Vishnudharmottara Purana · Chapter 1.75

vajra uvāca //
manvantare parikṣīṇe yādṛśī dvija
jāyate // samavasthā mahābhāga tādṛśīṃ vaktumarhasi

/
mārkaṇḍeya uvāca //
manvantare parikṣīṇe devā manvantareśvarāḥ //
maharlokamathāsādya tiṣṭhanti gatakalmaṣāḥ

manuśca saha śakreṇa devāśca yadunandana //
brahmalokaṃ prapadyante punarāvṛttidurlabham

ṛṣayaśca tathā sapta tatra tiṣṭhanti te sadā //
adhikāraṃ vinā sarve sadṛśāḥ parameṣṭhinaḥ

bhūtalaṃ sakalaṃ vajra toyarūpī maheśvaraḥ //
ūrmimālī mahāvegaḥ sarvamāvṛtya tiṣṭhati

bhūlokamāśritaṃ sarvaṃ tadā naśyati yādava //
na vinaśyanti rājendra viśrutāḥ kulaparvatāḥ

mahendro malayassahyaḥ śuktimānṛkṣavānapi //
vindhyaśca pāriyātraśca mālyavāngandhamādanaḥ

/
himavānhemakūṭaśca niṣadho nīla eva ca //
śvetaśca śṛṅgavānmerurna vinaśyanti parvatāḥ

śeṣaṃ vinaśyati jagatsthāvaraṃ jaṅgamaṃ ca yat //
naurbhūtvā tu satī devī tadā yadukulodvaha !

dhārayatyatha bījāni sarvāṇyevā viśeṣataḥ //
bhaviṣyaśca manustasyāṃ bhaviṣyā ṛṣayastathā

tiṣṭhanti rājaśārdūla sapta ye prathitā bhuvi //
matsyarūpadharo viṣṇuḥ śṛṅgī bhūtvā jagatpatiḥ

ākarṣati tu tāṃ nāvaṃ sthānātsthānaṃ sa līlayā //
karṣamāṇantu tāṃ nāvaṃ devadevaṃ jagatpatim

stuvanti ṛṣayaḥ sarve divyaiḥ karmabhiracyutam //
ghūrṇamānastadā matsyo jalavegormisaṃkule

ghūrṇamānāṃ tu tāṃ nāvaṃ nayatyamitavikramaḥ //
himādriśikharaṃ nāvaṃ devadevo jagatpatiḥ

matsyastvadṛśyo bhavati te ca tiṣṭhanti tatragāḥ

kṛtatulyaṃ tadā kālaṃ tāvatprakṣālanaṃ smṛtam //
āpassāmyamatho yānti yathāpūrvaṃ narādhipa //
ṛṣayaśca manuścaiva sarvaṃ kurvanti te tadā

manvantarānte jagatāmavasthā mayeritā te yaduvṛndanātha /
ataḥ paraṃ yattava kīrtanīyaṃ samāsatastadvada bhūmipāla

iti śrīviṣṇudharmottare prathamakhaṇḍe mā०saṃ० manvantaravarṇano nāma pañcasaptatitamo'dhyāyaḥ