વિષ્ણુધર્મોત્તરપુરાણમ્ · અધ્યાય 1.9

॥ વજ્ર ઉવાચ ॥
શ્રોતું જનાનિહેચ્છામિ સાગરદ્વીપવાસિનઃ ॥
પ્રાધાન્યેન ભૃગુશ્રેષ્ઠ વિસ્તરાદ્વિસ્તરો યતઃ

માર્કણ્ડેય ઉવાચ ॥
પાઞ્ચાલાઃ કુરવો મત્સ્યા યૌધેયાઃ સવટશ્ચરાઃ ॥
કુન્તયઃ શૂરસેનાશ્ચ મધ્યદેશજનાઃ સ્મૃતાઃ

વૃષધ્વજાંજનાઃ પન્નાઃ સુહ્મા માગધચેદયઃ ॥
કાશયશ્ચ વિદેહાશ્ચ પૂર્વસ્યાં કોશલાસ્તથા

કલિઙ્ગવઙ્ગપુણ્ડ્રાઙ્ગવૈદર્ભા મૂલકાસ્તથા॥
વિન્ધ્યાન્તનિલયાઃ પ્રોક્તાઃ પૂર્વદક્ષિણતઃ સ્મૃતાઃ

પુલિન્દાશ્મકજીમૂતનરરાષ્ટ્ર નિવાસિનઃ ॥
કર્ણાટકા ભોજકટા દક્ષિણાપથવાસિનઃ

અમ્બષ્ઠા દ્રવિડા નાગાઃ કામ્બોજાઃ સ્ત્રીમુખાઃ શકાઃ ॥
આનન્તવાસિનશ્ચૈવ જ્ઞેયા દક્ષિણપશ્ચિમે

સ્ત્રીરાજ્યં સૈન્ધવા મ્લેચ્છા નાસ્તિક્યા યવનાસ્તથા ॥
પશ્ચિમેન ચ વિજ્ઞેયાઃ પટુમાનૌષધૈઃ સહ

માણ્ડવ્યાશ્ચ તુષારાશ્ચ મૂલિકાશ્ચ મુખાઃ ખશાઃ ॥
મહાકેશા મહાનાસા દેશાસ્તૂરત્તરપશ્ચિમે

લમ્પગાસ્તાલનાગાશ્ચ મરુગાન્ધારજાહુતાઃ ॥
હિમવન્નિલયા મ્લેચ્છા હ્યુદીચીં દિશમાશ્રિતાઃ

ત્રિગર્તમીનકૌલૂતા બ્રહ્મપુત્રાસ્સતીગણાઃ ॥
અભિસારાશ્ચ કાશ્મીરાશ્ચોદક્પૂર્વેણ કીર્તિતાઃ

રાજેન્દ્રસાગરદ્વીપા પ્રધાના વસુધાધિપાઃ ॥
ભવતેઽહં પ્રવક્ષ્યામિ દિગ્દેશેન નિબોધ તત્

પઞ્ચાલનાથો મગધાધિપશ્ચ કલિઙ્ગરાડ્ ભોજકટેશ્વરશ્ચ ॥
અનન્તકઃ સૈન્ધવકસ્તુષારો મદ્રેશ્વરશ્ચાથ કુલૂતનાથઃ

ઇતિ શ્રીવિષ્ણુધર્મોત્તરે પ્રથમખણ્ડે માર્કણ્ડેયવજ્રસંવાદે જનપદવર્ણનો નામ નવમોઽધ્યાયઃ