Vishnudharmottara Purana · Chapter 1.86

vajra uvāca //
pratideśaṃ mahābhāga kathaṃ prāptamupadravam //
vijñāyate dvijaśreṣṭha tanmamācakṣva pṛcchataḥ

mārkaṇḍeya uvāca //
kṛttikāṃ rohiṇīṃ saumyaṃ madhyadeśasya nirdiśet //
pīḍite tritaye'tasminmadhyadeśaḥ prapīḍyate

ārdrāṃ punarvasuṃ puṣyaṃ pūrvadeśasya nirdiśet //
pīḍite tritaye tasminpūrvadeśaḥ prapīḍyate

āśleṣāṃ tu maghāṃ pūrvāṃ cāgneyyāṃ diśi nirdiśet //
pīḍite tritaye tasminnāgneyī pīḍyate'tha dik

āryamṇamatha hastaṃ ca tvāṣṭraṃ syāddiśi dakṣiṇe //
pīḍite tritaye tasminpīḍyate dakṣiṇā ca dik

svātiṃ viśākhāṃ maitraṃ ca nairṛtyāṃ diśi nirdiśet /
pīḍite tritaye tasminpīḍyate nairṛtī ca dik

vāyavyāṃ diśi nirdiṣṭā vaiśvavaiṣṇavavāsavāḥ /
pīḍite tritaye tasminvāyavī pīḍyate ca dik

vāruṇaṃ cājadaivatyaṃ cāhirbudhnyaṃ tathottare //
pīḍite tritaye tasminnuttarā dikprapīḍyate

revatī cāśvinī yāmyamaiśānī dik prapīḍitā //
pīḍite tritaye tasminnīśānī dik prapīḍyate

ādityo bhṛgujo bhaumo rāhussauro niśākaraḥ //
budho bṛhaspatiścaiva prācyādīśāḥ prakīrtitāḥ //

vidhvastavapuṣaste ca grahayuddhe parājitāḥ //
nīcāḥ pitṛgṛhasthāśca svāṃ diśaṃ pīḍayanti te

vajra uvāca //
svadeśapīḍanaṃ kuryānnakṣatraḥ pīḍitaḥ katham //
sarvametanmamācakṣva sarvadharmabhṛtāṃ vara

mārkaṇḍeya uvāca //
śanaiścarārkau cāreṇa vakreṇāṅgārako grahaḥ //
uparāgeṇa rāhuśca ketuścādhūmanodayaiḥ

udayāstamayābhyāṃ ca jīvaśukraśaśāṅkajāḥ //
saṃcchādanena ca śaśī hyagastyaścaiva yogataḥ

/
tathā yasmim̐śca nakṣatre divyapārthivanābhasāḥ //
dṛśyante tu mahotpātāḥ svāṃ diśaṃ saṃprapīḍayet

deśeṣu sarveṣu mayeritaṃ te śubhāśubhaṃ yādava mukhyanātha //
ataḥ paraṃ dharmabhṛtāṃ variṣṭha vadasva kiṃ te kathayāmi rājan

iti śrīviṣṇudharmottare prathamakhaṇḍe mā० saṃ० pratideśapīḍāvarṇanaṃ nāma ṣaḍaśītamo'dhyāyaḥ