Vishnudharmottara Purana · Chapter 1.80

vajra uvāca //
brahmaṇo'sya samutpattimārabhya sumahādyute //
kālasya gatimicchāmi śrotuṃ bhṛgukulodvaha

mārkaṇḍeya uvāca//
svenāhorātramānena brahmaṇo'sya jagatpateḥ//
samāṣṭakaṃ gataṃ rājanpañcamāsāstathaiva ca//

ahorātracatuṣkaṃ ca vartamānadinādgatam //
ataḥ paraṃ pravakṣyāmi tanme nigadataḥ śṛṇu

manavaḥ ṣaḍ gatāssapta sandhayaśca tathā gatāḥ //
saptaviṃśadvyatītāśca tathaiva ca caturyugāḥ

yugatrayaṃ tathātītaṃ vartamānacaturyugāt //
saṃvatsarāṇāṃ daśakaṃ tathā kaliyugādgatam

vātāśvameghakāle'sminsaha yakṣeṇa yādava //
bhaviṣyāṇāmatītānāṃ brahmaṇāṃ bhūridakṣiṇa

anādimattvātkālasya saṃkhyāṃ vaktuṃ na śakyate //
gaṅgāyāḥ sikatā dhārā yathā varṣati vāsavaḥ

śakyā gaṇayituṃ rājanna vyatītā pitāmahāḥ
antavattāṃ budho buddhvā sarvasya jagatīpate

tanmārgaṃ parimārgante yadviṣṇoḥ paramaṃ padam //
vajra uvāca // kiyatkālaparīmāṇaṃ mayā śāsyā vasundharā

parikṣitā ca dharmajña tanme brūhi bhṛgūttama//
mārkaṇḍeya uvāca//
adyaprabhṛti rājendra samā pañcāśakaṃ gate

parīkṣiti mahārāje divaṃ prāpte kurūddhahe //
parīkṣiddhīne lokesminprāṇituṃ tvaṃ tu śakyase

mahāprasthānamāviśya nāgalokaṃ gamiṣyasi //
svargate tvayi rājendra parīkṣiti tathā nṛpe

rājā nāgapure bhāvī pārīkṣijjanamejayaḥ //
mathurāyāṃ tathā bhāvī tava putro'calo nṛpaḥ // १३ ///
nagaraṃ khāṇḍavaprasthaṃ bhayādivinivarjitam //
pālayiṣyati dharmātmā putraste bhīmavikramaḥ

dānavendro mayaḥ pūrvaṃ phālgunena prayāsyatā //
mahāprasthānamityukto rājaṃstvatpriyakāmyayā

yāvadvajro mahīṃ bhuṅkte khāṇḍavaprasthamāśritaḥ //
tāvatsabheyaṃ saṃrakṣyā tvayā maduparodhataḥ

seyaṃ saṃrakṣyate tena pratijñāya dhanañjaye //
tvayi nākamanuprāpte sabheyaṃ mayaśāsanāt

himācalaṃ tu neṣyanti yatra bindusaraṃ saraḥ //
rākṣasāḥ kiṅkarā nāma yattasmānnirmitā purā

uktaṃ hi te kālagataṃ mayaitadāyuḥpramāṇaṃ ca tathā tavoktam //
ataḥ paraṃ dharmabhṛtāṃ variṣṭha vadasva kiṃ te kathayāmi rājan

iti śrīviṣṇudharmottare prathamakhaṇḍe mā० saṃ० yānakālavarṇano nāmāśītitamo'dhyāyaḥ