Vishnudharmottara Purana · Chapter 1.77

vajra uvāca //
mahākalpakṣaye brahmansamavasthāṃ vadasva me //
bhavāñjñānanidhiḥ sphīto yathā brahmā pitāmahaḥ

mārkaṇḍeya uvāca//
pūrṇe saṃvatsaraśate saṃhṛtya sakalaṃ jagat /
śete brahmā mahārāja prāgvadekārṇave tadā / २ /
saṃnyasya dehaṃ yogena puruṣaṃ pratipadyate //
mokṣasthānamanuprāpte devadeve pitāmahe

ye gatā brahmaṇaḥ sthānaṃ mucyante sarva eva te //
aṇḍasyābhyantaraṃ sarvaṃ tadāmbhobhiḥ prapūryate

|
śarīradhāriṇassarve tadā naśyanti pārthiva //
antargatena toyena bhinnamaṇḍe jagatpate

pūrṇe brahmāyuṣi tadā bāhyasthe'mbhasi līyate //
evaṃ sā jagadādhārā dhārā toye pralīyate

jyotiṣyāpaḥ pralīyante jyotirvāyau pralīyate //
khe vāyuḥ pralayaṃ yāti manasyākāśameva ca

manaḥ pralīyate buddhau buddhiścātmani līyate //
avyakte līyate cātmā avyaktaḥ puruṣe pare

anantāni tathoktāni yānyaṇḍāni mayā purā //
sarvāṇi tāni saṃhṛtya samakālaṃ jagatpatiḥ

prakṛtau tiṣṭhati tadā sā rātristasya kīrtitā //
brāhme samāśate pūrṇe punareva jagatpatiḥ

( sarvaṃ vidhatte dharmajña yathāpūrvamudāhṛtam //
avyaktādikrameṇātha vidhāyāṇḍaṃ maheśvaraḥ

aṇḍe śarīre bhavati svayaṃbhūramṛtadyutiḥ // )
svayaṃ sa eva dharmajña brahmā śubhacaturmukhaḥ

sarveṣvaṇḍeṣu dharmajñassamakālaṃ jagatpatiḥ //
svayaṃ śarīre bhavati prākāmyānmanujeśvara

brahmāyuṣonte jagatāmavasthā mayeritā te yaduvṛndanātha //
ataḥ paraṃ kiṃ kathayāmi tubhyaṃ tanme vadasvāyatalohitākṣa

iti śrīviṣṇudharmottare prathamakhaṇḍe mā० saṃ० mahākalpavarṇano nāma saptasaptatitamo'dhyāyaḥ//