વિષ્ણુધર્મોત્તરપુરાણમ્ · અધ્યાય 1.86

વજ્ર ઉવાચ ॥
પ્રતિદેશં મહાભાગ કથં પ્રાપ્તમુપદ્રવમ્ ॥
વિજ્ઞાયતે દ્વિજશ્રેષ્ઠ તન્મમાચક્ષ્વ પૃચ્છતઃ

માર્કણ્ડેય ઉવાચ ॥
કૃત્તિકાં રોહિણીં સૌમ્યં મધ્યદેશસ્ય નિર્દિશેત્ ॥
પીડિતે ત્રિતયેઽતસ્મિન્મધ્યદેશઃ પ્રપીડ્યતે

આર્દ્રાં પુનર્વસું પુષ્યં પૂર્વદેશસ્ય નિર્દિશેત્ ॥
પીડિતે ત્રિતયે તસ્મિન્પૂર્વદેશઃ પ્રપીડ્યતે

આશ્લેષાં તુ મઘાં પૂર્વાં ચાગ્નેય્યાં દિશિ નિર્દિશેત્ ॥
પીડિતે ત્રિતયે તસ્મિન્નાગ્નેયી પીડ્યતેઽથ દિક્

આર્યમ્ણમથ હસ્તં ચ ત્વાષ્ટ્રં સ્યાદ્દિશિ દક્ષિણે ॥
પીડિતે ત્રિતયે તસ્મિન્પીડ્યતે દક્ષિણા ચ દિક્

સ્વાતિં વિશાખાં મૈત્રં ચ નૈરૃત્યાં દિશિ નિર્દિશેત્ ।
પીડિતે ત્રિતયે તસ્મિન્પીડ્યતે નૈરૃતી ચ દિક્

વાયવ્યાં દિશિ નિર્દિષ્ટા વૈશ્વવૈષ્ણવવાસવાઃ ।
પીડિતે ત્રિતયે તસ્મિન્વાયવી પીડ્યતે ચ દિક્

વારુણં ચાજદૈવત્યં ચાહિર્બુધ્ન્યં તથોત્તરે ॥
પીડિતે ત્રિતયે તસ્મિન્નુત્તરા દિક્પ્રપીડ્યતે

રેવતી ચાશ્વિની યામ્યમૈશાની દિક્ પ્રપીડિતા ॥
પીડિતે ત્રિતયે તસ્મિન્નીશાની દિક્ પ્રપીડ્યતે

આદિત્યો ભૃગુજો ભૌમો રાહુસ્સૌરો નિશાકરઃ ॥
બુધો બૃહસ્પતિશ્ચૈવ પ્રાચ્યાદીશાઃ પ્રકીર્તિતાઃ ॥

વિધ્વસ્તવપુષસ્તે ચ ગ્રહયુદ્ધે પરાજિતાઃ ॥
નીચાઃ પિતૃગૃહસ્થાશ્ચ સ્વાં દિશં પીડયન્તિ તે

વજ્ર ઉવાચ ॥
સ્વદેશપીડનં કુર્યાન્નક્ષત્રઃ પીડિતઃ કથમ્ ॥
સર્વમેતન્મમાચક્ષ્વ સર્વધર્મભૃતાં વર

માર્કણ્ડેય ઉવાચ ॥
શનૈશ્ચરાર્કૌ ચારેણ વક્રેણાઙ્ગારકો ગ્રહઃ ॥
ઉપરાગેણ રાહુશ્ચ કેતુશ્ચાધૂમનોદયૈઃ

ઉદયાસ્તમયાભ્યાં ચ જીવશુક્રશશાઙ્કજાઃ ॥
સંચ્છાદનેન ચ શશી હ્યગસ્ત્યશ્ચૈવ યોગતઃ

।
તથા યસ્મિઁશ્ચ નક્ષત્રે દિવ્યપાર્થિવનાભસાઃ ॥
દૃશ્યન્તે તુ મહોત્પાતાઃ સ્વાં દિશં સંપ્રપીડયેત્

દેશેષુ સર્વેષુ મયેરિતં તે શુભાશુભં યાદવ મુખ્યનાથ ॥
અતઃ પરં ધર્મભૃતાં વરિષ્ઠ વદસ્વ કિં તે કથયામિ રાજન્

ઇતિ શ્રીવિષ્ણુધર્મોત્તરે પ્રથમખણ્ડે મા૦ સં૦ પ્રતિદેશપીડાવર્ણનં નામ ષડશીતમોઽધ્યાયઃ