Vishnudharmottara Purana · Chapter 1.85

vajra uvāca //
śubho vāpyaśubho vāpi kathaṃ kālo mahītale //
jñāyate bhārgavaśreṣṭha tanmamācakṣva pṛcchataḥ

mārkaṇḍeya uvāca //
kṛttikā yāmyavāyavye nāgavīthyuttarottare //
gajavīthīhyudaṅmadhye prājāpatyādayastrayaḥ

airāvaṇe hyudagbhāge ahorātracatuṣṭayam//
madhye vare tathā vīthī phalgunī ṛkṣayordvayoḥ

madhyemadhye tu govīthī ajādyaṃ bhacatuṣṭayam //
madhyayāme jaradgaḥ syāttritayaṃ śravaṇādikam

yāmyottareṇa tu mṛgā hastacitre prakīrtite //
ajādakṣiṇamadhye tu viśākhā maitrayossmṛtāḥ

āvikāyāmyayāmye tu śakrādyaṃ bhacatuṣṭayam //
vaiśvānarapathaṃ prāhustamevātyantadāruṇam

udayāstamayābhyāṃ ca cāreṇa ca tathā grahāḥ //
uttarāsu śubhāḥ proktā dakṣiṇāstvaśubhāvahāḥ

suprabhāraśmimantaśca nāgavīthyāṃ yadā grahāḥ //
na tadasti śubhaṃ loke yatra paśyanti mānavāḥ

viraśmayo vivarṇāśca vaiśvānarapathāśritāḥ //
na tadasti śubhaṃ rāma yanna kuryurjagattraye

rohiṇīśakaṭaṃ bhindyurgrahā yadi bhavettadā //
nāśaḥ prajānāṃ kūraśca viśeṣeṇātra lakṣyate

saurārasūryāḥ krūrāstu tathā kṣīṇaśca candramāḥ//
kūrairyukto budhaścaiva rāhuḥ ketustathaiva ca

śeṣāssaumyagrahāḥ proktā munibhistattvadarśibhiḥ //
rohiṇī kṛttikā pitryaṃ vaiṣṇavaṃ maitrameva ca

pīḍayanto grahā hanyurdiśaṃ varuṇapālitām//
pūrvasyāṃ diśi dṛśyante sarvatārāgrahā yadi

prācyānāṃ tu tadā rājñāṃ bhavetpīḍā sudāruṇā //
madhye ca yadi dṛśyante madhyadeśanivāsi nām

vāruṇyāṃ yadi dṛśyaṃte tāṃ diśaṃ pīḍayanti ca //
hīnādhikaṃ carantaśca vyabhre vā'darśanaṃ gatāḥ

dhūmāyanto jvalanto vā vedayanti mahadbhayam //
ekāntaritanakṣatragatāḥ syuścedgrahā divi

mālānāma bhavedyogo madhyadeśakṣitīśahā //
prāsaścakraṃ dhanurvajraṃ sasyānāṃ kṣudravṛṣṭidāḥ //

grahā bhayāvahā nityaṃ śṛṅgāṭakapurogamāḥ //
bhaveyurekarkṣagatāstribhirūrddhvaṃ yadā grahāḥ

vināśāyaiva lokānāṃ vijñeyāssumahīkṣitām //
ekena yadi vā dvābhyāṃ grahābhyāṃ sahito guruḥ

