Vishnudharmottara Purana · Chapter 1.90

// vajra uvāca //
grahāṇāṃ bhārgavaśreṣṭha nakṣatrāṇāṃ tathaiva ca //
pūjāvidhimahaṃ tvattaḥ śrotumicchāmi tattvataḥ

mārkaṇḍeya uvāca //
grahaṃ vāpyatha nakṣatraṃ yaṃ pūjayitumicchati / /
upaspṛśya śucirbhūtvā kṛtvā tasyātha maṇḍalam

maṇḍale kalpitaṃ vāpi svayaṃ daivavidā nṛpa //
pūjyasnānena vidhivatsnātaḥ prayatamānasaḥ

vidhinopasamādāya prayato jātavedasam //
atha vopasamādāne kṛte tatra purodhasā

prāktantre ca kṛte tatra cakṣuṣpatre yathāvidhi //
maṇḍalātpaścime bhāge prāṅmukhaḥ prayataśśuciḥ

maṇḍalasya tu śaucārthaṃ pañcagavyaṃ prakalpayet //
abhyukṣya pañcagavyena maṇḍalaṃ prayataḥ śuciḥ // ६ / /
arghyādikalpanāṃ kuryātpādyāntāṃ tadanantaram //
jīvādānaṃ tataḥ kuryājjīvasyāvāhanaṃ tataḥ

pūjyasyāvāhanaṃ kuryāttato'rghyaṃ vinivedayet //
pādyaṃ nivedayetpaścādāsanaṃ ca nivedayet

dattvaivācamanīyaṃ ca madhuparkaṃ nivedayet //
tato'nulepanaṃ dadyāttato dadyādvibhūṣaṇam / / ९ //
tato yajñopavītaṃ ca tataḥ pratisarāñśubhān //
vastraṃ tathā patākāṃ ca puṣpaṃ dhūpaṃ tathaiva ca

dīpaṃ ca dattvā naivedyaṃ mukhavāsaṃ ca pārthiva //
tato'gnihavanaṃ kuryādyasya yasya yathā bhavet

kṛtvaivottaratantraṃ ca dattvā pūrṇāhutiṃ tataḥ //
taduktāṃ dakṣiṇāṃ dattvā maṇḍale pratipādayet

hoturvastrayugaṃ deyaṃ gaussuvarṇaṃ tathaiva ca //
grāhyaṃ kālavidā tacca yaddattaṃ grahamaṇḍale

yathāśakti ca dātavyā brāhmaṇānāṃ ca dakṣiṇā //
visarjanaṃ tataḥ kāryaṃ tato brāhmaṇabhojanam // // १४ / /
bhuktavatsu ca vipreṣu pramārṣṭirmaṇḍale bhavet / /
arghyapuṣpādikaṃ sarvaṃ jale prakṣipya pārthiva

ambunā tarpaṇaṃ kāryaṃ pūjā syāttadanantaram

pūjāvidhiste gadito mayādya samāsataḥ pārthivasaṃghamukhya / /
ataḥ paraṃ kiṃ kathayāmi tubhyaṃ tanme vadasvākhilarājasiṃha //

iti śrīviṣṇudharmottare prathamakhaṇḍe mā० saṃ ० graharkṣapūjāvidhivarṇanaṃ nāma navatitamo'dhyāyaḥ / / ९ ० //