Vishnudharmottara Purana · Chapter 1.94

// vajra uvāca // //
ekaikasyedamuktaṃ te vidhānaṃ dvijapūjane //
sarvagrahāṇāṃ yajane vidhānaṃ mama kīrtaya

- //
mārkaṇḍeya uvāca //
ekaikasyedamuktaṃ te vidhānaṃ rājasattama //
sarvagrahāṇāṃ yajane maṇḍalasya vidhiṃ śṛṇu

ādāveva naravyāghra yāgaṃ vakṣyāmyataḥ param //
prāgāyataṃ tu kartavyamādau lekhādvayaṃ nṛpa

tasyopari tathā kāryamaparaṃ tūttarāyatam //
evaṃ kṛte yadutpannaṃ madhye tu caturasrakam

tato grahebhyaḥ kartavyaṃ tathā lekhācatuṣṭayam //
tacchaktibhyaḥ prakartavyaṃ tathā rekhyā catuṣṭayam //)
evaṃ kṛte sambhavati bhagaṇaṃ dvādaśakṣayam

trayodaśaṃ tathā tasya dhruvasthānaṃ tu madhyamam

prācyāṃ diśi mahīnātha meṣaṃ tu parikalpayet //
tadādyā gaṇanā kāryā pariśeṣeṣu rāśiṣu

rekhāvidhānaṃ dviguṇaṃ śobhārthaṃ parikalpayet //
rāśisthānāni sarvāṇi rāśivarṇena rañjayet

rāśi varṇānyatho vakṣye yathāvadanupūrvaśaḥ //
aruṇaśca sitaścaiva haritaḥ pāṭalastathā

āpāṇḍuśca vicitraśca kṛṣṇaśca kapilastathā //
piṃgalaḥ karburo babhrurmalinaśca yathākramam

meṣādīnāṃ vinirdiṣṭā varṇāḥ pārthivasattama//
ākāśavarṇaṃ karttavyaṃ dhruvasthānaṃ tathaiva ca

dhruvasthāne mahīnātha devatāsaptakaṃ nyaset //
maṇḍalaiśśuklavarṇaistu digvibhāgaṃ nibodha me

dhruvasya maṇḍalaṃ madhye prāgbhāge maṇḍalatrayam //
maṇḍalaṃ gaganasyātra bhāge prāguttare bhavet

prāgbhāge ca tathā rājanmaṇḍalaṃ brahmaṇaḥ smṛtam //
prāgdakṣiṇe tathā bhāge diśaṃ pūrvāṃ prakalpayet

bhāge vai nerṛte kāryaṃ bhuvo bhūpāla maṇḍalam //
śeṣasya ca tathā kāryaṃ pratīcyāṃ diśi maṇḍalam

digadhastāttathā tasya maṇḍalaṃ paścimottare //
grahaścāravaśādrājanyasminrāśau vyavasthitaḥ

maṇḍalaṃ tasya kartavyaṃ tasminneva yathāvidhi //
nyāsaṃ kāryaṃ grahendrāṇāṃ devatābhiḥ sahānagha

ādityātsaptame rāśau ketoḥ kāryaṃ tu maṇḍalam //
rāśau suvarṇe tadvarṇaṃ yasya syānmaṇḍalaṃ nṛpa

utpādyaḥ paridhistasya raṃgenānyena pārthiva //
gandhacūrṇayutā raṅgāḥ karttavyā bhūtimicchatā

rāśicakraṃ samagrantu rekhayā parivārayet //
nakṣatrāṇāṃ tataḥ kāryo nyāsaḥ pārthivasattama

rāśau rāśau yathāsthānaṃ rekhayā parivāritam //
rāśau rāśāvato vakṣye nakṣatrāṇāṃ samāśrayam

aśvinī bharaṇī caiva kṛttikāṃśaṃ caturthakam //
meṣarāśau vinirdiṣṭaṃ nityaṃ pārthivasattama

pādatrayaṃ kṛttikānāṃ rohiṇī sakalā tathā //
ilvalānāṃ tathaivārdhaṃ jñeyaṃ vṛṣasamāśrayam

