

ehyagre sarvadeveśa sarvadevamukhācyuta //
sarvatrastha mahābhāga sarvabhūtahite rata

āvāhayiṣye varadaṃ sahasrākṣaṃ divākaram //
tejomūrttiṃ durādharṣaṃ bhaktānāmabhayapradam

ehi deva jagannātha ṛksāmayajuṣāṃ pate //
trailokyamaṇḍaladvīpa sarvavyādhivināśana

āvāhayāmyahaṃ devamādityamudakeśayam //
snigdhavaiḍūryasaṅkāśaṃ varuṇaṃ sumahādyutim

ehi deva jalādhyakṣa yādogaṇamaheśvara //
nāgadaityoragagaṇaissatataṃ sevitānyuta

āvāhayāmyahaṃ candraṃ śītāṃśumamṛtaprabham //
oṣadhīśaṃ dvijādhyakṣaṃ nayanānandakārakam

ehi me bhagavam̐ścandra ehi me mṛgalācchana //
bhaktānukampinsatataṃ sarvanakṣatrapūjita

skandamāvāhayiṣyāmi ṣaṇmukhaṃ varadaṃ śiśum //
devārisenāmathanaṃ pārvatyānandavarddhanam

ehi devatamārādhya mahiṣāsurataskara //
kārtikeya jagannātha mayūravaravāhana

bhaumamāvāhayiṣyāmi tejomūrtiṃ durāsadam //
rudramūrtimanirdeśyavaktraṃ rudhirasaprabham

ehi me bhagavanbhauma aṅgāraka mahāprabha //
tvayi sarvaṃ samāyattaṃ bhūtalesmiñchubhāśubham

viṣṇumāvāhayiṣyāmi śaṅkhacakragadādharam //
atasīkusumaśyāmaṃ pītavāsasamacyutam

ehi me devadeveśa prajānirmāṇakāraka //
nārāyaṇa suduṣpāra mahāśārṅgadhanurdhara

budhamāvāhayiṣyāmi bodhakaṃ jagadīśvaram //
cāndriṃ grahagaṇādhyakṣaṃ tejomūrtiṃ durāsadam

ehi śītāṃśujācintya jagajjiṣṇo janārdana //
mahābala mahāsattva mahābāho mahādyute

śakramāvāhayiṣyāmi devaṃ suragaṇeśvaram //
vajrapāṇiṃ mahābāhuṃ gobrāhmaṇahite ratam

ehi deva sahasrākṣa devāribalasūdana //
airāvatasthadharmajña śacīhṛdayanandana

jīvamāvāhayiṣyāmi deveśvarapurohitam //
bṛhaspatiṃ bṛhadvācaṃ vedavedāṅgapāragam

ehi jīva mahābhāgajīvabhūta mahītale //
sasyavṛddhistavāyattā satataṃ bhūmivardhana

devīmāvāhayiṣyāmi pārvatīṃ varadāmumām //
harasya dayitāṃ bhāryāṃ cārvaṅgīṃ bhūtivardhinīm

ehi devi jagannāthe menāhṛdayanandini //
pavitre varade saumye nityaṃ bhaktajanapriye

śukramāvāhayiṣyāmi bhārgavaṃ jagadīśvaram //
nityaṃ sarvajanādhyakṣaṃ tapasā dyotitaprabham

ehi śukra mahābhāga ṣoḍaśārcirvaraprada //
prabhustvaṃ varadācintya varṣāvarṣasya nigrahe

āvāhayāmyahaṃ devaṃ prajādhyakṣamakalmaṣam //
bhaktānukampinaṃ devaṃ prajānirmāṇakārakam

ehi deva prajādhyakṣa pūjānirmāṇakāraka //
tvayi deva samāyuktaṃ prajānāmabhavodbhavam

ehi me bhagavanbrahmanprajāpatimahādyute //
saurimāvāhayiṣyāmi śanaiścāriṇamacyutam

tapasvinamanādhṛṣyaṃ bhaktānāmabhayapradam //
ehi tīkṣṇāṃśujācintya bhāvābhāvapradarśaka

tvayi sarvaṃ samāyattaṃ rājñāṃ bhūmau śubhāśubham //
āvāhayāmyahaṃ devaṃ gajavaktraṃ gaṇeśvaram

vipreśaṃ viprahartāraṃ pārvatīhṛdayapriyam //
ehi deva gaṇādhyakṣa lambodara mahābhuja

