Vishnudharmottara Purana · Chapter 1.87

// vajra uvāca //
śubhāśubhaparijñānaṃ bhagavanpuruṣaṃ prati //
tvattohaṃ śrotumicchāmi tanmamācakṣva pṛcchataḥ

mārkaṇḍeya uvāca//
janmāśritastriṣaṣṭhaśca saptamo daśamastathā //
ekādaśaḥ śaśī yeṣāṃ tadā teṣāṃ śubhaṃ bhavet

janmanyatha caturthe ca sāṣṭame daśame tathā //
ekādeśe budho yeṣāṃ teṣāmapi śubhaṃ vadet

dvipañcamagato jīvassaptamo navamastathā //
ekādaśastathā hyeṣāṃ teṣāmapi śubhaṃ vadet//

ṣaṣṭhasaptamagaḥ śukro daśame na ca śobhanaḥ //
dvādaśaśca tathā hyeṣāṃ teṣāṃ pīḍāṃ vinirdiśet

tṛtīye daśame ṣaṣṭhe tathā caikādaśe śubhā //
saurāratīkṣṇakiraṇā yeṣāṃ teṣāṃ śubhaṃ vadet

yasminhi jananaṃ yasya janmarkṣaṃ tasya tatsmṛtam //
caturthaṃ mānasaṃ tasmāddaśamaṃ karmasaṃjñitam

saṃgātakaṃ ṣoḍaśaṃ syādviṃśaṃ syātsāmudāyikam //
vaināśakaṃ tu nakṣatraṃ karmarkṣaṃ yattrayodaśam

/
ṣaṇṇakṣatrastu puruṣassarvaḥ prokto mahīpate //
rājā ca navanakṣatro nakṣatratritayaṃ śṛṇu

nityamabhyadhikaṃ ṣaḍbhyaḥ pārthivasya nṛpottama ///
deśābhiṣekanakṣatrau jātinakṣatrameva ca

jātyāśritāni vakṣyāmi nakṣatrāṇi tavānagha //
pūrvātrayamathāgneyaṃ brāhmaṇānāṃ prakīrtitam

/
uttarātritayaṃ puṣyaṃ kṣattriyāṇāṃ prakīrttitam //
pauṣṇaṃ maitraṃ tathā pitryaṃ prājāpatyaṃ viśāṃ smṛtam

ādityamāśvinaṃ hastaḥ śūdrāṇāmabhijittathā //
sārpaṃ viśākhā yāmyaṃ ca vaiṣṇavaṃ ca narādhipa

pratilomabhavānāṃ ca sarveṣāṃ parikīrtitam //
īhāde hyarthahānissyājjanmarkṣe copatāpite

karmarkṣe karmaṇāṃ hāniḥ pīḍā manasi mānase //
mūrttidraviṇabandhūnāṃ hānissaṃghātike hate

saṃtapte sāmudāyarkṣe mitrabhṛtyārthasaṃkṣayaḥ //
vaināśike vināśassyāddehadraviṇasaṃpadām

pīḍite cābhiṣekarkṣe rājyabhraṃśaṃ vinirdiśet //
deśarkṣe pīḍite pīḍāṃ deśasya ca purasya ca

pīḍite jātinakṣatre rājño vyādhiṃ vinirdiśet

graharkṣajātā samavāpya pīḍāṃ pūjā tu kāryā vidhinā svakena //
tataśśubhaṃ vindati rājasiṃha vidhūtapāpaḥ puruṣassadaiva //१५
iti śrīviṣṇudharmottare prathamakhaṇḍe mā०saṃ०pratipuruṣaśubhāśubhanirdeśonāma saptāśītitamo'dhyāyaḥ