Vishnudharmottara Purana · Chapter 1.68

mārkaṇḍeya uvāca // //
evamuktastadā rāmo devadevena śambhunā //
praṇamya śirasā devaṃ pārvatīṃ varadāṃ tathā

pramathaiśca pariṣvaktassotkaṇṭhenāntarātmanā //
jagāmāśramamuddiśya pituḥ parabalārdanaḥ

so'cireṇaiva saṃprāpya dadarśāśramamaṇḍale //
vayovṛddhaṃ tapovṛddhaṃ pitaraṃ dīptatejasam

so'bhivādya pituḥ pādau mātuśca paravīrahā //
bhrātṝṇāmānupūrvyeṇa dharmanityo jitendriyaḥ //

taiśca mūrdhanyupāghrātaḥ sāntvitassa mahātapāḥ //
sa matprasādaṃ pṛṣṭaścetyuktvā sarvamaśeṣataḥ

ākhyātavām̐stataḥ paścātpātālagamanaṃ tadā //
āsannaṃ devakāryaṃ ca cāparatnaṃ ca vaiṣṇavam

jamadagnirmahātejāḥ śrutvā rāmavacastadā //
cāparatnaṃ ca rāmāya pradadau devapūjitam

dattvovāca sa taṃ rāmaṃ hutāśanasamaprabham //
paścimena samudreṇa praviśya varuṇālayam

saṃpūjya varuṇaṃ rāmastasyaivānumate tadā//
śakraśatrūndurācārānpātālanilayañjahi //
anena cāparatnena vaiṣṇavena mahābala //
daiteyānsamare hatvā gatvā ca varuṇālayam

praṣṭavyo varuṇo devastvayā dharmānsanātanān //
sa putra varuṇāddharmāñchrutvā rāma yathāvidhi

āgacchethā yathākālaṃ matsamīpaṃ mahābhuja //
evamuktastadā rāmaḥ pitrā dharmabhṛtāṃ varaḥ

pitaraṃ mātaraṃ bhrātṝnabhivādya yathāvidhi //
jagāma varuṇāvāsaṃ rāmo vaiśvānaradyutiḥ

sa praviśya samudreṇa mahādevaprasādataḥ //
tato'śma nagaraṃ rāmo dadarśa puramuttamam

mano'bhirāmaṃ sphaṭikāśmacitraṃ turaṅganāgendrakulākulaṃ ca //
vibhūṣitaṃ pannagadaityanāthairudyānavāpīśata saṃkulaṃ ca

iti śrīviṣṇudharmottare prathamakhaṇḍe mā०saṃ० rāmasyāśmanagaradarśanaṃ nāmāṣṭaṣaṣṭitamo'dhyāyaḥ