kāryasiddhiḥ samāyattā tvayi sarveśa dehinām //
rāhumāvāhayiṣyāmi daityeśaṃ grahatāṅgatam

keśavāptavaraṃ vīraṃ tapasā dagdhakilbiṣam //
ehyehi daityapravara varadācintyavikrama

tapomūrte durādharṣa viparītacarāmbare //
āvāhayāmyahaṃ devaṃ viśvakarmāṇamacyutam

sarvāsāṃ devatānāṃ tu sadā śilpapravartakam //
ehi devavarācintya sarvaśilpapravartaka

tvayi sarvaiva sarveṣāṃ karmaṇāmāśritā gatiḥ //
ketumāvāhayiṣyāmi ketuṃ sarvadivaukasām

brahmaṇyaṃ sarvadharmajñaṃ bhaktānāmabhayapradam //
dhūmaketo ihābhyehi hutāśanasamaprabha

śikhākarālavikaca pūjitāghavināśana //
vahnerāvāhanaṃ proktaṃ pūrvameva mayānagha

āvāhayiṣyāmi śubhāṃ kṛttikāṃ devapūjitām //
ehi sādhāraṇe devi jyeṣṭhadakṣasute śubhe

prajāpatestathā proktaṃ rohiṇyāḥ śṛṇu pārthiva //
āvāhayāmi varadāṃ rohiṇīṃ candravallabhām

ehi rohiṇi dharmajñe dhruvakarmasu śobhane //
candrasyāvāhanaṃ proktamilvalāyā nibodha me

āvāhayāmi varadāmilvalāṃ śaśivallabhām //
ehi me ilvale devi mṛdukarmasu śobhane

rudramāvāhayiṣyāmi trinetraṃ śūlapāṇinam //
ehi śaṅkara sarvātmanmahādeva gaṇeśvara

ārdrāmāvāhayiṣyāmi nakṣatraṃ bāhusaṃjñikam //
ehyārdre cārusarvāṅgi dāruṇe rudrasammate

āvāhayiṣyāmyaditiṃ tapasā dagdhakilviṣām //
ādityāraṇi dharmajñe ehi devi mahāprabhe //

ṛkṣamāvāhayiṣyāmi dharmajñaṃ tu punarvasum //
punarvaso ihāgaccha carakarmaprasādaka

jīvasyāvāhanaṃ proktaṃ puṣyasyātha pracakṣate //
puṣyamāvāhayiṣyāmi nakṣatraṃ kṣiprasaṃjñikam

ehi puṣya mahābhāga poṣaṃ vardhaya sarvataḥ //
sarpānāvāhayiṣyāmi trailokyāntaragocarān //

āyāntu sarvataḥ sarpāḥ saumyarūpā bhavantu ca //
āvāhayiṣyāmyāśleṣāṃ bhaktānāṃ śrīvivarddhanām

āśleṣe tvamihābhyehi dāruṇe vijayaprade //
pitṝnāvāhayiṣyāmi mūrtyamūrtidharānaham

āyāntu pitaraśśīghraṃ sudhākavyabhujo'vyayāḥ//
maghāmāvāhayiṣyāmi ugranakṣatramañjasā

ehi me subhage devi maghe'ghaviniṣūdane //
bhagamāvāhayiṣyāmi pūrvaphalgunasaṃjñitam

/
ehi bhāgye mahābhāge ugrakarmaprasādike //
āvāhayiṣyāmyaryamṇamādityaṃ tejasāṃ nidhim

aryamam̐stvaṃ samamyehi bhaktapātakanāśana //
ṛkṣamāvāhayiṣyāmi cottarāphalgunīṃ śubhām

ehi tvaṃ subhage devi dhruve sarvāṅgasundari //
āvāhanaṃ mayā proktaṃ saviturdīptatejasaḥ

hastamāvāhayiṣyāmi sāvitraṃ kṣipramañjasā //
ehi sāvitra dharmajña bhaktānāṃ pāpanāśana

āvāhayāmyahaṃ devaṃ tvaṣṭāramamitadyutim //
ehi me bhagavam̐stvaṣṭaḥ prajāpālanatatpara

citrāmāvāhayiṣyāmi citrarūpāṃ manoharām //
ehi me varade citre mṛdukarmaprasādhini

vāyumāvāhayiṣyāmi sarvagaṃ dīptatejasam //
deva vāyo tvamabhyehi sarvabhūtajagatpriya

svātimāvāhayiṣyāmi nityamuttaramārgagām //
devi svāte tvamabhyehi carakarmasu śobhane

