Vishnudharmottara Purana · Chapter 1.69

// mārkaṇḍeya uvāca //
tasminpuravare ramye ratnacitrasabhāgatam //
ratnāsanagataṃ vīraṃ cārukuṇḍalalocanam

snigdhavaiḍūryasaṃkāśaṃ śuklāmbaravibhūṣitam //
hārabhārārpitatanuṃ cārukesaradhāriṇam

pravālamaṇimuktāḍhyaṃ gambhīraṃ bhujagāśrayam //
kirīṭottaṃsasaṃchannaṃ yādogaṇasamāśrayam

ādityamudakāvāsamaṃbhasāṃ patimūrjitam //
lokanāthaṃ mahadbhūtaṃ bhaktānāmabhayapradam

viṣṇorbhāgaṃ viśālāṃsaṃ viśālākṣaṃ mahābhujam //
sevyamānaṃ mahābhāgaistridaśairbrāhmaṇaistathā

daiteyaiśca mahābhāgairbhīmairbhīmaparākramaiḥ //
sundopasundaśakrākṣaśambarāmarakaṇṭakaiḥ

hayagrīvamahāgrīvadaśagrīvasurāntakaiḥ //
bhīmabhīmākṣanarakavikaṭotkaṭamāraṇaiḥ

atikāyamahākāyabhīmakāyabaloddhataiḥ //
nāgaiśca sumahākāyairmahābhogairjagaddhitaiḥ

nāgarājñā vāsukinā śaṅkhena kuruṇā tathā //
( mahāpadmena padmena karkoṭakadhanaṃjayaiḥ

airāvatena nāgena takṣakeṇa balena ca //
kaṃbalāśvatarābhyāṃ ca hyāryakeṇa mahātmanā

)
bālavyajanahastāstamupavījanti nimnagāḥ //
gaṅgā ca sarayū rājan vitastā yamunā tathā

irāvatī candrabhāgā narmadā ca mahānadī //
payoṣṇī brāhmaṇī gaurī vipāśā devikā tathā

śatadruḥ kampanā sindhustathā cānyāssahasraśaḥ //
sevyamānastathā kūpaistaḍāgaiśca savigrahaiḥ

sarovaraissāgaraiśca samudraiśca yadūttama //
taṃ dṛṣṭvā varuṇaṃ rājansa vavande bhṛgūttamaḥ

pūjayāmāsa ca tathā varuṇo'pi bhṛgūttamam //
pādyārghyācamanīyādyairāsanenodakena ca

āsīnaśca tadā rāmo daiteyānāṃ vadhe vṛtaḥ //
mahādevavacassarvaṃ varuṇāya nyavedayata

sa ca tenābhyanujñāto yayau daityapuraṃ mahat //
varuṇo'pi mahātejā rāmavākyena yādava

saṃvādayāmāsa tadā rāmaṃ raṇakṛtakṣaṇam //
tadā varuṇadūtebhyo daiteyāḥ śrutavistarāḥ

niṣkramya nagarādrājam̐ścaturaṅgabalānvitāḥ //
susannaddhāḥ pratīkṣanto rāmamadbhutavikramam // १ ९//
dadṛśuśca mahābhāgaṃ varacāpadharaṃ tadā //
mṛtyorbhujamivodagraṃ lokākarṣaṇatatparama /

dīptāṃśujālaṃ raṇacaṇḍavegaṃ dhanurdharaṃ kālabhujaprakāśam //
mahānubhāvaṃ samareṣvajeyaṃ lelihyamānaṃ bhujagendrabāhum

iti śrīviṣṇudharmottare prathamakhaṇḍe mā० saṃ० varuṇādidarśanaṃ nāmaikonasaptatitamo'dhyāyaḥ