Vishnudharmottara Purana · Chapter 1.88

vajra uvāca //
grahāṇāṃ bhṛguśārdūla nakṣatrāṇāṃ tathaiva ca //
pūjane vidhimācakṣva tatra me saṃśayo mahān

mārkaṇḍeya uvāca //
grahassādhipatiḥ kāryo nityaṃ maṇḍalake budhaiḥ //
nakṣatraścandrasahitastathā sādhipatirnṛpa

saṃkhyātā tārakāstasya yathāvanmanujeśvara //
teṣāṃ tārakasaṃkhyānaṃ nibodha gadato mama

raudraṃ puṣyaṃ tathā tvāṣṭraṃ vāyavyaṃ vāruṇaṃ tathā //
pauṣṇaṃ ca pārthivaśreṣṭha kathitaṃ tvekatārakam

dvitāraṃ phalgunīyugmaṃ tathā bhādrapadādvayam//
ādityaṃ ca tathā mūlaṃ caindrāgnaṃ cāśvinaṃ tathā

tritāraṃ bharaṇī saumyamaindraṃ brāhmaṃ savaiṣṇavam //
catustāramathāṣāḍhe dve maitraṃ yadunandana

pañcatāraḥ smṛto hastaḥ prājāpatyaṃ ca vāsavam //
sārpaṃ pitryamathāgneyaṃ ṣaṭtāraṃ parikīrtitam

ādityamaṇḍalaṃ kāryaṃ padmavarṇaṃ narādhipa //
śvetaṃ candramasaḥ kāryaṃ raktaṃ kāryaṃ kujasya ca

nīlaṃ budhasya karttavyaṃ pītavarṇaṃ bṛhaspateḥ //
śvetaṃ śukrasya karttavyaṃ kṛṣṇaṃ saurasya pārthiva

ākāśavarṇaṃ tamasaḥ ketordhūmaprabhaṃ tathā //
raktavarṇaṃ kṛttikānāṃ phalgunīdvitayasya ca

hastasya ca sapauṣṇasya maitrasya ca narādhipa //
pītaṃ puṣyasya keśasya śākravāḍavayostathā

śvetaṃ saumyasya raudrasya āpyavāruṇayostathā //
ādityasārpapitryāṇāṃ brāhmavāyavyayostathā

proṣṭhapādadvayasyātha śvetamevābhidhīyate //
vicitravarṇaṃ tvāṣṭrasya vaiśvadevasya cāpyatha

āśvinasya tathā kāryaṃ nityameva narādhipa //
kṛṣṇaṃ yāmyasya mūlasya pālāśaṃ śravaṇasya ca

viśākhāyāṃ pītaraktaṃ karttavyaṃ nṛpamaṇḍalam

yathoktavarṇena narendra kṛtvā pūrvaṃ grahasyānagha maṇḍalaṃ svam //
ṛkṣasya vā pūjyatamasya rājanpūjā vidheyā tadanantaraṃ ca

iti śrīviṣṇudharmottare prathamakhaṃḍe mā०sa० graharkṣamaṇḍalanirdeśonāmāṣṭāśītitamo'dhyāyaḥ