āvāhayiṣyāmīndrāgnī sahitau dīptatejasau //
indrābhyehi jagannātha ehyagne vijayaprada

ṛkṣamāvāhayiṣyāmi viśākhāṃ dīptatejasam //
viśākhe tvamihābhyehi devi sādhāraṇe śubhe

mitramāvāhayiṣyāmi devaṃ dīptāṃśumūrjitam //
ehi mitra mahābhāga bhaktāghapralayaṅkara

ṛkṣamāvāhayiṣyāmi hyanurādhāṃ varapradām //
anūrādhe tvamabhyehi mṛdukarmasu śobhane

śakrasyāvāhanaṃ proktaṃ jyeṣṭhāyāḥ śṛṇu pārthiva //
jyeṣṭhāmāvāhayiṣyāmi nakṣatraṃ śakradaivatam

jyeṣṭhe devi tvamabhyehi dāruṇe cārulocane //
devamāvāhayiṣyāmi devaṃ nirṛtijaṃ prabhum

ehi deva virūpākṣa mahābalaparākrama //
mūlamāvāhayiṣyāmi nakṣatraṃ dāruṇaṃ mahat

ehi mūla mahābhāga bhaktānāmabhayaprada //
apastvāvāhayiṣyāmi sarvagā varadāḥ śivāḥ //

āpastvāyāntu varadāḥ pavitrā maṅgalāvahāḥ //
ṛkṣamāvāhayiṣyāmi pūrvāṣāḍhetisaṃjñitam

ehi tvamugre varade cāṣāḍhe pūrva pūrvake //
viśvānāvāhayiṣyāmi devānadbhutatejasaḥ

āyāntu varadāḥ sarve viśvedevā mahābalāḥ //
ṛkṣamāvāhayiṣyāmi uttarāṣāḍhasaṃjñitam

ehi tvamuttarāṣāḍhe sarvakarmasu śobhane //
brahmaṇa āvāhanaṃ proktamabhijiti śṛṇu he prabho

ṛkṣamāvāhayiṣyāmi yattadabhijiducyate //
ehi dhiṣṇyavariṣṭhāya kṣiprakarmaprasādhaka

viṣṇorāvāhanaṃ proktaṃ śravaṇasya nibodha me //
ṛkṣamāvāhayiṣyāmi śravaṇaṃ sarvakāmadam

//
aśvattha tvaṃ samabhyehi carakarmaprasādhaka //
vasūnāvāhayiṣyāmi devānaṣṭau varapradān

āyāntu varadā devā vasavaḥ pāpanāśanāḥ //
dhaniṣṭhāmāvāhayiṣyāmi nakṣatraṃ rāśivallabham

dhaniṣṭhe tvamihāgaccha carakarmaprasādhake //
āvāhanaṃ mayā proktaṃ varuṇasya mahātmanaḥ

ṛkṣamāvāhayiṣyāmi nāmnā śatabhiṣaṃ śubham //
āgaccha tvaṃ śatabhiṣe carakarmasu śobhane

ajaikapādaṃ varadaṃ rudramāvāhayāmyaham //
ahirbudhnya samabhyehi jaṭājūṭopaśobhita

dhruvamāvāhayiṣyāmi deśe bhādrapadottare //
ehi tvaṃ sumahābhāge mama bhādrapadottare//
ṛkṣamāvāhayiṣyāmi revatīṃ cārudarśanām

ehi revati dharmajñe mṛdukarmaprasādhake //
āvāhayāmyahaṃ devaṃ pūṣaṇaṃ pāpanāśanam

pūṣansamyagihābhyehi sarvakarmaprasādika //
āvāhayāmyahaṃ devau nāsatyau sūryanandanau

