Vishnudharmottara Purana · Chapter 1.10

vajra uvāca //
niviṣṭānsāgare dvīpe saptāhaṃ kulaparvatān //
nāmataḥ śrotumicchāmi tatprasūtāśca nimnagāḥ

mārkaṇḍeya uvāca //
mahendro malayaḥ sahyaḥ śuktimānṛkṣaparvataḥ //
vindhyaśca pāriyātraśca saptāsminkulaparvatāḥ

trisāmā ṛṣikulyāśca ikṣugā tridivālayā //
lāṃgūlinī vaṃśadharā nadyastvetā mahendrajāḥ

kṛtamālā tāmraparṇī puṣpajā cotpalāvatī //
śītodakā girivahā nadyo malayasambhavāḥ

tuṅgabhadrā suprakārā vāhyā kāverikā tathā //
dakṣiṇāpathamadhyasthā sahyapādavinissṛtāḥ

ṛṣikā sukumārī ca mandagā mandavāsinī //
nṛpamālā śirī caiva śuktimatpādanissṛtāḥ

mandākinī daśārṇā ca śoṇo devī ca narmadā //
tamasā pippalā ceti ṛkṣavatpādaniḥsṛtāḥ

veṇā vaitaraṇī caiva narmadā ca kumudvatī //
toyā setuśilā caiva vindhyapādavinissṛtāḥ

pārā carmaṇvatī pādā vidiśā veṇuvatyapi //
siprā hyavantī kuntī ca pāriyātraviniḥsṛtāḥ

nadyaḥ pradhānāḥ kathitāstavaitāḥ puṇyāḥ pavitrā ṛṣisevitāśca //
santīha nadyaśca sahasraśo'nyā vaktuṃ na śakyā yaduvṛndanātha /

iti śrīviṣṇudharmottare prathamakhaṇḍe mārkaṇḍeyavajrasaṃvāde saptagiryudbhavanadīvarṇano nāma daśamo'dhyāyaḥ //१ ० //