વિષ્ણુધર્મોત્તરપુરાણમ્ · અધ્યાય 1.69

॥ માર્કણ્ડેય ઉવાચ ॥
તસ્મિન્પુરવરે રમ્યે રત્નચિત્રસભાગતમ્ ॥
રત્નાસનગતં વીરં ચારુકુણ્ડલલોચનમ્

સ્નિગ્ધવૈડૂર્યસંકાશં શુક્લામ્બરવિભૂષિતમ્ ॥
હારભારાર્પિતતનું ચારુકેસરધારિણમ્

પ્રવાલમણિમુક્તાઢ્યં ગમ્ભીરં ભુજગાશ્રયમ્ ॥
કિરીટોત્તંસસંછન્નં યાદોગણસમાશ્રયમ્

આદિત્યમુદકાવાસમંભસાં પતિમૂર્જિતમ્ ॥
લોકનાથં મહદ્ભૂતં ભક્તાનામભયપ્રદમ્

વિષ્ણોર્ભાગં વિશાલાંસં વિશાલાક્ષં મહાભુજમ્ ॥
સેવ્યમાનં મહાભાગૈસ્ત્રિદશૈર્બ્રાહ્મણૈસ્તથા

દૈતેયૈશ્ચ મહાભાગૈર્ભીમૈર્ભીમપરાક્રમૈઃ ॥
સુન્દોપસુન્દશક્રાક્ષશમ્બરામરકણ્ટકૈઃ

હયગ્રીવમહાગ્રીવદશગ્રીવસુરાન્તકૈઃ ॥
ભીમભીમાક્ષનરકવિકટોત્કટમારણૈઃ

અતિકાયમહાકાયભીમકાયબલોદ્ધતૈઃ ॥
નાગૈશ્ચ સુમહાકાયૈર્મહાભોગૈર્જગદ્ધિતૈઃ

નાગરાજ્ઞા વાસુકિના શઙ્ખેન કુરુણા તથા ॥
( મહાપદ્મેન પદ્મેન કર્કોટકધનંજયૈઃ

ઐરાવતેન નાગેન તક્ષકેણ બલેન ચ ॥
કંબલાશ્વતરાભ્યાં ચ હ્યાર્યકેણ મહાત્મના

)
બાલવ્યજનહસ્તાસ્તમુપવીજન્તિ નિમ્નગાઃ ॥
ગઙ્ગા ચ સરયૂ રાજન્ વિતસ્તા યમુના તથા

ઇરાવતી ચન્દ્રભાગા નર્મદા ચ મહાનદી ॥
પયોષ્ણી બ્રાહ્મણી ગૌરી વિપાશા દેવિકા તથા

શતદ્રુઃ કમ્પના સિન્ધુસ્તથા ચાન્યાસ્સહસ્રશઃ ॥
સેવ્યમાનસ્તથા કૂપૈસ્તડાગૈશ્ચ સવિગ્રહૈઃ

સરોવરૈસ્સાગરૈશ્ચ સમુદ્રૈશ્ચ યદૂત્તમ ॥
તં દૃષ્ટ્વા વરુણં રાજન્સ વવન્દે ભૃગૂત્તમઃ

પૂજયામાસ ચ તથા વરુણોઽપિ ભૃગૂત્તમમ્ ॥
પાદ્યાર્ઘ્યાચમનીયાદ્યૈરાસનેનોદકેન ચ

આસીનશ્ચ તદા રામો દૈતેયાનાં વધે વૃતઃ ॥
મહાદેવવચસ્સર્વં વરુણાય ન્યવેદયત

સ ચ તેનાભ્યનુજ્ઞાતો યયૌ દૈત્યપુરં મહત્ ॥
વરુણોઽપિ મહાતેજા રામવાક્યેન યાદવ

સંવાદયામાસ તદા રામં રણકૃતક્ષણમ્ ॥
તદા વરુણદૂતેભ્યો દૈતેયાઃ શ્રુતવિસ્તરાઃ

નિષ્ક્રમ્ય નગરાદ્રાજઁશ્ચતુરઙ્ગબલાન્વિતાઃ ॥
સુસન્નદ્ધાઃ પ્રતીક્ષન્તો રામમદ્ભુતવિક્રમમ્ ॥ ૧ ૯॥
દદૃશુશ્ચ મહાભાગં વરચાપધરં તદા ॥
મૃત્યોર્ભુજમિવોદગ્રં લોકાકર્ષણતત્પરમ ।

દીપ્તાંશુજાલં રણચણ્ડવેગં ધનુર્ધરં કાલભુજપ્રકાશમ્ ॥
મહાનુભાવં સમરેષ્વજેયં લેલિહ્યમાનં ભુજગેન્દ્રબાહુમ્

ઇતિ શ્રીવિષ્ણુધર્મોત્તરે પ્રથમખણ્ડે મા૦ સં૦ વરુણાદિદર્શનં નામૈકોનસપ્તતિતમોઽધ્યાયઃ