વિષ્ણુધર્મોત્તરપુરાણમ્ · અધ્યાય 1.68

માર્કણ્ડેય ઉવાચ ॥ ॥
એવમુક્તસ્તદા રામો દેવદેવેન શમ્ભુના ॥
પ્રણમ્ય શિરસા દેવં પાર્વતીં વરદાં તથા

પ્રમથૈશ્ચ પરિષ્વક્તસ્સોત્કણ્ઠેનાન્તરાત્મના ॥
જગામાશ્રમમુદ્દિશ્ય પિતુઃ પરબલાર્દનઃ

સોઽચિરેણૈવ સંપ્રાપ્ય દદર્શાશ્રમમણ્ડલે ॥
વયોવૃદ્ધં તપોવૃદ્ધં પિતરં દીપ્તતેજસમ્

સોઽભિવાદ્ય પિતુઃ પાદૌ માતુશ્ચ પરવીરહા ॥
ભ્રાતૄણામાનુપૂર્વ્યેણ ધર્મનિત્યો જિતેન્દ્રિયઃ ॥

તૈશ્ચ મૂર્ધન્યુપાઘ્રાતઃ સાન્ત્વિતસ્સ મહાતપાઃ ॥
સ મત્પ્રસાદં પૃષ્ટશ્ચેત્યુક્ત્વા સર્વમશેષતઃ

આખ્યાતવાઁસ્તતઃ પશ્ચાત્પાતાલગમનં તદા ॥
આસન્નં દેવકાર્યં ચ ચાપરત્નં ચ વૈષ્ણવમ્

જમદગ્નિર્મહાતેજાઃ શ્રુત્વા રામવચસ્તદા ॥
ચાપરત્નં ચ રામાય પ્રદદૌ દેવપૂજિતમ્

દત્ત્વોવાચ સ તં રામં હુતાશનસમપ્રભમ્ ॥
પશ્ચિમેન સમુદ્રેણ પ્રવિશ્ય વરુણાલયમ્

સંપૂજ્ય વરુણં રામસ્તસ્યૈવાનુમતે તદા॥
શક્રશત્રૂન્દુરાચારાન્પાતાલનિલયઞ્જહિ ॥
અનેન ચાપરત્નેન વૈષ્ણવેન મહાબલ ॥
દૈતેયાન્સમરે હત્વા ગત્વા ચ વરુણાલયમ્

પ્રષ્ટવ્યો વરુણો દેવસ્ત્વયા ધર્માન્સનાતનાન્ ॥
સ પુત્ર વરુણાદ્ધર્માઞ્છ્રુત્વા રામ યથાવિધિ

આગચ્છેથા યથાકાલં મત્સમીપં મહાભુજ ॥
એવમુક્તસ્તદા રામઃ પિત્રા ધર્મભૃતાં વરઃ

પિતરં માતરં ભ્રાતૄનભિવાદ્ય યથાવિધિ ॥
જગામ વરુણાવાસં રામો વૈશ્વાનરદ્યુતિઃ

સ પ્રવિશ્ય સમુદ્રેણ મહાદેવપ્રસાદતઃ ॥
તતોઽશ્મ નગરં રામો દદર્શ પુરમુત્તમમ્

મનોઽભિરામં સ્ફટિકાશ્મચિત્રં તુરઙ્ગનાગેન્દ્રકુલાકુલં ચ ॥
વિભૂષિતં પન્નગદૈત્યનાથૈરુદ્યાનવાપીશત સંકુલં ચ

ઇતિ શ્રીવિષ્ણુધર્મોત્તરે પ્રથમખણ્ડે મા૦સં૦ રામસ્યાશ્મનગરદર્શનં નામાષ્ટષષ્ટિતમોઽધ્યાયઃ