વિષ્ણુધર્મોત્તરપુરાણમ્ · અધ્યાય 1.95

માર્કણ્ડેય ઉવાચ ॥
આવાહનાન્યતો વક્ષ્યે સર્વેષાં પાર્થિવોત્તમ ॥
સર્વસ્યાવાહનસ્યાન્તે શ્લોકોઽયં પરિકીર્ત્યતે

મણ્ડલે સમ્પ્રવિશ્યાસ્મિન્મયા ભક્ત્યા નિવેદિતમ્ ॥
ઇદમર્ઘ્યમિદં પાદ્યં ધૂપોઽયં પ્રતિગૃહ્યતામ્

ધ્રુવમાવાહયિષ્યામિ સર્વગ્રહગણેશ્વરમ્ ॥
નિરુદ્ધં ભ્રામ્યતે યેન ભચક્રં વાતરજ્જુભિઃ

એહિ મે ધ્રુવ દેવેશ કેશવાચિન્ત્યવિક્રમ ॥
સર્વગ્રહગણાધ્યક્ષ સર્વલોકનમસ્કૃત

આવાહયિષ્યામ્યાકાશં વિમાનશતમણ્ડિતમ્ ॥
તૃતીયં દેવદેવસ્ય પદં વિષ્ણોર્મહાત્મનઃ

એહિ મે ભગવન્સૌમ્ય નિરાલમ્બ નભસ્તલ ॥
અપ્રમેયાતિગમ્ભીર નક્ષત્રગ્રહમણ્ડિત

આવાહયામ્યહં દેવં બ્રહ્માણં જગતાં પતિમ્ ॥
જગતોઽસ્ય સમુત્પત્તિસ્થિતિસંહારકારકમ્

એહિ સર્વપ્રજાધ્યક્ષ પદ્મયોને ચતુર્મુખ ॥
વેદમૂર્તે તદાધાર કાલનિર્માણ તત્પર

ઊર્દ્ધ્વમાવાહયિષ્યામિ હ્યનન્તાં મહતીં દિશમ્ ॥
અપ્રમેયાં નિરાલમ્બાં ચન્દ્રસૂર્યાંશુવર્જિતામ્

આગચ્છેહ મહાભાગે સતતં સિદ્ધસેવિતે ॥
અનન્તે વિપુલે દેવિ નિર્મલે હિતકારિણિ

પૃથ્વીમાવાહયિષ્યામિ સર્વસત્ત્વહિતે રતામ્ ॥
ધરાં ભૂમિં ક્ષમાં ક્ષોણીં વરદાં ભૂતધારિણીમ્

