Vishnudharmottara Purana · Chapter 1.8

// vajra uvāca //
bhagavanbhārataṃ varṣaṃ śrotumicchāmi tattvataḥ //
karmabhūmiṣu martyānāṃ varṣaṃ bhārgava bhāratam

mārkaṇḍeya uvāca //
bhāratasyāsya varṣasya nava bhedāḥ prakīrtitāḥ //
aṣṭabhirgiribhiśchannā yetvagamyāḥ parasparam

himācalādāsamudraṃ girayaste vyavasthitāḥ //
yāmyottareṇa rājendra nāmatastānnibodha me

svamālī hemamālī ca śambhuḥ kārtasvarākaraḥ //
vaiḍūryaparvataścaiva rājato maṇimānbhavaḥ

indradyumnaḥ kadetaśca tāmravarṇo gabhastimān //
rāgadveṣastathaivānyo gāndharvastvatha vāruṇaḥ

teṣāṃ tu navamo madhye dvīpo nāmnā tu madhyamaḥ //
asminmanvantare kṣiptaḥ sāgaraiśca caturdiśam

vaiḍūryaparvataḥ pūrvamuttareṇa himācalāt //
paścārdhe kāñcanagirerudageva ca lāvaṇāt

veṣṭitaḥ sāgaraḥ sarvo nānāsattvāśrayo nṛpa / //
himālayaḥ sāgaraistu kṛto deśadvayastathā

lavaṇasyottare pārśve sāgarasya ca dakṣiṇe //
purī laṃkā sanniviṣṭā yasyāṃ vai rāvaṇo hataḥ

lavaṇena ca saṃpṛktaḥ samudro lavaṇo yataḥ //
himācalasya yo bhāgo varṣe'sminnṛpa bhārate //1.8.१ ०//
tatrāsti śailapravaro dvitīyo gandhamādanaḥ //
śvetaśca parvataśreṣṭho mandaraśca mahāgiriḥ

ete śailavarā dṛṣṭā pāṇḍavaiśca mahātmabhiḥ //
himācalasya madhye tu kailāso nāma parvataḥ

himavatyeva vikhyāto naranārāyaṇāśramaḥ//
yatra sā badarī ramyā nānāśakunisevitā

uṣṇatoyavahā gaṅgā śvetatoyavahā parā //
suvarṇasikatā rājaṃstāpasairupaśobhitā

ityete kathitā dvīpāḥ prādhānyena tavānagha //
eteṣāmaṃtare dvīpāḥ śataśotha sahasraśaḥ

na te varṇayituṃ śakyā varṣāṇāṃ tu śatairapi //
vivarjayitvā bharatasya varṣaṃ varṣeṣu sarveṣu nareṃdrasiṃha //
nirāmayā vītabhayā manuṣyā varṣeṣu sarveṣu tathaiva coktāḥ

āyuḥpramāṇaṃ labhate hi rājandvīpeṣu sarveṣu naro mayoktam //
kṛtvā śubhaṃ karma tu bhārate'smindvīpeṣu sarveṣu narāḥ prayānti // /

vṛkṣeṣu teṣāṃ prabhavanti kāmāḥ striyaśca teṣāmapi rūpavatyaḥ //
daṇḍaśca teṣāṃ ca na dāṇḍiko'sti sanmārgagāste'pi tathā ca rājan

iti śrīviṣṇudharmottare prathamakhaṇḍe mārkaṇḍeyavajrasaṃvāde bhāratavarṣavarṇanaṃ nāmā'ṣṭamo'dhyāyaḥ