Vishnudharmottara Purana · Chapter 1.81

vajra uvāca //
tvayoditānāṃ dharmajña samāsena pṛthakpṛthak //
kālasyāvayavānāṃ ca śrotumicchāmi devatāḥ

mārkaṇḍeya uvāca //
pauruṣaṃ yadahorātraṃ śrutavānasi yādava //
kālātmā puruṣastasya sarvabhūtapatiḥ prabhuḥ

kalpasya daivataṃ brahmā yasyedaṃ sakalaṃ jagat //
kramānmanvantarāṇāṃ tu manavastu caturdaśa

svāyambhuvastu prathamo manuḥ svārociṣastathā //
vaivasvato'tha sāvarṇirbrahmaputrastathaiva ca

dharmaputro rudraputro dakṣaputraśca yādava //
raucyo bhautyaśca viśvātmā manavastu caturdaśa

vajra uvāca//
ya ete bhavatā proktā manavaśca caturdaśa //
nityaṃ brāhme dine prāpte eta eva kramāddvija

bhavantyutānye dharmajña etanme cchindhi saṃśayam //
athavā varttamāne'sminbhavatā mama kīrtitāḥ

mārkaṇḍeya uvāca //
eta eva mahārāja manavastu caturdaśa //
kalpekalpe tvayā jñeyā nātra kāryā vicāraṇā

ekarūpāstrayaḥ kalpā jñātavyāssarva eva hi //
kvacitkiṃcidvibhinnāśca māyayā parameṣṭhinaḥ

jñātavyamekarūpatvamabdānāṃ ca tathā tvayā //
kalpekalpe mahārāja manūnāṃ ca viśeṣataḥ

vajra uvāca //
kalpānāṃ janasādṛśye yuktinaivopapadyate //
kadācidapi dharmaja tatra paśyāmi kāraṇam

ekasminnantare muktiṃ kalpekalpe gate dvija //
prabhaviṣyajjagacchūnyaṃ kālasyāderabhāvataḥ

mārkaṇḍeya uvāca //
jīvasyānyasya sargeṇa nare muktimupāgate //
acintyaśaktirbhagavāñjaganpūrayate sadā

brahmaṇā saha mucyante brahmalokamupāgatāḥ //
sṛjyante ca mahākalpe tadvidhāścāpare janāḥ

te prāptāḥ paramaṃ sthānaṃ yeṣāṃ janma na vidyate //
samajīvapramāṇāśca sarve kalpāstathā nṛpa //
brahmaloke viṣṇuloke rudraloke ca ye gatāḥ

viṣṇulokāssubahavo rudralokāstathaiva ca //
śvetadvīpagatā ye ca teṣāṃ janma na vidyate

na tu sarveṣu rājendra teṣu muktiḥ prakīrtitā //
brahmalokopariṣṭācca ye lokā raudravaiṣṇavāḥ

mayoditāstayorgatvā punarjanma na vidyate //
mahākalpakṣaye jīvāḥ sarve taṃ parameśvaram

prāpyāpi vinivartante vinā jñānena yādava //
bhūya eva tadā lokānsarge sṛjati tānprabhuḥ

kalpamadhyre tu kalpānte jñānojjhitakalevarāḥ //
prāpnuvanti paraṃ paraṃ sthānaṃ tadviṣṇoḥ paramaṃ padam

jīvabījānyasargeṇa tatsthānaṃ parameśvaraḥ //
prapūrayati dharmajña rājankenāpi hetunā

vajra uvāca //
kalpānāṃ sati sādṛśye yo bhedo bhṛgunandana //
tamahaṃ śrotumicchāmi tatra me kautukaṃ mahat

mārkaṇḍeya uvāca //
kalpānāṃ sati sādṛśye śṛṇu bhedaṃ narādhipa//
samatīte yathā kalpe ṣaṣṭhe manvantare gate

saptamasya caturviṃśe rājaṃstretāyuge tadā //
yadā rāmeṇa samare sagaṇo rāvaṇo hataḥ

rāmeṇaiva tadā rājankumbhakarṇo nipātitaḥ //
vartamāne tu yadvṛttaṃ kalpe yadukulodvaha

rāmasya caritaṃ baddhaṃ tadā vālmīkinā śubham //
atītakalpe yadvṛttaṃ mayā tatkāmyake vane

yudhiṣṭhirāya kathitaṃ dharmaputrāya pārthiva //
kalpānāṃ sati sādṛśye bheda eṣa taveritaḥ

teṣāṃ svarūpaṃ ca tathā tathā rājannanukramam //
brahmajanmanisargāśca tathā tasya pṛthagvidhāḥ

kārtikeyasya lakṣmyāśca tathā devasya śūlinaḥ //
evamādyāḥ prabhedāstu tvayā jñeyā nu pārthiva //
kalpādīnāṃ mahārāja cānyatrāpi yadūdvaha

sādṛśyabhedāviha bhūmipāla kalpasyakalpasya mayoditau te //
yugādibhinnasya ca daivatāni vakṣyāmyatastāni nibodha rājan

iti śrīviṣṇudharmottare prathamakhaṇḍe mā० saṃ० kalpasādṛśyo nāmaikāśītitamo'dhyāyaḥ