એહિ મે વસુધે દેવિ વારાહેણ સમુદ્ધૃતે ॥
સર્વબીજધરે ભદ્રે સર્વભૂતાપહારિણિ

શેષમાવાહયિષ્યામિ મહીમણ્ડલ ધારણમ્ ॥
ફણાવલીરત્નજાલમરીચિવિકસોજ્જ્વલમ્

એહિ શેષ મહાભાગ એહ્યનન્તાદિકેશવ ॥
આહેયી ત્વં તનુસ્તસ્ય વિષ્ણોરમિતતેજસઃ

આવાહયામ્યધસ્તાત્તુ દિશં શેષેણ પાલિતામ્ ॥
નાગદૈત્યોરગગણૈસ્સતતં ચ નિષેવિતામ્

એહિ મે રત્નબાહુલ્યે નિત્યં શેષેણ પાલિતે ॥
ગમ્ભીરે વિપુલે ભીમે બહુસ્થાનાભિમણ્ડિતે

આવાહયિષ્યે વરદં દેવેશં જાતવેદસમ્ ॥
વેદમૂર્ત્તિં તદાધારં દેવદેવં હુતાશનમ્

એહ્યગ્રે સર્વદેવેશ સર્વદેવમુખાચ્યુત ॥
સર્વત્રસ્થ મહાભાગ સર્વભૂતહિતે રત

આવાહયિષ્યે વરદં સહસ્રાક્ષં દિવાકરમ્ ॥
તેજોમૂર્ત્તિં દુરાધર્ષં ભક્તાનામભયપ્રદમ્

એહિ દેવ જગન્નાથ ઋક્સામયજુષાં પતે ॥
ત્રૈલોક્યમણ્ડલદ્વીપ સર્વવ્યાધિવિનાશન

આવાહયામ્યહં દેવમાદિત્યમુદકેશયમ્ ॥
સ્નિગ્ધવૈડૂર્યસઙ્કાશં વરુણં સુમહાદ્યુતિમ્

એહિ દેવ જલાધ્યક્ષ યાદોગણમહેશ્વર ॥
નાગદૈત્યોરગગણૈસ્સતતં સેવિતાન્યુત

આવાહયામ્યહં ચન્દ્રં શીતાંશુમમૃતપ્રભમ્ ॥
ઓષધીશં દ્વિજાધ્યક્ષં નયનાનન્દકારકમ્

એહિ મે ભગવઁશ્ચન્દ્ર એહિ મે મૃગલાચ્છન ॥
ભક્તાનુકમ્પિન્સતતં સર્વનક્ષત્રપૂજિત

સ્કન્દમાવાહયિષ્યામિ ષણ્મુખં વરદં શિશુમ્ ॥
દેવારિસેનામથનં પાર્વત્યાનન્દવર્દ્ધનમ્

એહિ દેવતમારાધ્ય મહિષાસુરતસ્કર ॥
કાર્તિકેય જગન્નાથ મયૂરવરવાહન

ભૌમમાવાહયિષ્યામિ તેજોમૂર્તિં દુરાસદમ્ ॥
રુદ્રમૂર્તિમનિર્દેશ્યવક્ત્રં રુધિરસપ્રભમ્

એહિ મે ભગવન્ભૌમ અઙ્ગારક મહાપ્રભ ॥
ત્વયિ સર્વં સમાયત્તં ભૂતલેસ્મિઞ્છુભાશુભમ્

વિષ્ણુમાવાહયિષ્યામિ શઙ્ખચક્રગદાધરમ્ ॥
અતસીકુસુમશ્યામં પીતવાસસમચ્યુતમ્

એહિ મે દેવદેવેશ પ્રજાનિર્માણકારક ॥
નારાયણ સુદુષ્પાર મહાશાર્ઙ્ગધનુર્ધર

બુધમાવાહયિષ્યામિ બોધકં જગદીશ્વરમ્ ॥
ચાન્દ્રિં ગ્રહગણાધ્યક્ષં તેજોમૂર્તિં દુરાસદમ્

એહિ શીતાંશુજાચિન્ત્ય જગજ્જિષ્ણો જનાર્દન ॥
મહાબલ મહાસત્ત્વ મહાબાહો મહાદ્યુતે

શક્રમાવાહયિષ્યામિ દેવં સુરગણેશ્વરમ્ ॥
વજ્રપાણિં મહાબાહું ગોબ્રાહ્મણહિતે રતમ્

એહિ દેવ સહસ્રાક્ષ દેવારિબલસૂદન ॥
ઐરાવતસ્થધર્મજ્ઞ શચીહૃદયનન્દન

જીવમાવાહયિષ્યામિ દેવેશ્વરપુરોહિતમ્ ॥
બૃહસ્પતિં બૃહદ્વાચં વેદવેદાઙ્ગપારગમ્

એહિ જીવ મહાભાગજીવભૂત મહીતલે ॥
સસ્યવૃદ્ધિસ્તવાયત્તા સતતં ભૂમિવર્ધન

દેવીમાવાહયિષ્યામિ પાર્વતીં વરદામુમામ્ ॥
હરસ્ય દયિતાં ભાર્યાં ચાર્વઙ્ગીં ભૂતિવર્ધિનીમ્

