વિષ્ણુધર્મોત્તરપુરાણમ્ · અધ્યાય 1.88

વજ્ર ઉવાચ ॥
ગ્રહાણાં ભૃગુશાર્દૂલ નક્ષત્રાણાં તથૈવ ચ ॥
પૂજને વિધિમાચક્ષ્વ તત્ર મે સંશયો મહાન્

માર્કણ્ડેય ઉવાચ ॥
ગ્રહસ્સાધિપતિઃ કાર્યો નિત્યં મણ્ડલકે બુધૈઃ ॥
નક્ષત્રશ્ચન્દ્રસહિતસ્તથા સાધિપતિર્નૃપ

સંખ્યાતા તારકાસ્તસ્ય યથાવન્મનુજેશ્વર ॥
તેષાં તારકસંખ્યાનં નિબોધ ગદતો મમ

રૌદ્રં પુષ્યં તથા ત્વાષ્ટ્રં વાયવ્યં વારુણં તથા ॥
પૌષ્ણં ચ પાર્થિવશ્રેષ્ઠ કથિતં ત્વેકતારકમ્

દ્વિતારં ફલ્ગુનીયુગ્મં તથા ભાદ્રપદાદ્વયમ્॥
આદિત્યં ચ તથા મૂલં ચૈન્દ્રાગ્નં ચાશ્વિનં તથા

ત્રિતારં ભરણી સૌમ્યમૈન્દ્રં બ્રાહ્મં સવૈષ્ણવમ્ ॥
ચતુસ્તારમથાષાઢે દ્વે મૈત્રં યદુનન્દન

પઞ્ચતારઃ સ્મૃતો હસ્તઃ પ્રાજાપત્યં ચ વાસવમ્ ॥
સાર્પં પિત્ર્યમથાગ્નેયં ષટ્તારં પરિકીર્તિતમ્

આદિત્યમણ્ડલં કાર્યં પદ્મવર્ણં નરાધિપ ॥
શ્વેતં ચન્દ્રમસઃ કાર્યં રક્તં કાર્યં કુજસ્ય ચ

નીલં બુધસ્ય કર્ત્તવ્યં પીતવર્ણં બૃહસ્પતેઃ ॥
શ્વેતં શુક્રસ્ય કર્ત્તવ્યં કૃષ્ણં સૌરસ્ય પાર્થિવ

આકાશવર્ણં તમસઃ કેતોર્ધૂમપ્રભં તથા ॥
રક્તવર્ણં કૃત્તિકાનાં ફલ્ગુનીદ્વિતયસ્ય ચ

હસ્તસ્ય ચ સપૌષ્ણસ્ય મૈત્રસ્ય ચ નરાધિપ ॥
પીતં પુષ્યસ્ય કેશસ્ય શાક્રવાડવયોસ્તથા

શ્વેતં સૌમ્યસ્ય રૌદ્રસ્ય આપ્યવારુણયોસ્તથા ॥
આદિત્યસાર્પપિત્ર્યાણાં બ્રાહ્મવાયવ્યયોસ્તથા

પ્રોષ્ઠપાદદ્વયસ્યાથ શ્વેતમેવાભિધીયતે ॥
વિચિત્રવર્ણં ત્વાષ્ટ્રસ્ય વૈશ્વદેવસ્ય ચાપ્યથ

આશ્વિનસ્ય તથા કાર્યં નિત્યમેવ નરાધિપ ॥
કૃષ્ણં યામ્યસ્ય મૂલસ્ય પાલાશં શ્રવણસ્ય ચ

વિશાખાયાં પીતરક્તં કર્ત્તવ્યં નૃપમણ્ડલમ્

યથોક્તવર્ણેન નરેન્દ્ર કૃત્વા પૂર્વં ગ્રહસ્યાનઘ મણ્ડલં સ્વમ્ ॥
ઋક્ષસ્ય વા પૂજ્યતમસ્ય રાજન્પૂજા વિધેયા તદનન્તરં ચ

ઇતિ શ્રીવિષ્ણુધર્મોત્તરે પ્રથમખંડે મા૦સ૦ ગ્રહર્ક્ષમણ્ડલનિર્દેશોનામાષ્ટાશીતિતમોઽધ્યાયઃ