ilvalā=mṛgaśirā
ilvalārddhaṃ tathaivārdrā hyadityāścaraṇatrayam //
nityameva samuddiṣṭaṃ mithunasya samāśrayam

pādaṃ punarvasoḥ puṣyaṃ sārpaṃ karkaṭakāśrayam //
pitryaṃ bhāgyaṃ tathāryamṇaṃ prathamaṃ caraṇaṃ tathā

siṃharāśau vinirdiṣṭaṃ nityaṃ pārthivasattama //
pādatrayamathāryamṇaṃ hastaścitrārdhameva ca

kanyārāśau vinirdiṣṭaṃ nityaṃ pārthivasattama //
citrārdhamatha vāyavyaṃ viśākhācaraṇatrayam

tulārāśau vinirdiṣṭaṃ munibhistattvadarśibhiḥ //
viśākhācaraṇaṃ maitraṃ śākraṃ vṛścikabhe smṛtam

mūlamāpyaṃ tathā pādaṃ vaiśvadevasya dhanvini //
pādatrayaṃ vaiśvadevādrājanvaiṣṇavameva ca

dhaniṣṭhārdhaṃ ca makare nityameva prakīrtitam //
dhaniṣṭhārdhaṃ śatabhiṣagajapāccaraṇatrayam

kumbharāśau vinirdiṣṭaṃ satataṃ pārthivottama //
pādamājasya sakalaṃ cāhirbudhnyaṃ narādhipa

pauṣṇantu kathitaṃ mīne munibhistattvadarśibhiḥ //
bhacakrapūjane rājannakṣatrasya pṛthakpṛthak

rāśicakrasya bāhye tu hyekaikatārakaṃ nyaset //
prāguktavarṇairbhūpāla nyāsaḥ kāryo yathāvidhi

tārācakrasya vinyāsaṃ rekhayā parivārya tam //
nakṣatradaivatanyāsaṃ bahiḥ kāryaṃ samantataḥ

yathā nakṣatrasvāmī syādṛkṣavarṇaiḥ pṛthakpṛthak //
tasyāpi rekhā karttavyā vṛttā cāpyanu maṇḍalam

rekhābāhyena vinyāsaṃ digīśānāṃ tu kārayet //
diśaśca pārthivaśreṣṭha yathāvadanupūrvaśaḥ

svāśrayarkṣasamaṃ varṇaṃ digīśānāṃ tu kārayet //
uttarāyāṃ ca karttavyaṃ dhanadasya ca maṇḍalam

rukmavarṇaṃ prayatnena diśo varṇamataḥ śuṇu //
uttarā tu bhavecchuklā raktā prācī prakīrtitā

dakṣiṇā pītavarṇā syātkṛṣṇā jñeyā ca paścimā //
padmavarṇā tathā jñeyā tāmrā syātpūrvadakṣiṇā

pālāśā ca vinirdiṣṭā tathā dakṣiṇapaścimā //
nīlotpalasavarṇā tu vāyavyā parikīrtitā

śuklavarṇā tathā jñeyā caiśānītattvadarśibhiḥ//
diṅmaṇḍalaṃ tu tadvidvām̐llekhayā parivārayet

vṛttayā veṣṭayedvṛttāṃ lekhayā caturasrayā //
tanmadhye śaṅkhapadmādyairmaṅgalairupaśobhayet

lekhāvidhānaṃ dviguṇaṃ sarvatraiva prakalpayet //
maṇḍalasya tu koṇeṣu hyudakkumbhānnavāndṛḍhān

phalapallavasaṃchannāngandhapuṣpādisaṃyutān //
caturo vinyasedvidvānnityameva vicakṣaṇaḥ

lekhāsu vinyasedrājanpatākāśca dhvajām̐stathā //
chatrāṇi ca savarṇāni grahendrāṇāṃ pṛthakpṛthak

sthānantu vijñāya yathāvadatra kāryaṃ yathā maṇḍalakapramāṇam //
yathā mahattā nṛpa maṇḍalasya tathātathā vṛddhimupaiti kartā

iti śrīviṣṇudharmottare prathamakhaṇḍe mā० saṃ० maṇḍalakalpanānāma caturnavatitamo'dhyāyaḥ