વિષ્ણુધર્મોત્તરપુરાણમ્ · અધ્યાય 1.90

॥ વજ્ર ઉવાચ ॥
ગ્રહાણાં ભાર્ગવશ્રેષ્ઠ નક્ષત્રાણાં તથૈવ ચ ॥
પૂજાવિધિમહં ત્વત્તઃ શ્રોતુમિચ્છામિ તત્ત્વતઃ

માર્કણ્ડેય ઉવાચ ॥
ગ્રહં વાપ્યથ નક્ષત્રં યં પૂજયિતુમિચ્છતિ । ।
ઉપસ્પૃશ્ય શુચિર્ભૂત્વા કૃત્વા તસ્યાથ મણ્ડલમ્

મણ્ડલે કલ્પિતં વાપિ સ્વયં દૈવવિદા નૃપ ॥
પૂજ્યસ્નાનેન વિધિવત્સ્નાતઃ પ્રયતમાનસઃ

વિધિનોપસમાદાય પ્રયતો જાતવેદસમ્ ॥
અથ વોપસમાદાને કૃતે તત્ર પુરોધસા

પ્રાક્તન્ત્રે ચ કૃતે તત્ર ચક્ષુષ્પત્રે યથાવિધિ ॥
મણ્ડલાત્પશ્ચિમે ભાગે પ્રાઙ્મુખઃ પ્રયતશ્શુચિઃ

મણ્ડલસ્ય તુ શૌચાર્થં પઞ્ચગવ્યં પ્રકલ્પયેત્ ॥
અભ્યુક્ષ્ય પઞ્ચગવ્યેન મણ્ડલં પ્રયતઃ શુચિઃ ॥ ૬ । ।
અર્ઘ્યાદિકલ્પનાં કુર્યાત્પાદ્યાન્તાં તદનન્તરમ્ ॥
જીવાદાનં તતઃ કુર્યાજ્જીવસ્યાવાહનં તતઃ

પૂજ્યસ્યાવાહનં કુર્યાત્તતોઽર્ઘ્યં વિનિવેદયેત્ ॥
પાદ્યં નિવેદયેત્પશ્ચાદાસનં ચ નિવેદયેત્

દત્ત્વૈવાચમનીયં ચ મધુપર્કં નિવેદયેત્ ॥
તતોઽનુલેપનં દદ્યાત્તતો દદ્યાદ્વિભૂષણમ્ । । ૯ ॥
તતો યજ્ઞોપવીતં ચ તતઃ પ્રતિસરાઞ્શુભાન્ ॥
વસ્ત્રં તથા પતાકાં ચ પુષ્પં ધૂપં તથૈવ ચ

દીપં ચ દત્ત્વા નૈવેદ્યં મુખવાસં ચ પાર્થિવ ॥
તતોઽગ્નિહવનં કુર્યાદ્યસ્ય યસ્ય યથા ભવેત્

કૃત્વૈવોત્તરતન્ત્રં ચ દત્ત્વા પૂર્ણાહુતિં તતઃ ॥
તદુક્તાં દક્ષિણાં દત્ત્વા મણ્ડલે પ્રતિપાદયેત્

હોતુર્વસ્ત્રયુગં દેયં ગૌસ્સુવર્ણં તથૈવ ચ ॥
ગ્રાહ્યં કાલવિદા તચ્ચ યદ્દત્તં ગ્રહમણ્ડલે

યથાશક્તિ ચ દાતવ્યા બ્રાહ્મણાનાં ચ દક્ષિણા ॥
વિસર્જનં તતઃ કાર્યં તતો બ્રાહ્મણભોજનમ્ ॥ ॥ ૧૪ । ।
ભુક્તવત્સુ ચ વિપ્રેષુ પ્રમાર્ષ્ટિર્મણ્ડલે ભવેત્ । ।
અર્ઘ્યપુષ્પાદિકં સર્વં જલે પ્રક્ષિપ્ય પાર્થિવ

અમ્બુના તર્પણં કાર્યં પૂજા સ્યાત્તદનન્તરમ્

પૂજાવિધિસ્તે ગદિતો મયાદ્ય સમાસતઃ પાર્થિવસંઘમુખ્ય । ।
અતઃ પરં કિં કથયામિ તુભ્યં તન્મે વદસ્વાખિલરાજસિંહ ॥

ઇતિ શ્રીવિષ્ણુધર્મોત્તરે પ્રથમખણ્ડે મા૦ સં ૦ ગ્રહર્ક્ષપૂજાવિધિવર્ણનં નામ નવતિતમોઽધ્યાયઃ । । ૯ ૦ ॥