એહિ દેવિ જગન્નાથે મેનાહૃદયનન્દિનિ ॥
પવિત્રે વરદે સૌમ્યે નિત્યં ભક્તજનપ્રિયે

શુક્રમાવાહયિષ્યામિ ભાર્ગવં જગદીશ્વરમ્ ॥
નિત્યં સર્વજનાધ્યક્ષં તપસા દ્યોતિતપ્રભમ્

એહિ શુક્ર મહાભાગ ષોડશાર્ચિર્વરપ્રદ ॥
પ્રભુસ્ત્વં વરદાચિન્ત્ય વર્ષાવર્ષસ્ય નિગ્રહે

આવાહયામ્યહં દેવં પ્રજાધ્યક્ષમકલ્મષમ્ ॥
ભક્તાનુકમ્પિનં દેવં પ્રજાનિર્માણકારકમ્

એહિ દેવ પ્રજાધ્યક્ષ પૂજાનિર્માણકારક ॥
ત્વયિ દેવ સમાયુક્તં પ્રજાનામભવોદ્ભવમ્

એહિ મે ભગવન્બ્રહ્મન્પ્રજાપતિમહાદ્યુતે ॥
સૌરિમાવાહયિષ્યામિ શનૈશ્ચારિણમચ્યુતમ્

તપસ્વિનમનાધૃષ્યં ભક્તાનામભયપ્રદમ્ ॥
એહિ તીક્ષ્ણાંશુજાચિન્ત્ય ભાવાભાવપ્રદર્શક

ત્વયિ સર્વં સમાયત્તં રાજ્ઞાં ભૂમૌ શુભાશુભમ્ ॥
આવાહયામ્યહં દેવં ગજવક્ત્રં ગણેશ્વરમ્

વિપ્રેશં વિપ્રહર્તારં પાર્વતીહૃદયપ્રિયમ્ ॥
એહિ દેવ ગણાધ્યક્ષ લમ્બોદર મહાભુજ

કાર્યસિદ્ધિઃ સમાયત્તા ત્વયિ સર્વેશ દેહિનામ્ ॥
રાહુમાવાહયિષ્યામિ દૈત્યેશં ગ્રહતાઙ્ગતમ્

કેશવાપ્તવરં વીરં તપસા દગ્ધકિલ્બિષમ્ ॥
એહ્યેહિ દૈત્યપ્રવર વરદાચિન્ત્યવિક્રમ

તપોમૂર્તે દુરાધર્ષ વિપરીતચરામ્બરે ॥
આવાહયામ્યહં દેવં વિશ્વકર્માણમચ્યુતમ્

સર્વાસાં દેવતાનાં તુ સદા શિલ્પપ્રવર્તકમ્ ॥
એહિ દેવવરાચિન્ત્ય સર્વશિલ્પપ્રવર્તક

ત્વયિ સર્વૈવ સર્વેષાં કર્મણામાશ્રિતા ગતિઃ ॥
કેતુમાવાહયિષ્યામિ કેતું સર્વદિવૌકસામ્

બ્રહ્મણ્યં સર્વધર્મજ્ઞં ભક્તાનામભયપ્રદમ્ ॥
ધૂમકેતો ઇહાભ્યેહિ હુતાશનસમપ્રભ

શિખાકરાલવિકચ પૂજિતાઘવિનાશન ॥
વહ્નેરાવાહનં પ્રોક્તં પૂર્વમેવ મયાનઘ

આવાહયિષ્યામિ શુભાં કૃત્તિકાં દેવપૂજિતામ્ ॥
એહિ સાધારણે દેવિ જ્યેષ્ઠદક્ષસુતે શુભે

પ્રજાપતેસ્તથા પ્રોક્તં રોહિણ્યાઃ શૃણુ પાર્થિવ ॥
આવાહયામિ વરદાં રોહિણીં ચન્દ્રવલ્લભામ્

એહિ રોહિણિ ધર્મજ્ઞે ધ્રુવકર્મસુ શોભને ॥
ચન્દ્રસ્યાવાહનં પ્રોક્તમિલ્વલાયા નિબોધ મે

