Vishnudharmottara Purana · Chapter 1.93

vajra uvāca //
vistarācchrotumicchāmi grahanakṣatrapūjanam //
tvatto'haṃ bhārgavaśreṣṭha tanmamācakṣva pṛcchataḥ

mārkaṇḍeya uvāca //
kalpite maṇḍale snātaḥ prāktantre ca tathā kṛte //
maṇḍalasya tu śaucārthaṃ pañcagavyaṃ prakalpayet

payaḥ kāñcanavarṇāyā nīlāyāśca tathā ghṛtam //
dadhi vai kṛṣṇavarṇāyāḥ śvetāyāścaiva gomayam

gomūtraṃ tāmravarṇāyāḥ pañcagavyaṃ prakalpayet //
athaitāni samastāni kapilāyāssamāharet

gāyatryā gṛhya gomūtraṃ rathe akṣeti gomayam //
āpyāyasveti ca kṣīraṃ dadhikrāvṇeti vai dadhi

tejosi śukramityājyaṃ sāvitreṇa kuśodakam //
aghamarṣaṇamantreṇa saṃyojya praṇavena tu

maṇḍalābhyukṣaṇaṃ kāryaṃ sāvitryā tadanantaram //
pūrṇaṃ kṣīrākṣatopetaṃ sarṣapātaṇḍulairyutam

śaṅkhe rajate tāmre vā kuryādarghyaṃ vicakṣaṇaḥ //
rathe akṣeti mantreṇa draviṇena tathaiva ca

pādyasya kalpanā kāryā drupadāyāstathaiva ca //
hiraṇyavarṇetyārabhya ṛktrayeṇa tathaiva ca

āpo hiṣṭheti tisṛbhiḥ śannodevīti pārthiva //
jīvadānaṃ tato deyaṃ maṇḍale nṛpapuṅgava

arghyodakaṃ pavitreṇa tatra mantraḥ prakīrtitaḥ //
agnerāyurasītyevamanuvākaṃ narādhipa

jīvasyāvāhanaṃ kāryaṃ taṃ ca vakṣyāmyataḥ param //
om-āvāhayāmyahaṃ devaṃ jīvaṃ sarvagataṃ vibhum

pañcadhāvasthitaṃ dehaṃ pañcadhāvasthitaṃ punaḥ //
pañcādhāvasthitaṃ bhūyaḥ pañcadhāvasthitaṃ tataḥ

vāyavyena tu bhāvena pañcadhāvasthitassadā //
āgneyena tu bhāvena pañcadhāvasthitastathā

bhūtātmakena tu tathā pañcadhāvasthitaṃ prabhum //
vāruṇena ca bhāvena pañcadhāvasthitaṃ sadā //

maṇḍale'sminnadṛśyastvaṃ praviśādya namostu te //
jīvasyāvāhanaṃ kṛtvā yathāvatpārthivottama

vakṣyāmyāvāhanādhyāyānpūjyasyāvāhanaṃ bhavet //
tadviṣṇoḥ paramityevamarghyaṃ deyaṃ narādhipa

dhuvā dyauriti mantreṇa hyāsanaṃ vinivedayet //
āpohiṣṭheti tisṛbhiḥ pādyaṃ ca vinivedayet

arghyodakādācamanaṃ gāyatryā vinivedayet //
dadhi kṣaudraṃ ghṛtaṃ caiva madhuparkaṃ nivedayet

tatra maṃtratrayaṃ jñeyaṃ dadhi krāvṇeti pārthiva //
tejosi śukramityeva madhuvātā ṛtāyate

madhuparkikamaśvatthaṃ tato mātrāṃ nivedayet //
sahiraṇyaṃ bījapātraṃ draviṇena sadaiva tu

paśuḥ kalau na kartavya ityāha bhagavānbhṛguḥ //
rathe akṣeti mantreṇa dātavyamanulepanam

vibhūṣaṇaṃ ca tenaiva tataḥ parataraṃ nṛpa //
yajñopavītaṃ tu navaṃ tathā pratisaraṃ śubham

vastraṃ patākāṃ ca tathā sāvitreṇa nivedayet //
puṣpaṃ puṣpavatītyeva dhūpaṃ dhūrasi cāpyatha

dhūpamantramidaṃ cānyaṃ nibodha gadato mama //
vanaspatiraso divyo gandhāḍhyo gandha uttamaḥ

āhvānaṃ sarvadevānāṃ dhūpo'yaṃ pratigṛhyatām //
tejosi śukramityeva dīpaṃ dadyānmahīpate

hiraṇyagarbhetyaṣṭarcaṃ deyaṃ sarvaṃ nivedayet //
nibodha gadato mantramannapānanivedane

tuṣṭipuṣṭikaraṃ hṛdyamāhāraṃ sarvadehinām //
gṛhāṇa varadācintya pānaṃ bhaktyā mayoditam

pānenānena paramā tṛptirastu tavānagha //
tṛptastarpaya kāmaistu yajamānaṃ namo'stu te

anuktamaṃtraṃ śrutvā'tha grahebhyo yaḥ prayacchati //
sāvitraṃ tasya nirdiṣṭaṃ mantraṃ pārthivasattama

tato'gnihavanaṃ kṛtvā dattvā rājendra dakṣiṇām //
sāvitreṇa tu mantreṇa tataḥ kāryaṃ visarjanam

imāṃ pūjāṃ samādāya mayā bhaktyā niveditām //
punarāgamanāyeha vrajadhvaṃ nākamuttamam

ādhayo vyādhayaścaiva praśamaṃ yāntu sarvaśaḥ //
rakṣā cā'stu śivaṃ cāstu yajamānasya sarvataḥ

gavāṃ śivaṃ cāstu tathā dvijānāṃ rājñāṃ śivaṃ cāstu tathā prajānām //
ātaṅkahīnaṃ jagadastu sarvaṃ doṣāḥ praṇāśaṃ sakalāḥ prayāntu

iti śrīviṣṇudharmottare prathamakhaṇḍe mā० saṃ० grahapūjāvidhānaṃ nāma trinavatitamo'dhyāyaḥ