Vishnudharmottara Purana · Chapter 1.70

mārkaṇḍeya uvāca //
sannaddhaṃ dānavagaṇaṃ patākāśatasaṃkulam //
nānāprakāravāditraṃ siṃhanādabaloddhatam

dṛṣṭvā rāmo mahātejāḥ sajjaṃ cakre mahaddhanuḥ //
śaraissaṃchādayāmāsa daityasainyaṃ mahābalama

abhracchāyeva saṃjajñe rāmamuktaiśśilīmukhaiḥ //
tiryagūrdhvamadhaścaiva śarairvyāptaṃ samantataḥ

cāpamaṇḍalamadhyasthaḥ parivepīva bhāskaraḥ //
dṛṣṭamātreṇa sainyānāṃ cakṣūṃṣyapaharadraṇe

śarāndhakāre magnāste dānavā duṣṭacetasaḥ //
rāmasandarśanādeva dṛṣṭe'rke kauśikā yathā

sa dānavānāṃ vyasṛjanrāmo bhāti śilīmukhān //
sadānavānāṃ madhuvatkusumānāṃ śilīmukhaḥ

śarāndhakāre mahati magno matimatāṃ varaḥ //
māyāṃ kṛtvā tadāgneyīṃ taṃ dadāha śarotkaram

śarāndhakāragahanānniṣkrāntāste diteḥ sutāḥ //
bhārgavaṃ koṣṭakīkṛtya raṇe bibhidurañjasā

pracaṇḍairardhanārācairvatsadantaissacūcukaiḥ //
varāhakarṇairbhallaiśca kṣurapraiścaṭakānanaiḥ

tomarairbhiṇḍipālaiśca pāṣāṇairlaguḍaiśśubhaiḥ //
khaḍgaiḥ prāsaistathā cakrai'rgadāmusala kampanaiḥ

parighairāyasaiśśūlaistriśūlaiśśaktibhistathā //
sa bādhyamāno'pi raṇe daityanāthāyudhotkaraiḥ

na vivyathe mahātejā hutāhutirivānalaḥ //
yadā śastraprahāraistaṃ na śekussamare dvijam

hantuṃ daityavarā yuddhe cakrurastraṃ tadā mahat //
ayaśśaṅkurmahātejā rājā daityagaṇasya yaḥ

sametairdānavaissārdhaṃ rāmaṃ raṇakṛtakṣaṇam //
śaraiḥ saṃchādayāmāsa divyāstrapratimantritaiḥ

astrairastrāṇi saṃvārya dānavendrasya bhārgavaḥ //
ciccheda saśaraṃ cāpaṃ rukmadaṇḍaṃ tathā dhvajam

sāratheśca śiraḥ kāyācchirastrāṇavibhūṣitam //
etatkṛtvā raṇe karma dakṣiṇena sa pāṇinā

jagrāha paraśuṃ tīkṣṇaṃ daityakāyavidāraṇam //
padbhyāmākramya vegena samare rathakūbaram

nirjīvānpādavegena kṛtvā turagasattamān //
gadayā ca rathasthasya dānavendrasya saṃyuge

jahāra saśirastrāṇaṃ śiro jvalitakuṇḍalam //
ayaḥśaṅkau hate daitye bhārgavaṃ samare tadā

sarve daityagaṇāḥ kuddhāśchādayāmāsurañjasā //
astrapuñjaṃ raṇe cchitvā teṣāṃ bhṛgukulodbhavaḥ

raṇe ciccheda gātrāṇi śirāṃsi ca mahātapāḥ //
kṣaṇamātreṇa rāmo'pi daityadehasamākulām

śoṇitaughanadīṃ cakre keśaśaivālaśādvalām //
bāṇamīnāṃ cāpanakrāṃ chatrahaṃsāvalīṃ tathā

pretalokārṇavagamāṃ bhīrukalmaṣavarddhinīm //
hastiśīrṣopalāṃ raudrāṃ cārutatpucchapannagāma

evaṃ vidhe'pi saṃvṛtte raṇe karmaṇi dānavāḥ //
taṃ rāmamakṣataṃ dṛṣṭvā hataśeṣāḥ pradudruvuḥ

mayatāraprabhṛtayaḥ puraṃ ca viviśustadā //
palāyamānānsamare na jaghāna sa bhārgavaḥ

||
kiñciccheṣeṣu daityeṣu vinivṛttastadā raṇāt //
hatadaityāyutagaṇo rāmo'śmanagaraṃ yayau

rāmapraveśe nagaraṃ varuṇasyājñayā tadā //
patākādhvajasaṃbādhaṃ kṛtaṃ devairviśeṣavat

nāgaiśca dānavaiścaiva siktaṃ candanavāriṇā//
dhūpapuñjasamutkṣiptaṃ kusumotkaramaṇḍitam

tataśca sumahātejā varuṇastu vinirgataḥ//
putrapautraiḥ parivṛto rāmapragrahaṇakāraṇāt

saṃpūjyamānaṃ varuṇo rathamāropya ca svakam //
praveśayāmāsa puraṃ bahutūryapuraskṛtam

/
rāmapraveśe ca tadā nṛtyanto'psarasāṃ gaṇāḥ //
gandharvamukhyā gāyanti saṃstuvanti ca bandinaḥ

sa praviśyātha nagaraṃ varuṇasya tathā gṛham //
uvāsa tatra dharmātmā varuṇena supūjitaḥ

dharmāṇāmāgamaṃ kṛtvā varuṇātsasutāttadā // ३३ ///
evaṃ sa rāmaḥ paravīraghātī saṃprāpya yādogaṇanāthaveśma //
uvāsa putrairvaruṇasya sārdhaṃ saṃpūjitastena jaleśvareṇa

iti śrīviṣṇudharmmottare prathamakhaṇḍe ayaśśaṅkuvadho nāma saptatitamo'dhyāyaḥ