આવાહયામિ વરદામિલ્વલાં શશિવલ્લભામ્ ॥
એહિ મે ઇલ્વલે દેવિ મૃદુકર્મસુ શોભને

રુદ્રમાવાહયિષ્યામિ ત્રિનેત્રં શૂલપાણિનમ્ ॥
એહિ શઙ્કર સર્વાત્મન્મહાદેવ ગણેશ્વર

આર્દ્રામાવાહયિષ્યામિ નક્ષત્રં બાહુસંજ્ઞિકમ્ ॥
એહ્યાર્દ્રે ચારુસર્વાઙ્ગિ દારુણે રુદ્રસમ્મતે

આવાહયિષ્યામ્યદિતિં તપસા દગ્ધકિલ્વિષામ્ ॥
આદિત્યારણિ ધર્મજ્ઞે એહિ દેવિ મહાપ્રભે ॥

ઋક્ષમાવાહયિષ્યામિ ધર્મજ્ઞં તુ પુનર્વસુમ્ ॥
પુનર્વસો ઇહાગચ્છ ચરકર્મપ્રસાદક

જીવસ્યાવાહનં પ્રોક્તં પુષ્યસ્યાથ પ્રચક્ષતે ॥
પુષ્યમાવાહયિષ્યામિ નક્ષત્રં ક્ષિપ્રસંજ્ઞિકમ્

એહિ પુષ્ય મહાભાગ પોષં વર્ધય સર્વતઃ ॥
સર્પાનાવાહયિષ્યામિ ત્રૈલોક્યાન્તરગોચરાન્ ॥

આયાન્તુ સર્વતઃ સર્પાઃ સૌમ્યરૂપા ભવન્તુ ચ ॥
આવાહયિષ્યામ્યાશ્લેષાં ભક્તાનાં શ્રીવિવર્દ્ધનામ્

આશ્લેષે ત્વમિહાભ્યેહિ દારુણે વિજયપ્રદે ॥
પિતૄનાવાહયિષ્યામિ મૂર્ત્યમૂર્તિધરાનહમ્

આયાન્તુ પિતરશ્શીઘ્રં સુધાકવ્યભુજોઽવ્યયાઃ॥
મઘામાવાહયિષ્યામિ ઉગ્રનક્ષત્રમઞ્જસા

એહિ મે સુભગે દેવિ મઘેઽઘવિનિષૂદને ॥
ભગમાવાહયિષ્યામિ પૂર્વફલ્ગુનસંજ્ઞિતમ્

।
એહિ ભાગ્યે મહાભાગે ઉગ્રકર્મપ્રસાદિકે ॥
આવાહયિષ્યામ્યર્યમ્ણમાદિત્યં તેજસાં નિધિમ્

અર્યમઁસ્ત્વં સમમ્યેહિ ભક્તપાતકનાશન ॥
ઋક્ષમાવાહયિષ્યામિ ચોત્તરાફલ્ગુનીં શુભામ્

એહિ ત્વં સુભગે દેવિ ધ્રુવે સર્વાઙ્ગસુન્દરિ ॥
આવાહનં મયા પ્રોક્તં સવિતુર્દીપ્તતેજસઃ

હસ્તમાવાહયિષ્યામિ સાવિત્રં ક્ષિપ્રમઞ્જસા ॥
એહિ સાવિત્ર ધર્મજ્ઞ ભક્તાનાં પાપનાશન

આવાહયામ્યહં દેવં ત્વષ્ટારમમિતદ્યુતિમ્ ॥
એહિ મે ભગવઁસ્ત્વષ્ટઃ પ્રજાપાલનતત્પર

ચિત્રામાવાહયિષ્યામિ ચિત્રરૂપાં મનોહરામ્ ॥
એહિ મે વરદે ચિત્રે મૃદુકર્મપ્રસાધિનિ

વાયુમાવાહયિષ્યામિ સર્વગં દીપ્તતેજસમ્ ॥
દેવ વાયો ત્વમભ્યેહિ સર્વભૂતજગત્પ્રિય

સ્વાતિમાવાહયિષ્યામિ નિત્યમુત્તરમાર્ગગામ્ ॥
દેવિ સ્વાતે ત્વમભ્યેહિ ચરકર્મસુ શોભને

આવાહયિષ્યામીન્દ્રાગ્ની સહિતૌ દીપ્તતેજસૌ ॥
ઇન્દ્રાભ્યેહિ જગન્નાથ એહ્યગ્ને વિજયપ્રદ

