Vishnudharmottara Purana · Chapter 1.9

// vajra uvāca //
śrotuṃ janānihecchāmi sāgaradvīpavāsinaḥ //
prādhānyena bhṛguśreṣṭha vistarādvistaro yataḥ

mārkaṇḍeya uvāca //
pāñcālāḥ kuravo matsyā yaudheyāḥ savaṭaścarāḥ //
kuntayaḥ śūrasenāśca madhyadeśajanāḥ smṛtāḥ

vṛṣadhvajāṃjanāḥ pannāḥ suhmā māgadhacedayaḥ //
kāśayaśca videhāśca pūrvasyāṃ kośalāstathā

kaliṅgavaṅgapuṇḍrāṅgavaidarbhā mūlakāstathā//
vindhyāntanilayāḥ proktāḥ pūrvadakṣiṇataḥ smṛtāḥ

pulindāśmakajīmūtanararāṣṭra nivāsinaḥ //
karṇāṭakā bhojakaṭā dakṣiṇāpathavāsinaḥ

ambaṣṭhā draviḍā nāgāḥ kāmbojāḥ strīmukhāḥ śakāḥ //
ānantavāsinaścaiva jñeyā dakṣiṇapaścime

strīrājyaṃ saindhavā mlecchā nāstikyā yavanāstathā //
paścimena ca vijñeyāḥ paṭumānauṣadhaiḥ saha

māṇḍavyāśca tuṣārāśca mūlikāśca mukhāḥ khaśāḥ //
mahākeśā mahānāsā deśāstūrattarapaścime

lampagāstālanāgāśca marugāndhārajāhutāḥ //
himavannilayā mlecchā hyudīcīṃ diśamāśritāḥ

trigartamīnakaulūtā brahmaputrāssatīgaṇāḥ //
abhisārāśca kāśmīrāścodakpūrveṇa kīrtitāḥ

rājendrasāgaradvīpā pradhānā vasudhādhipāḥ //
bhavate'haṃ pravakṣyāmi digdeśena nibodha tat

pañcālanātho magadhādhipaśca kaliṅgarāḍ bhojakaṭeśvaraśca //
anantakaḥ saindhavakastuṣāro madreśvaraścātha kulūtanāthaḥ

iti śrīviṣṇudharmottare prathamakhaṇḍe mārkaṇḍeyavajrasaṃvāde janapadavarṇano nāma navamo'dhyāyaḥ