Vishnudharmottara Purana · Chapter 1.76

vajra uvāca //
brāhmasya divasasyānte yādṛśī dvija jāyate //
jagato'sya samāvasthā tādṛśīṃ vaktumarhasi

mārkaṇḍeya uvāca //
vṛtte prakṣālane rājankalpasyānte caturdiśam //
uttiṣṭhaṃti tadā ghorā divi sapta divākarāḥ

te tu pītvā jalaṃ sarvaṃ śoṣayanti jagattrayam //
vināśe sarvabhūtānāmayoguḍasamā tadā

bhūmirbhavati bhūpāla dagdhāssarve ca jantavaḥ //
vinaṣṭakilbiṣāssarve jīvamātrāvaśeṣakāḥ

janalokamathāsādyatatra tiṣṭhanti nirbhayāḥ//
bhūrbhuvassvarmahaścaiva tadā naśyanti pārthiva

janalokādayo lokā na tu naśyanti pārthiva//
tato'rkāste tu naśyanti saṃhitā rudratejasā

uttiṣṭhanti mahāraudrāstato divicarā ghanāḥ //
kecidañjanapuñjābhāḥ kecidgajakulopamāḥ

kecitpuravarākārāḥ keciddhāridrasannibhāḥ//
haritālāñjanaprakhyāstathā hiṅgulakaprabhāḥ

śukapatranibhāḥ kecitkecinnīlotpalaprabhāḥ//
vidyunmālā vinaddhāṅgā garjanto'tha balāhakāḥ

ākramya gaganaṃ rājanpūrayanti mahītalam //
gaṅgāpravāhapratimairdhārāpātaiḥ punaḥpunaḥ

tatassamudrā bhūpāla velodbhedataraṅgiṇaḥ //
chādayanti mahīṃ sarvāṃ dagdhāṃ sūryagabhastibhiḥ

tatassaṃvartako vāyurghanānārujati kṣaṇāt //
tato vāyuṃ samādāya svaśarīre pitāmahaḥ

/
svapityekārṇave loke naṣṭasthāvarajaṅgame //
naṣṭacandrārkapavane grahanakṣatratārake

suptvā yugasahasraṃ tu devadevo jagatpatiḥ //
punarvibuddhaḥ kurute sṛṣṭiṃ prāgvatpitāmahaḥ

sṛṣṭiṃ karoti dharmajña kalpekalpe punaḥpunaḥ //
pitāmahasya rātryante tasmāddhi sṛjati prajāḥ

jantūnāṃ jananādrājañjana ityabhidhīyate

etāvaduktaṃ tava bhūmipāla kalpe gate yadbhavatīha loke //
ataḥ paraṃ sarvayadupradhāna vadasva kiṃ te kathayāmi rājan

iti śrīviṣṇudharmottare prathamakhaṇḍe mā० saṃ० kalpāntavarṇano nāma ṣaṭsaptatitamo'dhyāyaḥ