āgacchetāṃ mahābhāgau varadāvaśvināvubhau //
ṛkṣamāvāhayiṣyāmi cāśvinī sarvakāmadam

yamasyāvāhanaṃ proktaṃ bharaṇīmatha vai śṛṇu //
ṛkṣamāvāhayiṣyāmi cograṃ bharaṇisaṃjñakam

ehi tvaṃ devi bharaṇi subhage cārudarśini //
śakrasyāvāhanaṃ proktaṃ pūrvameva mayā nṛpa

prācīmāvāhayiṣyāmi sūryodayavibhūṣitām //
ehi tvaṃ varade pūrve śubhakarmaprasādhike

vahnerāvāhanaṃ proktaṃ pūrvameva mayā tava //
diśamāvāhayiṣyāmi varadāṃ pūrvadakṣiṇām

vahnipriye samabhyehi varade pūrvadakṣiṇe //
yamasyāvāhanaṃ proktaṃ yāmyāyāśca diśaḥ śṛṇu

ahamāvāhayiṣyāmi dakṣiṇāṃ dakṣiṇāṃ diśam //
dakṣiṇe tvaṃ samabhyehi sarvakarmasu śobhane

pūrvamāvāhanaṃ proktaṃ virūpākṣasya dhīmataḥ //
diśamāvāhayiṣyāmi śubhāṃ dakṣiṇapaścimām

/
ehi me nairṛtī devi satataṃ bhūtivardhini //
āvāhanaṃ mayā proktaṃ varuṇasya mahātmanaḥ

diśamāvāhayiṣyāmi vāruṇīṃ varuṇīṃ śubhām //
āgaccha paścime devi varade varuṇapriye

āvāhanaṃ mayā proktaṃ vāyoścaiva mahātmanaḥ //
āvāhayāmi vidiśaṃ vāyavyāṃ paścimottarām //

varade tvaṃ samabhyehi vāyavye paścimottare //
āvāhayāmi dhanadaṃ devaṃ vaiśravaṇaṃ prabhum

rājarāja samabhyehi sarvayajñadhanādhipa //
diśamāvāhayiṣyāmi saumyāṃ dhanadapālitām

uttare tvaṃ samabhyehi sarvakarmasu śobhane //
devasyāvāhanaṃ proktaṃ tryambakasya mahātmanaḥ //

diśamāvāhayiṣyāmi śubhāṃ prāguttarāmaham //
ehi tvaṃ subhage devi satataṃ śivapālite

sarvānāvāhayiṣyāmi pūrvakumbheṣu sāgarān //
ratnādhyakṣāḥ samāyāntu catvāra iha sāgarāḥ

īśānyāṃ diśi yaḥ kumbhaḥ pūrvastasya tu sāgaraḥ //
āgneyyāntu samāyātu dakṣiṇe dakṣiṇaḥ śivaḥ

paścimastu samāyātu kumbhe dakṣiṇapaścime //
uttaraśca tathā'bhyetu kumbhe vai paścimottare

āvāhitānāṃ kartavyaṃ bhūmau kṛtvā tataḥ śiraḥ //
praṇāmamabhivādyaṃ ca tato mantramudīrayet

bhavatāṃ hi prasādena bhavatāṃ pratipūjanaiḥ //
prayatiṣye yathāśaktyā tanme'nujñātumarhatha

yuṣmākaṃ pūjanaṃ kartuṃ kena śakyaṃ yathāvidhi//
yuṣmatpūjāvihīnena kuto labhyaṃ mahatpadam

tataḥ kartuṃ yathāśaktyā bhavatāṃ pratipūjane //
varadāḥ prayatiṣyāmi tanmenujñātumarhatha

bhavatpūjāvidhāvasminbahuvijñaṃ sadaiva tu //
svāṃsvāṃ diśamadhiṣṭhāya dikpālā dīptatejasaḥ

utsādayantu sakalānvighnānme samupasthitān //
asmāddeśātpraṇaśyantu yajñaghnā brahmarākṣasāḥ

vināyakā vighnakarā mamogrā yajñadviṣo ye piśitāśanāśca //
siddhārthakairvajrasamānakalpairmayā nirastāḥ svagṛhaṃ prayāntu

etāvaduktvā vikireta vidvānsiddhārthakāndikṣu tathā vidikṣu //
rakṣohaṇaṃ cātra tathaiva maṃtraṃ vaktavyamuccairdvijapuṅgavena

sarvagrahāṇāṃ yajane pradiṣṭaṃ sarvauṣadhaiḥ snānamadīnasattva //
bījaiḥ samagraiśca tathaiva gandhairmṛdbhiśca ratnaiśca tathā jalaiśca

iti śrīviṣṇudharmottare prathamakhaṇḍe mārkaṇḍeyavajrasaṃvāde graharkṣāvāhanamantrādhyāyo nāma pañcanavatitamo'dhyāyaḥ