Vishnudharmottara Purana · Chapter 1.67

rāma uvāca ///
vaiṣṇavaṃ cāparatnaṃ tatkimarthaṃ bhavatā kare //
nyastaṃ ca tanme bhagavaṃścāparatnaṃ ca kīdṛśam

śaṅkara uvāca //
māyā hi vaiṣṇavī rāma yayā saṃmohitāḥ purā //
devāśca ṛṣayaścaiva gatvāntaḥ praṇatāḥ sthitā

yajatāṃ paramādhāraṃ devaṃ kamalasaṃbhavam //
bhūtabhavyabhaviṣyasya prabhuṃ lokanamaskṛtaḥ //

devā ūcuḥ //
vāsudevasya devasya mahādevasya cāpyatha //
antaraṃ jñātumicchāmaḥ kaḥ kasmādatiricyate

śaṅkara uvāca //
evamuktassuraiḥ sarvairṛṣibhiśca pitāmahaiḥ //
vihasyovāca tānsarvāṃstayorgatvā parasparam

brahmovāca //
janayadhvaṃ surāḥ sarve virodhamṛṣibhissaha //
virodhe tu samutpanne tayoryuddhaṃ upasthite

jñāsyadhvamantaraṃ devāstayornāstyatra saṃśayaḥ //
śaṅkara uvāca //
evamuktāḥ surāḥ sarve sārdhamṛṣigaṇaistadā

āvayorjanayāmāsurvirodhaṃ bhṛgunandana //
viṣṇorādhikyamanvicchaṃstasya māyāvimohitāḥ

kṛtavānasmi daivena deva vākyena vigraham //
prabhāvadarśanārthāya tvāvayorvigrahe tadā

āsannamabhavadyuddhaṃ sarvasattvabhayaṅkaram //
āvayorbhṛguśārdūla tadā yuddhe upasthite

ājagāmātha taṃ deśaṃ brahmā śubhacaturmukhaḥ //
devā brahmarṣayaścaiva tathā rājarṣayo'malāḥ //१ १ //
sarveṣāṃ samavetānāmāvayoryuddhasaṃgare //
uvāca vacanaṃ brahmā sarvalokanamaskṛtaḥ

brahmovāca //
na kartavyaṃ jagannāthau yuddhaṃ paramadāruṇam //
yuṣmadyuddhena sakalaṃ naśyatīdaṃ jagattrayam

gṛhītaṃ cāparatnaṃ yatsvayaṃ devena cakriṇā //
tadāropayatāṃ śūlī śūlicāpaṃ janārdanaḥ

jñāsyāmi cāntaraṃ devau cāpāropaṇakarmaṇā //
śaṅkara uvāca //
evamukte mama karāddhanurjagrāha keśavaḥ //
āropituṃ na me śaktiḥ sarvayatnena cābhavat

tataśca gatamohena mayā jñāto maheśvaraḥ //
jñātvā visṛṣṭacāpena stutaśca bhagavāṃstadā

namo'stu te devavarāprameya namo'stu te sarvaguṇāntarāya //
namo'stu te devagaṇārcitāya namo'stu te sarvaguṇottarāya

unmeṣamātreṇa tavāprameya dinaṃ samagraṃ prapitāmahasya //
nimeṣamātreṇa niśā pradiṣṭā yasyāṃ samādāya jagatsa śete

na kāraṇaṃ vedmi taveśa sṛṣṭau saṃhārakāryaṃ ca tathā na vedmi //
ādyaṃ na madhyaṃ na tathaiva cāntaṃ tvameka īśaḥ puruṣaḥ purāṇaḥ

sarveṣu bhūteṣu tathā sthitastvaṃ sarvāṇi bhūtāni tathā taveśa //
bhūtāntarastho'pi na bhūtasaṃstha āścaryametanmama devadeva

bhūtāntarasthopi na bhūtanāthaḥ bhūtārjitaiḥ karmabhirāpyase tvam //
karmāṇi sarvāṇi jagattrayasya dharme sadā yanmahadadbhutaṃ tat

gandhaḥ pṛthivyāṃ ca raso'psu deva vāyau yathā sparśaguṇastvadīyaḥ //
rūpaṃ tathāgnau gagane ca śabdo guṇā samagrāstava bhūtasaṃghe

manogatastvaṃ ca tathā vitarko buddhau gatastvaṃ ca viniścayo'tra //
cidrūpamātmanyatha devadeva avyaktasaṃsthasya guṇatrayastvam

tvameva bhūtāni ca tadguṇāśca mūrtervibhinnosi na bhūtabhinnaḥ //
tattvāni sarvāṇi ca tadvyatītaḥ tvameva devaḥ puruṣaḥ pradiṣṭaḥ

tavecchayā syātsakalā trilokī tavecchayā deva tathā vinaśyet //
itthaṃvidhasyānagha karmaṇaste stutiḥ kathaṃ syātparamasya dhāmnaḥ

evaṃ stuto devavaro mayāsāvuvāca māṃ devagaṇasya madhye //
yo'haṃ sa devaḥ parameśvarastvaṃ yo'haṃ sa devaḥ prapitāmahaśca

āśritya mūrtitritayaṃ mayedaṃ karmatrayaṃ śaṅkara sādhyate vai //
utpattināśau paripālanaṃ ca kālatraye śaṅkara devakāryāt

mūrtirmamogrā jagatāṃ taveyaṃ saṃhārakāryārthamudīrṇadarpā //
tprabhurbhavaḥ kāraṇakāraṇānāṃ pūjyaśca sarveśvara sarvadevaiḥ

ye tvāṃ namasyanti jagatpradhānaṃ bhaktiṃ parā ye ca vahanti tubhyam //
bhaktyā ca nityaṃ tava pūjayanti sthānaṃ hi teṣāṃ sulabhaṃ madīyam

madīyametadbhuvi cāparatvaṃ pradīyatāṃ bhārgavanandanāya //
ṛcīkaputrāya guṇādhikāya tasmātsamādāsyati tasya putraḥ

sa tena cāpena nihatya śatrūnkṛtvā ca laghvīṃ vasudhāṃ sureśa //
taccāparatnaṃ bhuvi rāghavāya pradāsyate rāma iti śrutāya

kṛtvā sa rāmopi hi tena karma pradāsyate tadvaruṇāya cāpam //
tasmātsamādāsyati phālguno'pi devārthakāryaikaratirmahātmā

svaṃ cāparatnaṃ janakāya dehi nimītināmnā bhuvi śabditāya //
tenāpi cāpena sa tatprasūto rājā mahatkarma kariṣyatīti

...duktvā bhagavānmahātmā jagāma kāṣṭhāṃ manasastvabhīṣṭām //
mayā tathā te bhuvi cāparatne dvijapradhāna kṣitipeṣu datte

yadvaipṇavaṃ cāpavaraṃ pituste nyastaṃ kare vāsukitulyarūpam //
taddevakāryeṇa vinā na śakyaṃ kenāpyadhijya yudhi rāma kartum

ajñātavasturacitaṃ surakāryadakṣaṃ govindabāhuviṭapāśrayalabdhamānam //
nyastaṃ purā pitṛkare tava yuddhaśauṇḍa cetthaṃ mayā harivacaḥ prasamīkṣya rāma

iti śrīviṣṇudharmottare prathamakhaṇḍe mā०saṃ० vaiṣṇavadhanuḥprādurbhāvo nāma saptaṣaṣṭitamo'dhyāyaḥ