Vishnudharmottara Purana · Chapter 1.78

// vajra uvāca //
saptamaste mahābhāga jātasya divasastvayam //
vartate brahmaṇo brahmam̐statra manvantarakṣaye

kathaṃ kālastvayā nītaḥ purā kalpakṣaye tadā //
etanme saṃśayaṃ chindhi tvaṃ samaḥ parameṣṭhinaḥ

mārkaṇḍeya uvāca //
naugatena mayā nītaḥ kālo manvantarakṣaye //
bhūyobhūyo mahābhāga devadevaprasādataḥ

kalpakṣayanuprāpya dāhakāla upasthite //
janalokagatenātha kālo nītassa vai mayā

dāhakāle tadā vṛtte pralayāmbhodhisaṃplave //
janalokādahaṃ bhraṣṭaḥ patito dharaṇītale

nūnaṃ tasyaiva devasya sā māyā bhīmavikramā //
ekārṇave bhūmitale patitasyāpi me nṛpa

jīvitaṃ na paribhraṣṭaṃ nūnaṃ tasya prasādataḥ //
tadāhaṃ naṣṭavijñānaḥ patitoṃ'bhasi dāruṇe

ūhyamānombukallolairitaścetaśca yādava //
apaśyamāno jagatīṃ saśailavanakānanām

nirvedaṃ jīvite dīrghe tadā bhūtosmi śatruhan //
so'hamārto'tha nirviṇṇastasmiṃstūdakasaṃplave

paśyāmi jalamadhyasthaṃ vipulaṃ vaṭapādapam //
mahāśākhaṃ ghanacchāyaṃ snigdhapallavaśobhitam // 1.78.१ ० //
tamahaṃ bāhubhirgatvā tasminnyagrodhapādape //
(śākhāsaktaṃ tu paśyāmi savitāraṃ tathojjvalam

divyaṃ paśyāmi paryaṅkaṃ sarvaratnopaśobhitam //)
paryaṅke tatra paśyāmi bālaṃ kamalalocanam

atasīpuṣpasaṃkāśaṃ pītavāsasamacyutam //
padmapatrābhacaraṇaṃ tadākārakaraṃ tathā

alaṅkṛtaṃ cābharaṇaiḥ śikhaṇḍaikavibhūṣitam //
ekaṃ sāhasramadhyasthaṃ bhrājamānamiva śriyā

sa māṃ dṛṣṭvā tadā bālaḥ smitapūrvamuvāca ha //
yadi śrānto'si dharmajña vigrahaṃ vadanena me

praviśya viśramasvādya yāvadvā rucitaṃ tava //
evamuktasya sañjātā vrīḍā yadukulodvaha

tato'hamavaśastasya praviṣṭo nṛpa vigraham //
jagatīṃ tatra paśyāmi saśailavanakānanām

yathāpūrvaṃ mahābhāga nagarākāraśālinīm //
devadaityoragākīrṇāṃ samudravarabhūṣaṇām

nṛparāṣṭrasamākīrṇāṃ vaṇigbhirupaśobhitām //
dvijādhyayanasaṃghuṣṭāṃ varṇāśramasamākulām

saritparvatavṛkṣāḍhyāṃ yajñotsavasamākulām //
tāṃ dṛṣṭvā kautukaṃ jātaṃ tasya bālasya karmaṇā

draṣṭumicchāmi tasyāntaṃ bhramamāṇastatastataḥ //
yadā nāsādayāmyatra tasya bālasya ceṣṭitam

pūrṇe yugasahasre'pi tamevāhaṃ tadā śiśum //
saṃprāptaḥ śaraṇaṃ rājannahaṃ bhāvyarthena coditaḥ

tato'haṃ vadanāttasya nirgataśśaśisannibhāt //
yadā tasyodare'paśyaṃ trailosya sacarācaram

tathā paśyāmi sakalaṃ bahirbhūmipasattama //
tato'haṃ patitastasya pādayossumahātmanaḥ

tatasso'ntarhito bālassaha tenaiva śākhinā//
evaṃ mayā tasya niśā narendra saṃprāpya puṇyaṃ jaṭhare hi nītā/
mahāśarīrasya mahānubhāva mahāprameyasya pitāmahasya

iti śrīviṣṇudharmoṃtare prathamakhaṇḍe mā० saṃ० bālaprabhāvakathano nāmāṣṭasaptatitamo'dhyāyaḥ