વિષ્ણુધર્મોત્તરપુરાણમ્ · અધ્યાય 1.87

॥ વજ્ર ઉવાચ ॥
શુભાશુભપરિજ્ઞાનં ભગવન્પુરુષં પ્રતિ ॥
ત્વત્તોહં શ્રોતુમિચ્છામિ તન્મમાચક્ષ્વ પૃચ્છતઃ

માર્કણ્ડેય ઉવાચ॥
જન્માશ્રિતસ્ત્રિષષ્ઠશ્ચ સપ્તમો દશમસ્તથા ॥
એકાદશઃ શશી યેષાં તદા તેષાં શુભં ભવેત્

જન્મન્યથ ચતુર્થે ચ સાષ્ટમે દશમે તથા ॥
એકાદેશે બુધો યેષાં તેષામપિ શુભં વદેત્

દ્વિપઞ્ચમગતો જીવસ્સપ્તમો નવમસ્તથા ॥
એકાદશસ્તથા હ્યેષાં તેષામપિ શુભં વદેત્॥

ષષ્ઠસપ્તમગઃ શુક્રો દશમે ન ચ શોભનઃ ॥
દ્વાદશશ્ચ તથા હ્યેષાં તેષાં પીડાં વિનિર્દિશેત્

તૃતીયે દશમે ષષ્ઠે તથા ચૈકાદશે શુભા ॥
સૌરારતીક્ષ્ણકિરણા યેષાં તેષાં શુભં વદેત્

યસ્મિન્હિ જનનં યસ્ય જન્મર્ક્ષં તસ્ય તત્સ્મૃતમ્ ॥
ચતુર્થં માનસં તસ્માદ્દશમં કર્મસંજ્ઞિતમ્

સંગાતકં ષોડશં સ્યાદ્વિંશં સ્યાત્સામુદાયિકમ્ ॥
વૈનાશકં તુ નક્ષત્રં કર્મર્ક્ષં યત્ત્રયોદશમ્

।
ષણ્ણક્ષત્રસ્તુ પુરુષસ્સર્વઃ પ્રોક્તો મહીપતે ॥
રાજા ચ નવનક્ષત્રો નક્ષત્રત્રિતયં શૃણુ

નિત્યમભ્યધિકં ષડ્ભ્યઃ પાર્થિવસ્ય નૃપોત્તમ ॥।
દેશાભિષેકનક્ષત્રૌ જાતિનક્ષત્રમેવ ચ

જાત્યાશ્રિતાનિ વક્ષ્યામિ નક્ષત્રાણિ તવાનઘ ॥
પૂર્વાત્રયમથાગ્નેયં બ્રાહ્મણાનાં પ્રકીર્તિતમ્

।
ઉત્તરાત્રિતયં પુષ્યં ક્ષત્ત્રિયાણાં પ્રકીર્ત્તિતમ્ ॥
પૌષ્ણં મૈત્રં તથા પિત્ર્યં પ્રાજાપત્યં વિશાં સ્મૃતમ્

આદિત્યમાશ્વિનં હસ્તઃ શૂદ્રાણામભિજિત્તથા ॥
સાર્પં વિશાખા યામ્યં ચ વૈષ્ણવં ચ નરાધિપ

પ્રતિલોમભવાનાં ચ સર્વેષાં પરિકીર્તિતમ્ ॥
ઈહાદે હ્યર્થહાનિસ્સ્યાજ્જન્મર્ક્ષે ચોપતાપિતે

કર્મર્ક્ષે કર્મણાં હાનિઃ પીડા મનસિ માનસે ॥
મૂર્ત્તિદ્રવિણબન્ધૂનાં હાનિસ્સંઘાતિકે હતે

સંતપ્તે સામુદાયર્ક્ષે મિત્રભૃત્યાર્થસંક્ષયઃ ॥
વૈનાશિકે વિનાશસ્સ્યાદ્દેહદ્રવિણસંપદામ્

પીડિતે ચાભિષેકર્ક્ષે રાજ્યભ્રંશં વિનિર્દિશેત્ ॥
દેશર્ક્ષે પીડિતે પીડાં દેશસ્ય ચ પુરસ્ય ચ

પીડિતે જાતિનક્ષત્રે રાજ્ઞો વ્યાધિં વિનિર્દિશેત્

ગ્રહર્ક્ષજાતા સમવાપ્ય પીડાં પૂજા તુ કાર્યા વિધિના સ્વકેન ॥
તતશ્શુભં વિન્દતિ રાજસિંહ વિધૂતપાપઃ પુરુષસ્સદૈવ ॥૧૫
ઇતિ શ્રીવિષ્ણુધર્મોત્તરે પ્રથમખણ્ડે મા૦સં૦પ્રતિપુરુષશુભાશુભનિર્દેશોનામ સપ્તાશીતિતમોઽધ્યાયઃ