ઋક્ષમાવાહયિષ્યામિ વિશાખાં દીપ્તતેજસમ્ ॥
વિશાખે ત્વમિહાભ્યેહિ દેવિ સાધારણે શુભે

મિત્રમાવાહયિષ્યામિ દેવં દીપ્તાંશુમૂર્જિતમ્ ॥
એહિ મિત્ર મહાભાગ ભક્તાઘપ્રલયઙ્કર

ઋક્ષમાવાહયિષ્યામિ હ્યનુરાધાં વરપ્રદામ્ ॥
અનૂરાધે ત્વમભ્યેહિ મૃદુકર્મસુ શોભને

શક્રસ્યાવાહનં પ્રોક્તં જ્યેષ્ઠાયાઃ શૃણુ પાર્થિવ ॥
જ્યેષ્ઠામાવાહયિષ્યામિ નક્ષત્રં શક્રદૈવતમ્

જ્યેષ્ઠે દેવિ ત્વમભ્યેહિ દારુણે ચારુલોચને ॥
દેવમાવાહયિષ્યામિ દેવં નિરૃતિજં પ્રભુમ્

એહિ દેવ વિરૂપાક્ષ મહાબલપરાક્રમ ॥
મૂલમાવાહયિષ્યામિ નક્ષત્રં દારુણં મહત્

એહિ મૂલ મહાભાગ ભક્તાનામભયપ્રદ ॥
અપસ્ત્વાવાહયિષ્યામિ સર્વગા વરદાઃ શિવાઃ ॥

આપસ્ત્વાયાન્તુ વરદાઃ પવિત્રા મઙ્ગલાવહાઃ ॥
ઋક્ષમાવાહયિષ્યામિ પૂર્વાષાઢેતિસંજ્ઞિતમ્

એહિ ત્વમુગ્રે વરદે ચાષાઢે પૂર્વ પૂર્વકે ॥
વિશ્વાનાવાહયિષ્યામિ દેવાનદ્ભુતતેજસઃ

આયાન્તુ વરદાઃ સર્વે વિશ્વેદેવા મહાબલાઃ ॥
ઋક્ષમાવાહયિષ્યામિ ઉત્તરાષાઢસંજ્ઞિતમ્

એહિ ત્વમુત્તરાષાઢે સર્વકર્મસુ શોભને ॥
બ્રહ્મણ આવાહનં પ્રોક્તમભિજિતિ શૃણુ હે પ્રભો