śanaiścaro vā dṛśyeta tadā durbhikṣamādiśet //
citrāyāṃ lohito yatra mūle devagurustathā //

bhārgavaśca śraviṣṭhāsu tadā ghoraṃ bhayaṃ bhavet //
kṛttikāsu śanaiścārī viśākhāsu bṛhaspatiḥ

sthitau prajānāṃ pīḍāyai vṛṣṭimantardivaṃ bhavet //
prāgdvāreṣu caranbheṣu sauro vakrabhiyādyadi

pṛthivīṃ pīḍayetsarvāṃ pūrvadeśaṃ viśeṣata //
raudre haste tathaivāpye āhirbudhnye śanaiścaraḥ

yadodayaṃ prapadyeta tadā naśyanti pārthivāḥ //
saumye tvāṣṭre śraviṣṭhāsu sthite saurai mahīkṣitaḥ

sarvapīḍāṃ samarhanti yayā yānti yamāntikam //
pūrvāṃ parāśāṃ saṃprāpto bhṛgujīvau parasparam

saptamarkṣagatau syātāṃ tadatra devo na varṣati //
aparvaṇi śaśāṅkārkau tvaṣṭānāma mahāgrahaḥ

āvṛṇoti tamaḥ śyāmaḥ sarvalokavipattaye //
udayāstamaye bhānoścandrasya ca yadā bhavet

pariveṣastadā rājā kṣipraṃ vadhamavāpnuyāt //
sakalaṃ cedahassūyo rātriṃ cetsakalāṃ śaśī

pariveṣī bhavedrājā tatrāpi vadhamarhati //
dvisūrye gagane vṛddhiṃ kṣattriyāṇāṃ vinirdiśet

dvicandre brāhmaṇānāṃ tu cādhikyaṃ pralayāya tu //
udayāstamayau yatra somārkau raktamaṇḍalau

na cātrābhrāṇi dṛśyante tanmahābhayalakṣaṇam //
candramā janmanakṣatraṃ parityajati yasya tu

śyāvo rūkṣopasavyaṃ tu tasya vidyādupadravam //
atyantā darśane rāhostathā cātyantadarśane

prajāpīḍā vinirdeśyā vyādhidurbhikṣataskaraiḥ //
yannakṣatragato rāhurgrasate candrabhāskarau

tajjātānāṃ bhavetpīḍā ye narāśśāntivarjitāḥ //
grahopasṛṣṭe nakṣatre grahaṇaṃ tu yadā bhavet

tadā pīḍā vinirdeśyā sainikānāṃ nṛpaissaha //
gṛhīto rāhuṇā candraḥ sūryo vā gaganāccyutaḥ

ulkāni hanyāttatrānyo rājā rājyaṃ kariṣyati //
gṛhītau pariveṣe tau yadā candradivākarau

samantātpīḍyate deśaḥ śastrakopaśca jāyate //
meghaissaṃchādyate rāhustvativarṣati vā yadā

akālajaistadā rājño bhayaṃ vidyādupasthitam //
yanna kṣatrāgate sūrye chidraṃ vai saṃprapadyate

tajjātaḥ pārthivaḥ kṣipraṃ yamalokaṃ gamiṣyati //
tāmrakuṅkumarūkṣābho ghṛtahāridrasannibhaḥ

bandhujīvanibho bhānuḥ śiśirādyeṣu śasyate //
asvacchavarṇaḥ paruṣo vepanaḥ khaṇḍamaṇḍalaḥ

sacchidre rajasā dhvasta ulkādyupahatopi vā //
maṇḍalādanyasaṃsthānaṃ meghaiścāyudhasannibhaiḥ

udayāstamaye cchannaḥ pārthivānāṃ na śasyate//
pakṣādau cāpasaṃsthāne yuddhaṃ śaśini nirdiśet

lābhasteṣāṃ jayasteṣāṃ yatra dṛṣṭaṃ bhayaṃ tataḥ //
samakoṭiviśālaśca kiṃcidvāpyuttaronnataḥ

māsādau candramāḥ śasto vāma eva viparyayaḥ //
maṇḍalenāntarīkurvañśṛṅge sā yadi vā spṛśet

tārāgrahaṃ tadā kuryādbhayaṃ janapade śaśī //
śuklapakṣasya yā vṛddhirloke kṣemasubhikṣadā

sā sitetarapakṣasya pṛthivyāṃ naiva gamyate //
śravaṇebhyudito bhaumaḥ puṣye vakramiyādyadi

