Vishnudharmottara Purana · Chapter 1.91

vajra uvāca //
grahāṇāṃ bhārgavaśreṣṭha nakṣatrāṇāṃ pṛthakpṛthak //
snānāni śrotumicchāmi tatpīḍāśamanānyaham // १ / /
mārkaṇḍeya uvāca //
mañjiṣṭhāṃ mātuluṃgaṃ ca kuṃkumaṃ raktacandanam //
pūrṇakumbhe kṛte tāmre sūryasnānaṃ vidhīyate // २ / /
uśīraṃ ca śirīṣaṃ ca padmakaṃ candanaṃ tathā //
śaṃkhe nyastamidaṃ snānaṃ candradoṣanivāraṇam // / / ३ //
khadiraṃ devadāruṃ ca tilānyāmalakāni ca / /
pūrṇakumbhe kṛte raupye bhaumapīḍāvināśanam

nadīsaṃgamatoyāni tanmṛdā sahitāni ca //
nyastāni kumbhe māhīye budhapīḍāvināśanam

gorocanaṃ nāgamadaṃ śatapuṣpā śatāvarī //
vinyasya rājate kumbhe śukrapīḍānivāraṇam

tilānmāṣānpriyaṃguṃ ca gandhapatraṃ tathaiva ca //
nyastaṃ kārṣṇāyase kumbhe saurapīḍānivāraṇam

gugguluṃ hiṃgulaṃ tālaṃ śubhāṃ caiva manaḥśilām //
śṛṃge ca māhiṣe nyastaṃ rāhupīḍāvināśanam

varāhanirhṛtāṃ rājanparvatāgramṛdaṃ tathā //
chāgaṃ kṣīraṃ khaḍgapātre ketupīḍāvināśanam

grahasnānamidaṃ proktamṛkṣasnānamataḥ śṛṇu //
yena samyakprayuktena mucyate kilviṣānnaraḥ //

vaṭāśvatthaśirīṣāṇāṃ patrāṇi tu tilaissaha //
sarvagandhopapannāni kṛttikāsu vidhīyate

sarvabījodakasnānaṃ rohiṇīṣu praśasyate //
sarvaratnodakasnānaṃ mṛgaśīrṣe vidhīyate

vacā ca gandhā kāntābhiḥ snānaṃ raudre prakīrtitam //
goṣṭhamṛdgomayasnānamāditye pāpanāśanam

sarvauṣadhyaḥ pañcagavyaṃ tathā gaurāśca śālayaḥ //
siddhārthakāssarvagandhāṃstiṣyasnāne śubhapradāḥ

valmīkāgramṛdā snānaṃ tathā sārpe śubhapradam //
satilaṃ devanirmālyaṃ snānaṃ śastaṃ maghāsu ca

phalgunīṣu ca pūrvāsu śāḍvalaṃ lavaṇaṃ ghṛtam //
uttarāsu tathā snānaṃ śimbimustāpriyaṃgubhiḥ

haste snānaṃ praśaṃsanti parvatāgrasaromṛdā //
citrāsu devanirmālyaṃ svātau puṣpairjalodbhavaiḥ

viśākhāsu praśaṃsanti raudracandanapadmakaiḥ //
nadīkūladvayānmṛdbhirmaitre snānaṃ prakīrtitam

jyeṣṭhodakena jyeṣṭhāsu suvarṇasahitaṃ hitam //
sarvamūlajalaiḥ snānamāpye muktāphalodakaiḥ

vaiśvadeve praśaṃsanti padmakośīracandanaiḥ //
sarvauṣadhaiścābhijiti śravaṇe saṃgamodakaiḥ

nadīvāpījalayutairvāruṇe tu praśasyate //
āje śrīvāsakaṃ snānaṃ kāntā puruhitaṃ hitam

āhirbudhnye tathā snānaṃ padmakośīracandanaiḥ //
kuṅkumāgurukarpūraiḥ sahitaṃ pāpanāśanam //
darbhermūlayutaiḥ pauṣṇe haridrādvayacandanaiḥ

nāgāśvagandhā madavantikā ca kṣaudrānvitā cāśvinake pradiṣṭā //
surāhva kāṣṭhaṃ rajanīdvayaṃ ca snānaṃ vacābhiḥ sahitaṃ ca yāmyam

iti śrīviṣṇudharmottare prathamakhaṇḍe mā० saṃ० grahanakṣatrasnānavidhivarṇanaṃ nāmaika navatitamo'dhyāyaḥ