ઋક્ષમાવાહયિષ્યામિ યત્તદભિજિદુચ્યતે ॥
એહિ ધિષ્ણ્યવરિષ્ઠાય ક્ષિપ્રકર્મપ્રસાધક

વિષ્ણોરાવાહનં પ્રોક્તં શ્રવણસ્ય નિબોધ મે ॥
ઋક્ષમાવાહયિષ્યામિ શ્રવણં સર્વકામદમ્

॥
અશ્વત્થ ત્વં સમભ્યેહિ ચરકર્મપ્રસાધક ॥
વસૂનાવાહયિષ્યામિ દેવાનષ્ટૌ વરપ્રદાન્

આયાન્તુ વરદા દેવા વસવઃ પાપનાશનાઃ ॥
ધનિષ્ઠામાવાહયિષ્યામિ નક્ષત્રં રાશિવલ્લભમ્

ધનિષ્ઠે ત્વમિહાગચ્છ ચરકર્મપ્રસાધકે ॥
આવાહનં મયા પ્રોક્તં વરુણસ્ય મહાત્મનઃ

ઋક્ષમાવાહયિષ્યામિ નામ્ના શતભિષં શુભમ્ ॥
આગચ્છ ત્વં શતભિષે ચરકર્મસુ શોભને

અજૈકપાદં વરદં રુદ્રમાવાહયામ્યહમ્ ॥
અહિર્બુધ્ન્ય સમભ્યેહિ જટાજૂટોપશોભિત

ધ્રુવમાવાહયિષ્યામિ દેશે ભાદ્રપદોત્તરે ॥
એહિ ત્વં સુમહાભાગે મમ ભાદ્રપદોત્તરે॥
ઋક્ષમાવાહયિષ્યામિ રેવતીં ચારુદર્શનામ્

એહિ રેવતિ ધર્મજ્ઞે મૃદુકર્મપ્રસાધકે ॥
આવાહયામ્યહં દેવં પૂષણં પાપનાશનમ્

પૂષન્સમ્યગિહાભ્યેહિ સર્વકર્મપ્રસાદિક ॥
આવાહયામ્યહં દેવૌ નાસત્યૌ સૂર્યનન્દનૌ

આગચ્છેતાં મહાભાગૌ વરદાવશ્વિનાવુભૌ ॥
ઋક્ષમાવાહયિષ્યામિ ચાશ્વિની સર્વકામદમ્

યમસ્યાવાહનં પ્રોક્તં ભરણીમથ વૈ શૃણુ ॥
ઋક્ષમાવાહયિષ્યામિ ચોગ્રં ભરણિસંજ્ઞકમ્

એહિ ત્વં દેવિ ભરણિ સુભગે ચારુદર્શિનિ ॥
શક્રસ્યાવાહનં પ્રોક્તં પૂર્વમેવ મયા નૃપ

પ્રાચીમાવાહયિષ્યામિ સૂર્યોદયવિભૂષિતામ્ ॥
એહિ ત્વં વરદે પૂર્વે શુભકર્મપ્રસાધિકે

વહ્નેરાવાહનં પ્રોક્તં પૂર્વમેવ મયા તવ ॥
દિશમાવાહયિષ્યામિ વરદાં પૂર્વદક્ષિણામ્

વહ્નિપ્રિયે સમભ્યેહિ વરદે પૂર્વદક્ષિણે ॥
યમસ્યાવાહનં પ્રોક્તં યામ્યાયાશ્ચ દિશઃ શૃણુ

અહમાવાહયિષ્યામિ દક્ષિણાં દક્ષિણાં દિશમ્ ॥
દક્ષિણે ત્વં સમભ્યેહિ સર્વકર્મસુ શોભને

પૂર્વમાવાહનં પ્રોક્તં વિરૂપાક્ષસ્ય ધીમતઃ ॥
દિશમાવાહયિષ્યામિ શુભાં દક્ષિણપશ્ચિમામ્

।
એહિ મે નૈરૃતી દેવિ સતતં ભૂતિવર્ધિનિ ॥
આવાહનં મયા પ્રોક્તં વરુણસ્ય મહાત્મનઃ

દિશમાવાહયિષ્યામિ વારુણીં વરુણીં શુભામ્ ॥
આગચ્છ પશ્ચિમે દેવિ વરદે વરુણપ્રિયે

આવાહનં મયા પ્રોક્તં વાયોશ્ચૈવ મહાત્મનઃ ॥
આવાહયામિ વિદિશં વાયવ્યાં પશ્ચિમોત્તરામ્ ॥

વરદે ત્વં સમભ્યેહિ વાયવ્યે પશ્ચિમોત્તરે ॥
આવાહયામિ ધનદં દેવં વૈશ્રવણં પ્રભુમ્

રાજરાજ સમભ્યેહિ સર્વયજ્ઞધનાધિપ ॥
દિશમાવાહયિષ્યામિ સૌમ્યાં ધનદપાલિતામ્

ઉત્તરે ત્વં સમભ્યેહિ સર્વકર્મસુ શોભને ॥
દેવસ્યાવાહનં પ્રોક્તં ત્ર્યમ્બકસ્ય મહાત્મનઃ ॥

