Vishnudharmottara Purana · Chapter 1.71

// vajra uvāca /// //
yatsa śuśrāva dharmātmā varuṇādbhṛgunandana //
tanmamācakṣva tattvena paraṃ kautūhalaṃ hi me

mārkaṇḍeya uvāca //
jamadagnisuto rāmo varuṇasya gṛhoṣitaḥ //
kadācidvaruṇaṃ devamidaṃ vacanamabravīt

/
rāma uvāca //
namaste devadeveśa surāsuragaṇārcita //
gobrāhmaṇahitāsakta yādogaṇajaleśvara

tvaṃ tasya devadevasya viṣṇoramitatejasaḥ //
ayanamṛṣibhiryena viṣṇurnārāyaṇaḥ smṛtaḥ

tvamevedaṃ jagatsarvaṃ sthāvaraṃ jaṅgamañca yat //
brahmā viṣṇuśca rudraśca tvaccharīre samāśritāḥ

tvamindrastvaṃ ca dhanadastvamīśastvaṃ samīraṇaḥ //
tvamagnistvaṃ yamaścaiva sarvādhārastvamacyutaḥ

devānāmīśvaraścaiva nāgānāmīśvarastathā //
sāgarāṇāṃ ca sarasāṃ saritāṃ ca mahābhuja

kūpavāpītaṭākānāṃ śaucasya paramasya ca //
viṣṇorvāmasya netrasya śaśāṅkasya mahātmanaḥ

tvanmayaṃ maṇḍalaṃ deva tvanmayāssarvatārakāḥ //
tvameva saritāṃ nāthassamudro yādasāṃ patiḥ

ādhārassarvaratnānāṃ vidyānāṃ ca jagatpate //
tvanmayo dehināṃ prāṇo jīvo rudhirasaṃjñakaḥ

rāmastvaṃ prāṇināṃ deva sarvadevamayo vibhuḥ //
bhavatā saṃyatā pāśairdānavā deva dāruṇaiḥ

pātāladvāramāśritya bhavāṃstiṣṭhati nirbhayaḥ //
merupṛṣṭhe ca bhagavanpurī te devanirmitā

tṛtīyā ca mahābhāga mānasottaramūrdhani //
puratraye tvaṃ vasasi prākāmyena jaleśvara

sarvatra pūjyase devaissarvabhūtabhavodbhava //
ādhārastvaṃ hi tapasāṃ śaucānāṃ bhuvanasya ca

trailokyaṃ sakalaṃ deva prakṛtirvikṛtiśca te//
mamāpi sumahābhāga prasādasumukho hyasi

tasmānme bhagavaṃśchindhi saṃśayānmanasi sthitān //
varuṇa uvāca //
yatrāsti te saṃśayamastradhāriñchettāsmi te tatra na saṃśayo'tra //
yathā mameśastripurāntako'sau tathā bhavānme raṇacaṇḍavega// /

iti śrīviṣṇudharmottare prathamakhaṇḍe mā०saṃ० śrīparaśurāmavaruṇakṛtastotro nāmaikasaptatitamo'dhyāyaḥ