prājāpatyuditaścandro nāśāya syānmahīkṣitāma //
gatāgataṃ yadā kuryānmaghāmadhyena lohitaḥ

tadā bhavatyanāvṛṣṭiḥ pāṇḍyo rājā vinaśyati //
phalgunyorudayaṃ kṛtvā vakraḥ syādvaiśvadaivake

prajāpatye pravāsaśca trailokyaṃ tatra pīḍyate //
dhruveṣu vaiṣṇave mūle śākre ca vicarankujaḥ

ghorāṃ karotyanāvṛṣṭiṃ kṛttikāsu maghāsu ca //
kārttike'śvayuje pauṣe cāṣāḍhe śrāvaṇe budhaḥ

dṛṣṭo loke bhayāya syānmāghavaiśākhayostathā //
akasmādyatra dṛśyeta divā devapurohitaḥ

rājā vā mriyate tatra sa vā deśo vinaśyati //
ahassarvaṃ yadā śukro dṛśyate'tha mahāgrahaḥ

tadā tvagnyādibhirgrāmānbādhate nagarāṇi ca //
kārttike tu yadā māsi kurvāte'stamayādayau

tadahnāṃ navati pūrṇaṃ bhuvi devo na varṣati //
śanaiścaro deśapīḍāṃ deśanakṣatrapīḍane

dhruvaṃ karoti rājendra nityaṃ cāravaśena tu //
saptāhāntargatā ye vai divyapārthivanābhasāḥ //
grahoparāge tīvrāssyurutpātāḥ svaphaleṣu te

ekasminyadi māse syādgrahaṇaṃ candrasūryayoḥ //
brahmakṣatravirodhāya viparītavivṛddhaye

yasmindṛśyeta nakṣatre viśākhāyāṃ pradhūpavat //
taddeśajātā pīḍā syādbudhaketumahāgrahāḥ

ulkādyabhihate sūrye ketubhirvā vidhūmite //
agastye vā dhruve vāpi prajāpīḍāṃ vinirdiśeta

ulkayābhihatā rūkṣā sphuraṇā rajasā yutāḥ //
ṛṣayassapta lokānāṃ vināśāya ca bhūbhṛtām

kṛttikābhissahodeti śāṃkarī diśamāśritaḥ //
kumārīprītito hanyālloke nṛpakumārakān

samāgame grahāṇāṃ tu candramāḥ śasyate hyudak //
nakṣatrāṇāṃ ca rājendra dakṣiṇena na śasyate

rāhuḥ ketuḥ kujaḥ śakraścandreṇa sahayāyinaḥ //
budho jīvaśca sauraśca nāgarā raviṇā saha

yāyinā vijite paure rājñāṃ syādyāyināṃ jayaḥ //
yāyigrahe paurajite purā rājñāṃ jayo mṛdhe

paureṇa vijite paure pauraiḥ paurakṣayaṃ vadet //
yāyinā yāyini hate yāyibhyo yāyināṃ kṣayaḥ

grahāṇāṃ cedbhavetsāmyaṃ sāmyaṃ rājñāṃ vinirdiśet //
jayājayau narendrāṇāṃ nirdeśyo grahavadbudhaiḥ

grahārūḍhaścyutassthānātsphureṇa vijito grahaḥ //
vijito jayaliṅgaiśca kṛṣṇaḥ śyāmadyutistathā

udaṅmārgagatiḥ snigdho vimalo vimalaprabhaḥ //
bṛhadrūpotiśukraśca vijayī kathito grahaḥ

na deyametaccapalasya loke na nāstikasyādhamapūruṣasya //
guhyaṃ munīnāmapi pārthivendra mayeritaṃ kālaviniścayaṃ te

iti śrīviṣṇudharmottare prathamakhaṇḍe mā०saṃ० grahaśubhāśubhaparijñānavarṇanaṃ nāma pañcāśītitamoyāyaḥ