દિશમાવાહયિષ્યામિ શુભાં પ્રાગુત્તરામહમ્ ॥
એહિ ત્વં સુભગે દેવિ સતતં શિવપાલિતે

સર્વાનાવાહયિષ્યામિ પૂર્વકુમ્ભેષુ સાગરાન્ ॥
રત્નાધ્યક્ષાઃ સમાયાન્તુ ચત્વાર ઇહ સાગરાઃ

ઈશાન્યાં દિશિ યઃ કુમ્ભઃ પૂર્વસ્તસ્ય તુ સાગરઃ ॥
આગ્નેય્યાન્તુ સમાયાતુ દક્ષિણે દક્ષિણઃ શિવઃ

પશ્ચિમસ્તુ સમાયાતુ કુમ્ભે દક્ષિણપશ્ચિમે ॥
ઉત્તરશ્ચ તથાઽભ્યેતુ કુમ્ભે વૈ પશ્ચિમોત્તરે

આવાહિતાનાં કર્તવ્યં ભૂમૌ કૃત્વા તતઃ શિરઃ ॥
પ્રણામમભિવાદ્યં ચ તતો મન્ત્રમુદીરયેત્

ભવતાં હિ પ્રસાદેન ભવતાં પ્રતિપૂજનૈઃ ॥
પ્રયતિષ્યે યથાશક્ત્યા તન્મેઽનુજ્ઞાતુમર્હથ

યુષ્માકં પૂજનં કર્તું કેન શક્યં યથાવિધિ॥
યુષ્મત્પૂજાવિહીનેન કુતો લભ્યં મહત્પદમ્

તતઃ કર્તું યથાશક્ત્યા ભવતાં પ્રતિપૂજને ॥
વરદાઃ પ્રયતિષ્યામિ તન્મેનુજ્ઞાતુમર્હથ

ભવત્પૂજાવિધાવસ્મિન્બહુવિજ્ઞં સદૈવ તુ ॥
સ્વાંસ્વાં દિશમધિષ્ઠાય દિક્પાલા દીપ્તતેજસઃ

ઉત્સાદયન્તુ સકલાન્વિઘ્નાન્મે સમુપસ્થિતાન્ ॥
અસ્માદ્દેશાત્પ્રણશ્યન્તુ યજ્ઞઘ્ના બ્રહ્મરાક્ષસાઃ

વિનાયકા વિઘ્નકરા મમોગ્રા યજ્ઞદ્વિષો યે પિશિતાશનાશ્ચ ॥
સિદ્ધાર્થકૈર્વજ્રસમાનકલ્પૈર્મયા નિરસ્તાઃ સ્વગૃહં પ્રયાન્તુ

એતાવદુક્ત્વા વિકિરેત વિદ્વાન્સિદ્ધાર્થકાન્દિક્ષુ તથા વિદિક્ષુ ॥
રક્ષોહણં ચાત્ર તથૈવ મંત્રં વક્તવ્યમુચ્ચૈર્દ્વિજપુઙ્ગવેન

સર્વગ્રહાણાં યજને પ્રદિષ્ટં સર્વૌષધૈઃ સ્નાનમદીનસત્ત્વ ॥
બીજૈઃ સમગ્રૈશ્ચ તથૈવ ગન્ધૈર્મૃદ્ભિશ્ચ રત્નૈશ્ચ તથા જલૈશ્ચ

ઇતિ શ્રીવિષ્ણુધર્મોત્તરે પ્રથમખણ્ડે માર્કણ્ડેયવજ્રસંવાદે ગ્રહર્ક્ષાવાહનમન્ત્રાધ્યાયો નામ પઞ્ચનવતિતમોઽધ્યાયઃ